१ तिमोथी 1 - जिरेल1 दि चिट्ठी टिक्कान्ते ङा पावल ईन। ङा येशू ख्रीष्टकी खटे खाबाते मि ईन। थेकी खटे खाबाते मिकी खिता फाप्च्येते काम खितालाचेन ङुरूङला पापदुकी डेल्कान्ते परमेश्वर थेमे था तिरी ग्युरला ओङगो सिन ङुरूङ आश खाईन गुकीन देता ओताते येशू ख्रीष्टकीराङ ङाला कोताते ईन। 2 ङा दि चिट्ठी तिमोथी खोल्ला टिगीन ओत। ङे खित्सादु येशू ख्रीष्टला विश्वास खाबेकी ङाला खो ङाराङ फुज्युङ च्योकराङ लाङगीदुक। आबा परमेश्वरताङ ङुरूङ प्रभु येशू ख्रीष्टकी खोल्ला दया खिन थेमे ङिङज्ये खाला लेमु खिनराङ देत्स्यीत। परमेश्वर बातताङ मिडिक्च्येते बात लोप माज्युत साबाते 3 ङे थोङला खोत्ताङ ठाल्ला म्यासिडोनिये अञ्चलपा डोजीन साकीन ज्याक्पाते बात ङा याङराङ सिन ओत। च्यि सासीन खुई एफिससदु देत्ला थेरू ङेन्दा फाप्च्येते बातताङ डिकराङ मिडिक्च्येते बात लोप्कान्ते मिओनला थोक्ते बात मालोप सिन कोत। 4 थेमे थेबाला छ्याःङ काम लै मिक्किच्येते कथा थेमे थाङबो थाङबोमे वंशावली बात खाला दिन तोङच्येते माकेत सि। थोक्ते बात खित्जीन खालि टेकाटेउरीकामा स्योरग्यो, नोमुङ डिक्च्येते बात मेङगो। थोक्ते बात खित्कान्ते मिओनगीचेन परमेश्वरगी मिओन नाङ खिता चालाते काम मिक्किओ। येशू ख्रीष्टला लेमु खाला विश्वास खालाकामा परमेश्वरगी खिता चालाते काम खिता थुप्क्यो। 5 ङे खोल्ला होथे मिओनला दोक खि, थोक माकेत सिन कोत साबातेचेन थेबेकी ज्येनतेबाला ङिङज्ये खित्स्यीत सिनराङ ईन। थोक खाला ङिङज्ये खिताला थेबे सेम लेमु ओङा फाप्क्यो, दाक्पोनला ङे दोक खिता ठीक मेन सिराच्योक लाबाते काम छ्याःङ खिता मेङगो, थेमे खेकीकामा मेन्देकी येशू ख्रीष्टला पक्काराङ खाला विश्वास खिता फाप्क्यो। 6 होदोक दोक खिता ताङगीन थेबा खालि छ्याःङ काम लै मिक्किच्येते बातकामा खाला दिन तोङगीन दुक। 7 थेबाचेन खोपरोङ परमेश्वर नियम लोप्कान्ते गुरू ईन खिदुक। थेमे खोपरोङला थे नियम आउदी लेमु खाला छ्या ओताच्योक खाला लोप्कीदुक। थोक खाईन लाप्सीनोङ खोपरोङगी च्यि बात लापे सिन खोपरोङलाराङ छ्या मिन्दुक। थेमे खोपरोङगी लोप्च्येते बात दोक दोक ईन सिन खोपरोङगीराङ खोबा मिन्दुक। 8 परमेश्वर नियम लेमु ईन सिन ङुरूङला छ्या ओत। थे नियम लोप्कानगी थे चुक खाला सुला लोपा फाप्कीते सिन लेमु खाला छ्या स्येलाकामा लोपा फाप्क्यो। 9 परमेश्वर नियमचेन थे नियमला खि साबा साबाच्योक खित्कान्ते मिओन लाईदु जोबाते मेन सिनोङ ङुरूङला छ्या ओत। थे नियम चुक्ते मिओन लाईदु जोबाते ईन्दे सासीन नियम कानून मेङेन्कान्तेताङ मनपरी खाला ख्याम्कान्ते मिओन, परमेश्वरला मान मिक्किकान्तेताङ पापीओन, परमेश्वरला मन परे मिक्किच्येते काम खित्कानताङ परमेश्वर ओतराङ मेत सिन थे विरोध खित्कान्ते मिओन लाईदु जोबाते ईन। थोक्ते मिओन लाईदुकामा मेन, दाक्पोन आबा आमाला थेमे ज्येन मिओनला सेत्कान्ते मिओन, 10 रन्डीबाजी थेमे होदि च्योक्ते खिता मेङच्येते ङोचा लाङच्येते काम खित्कान्ते मिओन, मि छोङकान्तेबा, ढाँर खित्कान्तेबा थेमे मेन्दे बातलाङ ईन सिन ना केल्कान्ते मिओन लाईदुङ ईन। परमेश्वर नियमचेन होदोक दोक काम खित्कान्ते मिओन लाईदुकामा मेन। येशू ख्रीष्टला विश्वास खित्कान्ते मिओनगी ङेन्दा फाप्च्येते बातताङ डिकराङ मिडिक्च्येते कामताङ बात खित्कान्ते मिओन लाईदु जोबाते ईन। 11 येशू ख्रीष्टला विश्वास खित्कान्ते मिओनगी ङेन्दा फाप्च्येते बातचेन गा लाङच्येते बातला साबा ओत। गा लाङच्येते बातचेन आउदी अचम्बते बात ईन। दि बातचेन जेसुकै ओत्कान्ते परमेश्वरगी मिओनला छ्या स्ये च्युता ओत। थेमे दि बात ज्येन मिओनला लोप सिन थेकी ङाला जिम्मा बिन्दा ओत। येशू ख्रीष्ट आउदी दया खित्कान्ते ईन 12 थेमे ङा ङुरूङ प्रभु येशू ख्रीष्टला धन्यवाद सिओ। च्यिला सासीन दिकी ङे जिम्मा बिन्दाते काम लेमु खाला खिओ सिन थेकी ङाला मिओनला गा लाङच्येते बात लोप्च्येते काम बिन्सुङ। दि काम खिताला ङाला शक्ति तेरकान्ते थेराङ ईन। 13 ईन्दानी थोङला ङे थेला आउदी खाईन विरोध खाबाप। थेला विश्वास खित्कान्ते मिओनला ङे खेदा खाईन खाईन दुक्पा बिन्दाप। थे मिओन दोक्पोईलाङ बाँकी ज्य्वाबा मेङगो सिन ङे थेबाला खितासम्म मेलेबा खाबाप। ङे थोक मेलेबा खाबा ईन्सीनोङ प्रभु येशू ख्रीष्टकी ङाला दया खाईन लेमु खासुङ। च्यिला सासीन थेजीन ङे थेला विश्वास खाबा मेतान थेमे ङाराङगी चुक मेलेबा खिन ओते सिनोङ ङाला छ्या मेतान। 14 थोक खाईन थेकी ङाला आउदी दया खाईन खितासम्म लेमु खासुङ। थेत्ताङ जीउज्यीकराङ ओङगीन ङे थेला विश्वास खिता थुप्सुङ थेमे ज्येनला ङिङज्ये खिता थुप्सुङ। 15 येशू ख्रीष्ट पापीओनला पापकी सजायदुकी डेलाला दि सा लुङबादु वाबाते ईन सिन सिरच्येते बात साँच्चीराङ ईन्दाते थेमे मिओनगी पत्ते खिता फाप्च्येते बातराङ ईन। थेमे पापीओन नाङ आउदी खाला पाप खित्कान्ते मि ङाराङ ईन। 16 ङा थोक्ते मि ईन्सीनोङ पापीओनला थे खोरोङगी चुक खिते सिरच्येते बात गाङेकी छ्या स्येस्यीत सिन येशू ख्रीष्टकी ङा च्योक्ते मिलाङ स्येदाङ सिराते बान्दा मिक्किता खाईन दया खासुङ। ङे तिरी थे खोरोङला विश्वास खाला नोमुङ मिसिन्च्येते जुनी ङेत्कान्ते मिओनगीङ थेकी थेबा खोपरोङला ङाला खाबा च्योकराङ स्येदाङ खिता साटोला दया खिओ सिन छ्या स्येस्यीत सिन थेकी ङाला थोक खाबा ओतान। 17 परमेश्वर सधैँभरि राज्य खिन देत्कान्ते गेल्बो ईन। थे नोमुङ मिस्यिओ। थेला मिगी थोङा मुथुबो। थे बाई ज्येन परमेश्वर ओतराङ मेत। थेला सधैँभरि मान खाला थेते जय जय ओङस्यीत सिन सिइ। आमेन। 18 फुज्युङ तिमोथी, ङे खोल्ला कोई कोई मिओनला चुक खि सिन कोत साबा ओताने ङे साकीन ज्याक्पा च्योकराङ खि। थेमे परमेश्वरगी सिर च्युताते बात खित्कान्ते मिओनगी गोमा खोरोङ विषयला साबाते बाततेबा टोक माज्येत। होथे बाततेबा सम्झे खाला खुई ङे खोरोङला खि साबाते काम लडाइँ खित्च्येते च्योकराङ दुक्पा ईन्सीनोङ लेमु खाला खिता थुप्क्यो। 19 प्रभु येशू ख्रीष्टला विश्वास खिन ङेन्दाते बात ङेन्गीन देता मातोङ। थेमे थोरूमसाक खिन ओता च्योकराङ खाला दाक्पोनला ङे दोक खिता ठीक मेन सिराच्योक लाबाते काम छ्याःङ माकेत। कोई कोईकी होथोक मिक्किता खाईन प्रभु येशू ख्रीष्टला विश्वास खिता ताङेकी थेबाला छ्येज्यीक हानी ओङा ओत। 20 थेबे नाङ हाइमेनियसताङ अलेक्जेन्डरोङ फाप्क्यो। प्रभु येशू ख्रीष्टला विरोध खिता मेङच्याक्वा सिन छ्या स्येस्यीत सिन ङे थेबा ङिकारला शैतान लाःक्तु सोम्पे खाबा ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.