१ पत्रुस 4 - जिरेलपरमेश्वरगी खि साबाच्योक खिता फाप्च्येते बात 1 थेमे ख्रीष्टकी मि जुनी लाकीन थोई दुक्पा भोगे खाबा ओताने सिन टोक मेज्येता खाला ख्योकोनगीङ थेकी च्योकराङ खाला दुक्पा भोगे खिओ सिन आँटे खाला देत। च्यिला सासीन दुक्पा भोगे खित्कान्ते मिकी पाप खिन मेदेदो। 2 ख्रीष्टला ताला थेकी च्योकराङ खानामेई था ख्योकोनगी दाक्पोन खुशी खिन जे खिता सेम लाङगीदुक थेराङ खिन देता माफाबो, बरू सोन सोनसाकराङ परमेश्वरगी च्यि खि सिका थे छ्या स्येला थेकी खि साबा च्योकराङ खिन देता थुप्क्यो। 3 ईन्दालाचेन गोमाबा ख्योकोनगीङ परमेश्वरला ङो मेस्येकान्ते मिओनगी च्योकराङ खिन तोङासम्म समय ताङा ओतान। च्यि सासीन थेजीन ख्योकोनगी ङोचा लाङच्येते कामओन खिन ओतान, दाक्पोन खुशी खिन जे खिता सेम लासुङ थेराङ खिन ओतान, जहिलेङ छ्याङ रक्सीकी जिलाकामा देत्कीन ओतान, ज्येनताङ रूला भक्कुचूर सोला थुला मोज मज्जा खिन ओतान थेमे ल्हा लु माने खिन खिता ओङराङ मेङच्येते काम खिन ओतान। 4 तर था ख्योकोनगी थोक्ते मेलेबा काम खिता ताङेकी थोरूमसाक होथोक्ते कामराङ खिन ओताते मिओनचेन ख्योकोन च्यिला खोपरोङगी च्योकराङ मिक्किका सिन छक्क परे खिदुक। थेमे ख्योकोनला ईन्दा मेन्दा साला ख्योकोन विरोध खिदुक। 5 स्याप्तेबा थेमे सोम्बोराङ ओताते मि गाङेला न्याय खिताला ठीक ओङगीन देताते परमेश्वर दोन्दु था ङीमा लेनज्यीक थेबेकी खोपरोङगी खाबाते होथोक्ते काम बात गाङेते हर हिसाब तेरा फाप्क्यो। 6 ङीमाई परमेश्वरगी दोक खाला न्याय खित्च्येते ईन्देकीराङ स्यिइन सिन्दाते मिओनलाङ गा लाङच्येते बात लापाते ईन। थोक खाबातेचेन थेबेकी सोन सोनसाक चुक खाला दुका थे ताला थेबे न्याय खिता थुप्स्यीत थेमे परमेश्वरगी तेरा चालाते नोमुङ मिसिन्च्येते जुनी ङेत्स्यीत सिन ईन। सुई चुक खिता फाप्कीते 7 थेमे था दि जुग सिन्च्ये बेला लेपा खाबा ओत। दाक्पोन सेम काबूला ज्याक्ला ख्योकोन च्याङबो खाला देत। दोक खासीन ख्योकोन परमेश्वरताङ प्रार्थना खिन देता थुप्क्यो। 8 थेमे ज्येनतोक भन्दाङ दोक्पोईकी ज्येनज्यीकला आउदी खाला ङिङज्ये खि। दोक खासीनराङ ज्येनगी जति मेलेबा खासीनोङ थोक्ते मिला माफ तेरा थुप्क्यो। 9 थेमे खाम्बादु ओङकानला ङिङमार मिक्किता खाला लेमु खि। 10 परमेश्वरगी ङुरूङ गाङेला खुदुक खुदुकते सीपताङ शक्ति बिन्दा ओत। थेकी दाक्पोनला जे खित्च्येते सीपताङ शक्ति बिन्ला दुक थे छ्य्वापेई ज्येनला लेमु ओङच्येते काम खि। 11 च्यि सासीन ज्येनला परमेश्वर बात लोप्कान्तेकी परमेश्वरगी जे साला दुक थेराङ लोप। थेमे ज्येनला ता फाप्कानगीङ परमेश्वरगी ङाला थोक खित्च्येते शक्ति बिन्दाते ईन सिन थे काम खि। दोक खाला जसकी जे खासीनोङ येशू ख्रीष्ट छ्य्वापेकी परमेश्वरते जय जय खित्च्येते काम खि। परमेश्वरते सधैँभरि जय जय ओङस्यीत। थेकी गाङेपा गाङेला राज्य खिनराङ देत्स्यीत। आमेन। दुक्पा ओङजीन चुक खित्च्ये 12 ङिङज्येते आज्यो न्वावे, ख्योकोनगी खपेराङ खिता मुथुप्ता सिराच्योक लाङच्येते दुक्पा भोगे खिता फाप्जीन च्यिला दोक ओङसुङा सिराच्योक खाला छक्क परे माकेत। 13 दोक्ते दुक्पा भोगे खिता फाप्जीन ख्योकोन गाका खि। च्यिला सासीन दोक ओङजीन ख्योकोनगी ख्रीष्टकी चुक दुक्पा भोगे खाबा ओता ईन्दाका सिन टिक्पी टिक्पी छ्या स्येक्यो। थेमे ख्रीष्ट था छ्येज्यीक शक्ति ङेत्ला दुरू ग्युरला ओङे छोमु ख्योकोनोङ आउदी खाला गा खिता ङेत्क्यो। 14 ख्रीष्टकी मि ईन्देकी ज्येनगी मनपरी सासीन ख्योकोननी भाग्यमानीका ईन। थेबेकी थोक खित्जीन ख्योकोनगी छ्येज्यीक शक्ति ओताते परमेश्वर आत्मा खेराङताङ ओत सिन झन लेमु खाला छ्या स्येक्यो। 15 ख्योकोनगी मि सेतेकी खित्सादु कि सुइँदेते खइँदा कुबेकी खित्सादु कि मेलेबा काम खाबेकी खित्सादु कि मि काम ङ्ये च्युतेकी खित्सादु सजाय ङेत्तुक्लो सिराचेन लेमु मेन। 16 तर मिओनगी ख्योकोनला ख्रीष्टियान ईन सिन दुक्पा तेरगीदुक सासीन ख्योकोनगी छ्याःङ ङोचा खिता माफाबो, बरू खेराङ ख्रीष्टियान ईन सिन गा खिन परमेश्वरते जय जय खि। 17 थेमे था परमेश्वरगी मि गाङे न्याय खित्च्येते बेला लेपा खासुङ। था थेकी गोमा ङुरूङ न्याय खिओ। दोक खाला थे खोरोङ मिओनतेनी थेकी न्याय खिओ सासीन झन थे खोरोङ गा लाङच्येते बात मेङेन्कान्ते मिओनला चुकका खाओङा। 18 परमेश्वर बातला चुक सिन टिबा ओते सासीन “परमेश्वरगी खि साबाच्योक खित्कान्ते मिओननी पापकी सजायदुकी बल्ल बल्ल थारग्यो सासीन थेकी खि साबाच्योक मिक्किकान्तेताङ पापीओनलानी झन चुकका ओङोङा,” सिन साबा ओत। 19 बात दोक ईन्देकी परमेश्वरगी साबाच्योक लेमु काम खित्जीन दुक्पा ङेत्कीदुक सासीन थोक्ते मिकी दि बात गाङे परमेश्वरला छ्या ओत सिन खोपरोङला जोकान्ते थेमे खिओ साबा च्योकराङ खित्कान्ते परमेश्वरला पूरो खाला भर परे खाला लेमु काम खिन देता फाप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.