१ यूहन्ना 1 - जिरेलमिओनला जुनी तेरकान्ते येशू ख्रीष्ट बात 1 ङ्योकोन दि बात गाङेला सिओ। च्यि सासीन दि सा नाम ज्वा भन्दा गोमामेईराङ थे बात सिराते ओतान। मिओनला जुनी तेरकान्तेचेन थेराङ ईन। थेकी साबाते बातओन ङ्योकोनगी ङेराङ नामज्योककीराङ थोबाते ईन। थेमे ङेराङ मिगीराङ थेला थोङाते ईन। थेत्ताङनी ङ्योकोन ङ्योम्बुराङ देतातेङ ईन। 2 मिओनला जुनी तेरकान्ते थे दुरू वाकीन ङ्योकोनगी थेला थोङाते ईन। ङ्योकोन ङेराङगी थोङाते थेमे थोबाते बात ख्योकोनला सिओ। मिओनला नोमुङ मिसिन्च्येते जुनी तेरकान्ते थे दुरू ओङा भन्दा गोमा आबा परमेश्वरताङ ङ्योम्बुराङ ओतान। 3 ख्योकोनोङ ङ्योकोनताङ ङ्योम्बुराङ डिक्ला देता थुप्स्यीत सिनराङ ङेराङगी थोङाते थेमे थोबाते दि बाततेबा ख्योकोनलाङ सिओ। ङुरूङचेन आबा परमेश्वर थेमे थे फुज्युङ येशू ख्रीष्टताङ ङ्योम्बुराङ डिक्ला देत्क्यो। 4 दोक ओङला ङुरूङ छ्याःङ पीर मिक्किता खाला आउदी गा खिन देता थुप्स्यीत सिन ङ्योकोन दि बाततेबा टिगीन ओत। परमेश्वर लेमु कामकामा खित्कान्ते ईन 5 येशू ख्रीष्टकी ङेराङला जे साबा ओतान थे बातराङ ङ्योकोन ख्योकोनला सिन ओत। च्यि सासीन परमेश्वर स्वर्गे नाम्दाक ईन। थेमे मेलेबा सिराते थेकी नोमुङ छ्याःङ मिक्किओ। 6 थोक ईन्देकी ङुरूङ परमेश्वरताङ ङ्योम्बुराङ डिक्ला देत्कान्ते मि ईन सालाङ मेलेबा कामराङ खिन देत्सीन ङुरूङगी ढाँर खाबाते ईन, सत्यते परमेश्वरगी खि साबाच्योक खाबाते मेन। 7 परमेश्वर नाम्दाकला देता ओता च्योकराङ खाला ङुरूङोङ थे नाम्दाकला देत्कीन लेमु काम खासीन ङुरूङ दाक्पोन नाङ ङ्योम्बुराङ डिक्ला देता थुप्क्यो। थेमे परमेश्वर फुज्युङ येशू थे खोरोङ ज्यान बिन्ला स्यिजीन थे जीउदुकी थेन्दाते ठागी खित्सादु ङुरूङ पाप गाङे माफ ओङगो। 8 ङे छ्याःङ पाप खाबा मेत सासीनचेन ङुरूङगी दाक्पोनगी ठुबाते डालुम नाङ दाक्पोनराङ स्यूक्च्येते काम खाबाते ईन। थोक सासीन सत्यते परमेश्वरगी साबाते बात ङुरूङगी दाक्पोन सेमगी नाङ ज्य्वाबा मुथुबो। 9 बरू ङुरूङगी ए परमेश्वर, ङ्योकोनगी दोक दोक पाप खाबाप, थोक खाबाते लेमु मेन्दाक्वा सिन सासीन थेकी ङुरूङ पाप माफ तेरग्यो, ङुरूङगी खाबाते गाङे मेलेबा काम माफ खिओ। च्यिला सासीन परमेश्वर थे खोरोङगी खिओ साबाच्योक खित्कान्ते थेमे लेमु काम खित्कान्ते ईन। 10 तर ङुरूङगी ङे नोमुङ छ्याःङ पाप खाबाराङ मेत सिन सासीन ङुरूङगी परमेश्वर ढाँर खित्कान्ते ईन साबाते ईन। ङुरूङगी दोक सासीन परमेश्वर बात दाक्पोन सेमला ज्य्वाबा मुथुबो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.