१ पत्रुस 1 - जिरेल1 दि चिट्ठी टिक्कान्ते ङा पत्रुस ईन। ङा येशू ख्रीष्टकी खटे खाबाते मि ईन। ङा दि चिट्ठी पोन्टस, गलातिया, कापाडोसिया, एशिया थेमे बिथिनिये नाङला मि लुङबे मि च्योकराङ ओङगीन लुङबा लुङबाला गाल्गीन देता ओताते मिओनला टिगीन ओत। ख्योकोन परमेश्वरगी छाने खाबाते मि ईन। 2 थे खोरोङगी गोमामेई खिता चाला च्योकराङ खाईन आबा परमेश्वरगी ख्योकोनला थे खोरोङ मि सिन छाने खाबा ओत। ख्योकोनगी येशू ख्रीष्टकी खि साबा साबा ङेन्स्यीत सिन परमेश्वर आत्मेकी ख्योकोन सेम खुदुक जोबा ओत। थेमे येशू ख्रीष्ट स्यिजीन थे जीउदुकी थेन्दाते ठागी खित्सादु ख्योकोन पाप माफ ओङा ओत। आबा परमेश्वरताङ प्रभु येशू ख्रीष्टकी ख्योकोनला झन झन दया खाला लेमु खिनराङ देत्स्यीत। परमेश्वरते जय जय खिता फाप्च्येते बात 3 ङुरूङ प्रभु येशू ख्रीष्ट आबा परमेश्वरते जय जय खिइ। थेकी ङुरूङला आउदी ङिङज्ये खाईन लोक्ला केर ज्युताच्योक खाईन साम्बाते जुनी बिन्सुङ। थेकी येशू ख्रीष्टला स्यिसादुकी सोम्बो लोक्पा ओतेकी थेकी खिओ साबाच्योक पक्काराङ खिओ सिन ङुरूङ आश खाईन गुकीन देताते बात नोमुङ फरक परे मिक्किओ। 4 थेकी थे खोरोङ मिओनला स्वर्गने तेरग्यो सिन साबाते ङेत्क्यो सिन ङुरूङ गुकीन देता ओत। थेने ङुरूङगी ङेत्च्येते नोमुङ नाश मोन्डोओ, सिन्ला तोरलाङ मोन्डोओ। 5 ख्योकोनगी प्रभु येशूला विश्वास खितेकी खित्सादु था दि जुग सिन्दे खाला ख्योकोनला पूरो खाला पापदुकी टाल्ला स्वर्गने खेरच्येते समय ओङ ओङसाकराङ परमेश्वरगी थे खोरोङ शक्तिकी ख्योकोनला मेलेबा काम खित्से छ्य्वापेई जोए खाला ज्य्वाक्यो। 6 ख्योकोन बात दोक ईन्देकी ख्योकोन आउदी गा खिन देता थुप्क्यो। ईन्दालाचेन थरिङोला ख्योकोनगी परी परीतेन्दे दुक्पा भोगे खिता फाप्क्यो। ईन्सीनोङ दोक्ते दुक्पा खालि टिक्पी दिनगी लाईदुकामा ओङच्येते ईन। 7 मेला लुगीन ताकीन सक्कली दुका सिन छ्या स्येबाते सेरोङ ङीमाई छ्याःङ काम लै मिक्किच्या डुइओ। सेर आउदी दामी चीज ईन्सीनोङ दि भन्दाङ ख्योकोनगी येशू ख्रीष्टला खिन ओताते विश्वास झन आउदी छ्ये ईन। दोक्ते परी परीतेन्दे दुक्पा ओङजीनराङ ख्योकोनगी थेला पक्काराङ खाईन विश्वास खाबाते ईन्दाकाना मेन्दाका सिन छ्या स्येक्यो। जति दुक्पा ओङजीनोङ सेम मेसेता खाईन थेला विश्वास खिनराङ देत्सीन था थे ग्युरला ओङे छोमु परमेश्वरगी ख्योकोनला आउदी लेमु खासुङ सिन साला थे खोरोङगी ज्वा चाला च्योकराङ लेमु जोला मान तेरग्यो। 8 ईन्दानी ख्योकोनगी येशू ख्रीष्टला थोङा मेत। ईन्सीनोङ ख्योकोन थेला ङिङज्ये खिदुक। ख्योकोनगी थेला थरिङोला थोङा मेत्सीनोङ थेला विश्वास खिदुक। थेमे मिकी साला सिरा मुथुप्च्या आउदी खाला गा खिदुक। 9 च्यिला सासीन परमेश्वरगी खेराङला पूरो खाला पापदुकी टाल्ला थे खोरोङताङ देत ज्युत्क्यो सिन ख्योकोनला छ्या ओत। ख्योकोनगी येशू ख्रीष्टला विश्वास खाबेकी खित्सादु थेकी दोक खित्च्येते ईन। 10 परमेश्वरगी ख्योकोनला दया खाला पापदुकी डेल्च्येते बात खिन परमेश्वर बात खित्कान्ते मिओनगी परमेश्वरगी मिला पापदुकी डेल्च्येते चुक खाला नाम खिताका सिन आउदी खाईन छ्या स्येबा चाला ओतान। 11 थेबे सेमगी नाङ ओताते ख्रीष्टकी आत्मेकी ख्रीष्टकी देमा वाला दुक्पा भोगे खाला स्या फाप्च्येते थेमे थे दुक्पा भोगे खाईन सिन्नामेई परमेश्वरगी थेला छ्येज्यीक मान तेरच्येते बात थेबाला छ्या स्ये च्युत्नामेई था च्यि बेलाला चुक चुक ओङजीन परमेश्वरगी थोक खिताका सिन थेबेकी छ्या स्येबा चाला ओतान। 12 परमेश्वरगी खोपरोङला सिर च्युताते होदि बातओन थेबा खोपरोङ लाईदु मेन्देकी ख्योकोन लाईदु ईन सिन परमेश्वरगी थेबाला छ्या स्ये च्युता ओतान। थेबेकी साबाते होथे बाततेबा थरिङोला गा लाङच्येते बात लोप्कान्ते मिओनगी ख्योकोनला लाप्कीन बिन्दा ओत। दि गा लाङच्येते बात परमेश्वरगी स्वर्गनेकी ताङाते परमेश्वर आत्मे छ्य्वापेई थेबेकी ख्योकोनला लाप्कीन बिन्दा ओत। होदि बातओन परमेश्वर दूतओनगीङ आउदी खाला छ्या स्येबा सेम खिओ। पत्रुसकी मेलेबा काम माकेत सिन साबाते 13 परमेश्वरगी ख्योकोनला दोक लेमु खाबा ओतेकी था ख्योकोनगी थेकी खि साबाते काम खित्च्ये छ्य्वापाकामा स्येत खि। दाक्पोन सेम काबूला स्योक। थेमे येशू ख्रीष्ट ग्युरला ओङे छोमु परमेश्वरगी ख्योकोनला दया खाला पूरो खाला पापदुकी टाल्ला लेमु खिओ साबाते पक्काराङ खिओ सिन खेराङगी आश खाईन देता च्योकराङ ओङगो सिन टोक माज्येत। 14 लाःपा कोताते ङेन्कान्ते फिजा च्योकराङ ओङला परमेश्वरगी कोताते ङेन। गोमाबा ख्योकोन छ्याःङ छ्या मेस्येकान्ते मि च्योक दाक्पोन सेमला लाबा लाबा खिन ओतान, था थोक माकेत। 15 बरू सेमला पाप सिराते छ्याःङ मोज्योबा खाला काम बात जे खासीनोङ खेराङला थे खोरोङ दोन्दु स्योक सिन कातोङकान्ते परमेश्वरगी खाबा च्योकराङ खि। थे सेमला पाप सिराते छ्याःङ मेत। 16 परमेश्वर बातला “ख्योकोनगी जे खित्जीनोङ सेमला पाप सिराते छ्याःङ मोज्योबा खाला खि। च्यिला सासीन ङा सेमला पाप सिराते छ्याःङ मेताते ईन,” सिन परमेश्वरगी साबाते बात साला दुक। 17 थेमे परमेश्वरताङ प्रार्थना खित्जीन ख्योकोन थेला आबा सिन सिओ। थेकी सुङलाङ काका पाका मिक्किता खाला सुई चुक खाला दुका थे ताला न्याय खिओ। थोगी खेराङ दुरू मि लुङबे मि च्योकराङ ईन सिन सम्झे खाला सोन्ला देत देतसाकराङ ख्योकोनगी परमेश्वरला मन परे मिक्किच्येते छ्याःङ खिता मेङगो सिन ज्यीबा खिन लेमु खिन देत। 18 मोल च्याल्गीनकामा खेराङ ज्युज्यु पुर्खे पालोमेकी चले खिन वाबाते छ्याःङ काम लै मिक्किच्येते रीतिथिति छ्य्वापेकी खेराङला टालाते ईन सिन ख्योकोनला छ्याराङ ओत। थोक खिताला च्यालाते मोल सेरताङ चाँदी मेतान। सेर चाँदीनी ङीमाई छ्याःङ काम लै मिक्किच्या डुइओ। 19 ख्रीष्ट थे खोरोङ ज्यान बिन्ला स्यिजीन थे जीउदुकी थेन्दाते ठागी खित्सादु ख्योकोन लाईदु थे मोल छ्योलाते ईन। ख्रीष्टनी परमेश्वरला पूजा खिताला सोई खित्च्येते छ्याःङ खुना खोटी मेताते लुई रीउ च्योकराङ ओतान। 20 दि सा नाम ज्वा भन्दा गोमाकाराङ परमेश्वरगी थेला मिओनला पापदुकी डेलाला छाने खाबा ओतान। थेमे ख्योकोनला दोक खाला लेमु खिताला थे दि जुग सिन्दे खाला देमा वाबाते ईन। 21 थेकी खित्सादुराङ ख्योकोनगी परमेश्वरला विश्वास खित्च्येते थेमे परमेश्वरगी तेरग्यो सिन साबातेबा ङेत्क्यो सिन आश खिन देत्च्येते ईन। परमेश्वरगी थेला स्यिसादुकीङ सोम्बो लोगीन छ्येज्यीक मान बिन्दा ओत। 22 सत्यते बात ङेन्गीन ख्योकोन सेम खुदुक गालेकी ख्योकोनगी ज्येन आज्यो न्वाला खेकीकामा मेन्देकी पक्काराङ ङिङज्ये खित्च्येते ईन। थोगी ख्योकोनगी दोक्पोईकी ज्येनज्यीकला आउदी खाला ङिङज्ये खि। 23 परमेश्वरगी ख्योकोनला लोक्ला केर ज्युताच्योक खाईन साम्बाते जुनी बिन्दा ओत। दि काम थेकी थे खोरोङ बातकी छ्य्वापेई खाबाते ईन। पालोई स्यिला डोच्येते मि छ्य्वापेई फिजा केबाच्योक मेन्देकी नोमुङ फरक परे मिक्किच्येते थे खोरोङ बातकी छ्य्वापेई परमेश्वरगी ख्योकोनला दि साम्बाते जुनी बिन्दाते ईन। थे खोरोङ बातकी छ्य्वापेई परमेश्वरगी मि नाङ काम खिओ, परमेश्वर बातला जे साला दुक थे पक्काराङ ओङगो। 24 परमेश्वर बातला “मि जुनी सिरातेनी पाङगी नाङले सो च्योकराङ ईन। थेमे मि जतिराङ छ्ये ईन्सीनोङ, थेबाताङ जे ओत्सीनोङ होदोक्ते गाङे होथे सोकी मेन्दोक च्योकराङ ईन। सो काम्ग्यो, सोकी मेन्दोकोङ ओइले खाला ङीम्ला डुइओ। 25 तर प्रभु परमेश्वर बातचेन नोमुङ फरक परे मिक्किओ,” सिन साला दुक। ख्योकोनला लाप्कीन बिन्दाते गा लाङच्येते बादोङ होदि परमेश्वर बातराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.