१ यूहन्ना 5 - जिरेलयेशू परमेश्वर फुज्युङराङ ईन 1 येशू परमेश्वरगी तोङगो साबाते ख्रीष्ट ईन सिन पत्ते खित्कान्ते मि गाङे परमेश्वर फुज्युङ फुमु ओङाते मि ईन। आबा परमेश्वरला ङिङज्ये खित्कान्ते मिकी थे फुज्युङ फुमुलाङ ङिङज्ये खिओ। 2 ङुरूङ परमेश्वर फुज्युङ फुमुला ङिङज्ये खित्कान्ते ईन सिन दि बातकी छ्य्वापेई छ्या स्येक्यो। चुक सासीन ङुरूङ परमेश्वरला ङिङज्ये खिओ थेमे थेकी खि सिन कोताते खिओ। 3 परमेश्वरला ङिङज्ये खित्च्या सिरातेचेन थेकी खि सिन कोताते खित्च्येते ईन। थेकी खि सिन कोताते खिताला दुक्पाङ मेत। 4 च्यिला सासीन परमेश्वर फुज्युङ फुमु ओङाते मिओनगीचेन दि सा लुङबे मिओनगी खित्च्येते च्योक्ते मेलेबा काम छ्याःङ मिक्किता खाला देता थुप्क्यो। येशू ख्रीष्ट परमेश्वर फुज्युङ ईन सिन थेला विश्वास खालाराङ ङुरूङ थोक खाला देता थुप्क्यो। 5 दि सा लुङबे मिओनगी खित्च्येते च्योक्ते मेलेबा काम छ्याःङ मिक्किता खाला देता थुप्कान्ते सु ईन्दे ओना? दोक खाला देता थुप्कान्ते मिचेन येशू परमेश्वर फुज्युङ ईन सिन पत्ते खित्कान्ते मिराङ ईन। 6 येशू ख्रीष्ट स्वर्गनेकी देमा वाकीन छ्युला स्यूला लिन्च्येते बप्तिस्मा लाबा ओतान। थेमे ङुरूङ लाईदु थे खोरोङ ज्यान बिन्गीन स्या ओतान। थेकी छ्युला स्यूकीन बप्तिस्मा लाबातेकामा मेन, थे खोरोङ ज्यानराङ बिन्गीन स्या ओतान। दि बाततेबा परमेश्वर आत्मेकी ईन सिन सिओ। परमेश्वर आत्माचेन साँचोते बात खित्कान्ते ईन। 7 येशू परमेश्वर फुज्युङ ईन सिन छ्या स्येच्येते बात सुम ओत। 8 दि बात सुमकाराङ ताला येशू परमेश्वर फुज्युङराङ ईन सिन लेमु खाला छ्या स्येक्यो। दि बात सुमचेन परमेश्वर आत्मेकी साबाते बात, येशू ख्रीष्टकी छ्युला स्यूकीन बप्तिस्मा लाबाते बात थेमे थेकी थे खोरोङ ज्यान बिन्गीन स्याप्ते काम ईन। 9 सुइँदा मिकी दि बात दोक दोक ईन सिन सानामेई ङुरूङ दाक पत्ते खिओ सासीन च्यि परमेश्वरगी थे खोरोङ फुज्युङ चुक्ते ईन्दे सिन साबाते बात ङुरूङगी पत्ते मिक्किच्या? मिकी साबाते बात भन्दा परमेश्वरगी थे खोरोङ फुज्युङ चुक्ते ईन्दे सिन साबाते बात झन पत्ते खिता थुप्च्येते मेनरो? 10 थोगी येशू परमेश्वर फुज्युङ ईन सिन थेला विश्वास खित्कान्ते मिकी थे परमेश्वर फुज्युङ ईन सिरच्येते बातला छ्याःङ शंका मिक्किओ। थे परमेश्वर फुज्युङ मेन सिन सिरकान्ते मिकीचेन परमेश्वरनी ढाँर खित्कान्ते ईन साबाते ईन। च्यिला सासीन थोक्ते मिकी परमेश्वरगी थे खोरोङ फुज्युङ चुक्ते ईन्दे सिन साबाते बात पत्तेराङ खाबा मेङगो। 11 परमेश्वरगी थे खोरोङ फुज्युङ चुक्ते ईन्दे सिन साबाते बात दिराङ ईन। च्यि सासीन परमेश्वरगी ङुरूङला नोमुङ मिसिन्च्येते जुनी बिन्दा ओत। मिओनला दि जुनी तेरकान्ते थे फुज्युङराङ ईन। 12 जो जसताङ परमेश्वर फुज्युङ ङ्योम्बु देत्ला दुक थे थेकी नोमुङ मिसिन्च्येते जुनी ङेता ओत। थे ङ्योम्बु देता मेताते मिकीचेन दोक्ते जुनी ङेता मेत। यूहन्नेकी चिट्ठी टिला सिन्दे खाला साबाते बात 13 ख्योकोनगी परमेश्वर फुज्युङला विश्वास खाबा ओत। थोगी ख्योकोनगी नोमुङ मिसिन्च्येते जुनी ङेता ओत सिन लेमु खाला छ्या स्येस्यीत सिन ङे ख्योकोनला दि बाततेबा टिबाते ईन। 14 ङुरूङगी खाबाते प्रार्थना परमेश्वरगी पक्काराङ थोक्यो सिन ङुरूङला छ्याराङ ओत। ङुरूङगी खइँदा बातकी लाईदु प्रार्थना खासीन थेमे थे बात परमेश्वरगी खिता चाला च्योकराङ ईन्सुङ सासीन ङुरूङगी थेला जे नाङ सासीनोङ थेकी ङेन्ग्यो। 15 ङुरूङगी जे नाङ सिन प्रार्थना खासीनोङ थेकी ङेन्ग्यो सिन छ्या ओतेकी थेला नाङ साबाते थेकी दाक तेरग्यो सिन ङुरूङ छ्याःङ शंका मिक्किओ। 16 थेमे ख्योकोन सुइँदेकी खेराङ आज्यो न्वा सुइँदेकी पाप खिता थोङसीन थेमे थे पाप खाबेकी थे स्यिला नरककुण्डमा स्यूक्पा फाप्च्या मेत्सीन ख्योकोन थोक खिता थोङकानगी परमेश्वरगी थेला थारच्येते लाम तेरस्यीत सिन प्रार्थना खि। दोक खाईन प्रार्थना खानामेई परमेश्वरगी थेला नोमुङ मिसिन्च्येते जुनी मेतेरो सिन मिसिरो। ङे थोक्ते मि लाईदु प्रार्थना खि साबातेचेन खालि पाप खाबेकी खित्सादु स्यिला नरककुण्डमा स्यूक्पा माफाप्कान्ते मि लाईदुकामा ईन। पाप खाबेकी स्यिला नरककुण्डमा स्यूक्पा फाप्कान्ते मि लाईदु थोक खि सिनचेन ङे साबाते मेन। च्यिला सासीन दोक्ते पापोङ ओङगो, थे पाप खित्कान्ते मिचेन स्यिला नरककुण्डमा स्यूइओ। 17 ईन्दाका जुन मेलेबा कामताङ बादोङ पापराङ ईन। ईन्सीनोङ दोक्ते पापोङ ओङगो, थे पाप खित्कान्ते मि स्यिला नरककुण्डमाराङचेन स्यूक्पा माफाबो। 18 ङुरूङला दि बात लेमु खाला छ्या ओत। च्यि सासीन परमेश्वर फुज्युङ फुमु ओङाते मि सुङगीङ पाप खिन मेदेदो। परमेश्वर फुज्युङगी थेबाला रोकालो गोठालो खित्च्येते ईन्देकी मिला मेलेबा खित्कान्ते शैतानगी थेबाला रिक्ला द्वाबोङ मुथुबो। 19 दि सा लुङबा गाङे मिला मेलेबा खित्कान्ते शैतान अधीनला ओत। ईन्सीनोङ ङुरूङचेन परमेश्वर फुज्युङ फुमु ईन सिन ङुरूङला लेमु खाला छ्या ओत। 20 ङुरूङला ज्येनोङ बात च्यि छ्या ओते सासीन परमेश्वर फुज्युङगी दुरू वाकीन परमेश्वर सु ईन्दे, चुक्ते ईन्दे सिन ङुरूङला छ्या स्ये च्युत्सुङ। थेकी दोक खानामेई ङुरूङ सत्यते परमेश्वरताङ डिक्पा थुप्सुङ थेमे परमेश्वर फुज्युङ येशू ख्रीष्टताङ डिक्पा थुप्सुङ। येशू ख्रीष्टचेन सत्यते परमेश्वर ईन, नोमुङ मिसिन्च्येते जुनी तेरकान्तेङ थेराङ ईन। 21 थोगी फिजावे, ख्योकोनगी ल्हा लु सिराते माने खिताराङ मेङगो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.