१ तिमोथी 5 - जिरेल1 थेमे था चुक सासीन गान्दाते मिओनगी खइँदा गल्ती खासीन थेबाला कस्स्ये खाला माङार। बरू खोरोङ आबाला च्योकराङ मान खाला थेबेकी थोक खाबाते लेमु मेन सिन खोले खोले खाला सम्झे खाला बिन। थेमे स्यारातेबाला लाःपा कोता फाप्सीन खोरोङ आज्यो न्वाला च्योकराङ खाला लाःप्ला कोत्ला बिन। 2 थोकराङ खाला गाम्माते मिओनला खइँदा बात मायाङसुङ सिरा फाप्सीन खोरोङ आमाला च्योकराङ मान खाला सम्झे खाला बिन। थेमे स्यार्मुतेबाला थोक खिता फाप्सीनचेन सेमदु छ्याःङ मेलेबा विचार मिक्किता खाला थेबाला खोरोङ आज्यी नुमु छेतराङ ठाने खाला लाःप्ला कोत्ला बिन। ख्योबो स्याप्ते फेम्मे मिओनला चुक खिता फाप्कीते 3 थेमे ख्योबो स्यिइन दुक्पा ङेताते फेम्मे मिओनला चुक खाला ता फाप्कीते थोकराङ खाला ताला मान खि। 4 थोक्ते मिते फुज्युङ फुमु कि नाता नातिनी ओत्सीन होथेबेकीराङ खोपरोङ गोम्मु कि आमाला ताच्येते खोपरोङ काम ईन सिन लेमु खाला ता फाप्क्यो। थेबेकी थोक खाईन ताबाते खोपरोङ आबा आमे गुन च्यालाते ईन। दोक खाबाते परमेश्वरला गा लाङगो। 5 ख्योबो स्यिइन ताकान सुङ मेत्कीन पक्काराङ दुक्पा ङेताते फेम्मे मिचेन परमेश्वरगी थे मोरोङला तेइओ सिन ङीन नुप थेत्ताङ प्रार्थना खिन देत्क्यो। 6 तर जो ख्योबो स्याप्ते फेम्मे मि खालि मोज मज्जा खिन दाक्पोन खुशीला ख्याम्गीदुक थेचेन सोम्बो ओत्सीनोङ परमेश्वर लाईदु स्याप्ते छेतराङ ईन। 7 सुङगीङ दिबेकी दि दि गल्ती खासुङ सिन सिरा मेङेत्स्यीत सिन थेरू येशू ख्रीष्ट मिओनला दि गाङे बात ङेन सिन लाःप्ला बिन। 8 दाक्पोन मिला थे लाक्तुङ दाक्पोन खाम्बे मिला माताकान्ते मिकीचेन येशू ख्रीष्टला विश्वास खित्जीन ङेन्दाते बात ङेन्दा ताङाते ईन। थोक्ते मिचेन येशू ख्रीष्टला विश्वास खाबा मेताते मि भन्दाङ मेलेबा ईन। 9 थेमे ख्योबो स्याप्ते फेम्मे मिओनते गन्तीला मिन टिक्जीन खालि दोक्तेबे मिनकामा टि। चुक सासीन थेबा लो खाल सुम छाङगीन सिन्दाते ओङा फाप्क्यो। थेमे थेबा थे मोरोङ ख्योबोताङकामा देताते ओङा फाप्क्यो। 10 दोस्यिककामा मेन, थेबाचेन लेमु कामगी लाईदु मिन चले खाबाते मि ओङा फाप्क्यो। थोक साबाते च्यि सासीन फुज्युङ फुमुला लेमु खाईन हुर्के खाबाते, खाम्बादु वाबाते मिला लेमु खित्कान्ते, परमेश्वर सन्तानओन खाम्बादु ओङजीन काम्बा टुला तेरकान्ते, दुक्पा ओताते मिओनला ताकान्ते थेमे ज्येनोङ होदोक्ते लेमुते काम खित्च्ये छ्य्वापा स्येत खिन देताते फेम्मे मि ओङा फाप्क्यो। 11 ख्योबो स्याप्ते ईन्सीनोङ उमेर गाला मेताते फेम्मे मिओनतेचेन सुङगीतेङ गन्तीला मिन माटिक। च्यिला सासीन थोक्ते फेम्मे मिला तिरी ङालानी ख्योबो मेताला ओङराङ मेङगो सिराच्योक लाला लोक्ला दाक ख्योबोताङ ड्वा थुप्क्यो। थोक खासीन गन्तीला मिन टिक्जीन था ङा फाङमा मिक्किता खाला देत्ला काम खिओ सिन खोपरोङगी ख्रीष्टताङ खाबाते जमान खाबाच्योक मिक्किओ। 12 खोपरोङगी जमान खाबाच्योक माक्यानामेई थेबेकी सजाय ङेत्क्यो। 13 दोस्यिककामा मेन, थेबे मिन गन्तीला टिसीन थेबा अल्छी ड्वा थुप्क्यो। थेमे थाराङ मि खाम्बा खाम्बाला युला ख्याम्ग्यो। थेबा अल्छी डोच्येतेकामा मेन, मि बात खिन ख्याम्ग्यो। थेमे मि काम ङ्ये ज्युत्च्येतेताङ खोपरोङला चासोराङ मेताते बात खिन ख्याम्ग्यो। 14 थेबेकी थोक खिन माख्याम्स्यीत सिन ङा च्यि सिते सासीन थोरूमोङ उमेर ओताते ख्योबो स्याप्ते फेम्मे मिओनगीचेन बरू याङराङ फाङमा खासीन लेमु ईन। थोक खाला थेबेते फुज्युङ फुमु ओङला थेबेकी खाम्बा खाला सारस्यीत। थोक खासीन येशू ख्रीष्ट मिओनला विरोध खित्कान्ते मिओनगी बात खित्च्येते लाम छ्याःङ मेङेदो। 15 थोक्ते फेम्मे मि नाङ कोई कोई येशू ख्रीष्टला विश्वास खिता ताङगीन शैतान छ्य्वापा लै खाबेकी खित्सादु ङे दि बात साबाते ईन। 16 येशू ख्रीष्टला विश्वास खित्कान्ते सुइँदा फेम्मे मिते दाक्पोनते फाप्च्येते ख्योबो स्याप्ते फेम्मे मि सुइँदा ओत्सीन थेकीराङ थेबाला ता फाप्क्यो। थोक खासीन ख्योबो स्याप्ते फेम्मे मि गाङेला येशू ख्रीष्ट मिओनगीकामा ता माफाप्ला थेबेते दाक्पोनते सिराते सुङ मेत्कीन दुक्पा ङेताते फेम्मे मिओनला लेमु खाला ता थुप्क्यो। येशू ख्रीष्ट मिओनला ताकान्ते मिओन बात 17 थेमे येशू ख्रीष्ट मिओनला ताकान्तेबे नाङ खोपरोङ काम लेमु खाला खित्कान्ते मिओनला आउदी खाला मान खिता फाप्क्यो। थेबे नाङोङ गा लाङच्येते बात च्यि ईन्दे सिन लोप्कान्तेबालाचेन झन मान खिता फाप्क्यो। थेमे थेबा गाङेला गोच्येतेङ तेरा फाप्क्यो। 18 च्यिला सासीन परमेश्वर बातला “दाइँ खित्कान्ते लाङला खाम्तोर माकोन,” सिन साबा ओत। लोक्ला “काम खित्कान्ते मिकी थे खोरोङ निमेक ङेता फाप्क्यो,” सिनोङ साबा ओत। 19 थेमे सुइँदेकी वाकीन च्याकीन येशू ख्रीष्ट मिओनला ताकान्तेबे नाङ फलानेकी दोक दोक गल्ती खासुङ सिन सासीन थे बात माङेन। फलानेकी दोक दोक गल्ती खाबाते ङेराङ थोङाते ईन सिन मेरा ङि सुमगी सानामेईकामा थोक्ते बात ङेन। 20 थेबेकी साबाते बात साँचो ईन्सीन थे गल्ती खित्कान्ते मिला थोक खिता मेङगो सिन ज्येनतेबा गाङे दोन्दु थोप। थोक खानामेकी थोक्ते काम खिता मेङच्याक्वा सिन ज्येनतेबा गाङे ज्यीबा खिओ। 21 ङे खि साबाते दोक्ते काम खित्जीन खुई छ्ये टेक्टे मेडेला खाला सुङलाङ काका पाका मिक्किता खाला खि। परमेश्वरताङ येशू ख्रीष्ट थेमे परमेश्वरगी छाने खाबाते दूतओन ङोन्दु ङा खोल्ला दोक खि सिन कोत्क्यो। 22 थेमे होत्ताराङ सुइँदे लाक्तु लाक्पा ज्याक्ला येशू ख्रीष्ट मिओनला ताच्येते कामगी जिम्मा मातेर। सु मि चुक्ते ईन्दे सिन छ्या मास्येबालाराङ थे जिम्मा बिन्सुङ थेमे थोक्ते मिकी खइँदा गल्ती खासुङ सासीन ज्येनगी खुईतेङ गल्ती ईन सिन सिओ। थोक मेङस्यीत सिन ताला पेलाकामा काम खि। 23 थेमे खुई थोङला च्योक छ्युकामा माथुङ। सुबाला लेमु ओङस्यीत सिन थेमे खोरोङ घरी घरी मानास्यीत सिन कहिले कहिले टिक्पी टिक्पी अंगूर छ्याङ थुङ। 24 थेमे याङराङ थे गल्ती खित्च्येते बात चुक सासीन सुङगीङ छ्याःङ मासाबालाराङ कोई कोई मि गल्तीचेन सजाय ङेता भन्दा गोमाराङ दाक थोङगो। कोई कोई मि गल्तीचेन सजिलो खाला माथोङला तिरीकामा छ्या स्येक्यो। 25 थोकराङ खाला कोई कोई मिकी खाबाते लेमुते कामोङ दाक थोङगो। कोईकीतेचेन होत्ता माथोङसीनोङ ङीमा लेनज्यीक दाक थोङगो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.