१ कोरिन्थी 8 - जिरेलल्हाला पूजा खाबाते सा ओङगीताना मेङते 1 थेमे ल्हाला पूजा खाबाते सा ओङगीताना मेङते सिन ख्योकोनगी ङाला ठिबा ओताक्वा। ईन्दाका च्यि खिता ओङगीते, चुक खिता मेङते सिन ङुरूङ गाङेला छ्याराङ ओत। जे बादोङ छ्या स्येकान्ते मि छ्येकामा खिओ। ज्येनला ङिङज्ये खित्कान्ते मिकीकामा लेमु काम खिओ। 2 जे बादोङ छ्या स्येबा ओत सिन सिरकान्ते मिकीचेन छ्या स्येबा फाप्च्येते बात थोरूमोङ लेमु खाईन छ्या स्येबा मेङगो। 3 परमेश्वरला ङिङज्ये खित्कान्ते मि सु सु ईन्दे सिन परमेश्वरगी लेमु खाईन छ्या स्येबा ओङगो। 4 थाचेन ङा ल्हाला पूजा खाबाते सा ओङगीताना मेङते सिन बात खितामीन। दि ल्हा लु सिराते छ्याःङ मेन। परमेश्वर खालि दोक्पोईकामा ओत। 5 ईन्दानी मिओनगी खोपरोङ ल्हा लु सिन थेमे थेबा छ्ये ईन सिन माने खित्च्येते ल्हा लु थेमे होदोक्ते ज्येनोङ दि सा नाम खाङ काल्बेई ओत। 6 ईन्सीनोङ ङुरूङ लाईदुनी परमेश्वर खालि दोक्पोईकामा ओत। थेचेन ङुरूङ आबा ईन। दि सा नाम थेमे ओताते जति गाङे थेकीराङ जोबाते ईन। थेमे परमेश्वर मि ईन्देकी ङुरूङ थेकी साबाते ङेन्ला थेला छ्ये जोइओ। थोकराङ खाला येशू ख्रीष्टकामा ङुरूङ मालिक ईन। दि सा नाम थेमे ओताते जति गाङे परमेश्वरगी थे छ्य्वापेकीराङ जोबाते ईन। थेमे ङुरूङला जुनी तेरकान्तेङ येशू ख्रीष्टराङ ईन। 7 जे ईन्सीनोङ दि ल्हा लु सिराते छ्याःङ मेन सिन ङुरूङ नाङ गाङेकी लेमु खाईन छ्या स्येबा मेत। गोमाबा ल्हा लु माने खिन ओतेकी थेमे ल्हाला पूजा खाबाते सेइन ओतेकी ल्हाला पूजा खाबाते सोसीन थरिङोलाङ कोई कोईकी हत्तेरिका ङे थे पूजा खाबाते सा ओङच्या मेतान, था ङाला पा फोइओ सिन सिओ। हत्तेरिका ङे दोक्ते स्या सा ओङच्या मेतान सिराच्योक खिओ। 8 बात चुक ईन्दे सासीन साप थुङेकी ङुरूङला परमेश्वर दोन्दु लेमुङ ज्वा मुथुबो, मेलेबाङ ज्वा मुथुबो। पूजा खाबाते स्या सोला परमेश्वर दोन्दु पा फोक्च्येतेङ मेन, मासोला थे दोन्दु लेमु ओङच्येतेङ मेन। 9 ल्हाला पूजा खाबाते सोसीन ओङगो सिन सिरकान्तेबा ख्योकोनगी दि बात लेमु खाईन छ्या स्येबा मेताते खेराङ आज्यो न्वाला पाप खित माज्युत। 10 च्यि सासीन खइँदा ल्हे थानदु पूजा खाबाते स्या सा बेलाला दि ल्हा लु सिराते छ्याःङ मेन सिन छ्या ओताते ख्योकोन सुइँदा थेरू गाल्गीन थे स्या सोसुङ थेमे खेराङगी च्योक खाईन बात लेमु खाईन छ्या स्येबा मेताते खेराङ आज्यो न्वाकी थोङसुङ सासीन थोक्ते स्या सा ओङच्याक्वा सिन थेबेकीङ सेइओ। सोनामेई थेबाला ङे पाप खाबाप सिराच्योक लाङगो। 11 होथोक खाला ख्योकोनगी छ्या स्येबाते बातकी खित्सादु खेराङ आज्यो न्वाला पाप खित ज्युत्कीदुक। ख्रीष्टचेन होथोक्ते मि लाईदुङ स्याप्ते ईन सिरच्येते बात टोक माज्येत। 12 दोक खाला ख्योकोनगी बात लेमु खाईन छ्या स्येबा मेताते खेराङ आज्यो न्वाला पाप खित च्युत्ला थेबाला मेलेबा लाङ ज्युत्कीदुक। ख्योकोनगी थोक खाईन पाप खाबाते ख्रीष्टलाराङ मेलेबा खाबाते ईन। 13 थोगी ङा ख्योकोनला च्यि सिते सासीन ङे खइँदा सोबा थुबा थोङला सुइँदा ङाराङ आज्यो न्वाकीङ ङे खाबा च्योकराङ खिदुक थेमे थेबाला खोपरोङगी थोक खाबाते पाप खाबाते ईन सिराच्योक लाङगीदुक सासीन थेबाला थोक मेङस्यीत सिन ङा नोमुङ स्या मास्साओ। च्यिला सासीन ङा थेबाला पाप खित ज्युता मोछोलो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.