१ यूहन्ना 2 - जिरेलमिकी चुक खिता फाप्कीते 1 फिजावे, ख्योकोनगी पाप मिक्किस्यीत सिनराङ ङा दि बाततेबा टिगीन ओत। सुइँदेकी दाक पाप खासीनोङ थेला सजाय मातेर सिन ङुरूङ लाईदु आबा परमेश्वरताङ बात खाला तेरकान्ते मेराज्यीक ओत। थेचेन येशू ख्रीष्टराङ ईन। थे लेमुते कामताङ बातकामा खित्कान्ते ईन। 2 ङुरूङ पाप माफ तेरा थुप्स्यीत सिन येशू ख्रीष्ट ङुरूङगी खाबाते पापकी सजाय भोगे खाईन स्याप्ते ईन। ङुरूङतेकामा मेन, सा लुङबा खाङगी मि पाप माफ तेरा थुप्स्यीत सिन थे थोक खाईन स्याप्ते ईन। 3 थेमे परमेश्वरगी खि सिन कोताते खानामेकी ङुरूङगी परमेश्वर सु ईन्दे, च्यि खिते सिन लेमु खाला छ्या स्येक्यो। 4 सुइँदेकी परमेश्वर सु ईन्दे, च्यि खिते सिन ङाला लेमु खाला छ्या ओत खिदुक तर परमेश्वरगी खि सिन कोताते मिक्किदुक सासीन थे ढाँर खित्कान्ते ईन। थोक्ते मिकी सत्यते परमेश्वरगी साबाते बात दाक्पोन सेमगी नाङ ज्य्वाबा मुथुबो। 5 सुइँदेकी परमेश्वरगी खि सिन कोताते खिदुक सासीन थे खोरोङगी ङिङज्ये खाईन खिता चालाते काम परमेश्वरगी थोक्ते मि जुनीदु पूरो खाला खिओ। ङुरूङगी दाक्पोन परमेश्वरताङ डिक्ला देत्कान्ते ईन सिन चुक खाला छ्या स्येकीते सासीन 6 परमेश्वरताङ डिक्ला देत्कान्ते ईन सिन सिरकान्ते मिकीचेन काम बात जे खित्जीनोङ येशूकी खाबा च्योकराङ खिता फाप्क्यो। परमेश्वरगी साबा च्योकराङ खिता फाप्च्येते बात 7 ङिङज्येते फिजावे, प्रभु येशूकी खि सिन कोताते ङे टिगीन ओताते दि बात ख्योकोनगी गोमा माथोबाते बातनी मेन। दि बात ख्योकोनगी थेला विश्वास खिता छोमुमेईराङ थोबाते बात ईन। दि बातचेन ख्योकोनगी थोबा ओताते गा लाङच्येते बातराङ ईन। 8 ईन्सीनोङ ङा ख्योकोनला थेकी खि सिन कोताते ज्येन बातज्यीक टिगीन ओत। दोक चुक खाला खित्च्ये सिन थे खोरोङगी तेन्गीन बिन्दा ओतान। थेमे ख्योकोनगीङ थोकराङ खिन दुक। च्यिला सासीन मुन्दाक तोरला डुइन ओत। थेमे स्वर्गे नाम्दाक दुरू वाकीन सिन्दा ओत। 9 सुइँदेकी ङानी नाम्दाकला देत्ला लेमु काम खित्कान्ते मि ईन खिदुक तर थे खोरोङ आज्यो न्वाला मिगी थोङसार्मु खिदुक सासीन थेनी थोरूमसाक मुन्दाकला देत्ला मेलेबा काम खित्कान्ते मि ईन। 10 दाक्पोन आज्यो न्वाला ङिङज्ये खित्कान्ते मिचेन नाम्दाकला देत्ला लेमु काम खित्कान्ते ईन। लेमु काम खानामेई थेला छ्याःङ मेलेबा मेङगो। 11 दाक्पोन आज्यो न्वाला मिगी थोङसार्मु खित्कान्ते मिकीचेन थे खोरोङगी च्यि खिन ओते, खापा डुइन ओते सिन छ्याःङ छ्या मेस्येओ। मुन्दाकला देत्कीन मेलेबा काम खिन ओतेकी खित्सादु थे अन्ध च्योकराङ गाला ओङगो। 12 फिजावे, येशू ख्रीष्टकी खाबाते कामगी खित्सादु ख्योकोन पाप माफ ओङा ओतेकी ङा ख्योकोनला दि बात टिगीन ओत। 13 छ्येवे, दि सा नाम ज्वा भन्दा गोमामेईराङ ओताते ख्रीष्टला ख्योकोनगी छ्या स्येबा ओतेकी ङा ख्योकोनला दि बात टिगीन ओत। स्याराते मिवे, ख्योकोनगी खेराङला मेलेबा खित्कान्ते शैतानला ग्याल्गीन सिन्दा ओतेकी ङा ख्योकोनला दि बात टिगीन ओत। फिजावे, ख्योकोनगी आबा परमेश्वर सु ईन्दे, चुक्ते ईन्दे सिन छ्या स्येबा ओतेकी ङे ख्योकोनला दि बात टिबाते ईन। 14 छ्येवे, दि सा लुङबा ज्वा भन्दा गोमामेईराङ ओताते ख्रीष्टला ख्योकोनगी छ्या स्येबा ओतेकी ङे ख्योकोनला दि बात टिबाते ईन। स्याराते मिवे, ख्योकोनगी परमेश्वर शक्ति ङेता ओतेकी, परमेश्वर बात खेराङ सेमला ज्याक्पेकी थेमे खेराङला मेलेबा खित्कान्ते शैतानला ग्याल्गीन सिन्दा ओतेकी ङे ख्योकोनला दि बात टिबाते ईन। 15 ख्योकोन सुङगीङ परमेश्वरला माने मिक्किकान्ते दि सा लुङबे मिओनगी खिताच्योक माकेत, दि सा लुङबे सम्पत्तिताङ होदोक्ते छ्याःङ कुरोतेङ लोभ माकेत। परमेश्वरला माने मिक्किकान्ते दि सा लुङबे मिओनगी खिताच्योक खित्कान्ते मिकीचेन आबा परमेश्वरला ङिङज्ये खिता मुथुबो। 16 दि सा लुङबे मिओनगीनी जसकीङ दाक्पोनला जे जे खिता सेम लाङगीदुक थेराङ खित्च्येते, मिगी थोङाते जति जेसुकैते लोभ खित्च्येते थेमे ङा छेत सुङ मेन सिराच्योक खित्च्येतेकामा खिओ। थोक खि सिन आबा परमेश्वरगी साबाते ईनराङ मेन। दोक खित्च्येतेनी दि सा लुङबे मि खोपरोङ सेमगी नाङदुई ओङच्येते ईन। 17 होथोक थोक खित्कान्ते मिओन स्यिला डुइओ थेमे दि सा लुङबाङ था पालोई नाश गाल्ला तोरला डुइओ। परमेश्वरगी साबा च्योकराङ खित्कान्ते मिचेन सधैँभरि थेत्ताङराङ देता ङेत्क्यो। येशू ख्रीष्टला विरोध खित्कान्ते मि बात 18 फिजावे, दि जुग सिन्दे बेला लेप्सुङ। दि जुग सिन्दे खाला ख्रीष्टला विरोध खित्कान्ते मि ओङगो सिन ख्योकोनगी थोबाराङ ओत। थरिङोला थोक्ते मि काल्बेई थेन्गीन सिन्दा ओत। थोगी ङुरूङगी दि जुग सिन्दे बेला लेपाक्वा सिन लेमु खाला छ्या स्येक्यो। 19 ईन्दानी गोमा होथेबाङ ङुरूङताङ ङ्योम्बुराङ ओतान। तिरी थेबा ङुरूङताङ दाक ठाल्गीन गाल्सुङ। थेबाङ ङुरूङ च्योक्तेराङ ईन्दा ईन्सीन ङुरूङताङ डिक्ला देत्च्या ओतान। थोक खाईन थेबा ङुरूङताङ ठाल्गीन गालेकी थेबा सुङ ङुरूङताङ डिक्कान्ते मि मेन सिन गाङेकी छ्या स्येक्यो। 20 दोक ईन्सीनोङ सेमला पाप सिराते छ्याःङ मेताते ख्रीष्टकी ख्योकोनलाचेन परमेश्वर आत्मा बिन्दा ओत। थेमे ख्योकोन गाङेकी सत्यते बात छ्या स्येबा ओत। 21 सत्यते बात च्यि ईन्दे सिन ख्योकोनला छ्या मेत सिन ङे दि बात टिबाते मेन। सत्यते बात ख्योकोनला लेमुराङ खाला छ्या ओत। सत्यते बात खित्कान्तेकी नोमुङ ढाँर मिक्किओ सिनोङ ख्योकोनला छ्याराङ ओत। 22 थोक ईन्सीन था सुला ढाँर खित्कान्ते ईन सिन सिरच्ये? जसकी येशू परमेश्वरगी तोङगो साबाते ख्रीष्ट मेन खिदुक थेचेन ढाँर खित्कान्ते ईन। ख्रीष्टला विरोध खित्कान्ते मि होथेराङ ईन। थोक्ते मिकीचेन येशू परमेश्वर फुज्युङ मेन थेमे परमेश्वर थे आबा मेन सिन सिओ। 23 येशूला परमेश्वर फुज्युङ मेन सिन सिरकान्ते मित्ताङ आबा परमेश्वर ङ्योम्बु मेदेदो। थेला परमेश्वर फुज्युङ ईन सिरकान्ते मित्ताङकामा आबा परमेश्वर ङ्योम्बु देत्क्यो। 24 थोक ईन्देकी खेराङगी येशूला विश्वास खिता छोमुमेई थोबाते बात ङेन्गीन देता मातोङ। थेरू खि साबाच्योक खिनराङ देत्सीन ख्योकोनचेन परमेश्वर फुज्युङ थेमे आबा परमेश्वरताङ डिक्ला देता ङेत्क्यो। 25 थेबाताङ डिक्ला देता ङेत्च्येतेराङ येशू ख्रीष्टकी ङुरूङला तेरग्यो साबाते नोमुङ मिसिन्च्येते जुनी ईन। 26 ख्योकोनला छक्के खाला येशू ख्रीष्ट छ्य्वापेई डेला छोल्कान्ते मिओन चुक्ते ईन्दे सिराला ङे दि बाततेबा टिबाते ईन। 27 ख्रीष्टकी ख्योकोनला बिन्दाते परमेश्वर आत्मा ख्योकोनताङ ओत्नामेकी सुङगीङ ख्योकोनला लोपा माफाबो। खेराङगी छ्या स्येबा फाप्च्येते बात गाङे ख्योकोनला थेकीराङ लाप्ला तेरग्यो। थेकी साँचोते बातकामा लोप्क्यो। थेकी खेराङला लापा च्योकराङ खाला येशू ख्रीष्टताङ डिक्ला देत। 28 थेमे था फिजावे, ख्योकोन येशू ख्रीष्टताङ डिक्लाराङ देत। थोक खाईन देत्सीन थे ग्युरला ओङे छोमु सजाय ङेत्कीता सिन छ्याःङ ज्यीबा थेमे ङोचा मिक्किता खाला ङुरूङ थे दोन्दु ड्वा थुप्क्यो। 29 थेकी मेलेबा कामताङ बात सिराते नोमुङ छ्याःङ खाबा मेत सिन ख्योकोनला छ्याराङ ओत। थोगी लेमुते कामताङ बात खित्कान्ते मिचेन गाङे परमेश्वर फुज्युङ फुमु ओङाते मि ईन सिनोङ ख्योकोनला छ्याराङ ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.