१ थिस्सलोनिकी 1 - जिरेल1 दि चिट्ठीचेन ङ्योकोन पावल, सिल्वानसताङ तिमोथी डिक्ला ख्योकोन थिस्सलोनिका सारदु जम्मा ओङकान्ते येशू ख्रीष्ट मिओनला टिगीन ओत। ख्योकोनचेन आबा परमेश्वर थेमे प्रभु येशू ख्रीष्टताङ जीउज्यीकराङ ओङाते मि ईन। आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। थिस्सलोनिके येशू ख्रीष्ट मिओनगी लेमु खाबाते बात 2 परमेश्वरताङ प्रार्थना खित्जीन ङ्योकोन जहिलेङ ख्योकोन लाईदुङ प्रार्थना खिन ख्योकोन गाङे लाईदु थेला धन्यवाद सिओ। 3 धन्यवाद सिरजीनराङ ख्योकोनगी येशू ख्रीष्टला विश्वास खाईन लेमु काम खिताला स्यूबाते थेमे ज्येनला ङिङज्ये खिन झन झन लेमु खाबाते बातकी लाईदु ङुरूङ आबा परमेश्वरला धन्यवाद सिओ। थे लाईदुकामा मेन, था ङीमाई ङुरूङ प्रभु येशू ख्रीष्ट ग्युरला ओङगो सिन आश खाईन गुकीन देता ओतेकी जस्तो दुक्पा ओङसीनोङ ख्योकोन सेम मेसेता खाईन देता ओताते बातकी लाईदुङ ङ्योकोन थेला धन्यवाद सिओ। 4 आज्यो न्वावे, परमेश्वरगी ख्योकोनला ङिङज्ये खाईन थे खोरोङ मि ईन सिन छाने खाबाते ईन सिरच्येते बादोङ ङ्योकोनला छ्या ओत। 5 च्यिला सासीन ङ्योकोनगी लोप्च्येते गा लाङच्येते बातचेन मि बातकामा मेन्देकी थे बातकी छ्य्वापेई परमेश्वरगी ख्योकोन नाङ छ्ये छ्ये शक्ति काम खासुङ। थे बात पक्काराङ सत्यते ईन सिन परमेश्वर आत्मे छ्य्वापेई लेमु खाईन छ्या स्येबेकी ङ्योकोनगी थे बात ख्योकोनला लेमु खाईन लोपा थुपाते ईन। थेजीन ख्योकोनताङ देत्जीन ख्योकोनला लेमु ओङस्यीत सिन ङ्योकोनगी चुक चुक खाबा ओताने सिन ख्योकोनला गाङे छ्या ओतेकी ङ्योकोनगी छ्याःङ सिरा माफाप्तासीन। 6 थेजीन ङ्योकोनला ताकीन ख्योकोनगीङ ङ्योकोनगी खाबा खाबा च्योकराङ खाबा ओतान। ङ्योकोनगी खाबा च्योककामा मेन्देकी ख्योकोनगी प्रभु येशू ख्रीष्टकी च्योगोङ खाबा ओतान। चुक खाईन सासीन ज्येनगी आउदी खाला दुक्पा तेरजीनोङ परमेश्वर आत्मेकी खित्सादु गा खिन ख्योकोनगी गा लाङच्येते बात ङेन्दा ओतान। 7 ख्योकोनगी थोक खाबाते थोङगीन म्यासिडोनियाताङ अखैये लुङबादु ओताते येशूला विश्वास खित्कान्ते मिओनगीङ ख्योकोनगी च्योकराङ खिता फाप्च्याक्वा सिन लेमु खाईन छ्या स्येसुङ। 8 ख्योकोनगी खित्सादु प्रभु येशू बात थेबे नाङकामा फैले खाबाते मेन, ख्योकोन परमेश्वर छ्य्वापा लै खाईन थेला विश्वास खिताला स्यूबाते बात मिओनगी गाङेपा छ्या स्येला दुक। ख्योकोनगी परमेश्वरला विश्वास खाबाते बात ङ्योकोनगी सुङलाङ सिरा फाप्च्या मिन्दुक। 9 ङ्योकोन जुन ठाउँदु ख्योल्सीनोङ थेङले मिओनगी दोक सिन ख्योकोन बातकामा खिदुक। थेबेकी ङ्योकोन ख्योकोनला प्रभु येशू बात लोपाला डोजीन ख्योकोनगी ङ्योकोनला चुक लेमु खाबा ओताने सिरच्येते बात थेमे ख्योकोनगी ल्हा लुतेबा माने खिता ताङगीन सोम्बोतेताङ सत्यते परमेश्वर छ्य्वापा लै खाईन थेलाकामा माने खिताला स्यूबाते बात खिदुक। 10 दोस्यिककामा मेन, थेबेकीचेन था स्वर्गनेकी ग्युरला ओङगो साबाते परमेश्वर फुज्युङ येशूला ख्योकोन गुकीनराङ देत्ला दुक्लो सिरच्येते बादोङ खिदुक। थेला परमेश्वरगी स्यिसादुकी सोम्बो लोक्पा ओत। मिओनला था तिरी परमेश्वरगी स्येदाङगी चूर गाल्ला तेरच्येते सजायदुकी ङुरूङला जोए खित्कान्ते थेराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.