१ तिमोथी 4 - जिरेलपरमेश्वर बातताङ मिडिक्च्येते बात चुक्ते ईन्दे 1 थेमे था तिरी कोई कोई मिकी मिला छक्के खिताला ल्हन्डीक स्यिन्डीपकी जोबाते मेन्दा मेन्दे बात ङेन्ला खोपरोङगी येशू ख्रीष्टला विश्वास खित्जीन ङेन्दाते बात ङेन्दा तोङगो। दोक खिओ सिन परमेश्वर आत्मेकी लेमु खाईन साबा ओत। 2 ढाँर खित्कान्तेबेकी होथे ल्हन्डीक स्यिन्डीपकी जोबाते मेन्दा मेन्दे बात लेमु बात ईन सिन ज्येनला लोप्क्यो। थोक्ते मि सेमचेन स्यिङ दो च्योकराङ स्येन्दे गाला ओतेकी खोपरोङगी थोक मेलेबा बात लोप्जीनोङ छ्याःङ च्योक मालाङो। 3 थेबेकी मिओनला चुक चुक्ते बात लोप्कीते सासीन फाङमा खिता मेङगो, दि सा मेङगो थे सा मेङगो सिन लोप्क्यो। थेबेकी सा मेङगो साबाते सापतेबा गाङे मिओनगी सारस्यीत सिन परमेश्वरगीराङ जोबाते ईन। थोगी येशू ख्रीष्टला विश्वास खाला सत्यते बात ङेन्कान्ते मिओनगी खोपरोङ सापकी लाईदु परमेश्वरला धन्यवाद बिन्नामेई जुन सापोङ सोसीन ओङगो। 4 च्यिला सासीन मिओनला सिन जोबाते ईन्स्यीत, ज्येनतोक ईन्स्यीत परमेश्वरगी जोबाते जति गाङे लेमु ईन, मेलेबा सिराते छ्याःङ मेत। थेकीराङ बिन्दाते ईन सिन थेला धन्यवाद बिन्गीन सोसीन सा मेङच्येते सिराते छ्याःङ मेत। 5 परमेश्वरगीराङ सा ओङगो साबा ओतेकी थेमे थे साप साकान्ते मिओनगी थेला धन्यवाद सिन प्रार्थना खाईन सोनामेई दि सा ओङगो थे सा मेङगो सिरच्येते छ्याःङ मेत। पावलगी तिमोथीला चुक चुक खिता फाप्कीते सिन साबाते 6 दि बातओन खुई ज्येन आज्यो न्वालाङ लेमु खाला लाप्ला बिन। थोक खासीन खो येशू ख्रीष्टकी खि साबाते काम लेमु खाला खित्कान्ते मि ओङगो। येशू ख्रीष्टला विश्वास खित्जीन ङेन्दाते बात खुई झन लेमु खाला खोकीन डुइओ। थेमे थरिङसाक ङेन्गीन वाबाते सत्यते बाततेबा झन लेमु खाला ङेन्गीन देता थुप्क्यो। 7 थेपा कोई कोई मिकी लोप्कीन ओताते कामराङ लै मिक्किच्येते कथाला खुई नामज्योक मासेत, ज्येनलाङ ङेन माज्युत। थेबेकी लोप्च्येते बातनी सत्यते बातताङ डिकराङ मिडिक्च्येते थेमे थाङनेते फेम्मे मि बात च्योक्ते ईन। थोगी खुई परमेश्वरला चुक खाला माने खिन ओते थे छ्य्वापा स्येत लै खाला झन थोक खिनराङ देत। 8 मिओनगी दाक्पोन ङार्मा ओङस्यीत सिन खोपरोङ जीउला दुक्पा बिन्गीन तालिम खाबाते छ्याःङ काम लै मिक्किच्येतेचेन मेन। ईन्सीनोङ परमेश्वरला माने खित्जीन खाबाते कामचेन दि भन्दा खापान खापान खुदुक ईन। दोक्ते काम खित्कान्ते मिलाचेन परमेश्वरगी दि जुनीलाकामा मेन तिरी जुनीलाङ आशी तेरग्यो सिन साबा ओत। 9 दि बात साँच्चीराङ ईन्दाते थेमे मिओनगी पत्ते खिता फाप्च्येते बातराङ ईन। 10 थोक ईन्देकीराङ ङुरूङगी स्याप स्याप खाला दुक्पा खिन थुपासम्म ज्येनलाङ सत्यते बात लोप्च्येते ईन। च्यिला सासीन सोम्बोते परमेश्वरगी साबा च्योकराङ खाला आशी तेरग्यो सिन ङुरूङ आश खाईन देता ओत। मि गाङेला पापदुकी डेल्कान्ते थेराङ ईन। थेकी थोक खिओ सिन येशू ख्रीष्टला विश्वास खित्कान्ते मि जोराङ ईन्सीनोङ परमेश्वरगी थेला पापकी सजायदुकी डेल्ग्यो। 11 च्यि खित्च्ये, चुक खिता फाप्कीते सिन दि बातबरी खुई थेरू गाङेला लोप। 12 खो थोरूमोङ स्याराराङ ओत्सीनोङ थोक खाला लोप्जीन कोत्जीन दि भर्खरगी फिजेकी साबाते बादोङ च्यि ङेन्च्ये, दिलाङ च्यि छ्या ओते सिन सिरच्येते लाम थेबा सुङलाङ मातेर। खो स्याराराङ दुक सिन हेपे मिक्किस्यीत सिन खोरोङगी खाबाते ताला येशू ख्रीष्टला विश्वास खित्कान्ते मिओनगी चुक चुक खिता फाप्च्या ईन्दाका सिन लोप्स्यीत सिन खुई दोक दोक खि। चुक सासीन खुई काम बात जे खासीनोङ लेमु खाला खि, ज्येनला ङिङज्ये खि, जे ओङसीनोङ येशू ख्रीष्टला विश्वास खिन देत, सेमला छ्याःङ पाप मोज्योबा खाला काम खि, 13 ङा थेपा ओङ ओङसाक थेरू गाङेला परमेश्वर बात थोच्या खाला पढे खाला बिन थेमे थे बातला च्यि साबाते ईन्दे सिन लाप्ला बिन। 14 येशू ख्रीष्ट मिओनला ताकान्ते मिओनगी खुई गोःकी लाक लाक्पा ज्याक्ला प्रार्थना खिते बेलाला कोई कोईकी परमेश्वरगी खुई विषयला सिर च्युताते बात खाबा ओतान। थोक खाईन परमेश्वरगी खोल्ला सीप बिन्दा ओतान सिन खुई टोक ज्येता मेतासीन। थेकी खोरोङला दोक खाईन बिन्दाते सीप पित मोतोङा खाला लेमु खाला चले खिन देत। 15 खोरोङला खि साबाते दि कामबरी थुपासम्म स्येत खाला खि। थोक खिन देत्नामेई खुई झन लेमु खिन दुक सिन गाङेकी छ्या स्येक्यो। 16 खोरोङगी चुक खिन ओते, चुक्ते बात लोप्कीन ओते सिन लेमु खाला विचार खिन देत। खुई दोक खिन देत्सीन खोरोङगी थेमे खुई लापाते बात ङेन्कान्ते मिओनगी तिरी पापकी सजाय भोगे खिता माफाबो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.