१ पत्रुस 2 - जिरेल1 बात दोक ईन्देकी था ख्योकोनगी मेलेबा काम सिराते छ्याःङ माकेत। ज्येनला ढाँर खित्च्येते थेमे मिकी खेराङला चुक लेमु ईन्दाका सिरस्यीत सिरच्ये सेमगी छ्याःङ काम माकेत। थोकराङ खाला मिला डार खित्च्येते थेमे मि मोत्च्येते बान्दा माकेत। 2 बरू बालकते फिजेकी याङ याङ नुमा थुङा सेम खाबाच्योक खाला ख्योकोनगीङ परमेश्वर बात ङेन्ला थेरू खि साबा साबा खित्च्ये छ्य्वापाकामा सेम खि। परमेश्वर बातचेन मि बात मेन्देकी गाङे सत्यते बात ईन। दि बात ङेन्ला थेरू खि साबा च्योकराङ खिन गाल्नामेई ख्योकोन मेलेबा काम खिता ताङला पाको डुइओ। 3 प्रभु येशू चुक लेमु खित्कान्ते ईन्दे सिन ख्योकोनगी छ्या स्येबा मेताते मेन। आउदी काम लै खित्च्येते दोई बात 4 ख्योकोन येशू ख्रीष्ट दोन्दु ग्युक। थेचेन कर्मीओनगी कामराङ लै मिक्किओ सिन क्युराते तर परमेश्वरगी आउदी काम लै खित्च्येते सिन छाने खाबाते दो ईन। थे सोम्बो ओत। 5 परमेश्वरगी जुनी बिन्दाते ख्योकोनोङ दो च्योक्तेराङ ईन। दोक्ते दोई छ्य्वापेई परमेश्वरगी थे खोरोङ आत्मा देत्च्येते मन्दिर जोच्येते ईन्देकी ख्योकोनगी थेला मेङगो मिसिरा खाला थोक खित छ्युत। दोक ओङनामेई ख्योकोनगी परमेश्वरला मन परे खित्च्येतेबा चढे खित्कान्ते पूजारी ओङला थेला मन परे खित्च्येते काम खिता थुप्क्यो। दोकचेन ख्योकोनगी येशू ख्रीष्टकी खाबाते कामगी खित्सादु खिता थुप्क्यो। 6 परमेश्वर बातला परमेश्वरगी “लो दि बात लेमु खाला ङेन। ङा सियोन सारदु ङाराङगी छाने खाबाते दोज्यीक ज्य्वाक्यो। थे मेताला छ्याःङ खिता मुथुप्च्या थे दो आउदी काम लै खित्च्येते ईन। परमेश्वरगी सियोन सारदु ज्याक्पाते दो साबाते मिकीकामा ङुरूङला लेमु खिता थुप्क्यो सिन थेला विश्वास खित्कान्ते मिओनला थेकी नोमुङ ङोचा मोलोङो,” सिन साबा ओत। 7 थोगी थे दो साबाते येशू ख्रीष्टला विश्वास खित्कान्तेबा ख्योकोन लाईदु थे आउदी काम लै खित्च्येते दो ईन। ईन्सीनोङ थेला विश्वास मिक्किकान्तेबे लाईदु थे चुक्ते ईन्दे सिन परमेश्वर बातला “जुन दोला कर्मीओनगी कामराङ लै मिक्किओ सिन क्युरा ओतान, थे दोराङ आउदी काम लै खित्च्या थे मेताला छ्याःङ खिता मुथुप्च्या ओङसुङ,” सिन टिला दुक। 8 परमेश्वर बातलाराङ “थे दोला मि काल्बेई नार्दोक देइओ। ठाःक छेतज्यीक ओताते थे दोला मि काल्बेई ठोके खाला रिल्ग्यो,” सिनोङ टिला दुक। परमेश्वर बातला नामज्योक मेसेत्कान्ते मिओनराङ थोक खाला रिल्ग्यो। थोक्ते मिओनला होदोक ओङ ज्युत्क्यो सिन परमेश्वरगी गोमाका साबा ओतान। 9 बात दोक ईन्सीनोङ ख्योकोनलाचेन परमेश्वरगी थे खोरोङ मि ईन सिन छाने खाबा ओत। ख्योकोनचेन परमेश्वर पूजारी ईन, थेचेन गेल्बो ईन। ख्योकोन परमेश्वरला माने खित्कान्ते मि ईन। ख्योकोन परमेश्वर मिराङ ईन। थेकी ख्योकोनला पापताङ लोभदुकी टाल्ला थे खोरोङ नाम्दाकला देताला थे खोरोङ दोन्दु स्योक सिन काताङा ओत। थेकी खाबाते अचम्ब अचम्बतेन्दे कामगी बात ख्योकोनगी ज्येनलाङ सिरस्यीत सिन थेकी ख्योकोनला दोक खाबाते ईन। 10 गोमा ख्योकोनला परमेश्वरगी थे खोरोङ मि साबा मेतान, थानी ख्योकोन थे मिराङ ईन। परमेश्वर चुक ङिङज्ये खित्कान्ते ईन्दे सिन थेजीन ख्योकोनगी छ्याःङ छ्या स्येबा मेतान, थेकी चुक आउदी ङिङज्ये खित्च्या ईन्दाका सिन थानी ख्योकोनगी छ्या स्येबा ओत। 11 ङिङज्येते आज्यो न्वावे, ख्योकोन दुरू टिक्पी दिनकामा देत्च्येते ईन्देकी मि लुङबे मि च्योकराङ ईन। थोगी ओर्च्ये, ख्योकोन ङे दोक्ते कामताङ बात खिता मेङगो सिन छ्या ओत्कीन ओत्कीनोङ ङे दोक माक्याबाला ओङराङ मेङगो सिराच्योक खाला खेराङ सेमला लाबा लाबा खित्च्येते नोमुङ छ्याःङ माकेत। 12 परमेश्वरला छ्या मेस्येकान्ते खेराङला मेलेबा मि ईन सिरकान्ते मिओन नाङराङ देता ओत्सीनोङ काम बात जे खित्जीनोङ ख्योकोनगी लेमुतेकामा खि। दोक खाईन ख्योकोनगी लेमुकामा खानामेई था परमेश्वरगी वाला मि गाङे न्याय खिते छोमु ख्योकोनला मेलेबा मि सिन सिरकान्ते होथे मिओनगी ख्योकोन थोक्ते मि मेन्दाक्वा सिन छ्या स्येला परमेश्वरते जय जय खिओ। छ्ये छ्ये मिताङ मालिक अधीनला देत्च्येते बात 13 प्रभु येशू मि ईन्देकी ख्योकोनगी लुङबादु राज्य खित्कानताङ ज्येन छ्ये छ्ये मि गाङे अधीनला देत्ला नियम कानून लेमु खाला ङेन। लुङबेते गाङे भन्दा छ्येते गेल्बोराङ ईन्देकी थेला मान खि। 14 थोकराङ खाला थे चावादु देत्ला काम खित्कान्ते छ्ये छ्ये मिलाङ मान खि। मेलेबा काम खित्कानला सजाय तेराला थेमे लेमु खित्कानला लेमु खासुङ सिराला थेबाला गेल्बोकीराङ खटे खाबाते ईन। 15 छ्याःङ विचार मिक्किता खाला ख्योकोनला मेन्दा मेन्दे दोष लै खित्कान्ते मिओनगी थोक्ते मेन्दे बात खिता तोङस्यीत सिन ख्योकोनगी लेमु काम खि। ख्योकोनगी दोकराङ खित्स्यीत सिरच्येते परमेश्वर सेम ओत। 16 थेमे सुङगीङ अधीनला मेताच्योक खाला काम खि। दोक साबाते खेराङला जे खिता सेम लाङगीदुक थेराङ खिता ङेत्क्यो साबाते मेन। जे खित्जीनोङ ख्योकोनगी परमेश्वर काम खित्कान्ते मिओनगी चुक खिता फाप्कीते थोकराङ खि। 17 मि गाङेला मान खि। खेराङ गाङेराङ आज्यो न्वा आज्यी नुमु ईन सिन सम्झे खाला दोक्पोईकी ज्येनज्यीकला ङिङज्ये खि। परमेश्वरताङ ज्यीबा खि। गेल्बोला मान खि। 18 थेमे योक्पो योङमुवे, ख्योकोनगी दाक्पोन मालिककी साबाते ङेन, थेबाला मान खि। खेराङला अन्याय मिक्किता खाला लेमु खित्कान्तेबेतेकामा मेन, थाराङ थाप्कानताङ दुङकान्ते मालिककी साबाते ङेन्ला थोक्तेबालाङ मान खि। 19 खेराङगी छ्याःङ गल्ती खाबा मेत्जीनोङ थेबेकी थाराङ ख्योकोनला दुक्पा तेरजीन ङाला दोक ओङाते परमेश्वरला छ्या ओत सिन सम्झे खिन थेबाला छ्याःङ मिसिरा खाईन दुक्पा खपे खासीन परमेश्वरगी ख्योकोनगी लेमु खासुङ सिन सिओ। 20 तर खेराङगी काम ङ्ये च्युतेकी खित्सादु दुताक ङेत्जीन खानामा ऊ मनेराङ मेदेन्दा खाईन देत्सीनोङ दि च्यि अचम्बे बात ईन्देरो। थोक मेन्गीन दाक्पोन काम लेमु खिन खिन थाराङराङ दुताक ङेत्जीन छ्याःङ मिसिरा खाईन देत्सुङ सासीन परमेश्वरगी ख्योकोनगी लेमु खासुङ सिन सिओ। 21 होदोक खाला दुक्पा भोगे खितालाराङ परमेश्वरगी ख्योकोनला थे खोरोङ दोन्दु स्योक सिन काताङाते ईन। ख्रीष्टकी ख्योकोन लाईदु थोई दुक्पा भोगे खासुङा सिन ख्योकोनला छ्याराङ ओत। थोक खाईन थेकी दुक्पा ओङजीन चुक खिता फाप्कीते सिन तेन्गीन बिन्दा ओतेकी ख्योकोनगीङ थेकी च्योकराङ खि। 22 “थेकी नोमुङ छ्याःङ पाप खाबा मेतान, ढाँरोङ खाबा मेतान।” 23 थे खोरोङला मनपरी सिरकानला थेकी छ्याःङ साबा मेतान, दुक्पा तेरजीन थोक खित्कान्तेबाला थेकी ख्योकोनला थाहा छ्येदोङ सिन साबा मेतान। बरू थे खोरोङ बात गाङे सुङलाङ काका पाका मिक्किता खाला न्याय खित्कान्ते परमेश्वरला छ्या ओत सिन थेकी थेलाराङ भर परे खाबा ओतान। 24 ङुरूङ पापदुकी ठाल्ला परमेश्वरगी खि साबा साबाच्योक खित्कान ओङस्यीत सिन थे ङुरूङ पापकी सजाय भोगे खाईन स्यिङगी थामला टाँए खाईन स्यिसुङ। थेकी थोक खाईन दुक्पा भोगे खाबेकी खित्सादु था ख्योकोनगी पापकी सजाय भोगे खिता माफाबो। 25 गोमा ख्योकोन गोठाला मेत्कीन छरपुट्ट गालाते लुक च्योकराङ ओतान। थाचेन ख्योकोन प्रभु येशू छ्य्वापा लै खाबा ओत। थेचेन लेमुते लुई गोठाला ईन। थेकी ख्योकोनला मेलेबा खित्च्ये छ्य्वापेई जोए खाला लेमु खाला तेइओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.