१ यूहन्ना 3 - जिरेलसु सु परमेश्वर फुज्युङ फुमु ईन्दे 1 लो विचार खिते, आबा परमेश्वरगी ङुरूङला चुक आउदी ङिङज्ये खासुङा। थेकी थोक आउदी ङिङज्ये खाईन ङुरूङला थे खोरोङ फुज्युङ फुमु ईन सिओ। ईन्दाबोङ ङुरूङ थे फुज्युङ फुमुराङ ईन। दि सा लुङबे मिओनगी ङुरूङ चुक्ते मि ईन्दे सिन छ्याःङ छ्या मेस्येओ। च्यिला सासीन थेबेकी परमेश्वर सु ईन्दे सिन छ्या मास्येसुङ। 2 ङिङज्येते फिजावे, था ङुरूङ परमेश्वर फुज्युङ फुमु ओङगीन सिन्दा ओत। था तिरी ङुरूङ चुक ओङोङा सिरच्येते बात थोरूमसाक ङुरूङला छ्या मेत। दि बातज्यीकचेन ङुरूङला लेमु खाला छ्या ओत। च्यि सासीन येशू ख्रीष्ट ग्युरला ओङे छोमु ङुरूङोङ थे च्योकराङ ओङगो। च्यिला सासीन थे जस्तो दुक उस्तोराङ ङुरूङगी थेला थोङा ङेत्क्यो। 3 तिरी पक्काराङ दोक ओङगो सिन आश खाला देत्कान्ते मिकीचेन ख्रीष्टकी च्योकराङ मेलेबा काम सिराते छ्याःङ मिक्किता खाला देत्क्यो। 4 पाप खित्कान्ते मिकी परमेश्वरगी खि साबाते माङेन्दाते ईन। सिइ सासीन परमेश्वरगी खि साबाते मेङेन्च्येतेराङ पाप खित्च्येते ईन। 5 मिओनगी खाबाते पापकी सजाय भोगे खाला थेबाला पापदुकी डेलालाराङ येशू ख्रीष्ट दुरू वाबाते ईन सिन ख्योकोनला छ्याराङ ओत। थेकी नोमुङ पाप खाबा मेत। 6 थेत्ताङ डिक्ला देत्कान्ते मिकीचेन सुङगीङ पाप खिन मेदेदो। पाप खिनराङ देत्कान्ते मि सुङगीङ थेला थोङाङ मेत, थे सु ईन्दे, चुक्ते ईन्दे सिन छ्याङ स्येबा मेत। 7 फिजावे, सुङगीङ ख्योकोनला छक्के खाला येशू ख्रीष्ट छ्य्वापेई ठाल मुज्युत्स्यीत। परमेश्वरगी खि साबाच्योक खित्कान्ते मिकीचेन येशू ख्रीष्टकी खाबा च्योकराङ खिओ। येशू ख्रीष्टचेन लेमुते कामताङ बातकामा खित्कान्ते ईन। 8 पाप खिनराङ देत्कान्ते मिचेन शैतानताङ डिक्कान्ते ईन। शैतानगीनी च्याक दि जुग शुरू ओङजीनमेईराङ पापकामा खिन ओत। शैतानगी खित्च्येते काम गाङे ङ्ये च्युत्ला खतम ज्वाप्लाराङ परमेश्वर फुज्युङ दुरू वाबाते ईन। 9 परमेश्वर फुज्युङ फुमु ओङाते मि सुङगीङ पाप खिनराङ मेदेदो। च्यिला सासीन परमेश्वर थे मि आबा ओङगीन थे मि बानी खुदुक गाला ओत। परमेश्वर फुज्युङ फुमु ओङेकी थोक्ते मिओनगी पाप खिन देताराङ मुथुबो। 10 सु सु परमेश्वर फुज्युङ फुमु ईन्दाका सु सु शैतान सन्तान ईन्दाका सिन ङुरूङगी लेमु खाला डेला थुप्क्यो। चुक खाला सासीन लेमु काम मिक्किकान्ते मिङ दाक्पोन आज्यो न्वाला ङिङज्ये मिक्किकान्ते मिङ परमेश्वर फुज्युङ फुमु ईनराङ मेन। ज्येनला ङिङज्ये खित्च्येते बात 11 ङुरूङगी दोक्पोईकी ज्येनज्यीकला ङिङज्ये खिता फाप्क्यो सिन ख्योकोनगी येशू ख्रीष्टला विश्वास खिता छोमुमेईराङ थोबाते बात ईन। 12 ङुरूङगी कयिनगी खाबाच्योक खिता मेङगो। मिला मेलेबा खित्कान्ते शैतानताङ डिक्कान्ते ईन्देकी थेकी थे खोरोङ न्वालाराङ सेता ओतान। थेकी च्यिला न्वातेला सेता ओताने छ्या ओत? न्वाते च्योक खाला लेमुते कामताङ बात खित्कान्ते मि मेन्देकीराङ थेकी न्वातेला सेता ओतान। 13 न्वावे, दि सा लुङबे मिओनगी ख्योकोनला मिगी थोङसार्मु खित्जीन थेबेकी च्यिला थोक खिताका सिराच्योक माकेत। 14 ङुरूङगी स्यिला सजाय ङेत्सादुकी थारगीन नोमुङ मिसिन्च्येते जुनी ङेत्कीन सिन्दा ओत सिन ङुरूङला छ्या ओत। च्यिला सासीन ङुरूङ दाक्पोन आज्यो न्वाला ङिङज्ये खिओ। ज्येनला ङिङज्ये मिक्किकान्ते मिचेन स्यिला सजाय ङेत्सादुकी थोरूमोङ थारा मेङगो। 15 दाक्पोन आज्यो न्वाला मिगी थोङसार्मु खित्कान्ते मिचेन ज्यानमारा ईन। थोक्ते मि नोमुङ मिसिन्च्येते जुनी ङेताते मि मेन सिन ख्योकोनला छ्याराङ ओत। 16 ज्येनला ङिङज्ये खित्च्येते च्यि ईन्दे सिन ङुरूङगी येशू ख्रीष्टकी खाबाते काम ताला छ्या स्येक्यो। थेकी ङुरूङ लाईदु थे खोरोङ ज्यानराङ बिन्दा ओतान। ङुरूङगीङ दाक्पोन आज्यो न्वाकी लाईदु दाक्पोन ज्यान तेरा फाप्क्यो। 17 दोक सिइना, सुइँदा मित्ताङ जेसुकै वालछ्येल दुक थेमे थेकी थे खोरोङ आज्यो न्वातेबा सुइँदा दुक्पा ङेत्कीन फेटेक फेटेक परे खाबा थोङजीनोङ थेला मिक कार्बोकीङ ग्युरला मातादुक सासीन च्यि थेकी परमेश्वरगी ज्येनला ङिङज्ये खि साबाच्योक खाईन ङिङज्ये खाबाते ईनरो? 18 बात दोक ईन्देकी फिजावे, ङुरूङगी ज्येनला ङिङज्ये खिओ सिन खेकीकामा मेन, सत्यते परमेश्वरगी खि साबाच्योक खाला कामगीराङ खाला तेन्दा फाप्क्यो। 19 थोक खासीन ङुरूङगी दाक्पोन सत्यते परमेश्वरताङ डिक्कान्ते मि ईन सिन सिरा थुप्क्यो। थेमे परमेश्वर दोन्दु छ्याःङ ज्यीबा खिता माफाबो। 20 खइँदा खानामेई कहिले कहिले ङुरूङला ङे च्यिला थोक खाताका सिन मेलेबा लाङगो। थोक लाङजीन ङुरूङगी ङे सेमगी बात परमेश्वरला छ्या मेताते मेन, थे खापान खापान छ्ये ईन, थेकी छ्या मेस्येच्येते बात छ्याःङ मेत सिरच्येते बात टोक ज्येता मेङगो। 21 ङिङज्येते फिजावे, दाक्पोनते ङे च्यिला थोक खाताका सिन मेलेबा लाङच्येते छ्याःङ मेत्सीन ङुरूङला परमेश्वर दोन्दु छ्याःङ ज्यीबा मालाङो। 22 थेमे ङुरूङगी जे नाङ सासीनोङ परमेश्वरगी दाक तेरग्यो। च्यिला सासीन ङुरूङ थेकी खि सिन कोताते ङेन्ग्यो थेमे थेला मन परे खित्च्येते काम खिओ। 23 थेकी खि सिन कोतातेचेन थे खोरोङ फुज्युङ येशू ख्रीष्टला विश्वास खित्च्येते थेमे येशू ख्रीष्टकी खि साबाच्योक खाला दोक्पोईकी ज्येनज्यीकला ङिङज्ये खित्च्येतेराङ ईन। 24 परमेश्वरगी खि सिन कोताते खित्कान्ते मिओनचेन थेत्ताङ डिक्ला देत्क्यो। थोक्ते मिओनताङ परमेश्वर ङ्योम्बुराङ देत्क्यो। परमेश्वर ङुरूङताङ ङ्योम्बु देत्क्यो सिन ङुरूङगी चुक खाला छ्या स्येकीते? दि बातचेन ङुरूङगी थेकी ङुरूङला बिन्दाते थे खोरोङ आत्मे छ्य्वापेई छ्या स्येक्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.