१ पत्रुस 3 - जिरेलख्यावा फेम्मे बात 1 थोकराङ खाला फेम्मे मिवे, ख्योकोनगी दाक्पोन ख्योबो अधीनला देत्ला थेबाला मान खि। थेबा कोईकी परमेश्वर बात ङेन्दा मेत्सीनोङ ख्योकोन चालचलनताङ बानी लेमु थोङनामेई थेबाला थे बात ङेन सिन सिराराङ माफापा खाला थेबेकीङ प्रभु येशूला विश्वास खिता थुप्क्यो। 2 ख्योकोन लेमु बानी बिवारा ओताते थेमे थेबाला मान खाबाते थोङनामेई थेबेकीङ प्रभु येशूला विश्वास खिओ। 3 खेराङ लेमु थोङाला ख्योकोनगी परी परी खाला गोः सेत्च्येते थेमे सेरगी गहनाताङ लेमु लेमु खोलाक खोन्ला सिंगारपेटार खिता माफाबो। 4 बरू ख्योकोनगी ङा ङाराङ ईन सिराच्योक माकेत, गाङेताङ खा छ्येत लेमु खाला डिक्ला थुन्ला देत। होदोक दोक खित्कान्ते फेम्मे मिलाराङ परमेश्वरगी लेमुते फेम्मे मि ईन सिओ। 5 परमेश्वरगी साबा च्योकराङ खिओ सिन भर परे खित्कान्ते गोमा गोमाबे फेम्मे मिओनगीङ होदोकराङ खिन ओतान। थेबा दाक्पोन ख्योबो अधीनला देत्ला थेबाला मान खिन ओतान। 6 सारे बातराङ विचार खि। ख्योबो सिन थे अधीनला देत्ला सारेकी अब्राहामला मान खिन ओतान। बात दोक ईन्देकी जस्तो खिता लेमु दुक थोकराङ खिन छ्याःङ ज्यीबा मुखुरा खाईन देत्सीन ख्योकोनलाङ सारे सन्तानराङ ईन सिरा सोई खिओ। 7 थेमे ख्योओ मिवे, फेम्मे मि खेराङ छेत ङार्मा मेङगो सिरच्येते बात टोक मेज्येता खाला ख्योकोनगी दाक्पोन फेम्मेला लेमु खि। परमेश्वरगी थेबालाङ ख्योकोनला च्योकराङ खाला दया खाला नोमुङ मिसिन्च्येते जुनी तेरग्यो सिरच्येते बादोङ टोक माज्येत। ख्योकोन खेराङ खेराङगी चुक खिता फाप्च्या ईन्दाका थोकराङ खासीन परमेश्वरगी ख्योकोनगी खाबाते प्रार्थना ङेन्ग्यो। लेमु खित्जीन दुक्पाङ ङेता थुप्क्यो 8 था बात च्यि सासीन ख्योकोन गाङेराङ डिक्ला थुन्ला देत। पीर फापा ओतातेबाला पीर माकेत सिन सि। खेराङ गाङेराङ आज्यो न्वा आज्यी नुमु ईन सिन सम्झे खाला दोक्पोईकी ज्येनज्यीकला ङिङज्ये खि। दोक्पोईकी ज्येनज्यीक दुक्पाला तो। ङा ङाराङ ईन सिराच्योक मिक्किता खाला बरू ज्येनला मान खि। 9 खेराङला मेलेबा खित्कानला थोकराङ खाला किम्बा माज्येल, खेराङला मनपरी सिरकानलाङ थोकराङ माकेत, बरू लेमु ओङस्यीत सिन थेबाला आशी बिन। ख्योकोनगी होदोक खित्स्यीत सिनराङ परमेश्वरगी ख्योकोनला थे खोरोङ दोन्दु स्योक सिन काताङाते ईन। ख्योकोनगी थोक खासीन थेकी ख्योकोनलाङ आशी तेरग्यो। 10 परमेश्वर बातला च्यि साबा ओते सासीन “जुनी खाङ छ्याःङ मेलेबा मेङस्यीत थेमे जेसुकै साबा च्योक ओङस्यीत सिरच्येते सेम खित्कान्ते मिकीचेन मि बात खिता मेङगो, ढाँरोङ खिता मेङगो। थेकी दाक्पोन खा थाताला ज्य्वाबा फाप्क्यो। 11 मेलेबा काम खिता ताङला लेमु काम खिता फाप्क्यो। थेमे चुक खाला गाङेताङ डिक्ला थुन्ला देता थुप्कीका थे छ्य्वापाराङ स्येत खिता फाप्क्यो। 12 च्यिला सासीन थे खोरोङगी खि साबा च्योककामा खित्कान्ते मिला प्रभु परमेश्वरगी लेमु खाला तेइओ, थेकी थेबेकी खाबाते प्रार्थनाङ ङेन्ग्यो। मेलेबा खित्कान्ते मिओनलाचेन थेकी थोङाराङ सै मिक्किओ, थेकी थेबेते छ्याःङ वास्ता मिक्किओ,” सिन साबा ओत। 13 ख्योकोनगी लेमु खित्च्ये छ्य्वापाकामा स्येत खाईन थोकराङ खानामेई ख्योकोनला सुई मेलेबा खितेरो? 14 खेराङगी दोक खाला लेमु काम खित्जीनोङ सुइँदेकी ख्योकोनला दुक्पा तेरगीदुक सासीन ख्योकोन भाग्यमानी ईन। थोक खाला दुक्पा तेरकान्तेबाताङ ख्योकोनगी छ्याःङ ज्यीबा माकेत, सुर्ताङ खिता माफाबो। 15 बरू येशू ख्रीष्टराङ खेराङ मालिक ईन सिन टोक माज्येत, थेला मान खि। थेमे परमेश्वरगी तिरी तेरग्यो साबातेबा ङेत्क्यो सिन खेराङगी आश खाबाते पक्काराङ ङेत्क्यो सिन ख्योकोन चुक खाला सिते सिन ठिकान गाङेला ख्योकोनगी जहिलेङ लाःप्ला बिन। थेबे सेमला फोक्च्येते बात छ्याःङ मिक्किता खाला थोक्ते मिओनताङ ख्योकोनगी खा छ्येत लेमु खाला बात खि। 16 ख्योकोनगी काम बात जे खित्जीनोङ हत्तेरिका ङे थोक खिता ओङच्या मेतान सिराच्योक लाङच्येते छ्याःङ माकेत। दोक्ते काम मिक्किता खाईन देत्सीन खेराङ ख्रीष्टकी मि ईन्गीन लेमु कामताङ बातकामा खाबा ओत्सीनोङ मेन्दा मेन्दे बात खाला खेराङला दोष लै खित्कान्ते मिओनगी खोपरोङगी ख्योकोन लेमु मि मेन साबाते बात ठीक मेन्दाक्वा सिन छ्या स्येला ङोचेकी खाराक्पा देत्क्यो। 17 ख्योकोनगी लेमु काम खाईन दुक्पा भोगे खाबातेराङ परमेश्वरला लेमु लाङगीदुक सासीन बरू मेलेबा काम खाला दुक्पा भोगे खिता भन्दा लेमु काम खाला दुक्पा भोगे खिताराङ लेमु ईन। 18 मिओनला पापदुकी डेलाला ख्रीष्ट पापकी सजाय भोगे खाईन थे खोरोङ ज्यान बिन्गीन स्या ओतान। दोक खाईन छ्याःङ गल्ती मेताते ख्रीष्ट परमेश्वरगी माकेत साबा साबा खित्कान्ते मिओन लाईदु स्या ओतान। थे थोक खाईन बाजिई मि गाङे लाईदु स्यिइन सिन्दा ओतेकी था लोक्ला नोमुङ दोक खिता माफाबो। थे थोक खाईन स्याप्की खित्सादु ख्योकोन परमेश्वर दोन्दु ड्वा थुपा ओत। मिओनगी थेला सेता ओतान। ईन्सीनोङ परमेश्वरगी थेला थे खोरोङ आत्मे छ्य्वापेकी सोम्बो लोक्पा ओत। 19 परमेश्वर आत्मे छ्य्वापेईराङ थेकी स्यिइन सिन्दाते मिओन देता फाप्च्येते ठाउँदुङ गाल्गीन गोमाका स्याप्ते मिओनलाङ गा लाङच्येते बात लापा ओतान। 20 होथे मिओनगीचेन थाङबो अटेरी खाईन परमेश्वर बातला नामज्योकराङ सेता मेतान। थेजीन नूहेकी पानीजहाज जोला सिन सिनसाकराङ परमेश्वरचेन ना थेबेकी थे खोरोङ बात ङेन्गीता सिन गुकीनराङ देता ओतान। थेजीन थे पानीजहाज नाङ स्यूकीन मि टिक्पीस्यिक, खालि मेरा गेतकामा थे छ्युई भलदुई सोन्दा ओतान। 21 थे भलदुकी थोक खाईन नूहताङ थे मिओन सोन्दाते बातचेन थरिङोला परमेश्वरगी मिला पापदुकी डेल्च्येते बप्तिस्मा तेरच्येते बातताङ डिइओ। चुक खाला सासीन छ्युला लुक्ला बप्तिस्मा तेरच्येते काम ठु खाला जीउकी ङेक्च्युक क्युरच्येते च्योक मेन। बप्तिस्मा लिन्कान्ते मिकीनी परमेश्वरगी ङाला पापदुकी टाल्ला ङे सेम लेमु जोरस्यीत सिन बप्तिस्मा लिन्च्येते ईन। परमेश्वरगी थोक्ते मिला पापदुकी डेल्च्येतेचेन येशू ख्रीष्ट सोम्बो लोक्पा ओतेकीराङ ईन। 22 थेचेन थरिङोला स्वर्गने गाल्गीन परमेश्वर सामे छ्य्वापा देता ओत। सा नाम खाङ ओताते परमेश्वर दूतओन ईन्स्यीत, ल्हा ल्हन्डीक ईन्स्यीत, छ्ये टेक्टे जो ईन्सीनोङ जे ईन्सीनोङ होदिबा गाङे थे अधीनलाराङ ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.