१ तिमोथी 6 - जिरेलयोक्पो योङमुकी चुक खिता फाप्कीते 1 थेमे येशूला विश्वास खित्कान्ते मिओन नाङ योक्पो योङमु गाङेकी खोपरोङ मालिकओनगी साबाते ङेन्ला थेबाला मान खिता फाप्क्यो। थेबेकी थोक माक्याबाते ज्येनगी थोङसीन परमेश्वर विरोध खिओ थेमे ङुरूङगी लोप्कीन ओताते बात लेमु मेन सिओ। 2 थेबे मालिकतेबाङ येशू ख्रीष्टला विश्वास खित्कान्ते ईन्सीन थानी आज्यो न्वाराङ ईन सिराच्योक खाला मालिकतेबाला मान खिता तोङा मेङगो। बरू मालिकओनलाङ परमेश्वरगी ङिङज्ये खिओ, थेबाङ येशू ख्रीष्टला विश्वास खित्कान ईन साला थेबाला लेमु ओङस्यीत सिन झन लेमु खाला काम खिता फाप्क्यो। ङे साबाते दि बाततेबा गाङे चुक खिता फाप्कीते सिन खुई गाङेला लाप्ला कोत्ला बिन। पैसे लोभकी खित्सादु मिकी चुक चुक खिते 3 थेमे सुइँदेकी ङे लापाच्योक मेन्गीन खुदुकराङ बात लाप्ला ङुरूङ प्रभु येशू ख्रीष्ट सत्यते बातताङ मिडिक्च्येते बात लाप्सीन थेमे परमेश्वरला चुक खाला माने खिता फाप्कीते सिन लापा ओताच्योक खाईन मालाप्सुङ सासीन 4 थोक्ते मिओनगी गाङे बात छ्या ओताच्योक खाईन छ्ये खासीनोङ थेबेकीनी च्यि बात चुक ईन्दे सिन छ्याःङ खोबा मेङगो। थेबेकीचेन टेकाटेउरी स्योरच्येते छ्याःङ काम लै मिक्किच्येते बातकामा देन्दा चाल्ला होथोक्ते बातकामा छोल्गीन ख्याम्ग्यो। थोक्ते बात खित्जीन खालि स्येदाङ लाङच्येते, डिक्ला थुन्ला देता मुथुप्च्येते, मि मोत्च्येते, शंका खाला ईनराङ मेन्दे दोष लै खित्च्येते 5 थेमे जहिलेङ थोम्मुकामा खिन देत्च्येते ओङगो। थेबे सेम मेलेबा ओतेकी सत्यते बात थेबाला छ्याःङ काम लै मिक्किओ। थेबेकी परमेश्वरला माने खित्च्येतेचेन सम्पत्ति ज्वा थुप्क्यो सिनकामा ईन। 6 ईन्दानी परमेश्वरला माने खानामेई लेमु मेङच्येते मेन। थेला माने खित्जीन चुक खाला सम्पत्ति ज्वा थुबोङा सिराच्योक मिक्किता खाला आउदी गा खिन देता थुप्क्यो। 7 केजीन ङुरूङगी लाःक्तु छ्याःङ खुरगीन मावा, थोकराङ खाला स्यिजीनोङ छ्याःङ खुरला डोच्येते मेन। 8 साप थुङाताङ खोन्दाला दाङच्या ओङसीन ङुरूङ सन्तो खाला देता थुप्क्यो। 9 छ्युक्पु ड्वा छोल्कान्ते मिओनलाचेन झन झन पैसे लोभ लाला तोर्बाकला फाप्लु खाला मेलेबा ओङगो। पैसे लोभकी खित्सादु थोक्ते मिओनगीचेन लेम्बा च्योक खाला आउदी मेलेबातेन्दे काम खाला खोपरोङ स्यूक्च्येते डालुम खोपरोङगीराङ ठुइओ। 10 च्यिला सासीन पैसे लोभकी खित्सादुराङ मिकी जेसुकै मेलेबा काम खित्च्येते ईन। पैसे लोभला स्यूकीन कोई कोईकी येशू ख्रीष्टला विश्वास खाईन ङेन्दाते बात ङेन्दा ताङला दुक। थोक खाबेकी खित्सादु थेबा हत्तेरिका ङे च्यिला थोक खाताका सिराच्योक गाल्गीन थेबे सेम पीरताङ तापकी छोला दुक। पावलगी चिट्ठी टिला सिन्दे खाला साबाते बात 11 तर खोचेन परमेश्वरगी खि साबाते काम खित्कान्ते मि ईन। थोगी खुई थोक्ते मेलेबा काम छ्याःङ माकेत। खुईचेन परमेश्वरगी खि साबा च्योकराङ खिन देत, थेला चुक खाला माने खिता फाप्च्येते ईन्दे थोकराङ खाला माने खि, येशू ख्रीष्टला विश्वास खिन देत। दोस्यिककामा मेन, ज्येनला ङिङज्ये खि, दुक्पा ओङसीनोङ खपे खिन देत थेमे गाङेताङ खा छ्येत लेमु खि। खुई होदोक दोक खित्च्ये छ्य्वापाकामा सेम लै खि। 12 येशू ख्रीष्टला विश्वास खाईन ङेन्दाते बात ङेन्दा मोतोङा खाला जति दुक्पा ओङसीनोङ थे बातला साबा च्योकराङ खि। नोमुङ मिसिन्च्येते जुनी ङेत्स्यीत सिन परमेश्वरगी खोल्ला थे खोरोङ दोन्दु स्योक सिन काताङाते ईन मेन? थेजीन खुई मि काल्बेई ङोन्दु ङा प्रभु येशू ख्रीष्टला विश्वास खिओ सिनोङ साबा ओत। था थे नोमुङ मिसिन्च्येते जुनी खुई खोरोङ लाःक्तुकी स्योर माज्युत। 13 थेमे ओताते जति गाङेला ङेपाक तेरकान्ते परमेश्वर थेमे रोमी गेल्बो हाकिम पन्तियस पिलातस दोन्दु साँचोते बात लाःप्कान्ते येशू ख्रीष्ट ङोन्दु ङा खोल्ला दोक दोक खि सिन कोत्क्यो। 14 च्यि सासीन प्रभु येशू ख्रीष्ट स्वर्गनेकी ग्युरला ओङ ओङसाकराङ ङे खोल्ला खि साबाते दि बाततेबा दोक्पोईओङ मोतोङा खाला गाङे खिन देत। खुई दोक माक्यासुङ सिन सुङगीङ सिरा मेङेत्स्यीत। 15 परमेश्वरगी तोके खाबे बेलालाराङ प्रभु येशू ख्रीष्ट ग्युरला ओङगो। परमेश्वरचेन जेसुकै ओत्कान्ते ईन। सा नाम खाङ गाङेपा राज्य खित्कान्ते थेकामा ईन। थे गेल्बोओनतेङ गेल्बो थेमे गाङे छ्येतेबेतेङ छ्येते ईन। 16 थेकामा नोमुङ मिस्यिओ। थे सुङ दोन्दु ड्वा मुथुप्च्ये नाम्दाकला देत्क्यो। थेला सुङगीङ थोङा मेत, सुङगीङ थोङाङ मुथुबो। दोक छ्येते परमेश्वरला गाङेकी मान खिनराङ देत्स्यीत। थेकी गाङेपा गाङेला राज्य खिनराङ देत्स्यीत। आमेन। 17 थेमे थरिङोला छ्युक्पु ओताते मिओनला दोक सिन कोत। थेबाला छ्ये माकेत सि, सम्पत्ति ओत्कीन ओत सिन ढुक्क खाला मादेत सि। थोक्ते सम्पत्तिनी नामसाक दाक्पोन लाःक्तु देत्कीते सिन छ्याःङ छ्या मेङगो। बरू थेबाला परमेश्वरला भर परे खिता लोप सिन सि। थेकीराङ ङुरूङला गोच्येतेबरी दाङच्या ख्योप्च्या खाला बिन्ला गा खिन देत ज्युत्क्यो। 18 थेबाला सम्पत्ति सोक्पा साटोला ज्येनलाङ ता फाप्क्यो सिन खोपरोङ सम्पत्ति ज्येनताङ गोला सो सि। दोक खिन लेमुते कामकामा खि सि। 19 थोक खित्च्येतेराङ थेबे लाईदु स्वर्गने जम्मा ओङगीन डोच्येते सम्पत्ति ईन। दि सम्पत्ति ओत्नामेई तिरी थेबाला लेमु ओङला नोमुङ मिसिन्च्येते जुनी ङेत्क्यो। 20 लो तिमोथी, परमेश्वरगी खोरोङला जिम्मा बिन्दाते काम खि साबा च्योकराङ खाला खिन देत। परमेश्वर बातताङ डिकराङ मिडिक्च्येते कामराङ लै मिक्किच्येते बातला नामज्योक मासेत। च्यि बात चुक ईन्दे सिन लेमु खाईन छ्या स्येबा ओताच्योक खाला सत्यते बात ईन सिन मेन्दे बात लोप्कान्ते मि बात नोमुङ माङेन। 21 कोई कोईकी होथोक्ते बात खिताला स्यूकीन येशू ख्रीष्टला विश्वास खाईन ङेन्दाते बातराङ ङेन्दा ताङगीन सिन्दा ओत। प्रभु येशू ख्रीष्टकी ख्योकोनला दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.