१ तिमोथी 3 - जिरेलयेशू ख्रीष्ट मिओनला ताकान्ते छ्ये छ्ये मि चुक्ते ओङा फाप्कीते 1 थेमे सुइँदा मि येशू ख्रीष्ट मिओनला ताकान्ते छ्येते मि ओङा चाल्सीन थेकी लेमु कामराङ खिता चालाते ईन सिन सिरच्येते बात साँच्चीराङ ईन्दाते बात ईन। 2 थोक्ते मिचेन सुङगीङ दिकी दि दि गल्ती खाबा ओत सिन साबा मेताज्यीक ओङा फाप्क्यो। थेते फेम्मेज्यीककामा ओङा फाप्क्यो। थेचेन जहिलेङ च्याङबो खाला देत्कानज्यीक, दाक्पोन सेम काबूला ज्य्वाबा थुप्कानज्यीक ओङा फाप्क्यो। थे बानी लेमु ओताज्यीक, डोम्बोओनताङ फार छुर ख्याम्कान मिओनला लेमु खित्कानज्यीक थेमे मिओनला परमेश्वर बात लेमु खाला लोपा थुप्कानज्यीक ओङा फाप्क्यो। 3 थे छ्याङ रक्सी काल्बा मुथुङकानज्यीक, मिला लाःक मोतोङकानज्यीक, गाङेताङ खा छ्येत लेमु खित्कानज्यीक, थोम्मु जीङगा मिक्किकानज्यीक थेमे पैसे लोभ मिक्किकानज्यीक ओङा फाप्क्यो। 4 थेचेन थे खोरोङ खाम्बादु जेसुकै बन्दाबस्ता लेमु खित्कान ओङा फाप्क्यो। फुज्युङ फुमुतेबेकी थेला मान खाला थेकी लाःपा कोता ङेन्स्यीत सिन थे फिजाओनला लेमु खाला ताला लुबा थुप्कानज्यीक ओङा फाप्क्यो। 5 च्यिला सासीन दाक्पोन खाम्बे बन्दाबस्ता लेमु खिता मुथुप्कान्ते मिकी चुक खाला परमेश्वर मिओनला लेमु खाला ता थुप्कीतेरो? 6 लोक्ला थोक्ते मि ओङा छोल्कान्ते मिचेन भर्खरकामा येशूला विश्वास खिताला स्यूबाते मि ओङा मेङगो। थोक्ते मि छ्येते मि ओङसीन थेकी ङा ङाराङ ईन सिराच्योक खिताङ थुप्क्यो। थोक खासीन थेकीङ परमेश्वरगी शैतानला बिन्दाते सजाय ङेत्क्यो। 7 दोस्यिककामा मेन, थोक्ते मिचेन येशू ख्रीष्ट मि मेन्दाते मिओनगीङ लेमु मि ईन सिन माने खिन वाबाते मि ओङा फाप्क्यो। थोक्ते मि मेन्सीन ज्येनगी थे गल्ती थेप्क्यो। थेमे थे तोर्बाकला थेप्लु खाला शैतान लाःक्तु फाप्क्यो। छ्येते मिओन कामला मद्धत तेरकान्ते मिओन चुक्ते ओङा फाप्कीते 8 थेमे येशू ख्रीष्ट मिओनला ताकान्ते छ्येते मिओन कामला मद्धत तेरकान्ते मिओनोङ लेमु बानी ओताते मि ओङा फाप्क्यो। थेबाचेन च्येला ङि खित्कान्ते थेमे छ्याङ रक्सीकी जिकान्ते मि ओङा मेङगो। थेबा सम्पत्ति ज्वाप सिन पैसे लोभला स्यूक्कान्तेन्दे ओङा मेङगो। 9 थेबाचेन येशूला विश्वास खित्जीन छ्या स्येकीन ङेन्दाते बात लेमु खाला ङेन्गीनराङ देत्कान्ते ओङा फाप्क्यो। परमेश्वरगी खोपरोङला छ्या स्ये च्युताते होदि बात ङेन्गीनराङ देत्जीन दाक्पोनला ङे दोक खिता ठीक मेन सिराच्योक लाबाते काम छ्याःङ मिक्किता खाला देता फाप्क्यो। 10 दोस्यिककामा मेन, येशू ख्रीष्ट मिओनला ताकान्ते छ्येते मिओन कामला मद्धत तेरकान्ते मि ओङकान्ते मिओनला थेबा चुक्ते मि ईन्दे सिन गोमा लेमु खाला ता फाप्क्यो। सुङगीङ दिकी दि दि गल्ती खाबा ओत सिन साबा मेताते मिकामा होथोक्ते मि ओङाला छाने खिता फाप्क्यो। 11 थोकराङ खाला थेबे फेम्मेतेबाङ लेमु बानी ओताते, मि मोत्कीन माख्याम्कान्ते, छ्याङ रक्सी काल्बा मुथुङकान्ते थेमे जस्तो कामोङ लेमु खित्कान्ते ओङा फाप्क्यो। 12 येशू ख्रीष्ट मिओनला ताकान्ते छ्येते मिओन कामला मद्धत तेरकान्ते मि ओङकान्ते मिओनते फेम्मेज्यीककामा ओङा फाप्क्यो। थेबाचेन दाक्पोन फुज्युङ फुमुला लेमु खाला ताला लुबा थुप्कान थेमे खाम्बादु ज्येनोङ बन्दाबस्ता लेमु खित्कान ओङा फाप्क्यो। 13 थेबेकी खोपरोङ काम लेमु खाईन खासीन ज्येनगी थेबाला लेमु मि ईन साला मान खिओ। थेमे खोपरोङगी येशू ख्रीष्टला विश्वास खाईन ङेन्दाते बात झन छ्याःङ ज्यीबा मिक्किता खाला लोपा थुप्क्यो। गोमा सुङलाङ छ्या स्ये च्युता मेताते बात च्यि ईन्दे 14 ङाला था खो ओत्सापा होत्ता ओङा थुप्कीतासीन सिराच्योक लाबा ओत्सीनोङ ङे दि बातओन दोक खाईन चिट्ठीलाराङ टिबाते ईन। 15 केही कुरोकी ङा होत्ता मासीनोङ दि बातओन पढे खानामेई परमेश्वर खाम्बे मिओनगी चुक खिता फाप्च्या ईन्दाका, चुक खाला देता फाप्च्या ईन्दाका सिन खुई छ्या स्येक्यो। थोक्ते मिओन सोम्बोते परमेश्वर मि ईन। थेबेकी खित्सादु परमेश्वर सत्यते बात च्यि ईन्दे सिन गाङेकी छ्या स्येला थे बातताङ मिडिक्च्येते बात डेला थुप्क्यो। 16 परमेश्वरगी गोमा सुङलाङ छ्या स्ये च्युता मेताते थे खोरोङला चुक खाला माने खिता फाप्कीते सिरच्येते बात आउदी अचम्ब लाङच्याज्यीक दुक। दि बात मेन सिन सुङगीङ सिरा मुथुबो। दि बात च्यि ईन्दे सासीन ख्रीष्टचेन मि जुनी लाकीन पृथ्वीदु केसुङ। थे छ्याःङ गल्ती मेताते ईन सिन परमेश्वर आत्मेकी छ्या स्ये च्युता ओत। थेला परमेश्वर दूतओनगी थोङा ओत। जात जातकी मिला थे बात लाप्कीन बिन्दा ओत। सा लुङबा खाङ मिओनगी थेला विश्वास खाबा ओत। थेला परमेश्वरगी छ्येज्यीक मान बिन्गीन स्वर्गने खेरा ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.