१ थिस्सलोनिकी 5 - जिरेलप्रभु येशू ग्युरला ओङ ओङसाक चुक खिता फाप्कीते 1 थेमे आज्यो न्वावे, ङ्योकोनगी था तिरी चुक चुक ओङगीते सिन साबाते बात नाम च्यि बेलाला ओङगीताका सिन ख्योकोनला छ्याःङ टिक्पा माफाप्तासीन। 2 चोर दि छोमुराङ ओङगो सिरा माथुपा च्योकराङ प्रभु येशू ग्युरला ओङच्येते दिनोङ दिराङ ईन सिन सुङगीङ सिरा मुथुबो सिन ख्योकोनला लेमु खाला छ्याराङ ओत। 3 मिओनगी थानी खापाङ गोलमाल मेङगो, था छ्याःङ ज्यीबा मिक्किता खाला देता ङेत्क्यो सिरे बेलालाराङ चुक ओङगीते सासीन फुज्यीमा खुराते फेम्मे मिला एक्कासि फिजे सुक देक्पाच्योक खाला थोक सिरकान्ते मिओनगी छ्याःङ छ्या मेस्येबा खाला सजाय ङेत्क्यो। थेबा सुङ सजायदुकी थारराङ माथारो। 4 आज्यो न्वावे, ख्योकोनचेन तिरी ओङच्येते बातला छ्याःङ विचार मिक्किता खाला मुन्दाकला देत्कान्ते मि मेन। थोगी सुइँदे खाम्बादु चोर ओङजीन थे खाम्बे मिओनला अचम्ब लाबाच्योक खाला प्रभु येशू ग्युरला ओङे छोमु ख्योकोनलाचेन छ्याःङ अचम्ब मालाङो। 5 ख्योकोननी गाङेराङ परमेश्वर नाम्दाकला देत्कान्ते मि ईन। ख्योकोन मुन्दाकला खित्च्येते मेलेबा मेलेबा काम खित्कान्ते मि मेन्देकी नाम्दाकला लेमु काम खित्कान्ते मि ईन। ङुरूङचेन मेलेबा मेलेबा काम खिन मुन्दाकला देत्कान्ते मि मेन। 6 थोगी ङुरूङगी होथे ज्येनगी खिन ओताच्योक खिता मेङगो। ङिगी जाप्ते मि च्योक गाला ओतेकी थेबेकीचेन तिरी बात छ्याःङ विचार मिक्किओ। ङुरूङचेन तिरी बातकी विचार खाला च्याङबो खाला देता फाप्क्यो, छ्याङ रक्सी थुकीन होस तोराते मिकी खिताच्योक खिता मेङगो। 7 थेमे मिओन नुपलाराङ ङ्याल्ग्यो, छ्याङ रक्सी थुला जिकान्तेबाङ नुपलाराङ जिइओ, मेनरो? 8 ङुरूङचेन परमेश्वर नाम्दाकला देत्कान्ते मि ईन्देकी होस तोराते मि च्योक ओङा मेङगो। बरू च्याङबो खाला देत्ला प्रभु येशूला विश्वास खिन थेमे ज्येनला ङिङज्ये खिन देता फाप्क्यो। दोक खिन देत्च्येतेचेन लडाइँ बेलाला मिल्टेरीओनगी ठाङला खोन्च्येते च्याकी पाता खोन्दा च्योकराङ ईन। थेमे ङुरूङगी आश खाईन देता च्योकराङ था तिरी पापकी सजाय भोगे खिता माफाबो सिनोङ टोक ज्येता मेङगो। थोक खित्च्येतेचेन मिल्टेरीओनगी गोःला च्याकी टोप खोन्दा च्योकराङ ईन। 9 परमेश्वरगी ङुरूङला छाने खाबाते स्येदाङगी चूर गाल्ला सजाय तेराला मेन, ङुरूङ प्रभु येशू ख्रीष्टकी खाबाते कामगी खित्सादु पूरो खाला पापदुकी टाल्ला स्वर्गने देत ज्युताप सिन ईन। 10 था तिरी ङुरूङ थेत्ताङ नोमुङ माठाला खाला देता ङेत्स्यीत सिनराङ प्रभु येशू ख्रीष्ट ङुरूङगी ङेता फाप्च्येते पापकी सजाय थे खोरोङगीराङ भोगे खाईन स्याप्ते ईन। थोगी थे ग्युरला ओङकेसाकला ङुरूङ स्यिसीनोङ सोन्गीनराङ देता ओत्सीनोङ थेत्ताङराङ देता ङेत्क्यो। 11 बात दोक ईन्देकी थातासाक खिन ओता च्योकराङ ख्योकोनगी ङुरूङ सुङगीङ सेम सेता माफाबो साला दोक्पोईकी ज्येनज्यीकला आँट बिन। पावलगी चिट्ठी टिला सिन्दे खाला साबाते बात 12 थेमे आज्यो न्वावे, ख्योकोनगी खेराङ नाङ खेराङला लेमु ओङस्यीत सिन दुक्पा खाला खाला लोप्कान कोत्कानला मान खि। थेबाला थे काम प्रभु येशूकीराङ बिन्दाते ईन। 13 थेबेकी थोक दुक्पा खाला काम खित्च्येते ईन्देकी थेबाला ङिङज्ये खिन आउदी खाला मान खि। ख्योकोन गाङेराङ डिक्ला थुन्ला देत। 14 थेमे आज्यो न्वावे, ख्योकोनगी खेराङ नाङ दाक्पोन लाःक खिता ताङला अल्छी खाला देत्कानला थोक माकेत, काम खिता फाप्क्यो सिन सि, ज्यीबा खित्कानला ज्यीबा खिता माफाबो सिन सि, प्रभु येशूला विश्वास खाईन पाको गाला मेतातेबाला पाको ड्वाप्ला मद्धत बिन। थेमे स्येदाङ मिक्किता खाला गाङेताङ खा छ्येत लेमु खाला काम खि। 15 सुइँदेकी सुइँदाला मेलेबा खासीन थेलाङ थोकराङ खाला स्येदाङ सेता मेङगो। ख्योकोन सुङगीङ थोक माकेत। दाक्पोन नाङ ईन्स्यीत, ज्येन मि नाङ ईन्स्यीत चुक खित्जीन गाङेला लेमु ओङगीका थे छ्य्वापाकामा स्येत खि। 16 थेमे जहिलेङ गा खिन देत, 17 परमेश्वरला प्रार्थना खित्च्येते नोमुङ मातोङ, 18 दुक्पा किम्मु जस्तो ओङजीनोङ परमेश्वरला धन्यवाद सि। येशू ख्रीष्टताङ जीउज्यीकराङ ओङाते मि ईन्देकी ख्योकोनगी होदोक दोक खित्स्यीत सिरच्येते परमेश्वर सेम ओत। 19 थेमे परमेश्वर आत्मेकी खिता चालाते काम रोके माकेत, 20 सुइँदेकी परमेश्वरगी सिर च्युताते बात खित्जीन थे छ्याःङ काम लै मिक्किओ सिराच्योक माकेत। 21 खाङ कामताङ बात लेमु ईन्दे, खाङ मेलेबा ईन्दे सिन लेमु खाला छ्या स्येबा खि। जुन कामताङ बात खिता लेमु दुक थे खि, 22 मेलेबा सिराते छ्याःङ माकेत। 23 थेमे सेमला ढुक्क लोङकान्ते परमेश्वरगी ख्योकोनगी मेलेबाते कामताङ बात सिराते छ्याःङ मिक्किस्यीत सिन ख्योकोन सेम खुदुक जोइन देत्स्यीत थेमे ख्योकोन आत्मा, सेम थेमे जीउ जेसुकैला लेमु खाला तेइनराङ देत्स्यीत। दोक खाला था ङुरूङ प्रभु येशू ख्रीष्ट ग्युरला ओङे छोमु ख्योकोन छ्याःङ दोष मेताते मि ओङस्यीत सिन ङ्योकोन प्रार्थना खिओ। 24 ख्योकोनला थे खोरोङ दोन्दु स्योक सिन कातोङकान्ते परमेश्वर थे खोरोङगी खिओ साबा च्योकराङ खित्कान्ते ईन्देकी थेकी ख्योकोनला ङ्योकोनगी प्रार्थना खाबाच्योक खाला लेमु खिओ। 25 थेमे आज्यो न्वावे, ख्योकोनगीङ ङ्योकोन लाईदु परमेश्वरताङ प्रार्थना खि। 26 ठेत्जीन ख्योकोन गाङेकी दोक्पोईकी ज्येनज्यीकला मान खिन नमस्ते खि। 27 प्रभु येशूकी ङाला ख्योकोनला कोत्च्येते अधिकार बिन्दा ओतेकी ख्योकोनगी दि चिट्ठी खेराङ नाङ दोक्पोईलाङ मेडेला खाला गाङेला सुने खाला बिना सिन सिओ। 28 लो ङुरूङ प्रभु येशू ख्रीष्टकी ख्योकोनला दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.