१ थिस्सलोनिकी 4 - जिरेलपरमेश्वरला चुक्ते काम मन परे खिते 1 आज्यो न्वावे, था ज्येन बात च्यि सासीन परमेश्वरला चुक्ते काम मन परे खिते, ख्योकोनगी चुक खाला देता फाप्कीते सिन ङ्योकोनगी ख्योकोनला लाप्कीन बिन्दा ओत। ङ्योकोनगी लापाच्योक खाला ख्योकोन कामोङ खिनराङ दुक। प्रभु येशूताङ जीउज्यीकराङ ओङाते मि ईन्देकी ङ्योकोन ख्योकोनला थोरूमसाक खिन ओताच्योक खिन देता मातोङ, झन लेमु खाला दोक खिनराङ देत सिन सिओ। 2 प्रभु येशूकी ङ्योकोनला बिन्दाते अधिकार चले खाईन ङ्योकोनगी ख्योकोनला चुक चुक खिता फाप्कीते सिन लापा ओताने सिन ख्योकोनला छ्याराङ ओत। 3 परमेश्वर सेमचेन ख्योकोन सेम खुदुक गालाते मि ओङस्यीत सिरच्येते ओत। थोक ईन्देकी ख्योकोनगी रन्डीबाजी थेमे होदि च्योक्ते खिता मेङच्येते काम खितराङ माकेत। 4 ख्योकोनगी दाक्पोन फेम्मेताङ ङ्योम्बु देत्जीन दाक्पोनला खिता सेम लाबा लाबाच्योक माकेत। थेबे इज्जततेङ ख्याल ज्याक्ला काम खि। 5 परमेश्वरला छ्या मास्येबाते मिओनगी खोपरोङ सेम थामे खिता माथुप्ला फेम्मेतेबाला चुक खिता सेम लाङगीका थोकराङ खिओ। ख्योकोनगीचेन थेबेकी च्योक माकेत। 6 थेमे ख्योकोन सुङगीङ येशूला विश्वास खित्कान्ते ज्येन मि फेम्मेताङ खिता मेङच्येते काम खाला थे ख्योबोला सोम्बोलाराङ सबी चावादु लुच्येते काम माकेत। होथोक्ते मेलेबाते काम जे खासीनोङ थोक खित्कान्तेबाला प्रभु येशूकी सजाय तेरग्यो। थोगी ख्योकोन च्याङबो खि सिन ङ्योकोनगी ख्योकोनला गोमाकाराङ लाःपा ओत। 7 परमेश्वरगी होथोक्ते काम खित्स्यीत सिन मेन, ङुरूङ सेम खुदुक गाल्ला थोक्ते मेलेबाते काम सिराते छ्याःङ मिक्किस्यीत सिन ङुरूङला थे खोरोङ दोन्दु स्योक सिन काताङाते ईन। 8 थोगी ङ्योकोनगी होथोक्ते काम माकेत सिन साबाते दि बातला सुइँदेकी नामज्योक मेसेत्तुक सासीन थोक्ते मिकी मिला मेन्देकी परमेश्वरलाराङ नामज्योक मासेताते ईन। परमेश्वरचेन ख्योकोनला थे खोरोङ आत्मा तेरकान्ते ईन। 9 थेमे प्रभु येशूला विश्वास खित्कान्ते आज्यो न्वाकी नाङ दोक्पोईकी ज्येनज्यीकला ङिङज्ये खित्च्येते बातला ङ्योकोनगी ख्योकोनला छ्याःङ सिरा माफाप्तासीन। दोक्पोईकी ज्येनज्यीकला चुक खाला ङिङज्ये खिता फाप्कीते सिन परमेश्वर थे खोरोङगीराङ ख्योकोनला लाप्कीन बिन्दा ओत। 10 ईन्दाबोङ म्यासिडोनिये लुङबा खाङ ओताते आज्यो न्वा गाङेला ख्योकोनगी ङिङज्ये खिनराङ दुक। ओर्च्ये, आज्यो न्वाबा ख्योकोनगी झन लेमु खाला दोक खिनराङ देत। 11 थेमे ङ्योकोनगी गोमाका साबा च्योकराङ ख्योकोनगी च्यि खित्च्ये छ्य्वापा स्येत खिसे सासीन ख्योकोनगी दाक्पोन दाक्पोन लाक रेरे खि। ज्येनला लोप्च्येते कोत्च्येते छ्याःङ खाँचो मेत्सीनोङ थेबाला दोक खि, थोक खि सिन लोपा कोता चाल्ला दुक्पा मातेर। दाक्पोन दाक्पोन पाखुरा चले खाला सो। 12 दोक खासीन सुङगीङ ख्योकोनला थाराङ स्वा माफाबो, येशू ख्रीष्ट मि मेन्दाते मिओनगीङ ख्योकोनला लेमु मि ईन सिओ। प्रभु येशू ख्रीष्ट ग्युरला ओङजीन चुक ओङगीते 13 थेमे आज्यो न्वावे, ज्येन बात च्यि सासीन ख्योकोन नाङ स्यिइन सिन्दाते मिओनला था तिरी च्यि ओङगीते सिन ख्योकोनगी लेमु खाला छ्या स्येस्यीत सिन ङ्योकोन दि बात खिन ओत। थेबाला चुक ओङगीते सिन छ्या स्येनामेकी ख्योकोनगीचेन स्वर्गने ड्वा ङेत्कीता मेङेत्ता सिन छ्याःङ आश मेताते मिओनगी खोपरोङते स्यिइन सिन्दाते मिओन लाईदु पीर खाबाच्योक खाला पीर खिता माफाबो। 14 येशू स्याप्तेताङ सोम्बो लोक्पाते बात पक्काराङ ईन्देकी थेला विश्वास खिन खिन स्याप्ते मिओनलाङ परमेश्वरगी था तिरी सोम्बो लोक्ला येशूताङराङ थे खोरोङ दोन्दु देताला खेरग्यो सिरच्येते बात ङुरूङ पत्ते खिओ। 15 दोक ओङगो सिरच्येते बातला प्रभु येशू थे खोरोङगीराङ साबाते बात ङ्योकोन ख्योकोनला सिओ। च्यि सासीन थे ग्युरला ओङे छोमु थेला विश्वास खित्कान्ते गोमाका स्यिइन सिन्दाते मिओनगी माठेतथुप ङुरूङ थे छोमुसाक सोन्गीन देतातेबा सुङगीङ थेला मेठेदो। 16 थे छोमु चुक ओङगीते सासीन प्रभु येशूकी लो था बेला लेप्सुङ सिन गाङेकी थोच्या खाला सिराईताङ, परमेश्वर छ्येते दूतकी गाङेकी थोच्या खाला बात खिताईताङ थेमे परमेश्वर बिकुल फुबाते ङोरो थोबाईताङराङ प्रभु येशू स्वर्गनेकी ग्युरला ओङगो। थे ग्युरगीन वानामेई ख्रीष्टला विश्वास खित्कान्ते गोमाका स्याप्ते मिओन स्यिसादुकी सोम्बो लोइओ। 17 थेमे थे छोमुसाकराङ सोन्गीन देता ओताते ङुरूङलाङ प्रभु येशू ठेता खिताला परमेश्वरगी होथेबाताङराङ मुक्पे नाङ खाला नामने खेरग्यो। थेमे ईन्सीन ङुरूङ प्रभु येशूताङ नोमुङ माठाला खाला ङ्योम्बुराङ देता ङेत्क्यो। 18 होदि बाततेबा सम्झे खाला ख्योकोनगी दोक्पोईकी ज्येनज्यीकला छ्याःङ पीर खिता माफाबो सिन सि। |
© 1992 Wycliffe Bible Translators Inc. All rights reserved.
Wycliffe Bible Translators, Inc.