१ थिस्सलोनिकी 2 - जिरेलपावलगी थिस्सलोनिकादु गोमा खाबाते कामगी बात खाबाते 1 थेमे आज्यो न्वावे, ङ्योकोनगी ख्योकोन ओत्सापा वाकीन खाबाते काम थाराङ खेरो मागाल्सुङ सिन ख्योकोनला छ्याराङ ओत। 2 च्यि सासीन ख्योकोन ओत्सापा ओङा भन्दा गोमा फिलिप्पी सारदु परमेश्वरते गा लाङच्येते बात लोप्जीन थेरू मिओनगी ङ्योकोनला दुकीन इज्जत बेइज्जत खाबाते बात ख्योकोनगी छ्या मास्येबाते मेन। थेरू थोक खाईन दुक्पा बिन्सीनोङ परमेश्वरगी ङ्योकोनला आँट बिन्देकी ङ्योकोनगी ख्योकोन ओत्सादु वाकीन थेरूङ थे बातराङ लापाप। थेरूङ मिओनगी आउदी दुक्पा बिन्सीनोङ ङ्योकोनगी छ्याःङ ज्यीबा मिक्किता खाईन ख्योकोनला थे बात लापा ओतान। 3 जसकी जेराङ सासीनोङ ङ्योकोननी मिओनला गा लाङच्येते बात ङेन सिन लोप्जीन नोमुङ मेन्दे बात मोलोबो, चुक खासीन ङेराङला फाइदा ओङगीका थे तालाङ मोलोबो थेमे मि मिकला छारो देक्पाङ मोछोलो। 4 ङ्योकोनलानी परमेश्वरगीराङ दिबेकी ङे साबा च्योकराङ खिओ सिन गा लाङच्येते बात लोप्च्येते काम जिम्मा बिन्दाते ईन। थोगी ङ्योकोननी मिओनला खुशी ज्वाप्ला मेन्देकी ङेराङ सेमगी नाङ च्यि दुका सिन लेमु खाला छ्या स्येकान्ते परमेश्वर खुशी ओङस्यीत सिन गा लाङच्येते बात लोप्क्यो। 5 ख्योकोनताङ ओत्जीनोङ ङ्योकोनगी खोलु सिराते बान्दा माक्या। थोकराङ खाईन सेमदुचेन ख्योकोनगी खइँदा तेरगीता सिन लोभ खाईनोङ थे बात मालाप। दि बात ख्योकोनला सिरा माफाप्तासीन। ङ्योकोनगी साबाते बात ढाँर खाबाते मेन सिन परमेश्वरला छ्या ओत। 6 लोक्ला ङ्योकोनगीनी ज्येनगी ईन्स्यीत, ख्योकोनगी ईन्स्यीत सुङगीङ ङेराङला मान खित्स्यीत सिराच्योक माक्या। 7 ईन्दाका ङ्योकोन ख्रीष्टकी खटे खाबाते मि ईन्देकी ङ्योकोनला ख्योकोनगीराङ ता फाप्क्यो सिरा थुप्च्या ओतान। थोक मिक्किता खाईन बरू ङ्योकोनगीनी थे मोरोङ नुमा थुङकान्ते बालकते फिजाला आमातेकी लेमु खिता च्योकराङ खाईन ख्योकोनला लेमुका खाबाप। 8 ङ्योकोनला ख्योकोनते आउदी ङिङज्ये लाबा ओतान। थोगी ख्योकोनला परमेश्वरते गा लाङच्येते बात लाप्ला तेरालाकामा मेन, ख्योकोनला लेमु ओङे लाईदु स्या फाप्सीनोङ ङ्योकोन नाइँ सिरच्या मेतान। 9 आज्यो न्वावे, ख्योकोनला परमेश्वरते गा लाङच्येते बात लोप्जीन ख्योकोन सुङलाङ छ्याःङ दुक्पा तेरा माफाप्स्यीत सिन ङेराङ लाईदु साप थुङा ङ्य्वाप्ला ङीन नुप ठोत थेनथेन काम खाबाप। ङ्योकोनगी थोक खाबाते बात ख्योकोनगी टोक ज्येता मेतासीन। 10 येशूला विश्वास खित्कान ख्योकोन गाङेताङ ङ्योम्बु ओते बेलाला ङ्योकोनगी मेलेबाते काम सिराते छ्याःङ माक्या। चुक खित्जीन ख्योकोनला लेमु ओङगीका थोककामा खाबाप। ङ्योकोनगी दि दि गल्ती खासुङ सिन सुङगीङ सिरा मुथुबो। ङ्योकोनगी साबाते दि बात ढाँर खाबाते मेन सिन परमेश्वरला थेमे ख्योकोनला छ्या ओत। 11 आबातेकी फिजाओन बानी मेङ्येस्यीत सिन लाःपा कोता च्योकराङ ङ्योकोनगीङ ख्योकोन गाङेला लेमु ओङस्यीत सिन दोक दोक खाबाप। चुक सासीन दुक्पा ओङसीनोङ सेम मेसेता खाला प्रभु येशूला विश्वास खिन देता मातोङ साकीन आँट बिन्दाप। 12 थेमे परमेश्वर मिओनगी चुक चुक खिता फाप्कीते सिन लाप्कीन थोक खिन देत सिन लोप्कीन देताप। ख्योकोन थे खोरोङ राज्यदु देता ङेत्स्यीत थेमे थे खोरोङ चुक छ्ये ईन्दाका सिन लेमु खाला छ्या स्येस्यीत सिन थे खोरोङ दोन्दु स्योक सिन कातोङकान्ते परमेश्वरराङ ईन। 13 थेमे ङ्योकोन जहिलेङ दि बातकी लाईदुङ परमेश्वरला धन्यवाद सिओ। च्यि सासीन ङ्योकोनगी परमेश्वर बात लोप्जीन थे बात मिकी जोबाते मेन्दाक्वा, परमेश्वर बातराङ दुका सिन ख्योकोनगी ङेन्सुङ। ईन्दाबोङ थे बातचेन परमेश्वर बातराङ ईन। येशूला विश्वास खित्कान ख्योकोन नाङ परमेश्वरगी होथे बातकी छ्य्वापेईराङ काम खिन ओत। 14 चुक सासीन आज्यो न्वावे, परमेश्वर बात ङेन्देकी ख्योकोनगीङ येशू ख्रीष्टताङ जीउज्यीकराङ ओङाते यहूदिये लुङबादु ओताते परमेश्वर मिओनगी च्योकराङ खाईन दुक्पा भोगे खासुङ। होथेबाला खोपरोङ यहूदीओनगी दुक्पा बिन्दा च्योकराङ ख्योकोनलाङ खेराङ लुङबे मिओनगीराङ दुक्पा बिन्दा ओतान। 15 ज्येनला दुक्पा तेरकान्ते होथे यहूदीओनगीचेन प्रभु येशूला सेता ओतान। थेमे थे गोमा परमेश्वर बात खित्कान्ते मिओनलाङ सेता ओतान। होथेबेकीराङ ङ्योकोनलाङ दुक्पा बिन्गीन ख्योकोन ओत्सादुई उरगीन ताङा ओतान। परमेश्वरला मन परे मिक्किच्येते काम खित्कान्ते थेमे मि गाङेला मिगी थोङसार्मु खित्कान्ते होथेबाराङ ईन। 16 च्यिला सासीन परमेश्वरगी ज्येन ज्येन जातकी मिला पापदुकी डेल्स्यीत सिन ङ्योकोनगी थेबाला गा लाङच्येते बात लोप्जीन होथे यहूदीओनगी ङ्योकोनला थुपासम्म दुक्पा बिन्ला थे बात लोप मुज्युत्तुक। होदोक दोक्ते कामकामा खिन देत्कीन थानी थेबानी पापकीराङ नुप्कीन सिन्दा खाईन सिन्सुङ। था ईन्सीन परमेश्वरगी थेबाला स्येदाङगी चूर गाल्ला सजाय तेरच्येते बेला लेप्सुङ। पावलगी थिस्सलोनिके येशू ख्रीष्ट मिओनला ठेता चालाते 17 आज्यो न्वावे, टिक्पी दिन ख्योकोनताङ ठाला फाप्जीन ङ्योकोनला आउदी पीर लासुङ। ईन्दाका ङ्योकोन थारीला ओत्सीनोङ ङ्योकोनगी ख्योकोनला टोक ज्येता मेत। ख्योकोनला ठेताप सिन ङ्योकोनगी टिक्पी टिक्पीराङ माक्या। नामराङ ख्योकोन छ्येत ता ङेदोङा सिराच्योक लाकीन थुपासम्म ङ्योकोन थेपा ओङा चालाप। 18 थेपा ड्वा ङेत्कीता सिन ङ्योकोनगी याङ याङराङ मौका ताबाप। ङा पावल ङाराङराङ थेपा ड्वाप सिन बाजिताङ बाजि ठीक खित्जीनोङ ओङा माथुप्सुङ। शैतानगी ङ्योकोनला थेपा डोरराङ माच्युत्सुङ। 19 था प्रभु येशू ग्युरला ओङे छोमु थे दोन्दु देत्जीन ख्योकोनगी खित्सादु ङ्योकोनगी मान ङेत्क्यो सिन आश खाईन गुकीन देता ओत। ख्योकोनगी खित्सादुराङ थे छोमु खुशीङ ओङा ङेत्क्यो थेमे ख्योकोनगी चुक लेमु खाबा ओताने सिन गा खिता ङेत्क्यो। 20 ईन साँच्चीराङ ङ्योकोनगी गा खिता ङेत्च्येते थेमे खुशी ओङा ङेत्च्येते ख्योकोनगी खित्सादुराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.