१ पत्रुस 5 - जिरेलछ्येते मिओनताङ स्यारातेबाला साबाते बात 1 थाचेन ङा ख्योकोन नाङ येशू ख्रीष्ट मिओनला ताकान्ते मिओनला बातज्यीक बात ङि सिरामीन। ङा ङाराङोङ ख्योकोन च्योकराङ येशू ख्रीष्ट मिओनला ताकान्ते मिज्यीक ईन। ख्रीष्टकी भोगे खाबाते दुक्पातेबा ङे गाङे ङाराङ मिगीराङ थोङाते ईन। था थे छ्येज्यीक शक्ति ङेत्ला ग्युरला ओङजीन ङाङ मान ङेत्ला थेत्ताङ देता ङेत्क्यो सिनोङ ङाला छ्या ओत। येशू ख्रीष्ट मिओनला ताकान्ते मिओन ख्योकोनगी ओर्च्ये दोक खि। 2 चुक सासीन लुई गोठालेकी लुक ताप च्योकराङ खाला लेमु खाला तो सिन परमेश्वरगी खेराङ जिम्माला बिन्दाते परमेश्वर मिओनला लेमु खाला तो। परमेश्वरगी ङाला दोक खि साबेकी ङे दोक खिता करराङ लै खासुङ सिराच्योक माकेत, बरू गा खिन दाक्पोन राजी खुशीकी दि काम खाबाते ईन सिराच्योक खाला थेबाला लेमु खाला तो। थेमे दि काम खित्जीन पैसा थोई ङेत्कीका सिन पैसे लोभ खाला मेन्देकी दि काम खिता आउदी सेम ओताच्योक खाला काम खि। 3 ख्योकोन खेराङचेन थेबे मालिक ईन सिराच्योक खाला छ्ये खिता माछोल। थेबेकीङ खेराङगी च्योकराङ खिता लोप्स्यीत सिन लेमुते लुई गोठालेकी लुक लेमु खाईन ताबाच्योक खाला थेबाला लेमु खि। 4 दोक खासीन था येशू ख्रीष्ट ग्युरला ओङजीन थेकी ख्योकोनला इनाम सिन छ्येज्यीक मान तेरग्यो। थेकी थोक खानामेई ख्योकोन सधैँ मान ङेत्ला देता ङेत्क्यो। येशू ख्रीष्टचेन ज्येन गोठाला गाङेला कोत्कान्ते छ्येते गोठाला च्योक्ते ईन। 5 थेमे स्याराते मिओनलाङ ङा च्यि सिते सासीन ख्योकोनगी दाक्पोन भन्दा छ्येकी लाःपा कोताते ङेन। थेमे दि बातचेन ङा ख्योकोन गाङेला सिओ। च्यि सासीन ख्योकोन सुङगीङ ङा ङाराङ ईन सिराच्योक मिक्किता खाला बरू दोक्पोईकी ज्येनज्यीकला मान खि। परमेश्वर बातलाङ “ङा ङाराङ ईन सिराच्योक खित्कान्ते मिला परमेश्वरगी मनराङ परे मिक्किओ। छ्ये मिक्किकान्ते मिलाचेन थेकी दया खिओ,” सिन साबा ओत। 6 थोगी छ्ये छ्ये काम खित्कान्ते परमेश्वर दोन्दु ख्योकोनगी ङा ङाराङ ईन सिराच्योक माकेत। थोक माक्यानामेई खेराङला मान तेरच्ये बेला लेप्नामेई थेकी ख्योकोनला दाक मान तेरग्यो। 7 थेमे खेराङ पीरताङ ताप जति गाङे थेलाराङ सि। च्यिला सासीन ख्योकोनला लेमु खाला ताकान्ते थेराङ ईन। 8 थेमे दाक्पोन सेम काबूला स्योक। खेराङला मेलेबा खिता छोल्कान्ते शैतानगी छ्याःङ मेलेबा खिता मुथुप्स्यीत सिन च्याङबो खाला देत। थेचेन जहिलेङ ख्योकोन सुला थेप्ला ङ्ये ज्युता ङेदोङा सिन जे थेप्कीदुक खाप खाप्ला साप सिन ङारगीन ख्याम्बाते सिंह च्योक खाला युगीनराङ देत्क्यो। 9 शैतानगी जे सासीनोङ थे बात ङेनराङ माङेन, जति दुक्पा बिन्सीनोङ सेम मेसेता खाला देत थेमे येशू ख्रीष्टला विश्वास खिनराङ देत। दि सा लुङबा खाङ ओताते खेराङ आज्यो न्वाकीङ ख्योकोनगी च्योकराङ दुक्पा भोगे खिन देता ओत सिरच्येते बात टोक माज्येत। 10 टिक्पी दिन ख्योकोनगी दोक्ते दुक्पा खपे खिता फाप्सीनोङ ख्रीष्टकी खाबाते कामगी खित्सादु खितासम्म दया खित्कान्ते परमेश्वरगी ख्योकोनला सधैँभरि लाईदु मान तेराला थे खोरोङ दोन्दु स्योक सिन काताङा ओत। थेकीराङ ख्योकोनला सेम सेता ओत्सादुई लोक्ला आँट तेरग्यो, जस्तो ओङजीनोङ मेलेबा खित्सादुई जोए खाला ज्य्वाक्यो थेमे ख्रीष्टला विश्वास खिन देताला शक्ति तेरग्यो। 11 दोक खित्कान्ते परमेश्वरगी सधैँभरि गाङेपा गाङेला राज्य खिनराङ देत्स्यीत। आमेन। पत्रुसकी चिट्ठी टिला सिन्दे खाला साबाते बात 12 दि चिट्ठी ङे सिल्वानसला टिक च्युताते ईन। सिल्वानसचेन खिओ साबा च्योकराङ खित्कान्ते मि ईन। दि ङेते ङाराङ न्वा च्योकराङ ईन। जति दुक्पा ओङजीनोङ ख्योकोन सेम मेसेता खाला देत्स्यीत सिन आँट तेराला थेमे परमेश्वरगी पक्काराङ दया खिओ सिन ख्योकोनगी लेमु खाला छ्या स्येस्यीत सिन ङे थुम्मी खाईन दि चिट्ठी टिबाते ईन। परमेश्वरगी खेराङला दया खिनराङ देत्स्यीत सिन थेला माने खिन देता मातोङ। 13 बेबिलोनदु ओताते येशू ख्रीष्ट मिओनते ख्योकोनला नमस्ते ओत्लो। परमेश्वरगी थेबालाङ ख्योकोनला च्योकराङ खाईन छाने खाबाते ईन। मर्कूसतेङ ख्योकोनला नमस्ते ओत्लो। दि ङेते ङाराङ फुज्युङ च्योकराङ ईन। 14 फार छुर ठेत्जीन ख्योकोनगी दोक्पोईकी ज्येनज्यीकला मान खिन नमस्ते खि। ख्रीष्टताङ जीउज्यीकराङ ओङाते ख्योकोन गाङेला थेकी लेमु खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.