१ कोरिन्थी 9 - जिरेलपावलगी थे खोरोङ अधिकार बात खाबाते 1 च्यि ङाराङगी खिता चालाते काम ङे ङाराङ खुशीकी खिता मेङेदोतरो? च्यि ङाङ येशू ख्रीष्टकी खटे खाबाते मि मेनरो? च्यि ङे ङुरूङ प्रभु येशूला थोङा मेत साबाप? थेमे च्यि ङे प्रभु येशूकी ङाला कोताते काम खाबेकीका ख्योकोनगी थेला विश्वास खाबाते मेनरो? 2 ज्येनगी ङाला येशू ख्रीष्टकी खटे खाबाते मि मेन खिदुक्लो। ख्योकोनगीनी थोक मिसिरो सिन ङाला छ्या ओत। च्यिला सासीन ङे ख्योकोन नाङ गा लाङच्येते बात लाप्नामेई ख्योकोनगी प्रभु येशूला विश्वास खाबेकी ङा येशू ख्रीष्टकी खटे खाबाते मि ईन सिरच्येते बात लेमु खाला छ्या स्येक्यो। 3 ङा येशू ख्रीष्टकी खटे खाबाते मि मेन सिरकान्तेबाला ङा दोक सिओ। 4 च्यि ङ्योकोनगीचेन गा लाङच्येते बात लाप्नामेई ङेराङला साप थुङा गोच्येते लिन्दा ङेत्च्येते मेनरो? 5 येशू ख्रीष्टकी खटे खाबाते ज्येनतेबा, प्रभु येशू न्वाओन थेमे पत्रुसकी खिताच्योक फेम्मेतेबाङ येशूला विश्वास खित्कान ईन्देकी ङ्योम्बुराङ टीकीन ख्याम्बाच्योक ङेङ खिता मुथुबो साबाप? 6 थेमे च्यि बारनाबासताङ ङेचेन ङेराङ सुबा स्वाप्ला ज्येनोङ काम खिता फाप्च्येते ईनरो? 7 च्यि ख्योकोनगी सुइँदा लडाइँला डोकान्ते मिल्टेरीकी थे खोरोङ खर्च सोकीन गालाते थोङा ओत? थेमे च्यि अंगूर खेती खित्कान्ते मिकी थे खोरोङ स्यीङगी अंगूर मास्साओ? थोकराङ खाला च्यि रा लुक सोला सुइँदेकी थेबे थारा ओमा मास्साओतरो? 8 च्यि ङे थाल्ला भर्खर साबाते बातओन मि बात च्योककामा लाङगीदुक? दोक्ते बातनी परमेश्वर नियमलाङ साबा ओत। 9 चुक सासीन मोशेकी टिबाते परमेश्वर नियमला “दाइँ खित्कान्ते लाङला खाम्तोर माकोन,” सिन साबा ओत। च्यि परमेश्वरगी लाङलाकामा च्यि गोकीते, चुक खिता फाप्कीते सिन सुर्ता खिओ साबाप? 10 परमेश्वर बातला साबाते दि बात परमेश्वरगी ङ्योकोन लाईदुराङ साबाते ईन। च्यिला सासीन लाङ मोत्कानताङ अन्न ङाक्कानगी खोपरोङ बनी ङेत्क्यो सिनराङ थोक खिओ। 11 बात दोक ईन्देकी ङ्योकोनगी ख्योकोनला गा लाङच्येते बात सोन देपाच्योक खाईन लाप्कीन बिन्नामेई च्यि ख्योकोनगी ङ्योकोनला साप थुङा गोच्येते तेरा फाप्च्येते मेनरो? 12 ख्योकोन नाङ काम खित्कान ज्येनगी खोपरोङला गोच्येते ख्योकोनताङ लिन्गीदुक सासीन झन च्यि ङ्योकोनगीनी लिन्दा ङेत्च्येते मेनरो? ङ्योकोनला गोच्येते ख्योकोनगी तेरा फाप्च्येते ईन्सीनोङ ख्रीष्टते गा लाङच्येते बात गाङेकी लेमु खाला ङेन्स्यीत सिन ङ्योकोनगी बरू ङेराङगी दुक्पा खाबाप, ख्योकोन छ्य्वापेई छ्याःङज्यीक खाङज्यीक माला। 13 परमेश्वर मन्दिर नाङ काम खित्कान्ते मिओनगी थेरू चढे खाबाते नाङदुकी दाक्पोन बो ङेत्क्यो। थोकराङ खाला थेरू भोग तेरकान्ते मिओनगीचेन थे पूजा खाबाते नाङदुकी खोपरोङ बो ङेत्क्यो सिन च्यि ख्योकोनला छ्या मेत? 14 होदोकराङ खाला गा लाङच्येते बात लोप्कान्तेबेकीङ थे कामगी छ्य्वापेकीराङ खोपरोङ जीउ पाला खित्स्यीत सिन प्रभु येशूकी कोता ओत। 15 दोक खाला ङेते नाङ सिरच्येते अधिकार ओत्सीनोङ ङे थोरूमसाक सुङताङ छ्याःङ लाबा मेत। ङाराङला गोच्येते ख्योकोनताङ नाङ सिराप सिनोङ ङे दि बात टिबाते मेन। ख्योकोनताङ खइँदा लाला गा लाङच्येते बात लोपा भन्दानी बरू ङाला स्याप्ते लेमु लाङगीदुक। च्यिला सासीन सुङताङ छ्याःङज्यीक खाङज्यीक मिलिन्दा खाला दि काम खित्जीनराङ ङाला आउदी गा लाङगीदुक, दि बातलाचेन ङा छ्येराङ खिओ। 16 ईन्दाका गा लाङच्येते बात ज्येनला लोप्जीन ङे छ्ये खिता फाप्च्येते बात छ्याःङ मेत। दि बातनी ङे लोपाराङ फाप्क्यो। थोक माक्यासीन ङाला तिरी आउदी ज्यीबा लाङच्या मेलेबा ओङगो। 17 थेमे दि काम ङाराङ खुशीकी खाबाते ईन्सीन तिरी ङे खइँदा इनाम ङेत्च्या ओतान। तर परमेश्वरगीराङ ङाला दि बात लोप्च्येते जिम्मा बिन्देकी ङा दि काम खिन ओत। 18 थोक सासीन च्यि ङे छ्याःङ इनाम मेङेदो? ङाराङला गोच्येते ज्येनताङ लिन्च्येते अधिकार ओत्सीनोङ ङा सुङताङ छ्याःङ मिलिन्दा खाला गा लाङच्येते बात लोप्क्यो। ङे दोक खित्च्येतेराङ ङे ङेत्च्येते इनाम ईन। पावलगी थे खोरोङ चुक खाला काम खिते सिन साबाते 19 ईन्दानी ङा सुङगीङ योक्पो मेन। ङाराङ खुशीकी च्यि खिता फाप्कीका ङा थे खिता थुप्क्यो। ईन्सीनोङ मि काल्बेईकी येशूला विश्वास खित्स्यीत सिन ङे ङाराङ थेबे योक्पो ईन्दा च्योकराङ खाईन काम खाबान। 20 चुक सासीन ङाराङ यहूदीओन नाङ देत्जीन थेबेकी येशूला विश्वास खित्स्यीत सिन ङा थेबा च्योकराङ ओङगीन देतान। दोक खाईन परमेश्वरगी थे खोरोङ नियम बिन्दाते होथेबाताङ देत्जीन ङेङ थेबेकी च्योकराङ खाईन थे नियम ङेन्दान। ईन्दानी था ङा थे नियम अधीनला मेत। 21 लोक्ला परमेश्वरगी थे खोरोङ नियम बिन्दा मेताते मिओनताङ देत्जीनचेन होथेबेकीङ येशूला विश्वास खित्स्यीत सिन ङाङ होथेबा च्योकराङ खाईन देतान। दोक साबाते ङा परमेश्वर नियम मेङेनो साबाते मेन, ङानी ख्रीष्टकी कोताते ङेन्ग्यो। 22 थोकराङ खाला येशू बात खोकीन पाको गाला मेताते मिओनताङ देत्जीनचेन थेबेकी येशूला झन लेमु खाला विश्वास खित्स्यीत सिन ङा थे बात गाङे छ्या स्येकीन पाको गालाते मि च्योक मिक्किता खाईन थेबा च्योकराङ खाईन देतान। थोक खाला थेबा दोक्पोई ङिकामा ईन्सीनोङ पापकी सजायदुकी थारस्यीत सिन गाङे लाईदु थेबा जस्तो जस्तो दुक ङेङ उस्तो उस्तोराङ ओङगीन काम खाबान। 23 गा लाङच्येते बात मिओनगी लेमु खाला ङेन्स्यीत थेमे दि बातला ङेत्क्यो साबाते आशी ङेङ ङेत्स्यीत सिनराङ ङा दोक खिओ। 24 थेमे दि बातनी ख्योकोनला छ्याराङ ओतासीन। बत्ते खित्जीन मेरा काल्बेई छ्य्वासीनोङ थेबे नाङ ग्याल्कान्तेकीकामा पुरूस्कार ङेत्क्यो मेन? थोगी ख्योकोनगीङ होथे बत्ते खित्जीन ग्याल्कान्तेकी पुरूस्कार ङेताच्योक खाला इनाम ङेत्स्यीत सिन थुपासम्म लेमु काम खि। 25 खेलकूदला भाग लिन्कान्ते मि जसकीङ ग्याल्ला पुरूस्कार ङेता थुप्स्यीत सिन खोपरोङ जीउला ङार्माताङ थाङ मेछ्येत्च्या ज्वाप्ला ङीमे ठाङमा दुक्पा खाला तालिम खित्च्येते खिओ। थेबेकी ङेत्च्येते पुरूस्कारचेन ङीमाई छ्याःङ काम लै मिक्किच्या डुइओ। तर ङुरूङगी ङेत्च्येते इनामचेन नोमुङ होथोक खाला काम लै मिक्किच्या मोन्डोओ। 26 थोगी ङा छ्याःङ आश मेताते मि च्योक खाला मेन्देकी ग्याल्ला पुरूस्कार लिन्कान्ते मिकी ख्योला फाप्च्येते ठाउँ ताला छ्योङाच्योक खाला काम खिओ। लेम्बेकी च्योक थाराङ गुस्सीकी देक्पाच्योक मिक्किओ। 27 ङाराङला जति दुक्पा ओङसीनोङ ङा ङाराङला खिता सेम लाबा लाबा मिक्किओ। ङे थोक खासीन ङाराङगी ज्येनला दोक खिता फाप्क्यो, थोक खिता फाप्क्यो सिन लाप्सीनोङ ङा ङाराङराङ होथोक खिता मुथुप्कान्ते च्योक ओङला ङे छ्याःङ इनाम मेङेदो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.