१ तिमोथी 2 - जिरेलयेशू ख्रीष्ट मिओनगी संगति खित्जीन चुक चुक खिता फाप्कीते 1 थेमे गाङे भन्दा गोमा था ङा च्यि सिते सासीन संगति खित्जीन येशू ख्रीष्ट मिओनगी परमेश्वरला प्रार्थना खिता फाप्क्यो। प्रार्थना खित्जीन थेबेकी च्यि च्यि गोकीका परमेश्वरला नाङ सिरा फाप्क्यो। ज्येन ज्येन मि लाईदुङ प्रार्थना खिता फाप्क्यो। परमेश्वरगी खाबाते कामगी लाईदु थेला धन्यवाद सिरा फाप्क्यो। थोक खाला मि गाङे लाईदु प्रार्थना खिता फाप्क्यो। 2 थेमे छ्याःङ गोलमाल मायाङला ङुरूङगी परमेश्वरला माने खिन थेमे थेला मन परे खित्च्येते काम खिन लेमु खाला देता ङेत्स्यीत सिन झन गेल्बोओनताङ लुङबे छ्ये छ्ये मि लाईदुङ प्रार्थना खिता फाप्क्यो। 3 दोक खाला प्रार्थना खित्च्येते लेमु ईन। होदोक खाला प्रार्थना खित्जीन ङुरूङला पापदुकी डेल्कान्ते परमेश्वरला गा लाङगो। 4 मि सुङगीङ पापकी सजाय भोगे खिता माफाप्स्यीत थेमे गाङेकी सत्यते बात छ्या स्येला ङेन्स्यीत सिरच्येते परमेश्वर सेम ओत। 5 च्यिला सासीन परमेश्वर दोक्पोईकामा ओत थेमे परमेश्वरताङ मिओनला डिक्पा खाला तेरकान्तेङ दोक्पोईकामा ओत। थेचेन मि जुनी लाबाते येशू ख्रीष्टराङ ईन। 6 मि गाङे पापकी सजाय थे खोरोङगीराङ भोगे खाईन थेचेन मि गाङे लाईदु ज्यान बिन्गीन स्यिसुङ। थेकी थोक खाबाते काम तालाराङ परमेश्वरगी मि गाङेला पापकी सजायदुकी टाल्ला थे खोरोङताङ डिक ज्युता छोल्ग्यो सिन परमेश्वरगी थे खोरोङगी तोके खाबे बेलाला मिओनला छ्या स्ये च्युत्सुङ। 7 परमेश्वरगी मिओनला थोक खिता छोल्ग्यो सिराला ङा येशू ख्रीष्टकी खटे खाबाते मि ईन सिन थेकीराङ ङाला छाने खाबाते ईन। दि बात ङे ढाँर खाबाते मेन। दि साँचोते बात ईन। ङाचेन थेबेकी सुला विश्वास खिता फाप्कीते थेमे ङेन्दा फाप्च्येते सत्यते बात च्यि ईन्दे सिन ज्येन ज्येन जातकी मिला लोप्कान्ते मि ईन। 8 थेमे ङा च्यि सिते सासीन येशू ख्रीष्ट मिओन जम्मा ओङजीन गाङेपा ख्योओ मिओनगी प्रार्थना खिता फाप्क्यो। प्रार्थना खिताला लाक्पा लोङजीन थेबा मेलेबा काम खिता ताङगीन सिन्दाते मि ओङा फाप्क्यो। थेबेकी सुङताङ स्येदाङ खुरा मेङगो। थेमे थेबा थोम्मु जीङगा खिता छोल्कान्ते मि ओङा मेङगो। 9 थोकराङ खाला फेम्मे मिओनगीङ सोबोउ ओताते मिकी च्योक खाला ठीक ठीक तरीकेकी खोलाक खोन्दा फाप्क्यो। फूर्ति पारे खिताला परी परी खाला ल्हामा ल्हाच्येते, आउदी काल्बा काल्बा हीरा मोतीताङ सेरगी गहना थेमे आउदी महँगो महँगोते खोलाक खोन्दा मेङगो। 10 बरू परमेश्वरला माने खित्कान्ते फेम्मे मिओनगी खिता फापाच्योक खाला थेबेकी लेमु काम खिता फाप्क्यो। 11 थेबेकी बात काल्बा मिक्किता खाला छ्येतेबे अधीनला देत्ला थेबेकी लापाते बात लेमु खाला ङेन्दा फाप्क्यो। 12 ङाचेन फेम्मे मिओनगी ख्योओ मिओनला लोपा मेङगो थेमे थेबाला कोत्च्येते अधिकार ओताच्योक खाला कोता ओङराङ मेङगो सिन सिओ। थेबाचेन ख्योओ मिओनगी लोप्जीन बात काल्बा मिक्किता खाला देता फाप्क्यो। 13 ङा च्यिला फेम्मे मिओनगी दोक खिता फाप्क्यो सिन सिते सासीन परमेश्वरगी मि जोजीन आदमला गोमा जोबाते ईन, थे तिरीकामा हव्वाला जोबाते ईन। 14 थोकराङ खाला शैतानगी छक्के खाबातेङ आदमला मेन, हव्वालाराङ ईन। थोक खाईन छक्के खाईन हव्वेकीराङ परमेश्वरगी माकेत साबाते काम खाईन पाप खाबा ओतान। 15 फेम्मे मिकी थोक खाबा ईन्सीनोङ परमेश्वरगी थेबाला फिजे सुक देक्जीन ताला जोए खिओ। थोक ईन्सीनोङ थेबेकी छ्ये मिक्किता खाला येशू ख्रीष्टला विश्वास खिन देता फाप्क्यो, ज्येनला ङिङज्ये खिता तोङा मेङगो थेमे परमेश्वरला मन परे खित्च्येते कामताङ बात खिन देता फाप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.