१ कोरिन्थी 7 - जिरेलफाङमा खित्च्येतेताङ मिक्किच्येते बात 1 ख्योकोनगी ङाला ठिकीन ताङाते बातओन नाङ ख्योओ मिकी फाङमा मिक्किता खाईन देत्सीन लेमु ईन्दासीन साबाते विषयला था ङा बात खितामीन। 2 ङा ख्योकोनला च्यि सिते सासीन सुङगीङ रन्डीबाजी मिक्किस्यीत सिन ख्योकोन दाक्पोन दाक्पोनते ख्यावा फेम्मे ओतातेराङ लेमु ईन। 3 ख्यावा फेम्मे ओङनामेई दोक्पोईकी ज्येनज्यीकला च्यि चुक खिता फाप्च्येते ईन्दे ख्योकोनगी थोकराङ खि। 4 फेम्मे मिकी दाक्पोन खुशी खिता मेङगो। थेला ख्योबोते हक लै खिओ। थोकराङ खाला ख्योओ मिकीङ दाक्पोन खुशी खिता मेङेदो। थेला फेम्मेते हक लै खिओ। थेमे थेबेकी दोक्पोईकी ज्येनज्यीक खाँचो टारे खिता फाप्क्यो। 5 ख्यावा फेम्मे ओङगीन सिन्नामेई दोक्पोईकी ज्येनज्यीक खाँचो टारे खिता फाप्च्येते ईन्देकी ख्योकोन ठाल्ला माङ्याल। परमेश्वरताङ प्रार्थना खिताला कहिलेकहीँ ङिकारगी सल्लाह खाला ङ्योम्बुराङ ङ्याल्च्येते बातकीते ङुरूङ छ्याःङ विचार मिक्किकी सिन सासीनोङ ज्येन बेलाला ठाल्ला माङ्याल। ठाल्गीन ङ्याल्सीन ख्योकोनगी दाक्पोन सेम थामे खिता मुथुबो। थेमे शैतानगी ख्योकोनला पाप खित ज्युत्क्यो। 6 ङे ख्योकोनला दोक खिताराङ फाप्क्यो सिन कोताते मेन। खालि सल्लाह बिन्दातेकामा ईन। 7 ईन्दानी मि गाङे ङा च्योक खाईन फाङमा मिक्किता खाईन देताते ङाला लेमु लाङगीदुक। ईन्सीनोङ परमेश्वरगी मि दाक्पोन दाक्पोनला दोक्पोईला फाङमा खाला देत्च्येते थेमे ज्येनज्यीकला फाङमाराङ मिक्किता खालाङ देता थुप्च्येते शक्ति बिन्दा ओङगो। 8 थाचेन ङा फाङमा माक्याबाते मिओन थेमे ख्योबो स्यिइन सिन्दाते मिओनगी च्यि खिता फाप्कीते सिन बात खिन ओत। चुक सासीन ख्योकोन गाङेराङ ङा च्योक दोक्पोईकामा देता थुप्सुङ सासीन लेमु ईन। 9 तर थोक खाला देता मुथुप्तुक सासीन बरू ख्योकोनगी फाङमा खि। खालि ख्योओ मिकी फेम्मे मित्ताङ ङ्याल्च्येते थेमे फेम्मे मिकी ख्योओ मित्ताङ ङ्याल्च्येते सेमकामा खाला दिन तोङा भन्दानी फाङमा खाला देताराङ लेमु ईन। 10 थेमे फाङमा खाईन सिन्दाते मिओनलाचेन ङा दि खिराङ सिन कोत्क्यो, ङे मेन दि बात प्रभु येशूकीराङ कोताते ईन। चुक सासीन फेम्मे मि ख्योबोताङ ठाला मेङगो। 11 ठाल्सीन थे लोक्ला नोमुङ फाङमा मिक्किता खाला देता फाप्क्यो कि याङराङ ख्योबोतेताङ डिक्ला ङ्योम्बुराङ देता फाप्क्यो। थेमे ख्योओ मिकीङ दाक्पोन फेम्मेला तोङा मेङगो। 12 थेमे ख्योकोन ज्येनबरीलाचेन ङा दि सल्लाह तेरग्यो। दिचेन ङाला प्रभु येशूकी सि साबाते मेन, ङाराङ बात ईन। चुक सासीन ख्योकोन सुइँदेते फेम्मेचेन येशूला विश्वास खित्कान मेन्सीनोङ थे मोरोङ ख्योबोताङ देता सेम खिदुक सासीन ख्योकोनगी थोक्तेला मातोङ। 13 थोकराङ खाला फेम्मे मिओनगीङ दाक्पोन ख्योबो येशूला विश्वास खित्कान मेन्सीनोङ थे ङ्योम्बुराङ देता सेम खिदुक सासीन ख्योकोनगी थेला मातोङ। 14 ङे च्यिला दोक साबाते ईन्दे सासीन सुइँदेते ख्योबोते येशूला विश्वास खित्कान मेन्सीनोङ फेम्मेताङ ङ्योम्बुराङ देत्सीन थेलाङ परमेश्वरगी थे खोरोङ मि ईन सिओ। थोकराङ खाला सुइँदेते फेम्मेते येशूला विश्वास खित्कान मेन्सीनोङ ख्योबोताङ ङ्योम्बुराङ देत्सीन थेलाङ परमेश्वरगी थे खोरोङ मि ईन सिओ। थोक ईन्देकीराङ ख्योकोन फिजाओनलाङ परमेश्वरगी थे खोरोङ मि ईन सिओ। थोक मेन्दा ईन्सीन थेकी थेबाला थे खोरोङला माने मिक्किकान्ते मि फिजा च्योकराङ ईन सिरच्या ओतान। 15 परमेश्वरगी ङुरूङला डिक्ला थुन्ला देत्स्यीत सिन थे खोरोङ दोन्दु स्योक सिन काताङाते ईन। ईन्सीनोङ डिक्ला देता माथुप्ला येशूला विश्वास मिक्किकान्ते फेम्मे मि ख्योबोतेताङ ठाल्गीदुक सासीन थेमे येशूला विश्वास मिक्किकान्ते ख्योओ मिकी फेम्मे तोङगीदुक सासीन थेबेकी थोकराङ खित्स्यीत, थेबाला सुङगीङ छ्याःङ मासेर। 16 ख्योकोन येशूला विश्वास खित्कान्ते फेम्मे मिकी दाक्पोन ख्योबो खेराङताङ माठाल्सीन थेकीङ येशूला विश्वास खाला पापकी सजायदुकी थारग्यो सिन चुक खाला सिरा थुप्कीते? थोकराङ खाला ख्योओ मिकीङ ङात्ताङ ङ्योम्बु देत्सीन ङे फेम्मेकीङ ङीमाई येशूला विश्वास खाला पापकी सजायदुकी थारग्यो सिन चुक खाला सिरा थुप्कीतेरो? दाक्पोन जे खिन ओतान थेराङ खिन देत्च्येते बात 17 जे ईन्सीनोङ प्रभु येशूकी दाक्पोन दाक्पोनला च्यि खि साबा ओते, चुक खाला देता फाप्क्यो साबा ओते थोकराङ खिता फाप्क्यो। च्यि सासीन परमेश्वरगी ख्योकोनला थे खोरोङ दोन्दु स्योक सिन कातोङजीन खेराङ चुक ओताने, च्यि खिन ओताने थोकराङ खिन देत। ठाउँ ठाउँला जम्मा ओङकान्ते येशू ख्रीष्ट मि गाङेला ङा दि बातराङ सिओ। 18 परमेश्वरगी सुइँदाला थे खोरोङ दोन्दु स्योक सिन कातोङा भन्दा गोमा थे मिकी जीउला खतकी चिनु जोबा ओत्सीन थे चिनु थोकराङ देत्स्यीत। थेजीन जीउला थे चिनु जोबा मेत्सीन थोक्ते मिकीङ थे चिनु माजो। 19 जीउला खतकी चिनु जोच्येतेताङ मोजोच्येते छ्येते बात छ्याःङ मेन। छ्येते बातनी परमेश्वरगी खि साबा साबा खित्च्येतेराङ ईन। 20 थोगी परमेश्वरगी खेराङला थे खोरोङ दोन्दु स्योक सिन कातोङजीन खेराङ जे जे खिन ओतान थोकराङ खिन देत। 21 च्यि सासीन ख्योकोन सुइँदा योक्पो योङमु ईन्सीन छ्याःङ ङोचा माकेत। थोक खिन देता माफाप्सीनचेन गा खिन थे काम थोङ। 22 बात चुक ईन्दे सासीन सुइँदा मि योक्पो योङमु ईन्सीनोङ प्रभु परमेश्वरगी थेला थे खोरोङ दोन्दु स्योक सिन काताङनामेकी थोक्ते मि योक्पो योङमु मेन्देकी प्रभु येशू मि ईन। थोकराङ खाला सुइँदा मि योक्पो योङमु मेन्सीनोङ प्रभु परमेश्वरगी थे खोरोङ दोन्दु स्योक सिन काताङनामेकी थोक्ते मिओनचेन ख्रीष्टकी योक्पो योङमु ईन। 23 परमेश्वरगी ख्योकोनला आउदी काल्बेई मोल च्याल्गीन ङ्योबाते ईन। थोगी था ख्योकोनगी ज्येनगी साबा साबा ङेन्ला थेबेकी कोता कोताच्योक माकेत। 24 बात दोक दोक ईन्देकी आज्यो न्वावे, परमेश्वरगी खेराङला थे खोरोङ दोन्दु स्योक सिन कातोङे बेलाला खेराङ च्यि काम खिन ओताने थे थेराङ खिन थेत्ताङ डिक्ला देत। कर्नेते मिओनताङ ख्योबो स्याप्तेबेकी चुक खित्च्ये 25 थेमे ख्योकोनगी कर्नेते मिओनगीचेन चुक खिता लेमु ईन्ताका सिन ङाला ठिबा ओताक्वा। थोक्ते मिओनगी च्यि खित्च्ये, चुक खिता फाप्कीते सिरच्येते बातनी प्रभु येशूकी ङाला कोता मेत। ईन्सीनोङ कर्नेते मिओनगी चुक खिता लेमु ईन्दे सिन सल्लाह तेरामीन। प्रभु येशूकी ङाला दया खाबा ओतेकी ख्योकोनगी ङे सल्लाह ठीक ईन सिरा थुप्क्यो। 26 ङे सल्लाह दि ईन। चुक सासीन थरिङोला दि दुक्पे बेलाला ख्योकोनचेन खेराङ जस्तो जस्तो दुक उस्तो उस्तोराङ देता लेमु ईन। 27 च्यि सासीन फाङमा खाबाते मिकी था फेम्मे तोङच्ये बात माकेत। थोकराङ खाला फाङमा खाबा मेत्सीन फेम्मे खुलाङच्ये विचार माकेत। 28 तर ख्योकोनगी फाङमा खासीन दि पाप खाबाते मेन। थोकराङ खाला फाङमा खाबा मेताते फेम्मे फिजेकी फाङमा खिताङ पाप मेन। ईन्सीनोङ फाङमा खानामेई ख्योकोनला काल्बेई दुक्पा ओङगो। ङाचेन ख्योकोन थोक्ते दुक्पाला माफाप्स्यीत सिन सेम खिओ। 29 आज्यो न्वावे, दि जुग सिन्च्येते समय था काल्बेई मेत। थोगी फाङमा खाबाते मिकी फेम्मेते विचारकामा मिक्किता खाला बरू फाङमाराङ खाबा मेताते मि च्योक ओङला परमेश्वरगी दाक्पोनला कोताते काम खि। 30 थोकराङ खाला पीर खिन ङुइनकामा देत्कान्ते मिओनचेन गा खि, पीर खिन मादेत। थेमे गा खिन देत्कान्ते मिओनगीङ गा लाबा मेताते मि च्योक ओङला देत। दाक्पोनला गोक्यो सिन सामान ङ्योला खुलाङकान्ते मिओनगीङ थे सामानतेबा चले खिता ङेत्कीता मेङेत्ता सिराच्योक खाला देत। 31 ख्योकोन गाङेकी दि सा लुङबादु देत देतसाक गोच्येते सामानताङ दुरू खिता फाप्च्येते कामगी विचारकामा खिन मादेत। च्यिला सासीन दि सा लुङबादु ओताते जति था जेसुकै सिन्ला तोरला डुइओ। 32 ख्योकोन सुङ छ्याःङ पीरताङ सुर्ता मिक्किता खाला देत्स्यीत सिरच्येते ङे सेम ओत। फाङमा माक्याबाते ख्योओ मिकीचेन चुक खासीन ङे प्रभु येशूला मन परे खित्च्येते काम खिता थुबोङा सिन थे छ्य्वापाकामा सेम खिओ। 33 फाङमा खाबाते मि बातचेन दोक मेन। थेकी दाक्पोन फेम्मेला चुक खाला खुशी ज्वा थुप्कीका सिरच्येते बादोङ विचार खिता फाप्क्यो। थोक ईन्देकी फाङमा खाबाते मिकीचेन छ्य्वाच्यीकपाकामा सेम खिता मुथुबो। 34 थोकराङ खाला फाङमा खाबातेताङ माक्याबाते फेम्मे मि बादोङ खुदुक ओङगो। फाङमा माक्याबाते फेम्मे मिकीचेन ङे काम बात जे खासीनोङ चुक खासीन प्रभु येशूला मन परे खित्च्येतेकामा खिता थुबोङा सिन थे छ्य्वापाकामा सेम खिओ। तर फाङमा खाबाते फेम्मे मिकीचेन चुक खाला थे मोरोङ ख्योबोला खुशी ज्वा थुप्कीका सिरच्येते बादोङ विचार खिता फाप्क्यो। 35 ख्योकोनला लेमु ओङस्यीत सिनराङ ङा दि गाङे बात सिन ओत। ख्योकोनला दुक्पा तेरे लाईदु दि खि, थे खि सिन साबाते मेन। ख्योकोनगी ज्येनतोक्ते छ्याःङ विचार मिक्किता खाला प्रभु येशूला मन परे खित्च्येते काम खिता थुप्स्यीत सिन ङे दि बातओन साबाते ईन। 36 सुइँदा ख्योओ फिजाला ङे ङाराङला नाङ खाबाते फेम्मे फिजाला फाङमा मिक्किकी सिरा ओङच्या मेतान सिराच्योक लाङगीदुक थेमे फाङमा माक्याबाला ङा देताराङ मुथुबो सिराच्योक लाङगीदुक सासीन थेकी खिता सेम खाबा च्योकराङ खित्स्यीत। थेबा ङिबोकी फाङमा खासीन ओङगो। फाङमा खिता पाप मेन। 37 तर सुइँदेकी ङा फाङमाराङ मिक्किता खाला देत्क्यो सिन टुङ्गो खिदुक थेमे थे फाङमाराङ मिक्किता खाला देता थुप्कीदुकताङ दाक्पोन सेम काबूला ज्य्वाबा थुप्ला थे खोरोङला नाङ खाबाते फेम्मे फिजाला फाङमा मिक्किता खाला देत्कीदुक सासीन थे मिकीङ लेमुराङ खिओ। 38 बात दोक ईन्देकी दाक्पोनला नाङ खाबाते फेम्मे फिजाला फाङमा खित्कान्ते मिकी लेमु कामराङ खिओ। फाङमा मिक्किओ सिन फाङमाराङ मिक्किता खाला देत्कान्ते ख्योबो मिकी झन लेमु खाबाते ईन। 39 थेमे दाक्पोन ख्योबो सोन सोनसाक फेम्मे मि नोमुङ माठाला खाला दाक्पोन ख्योबोताङराङ देता फाप्क्यो। ख्योबोते स्यिनामेईचेन सेम लासीन थेकी थे मोरोङ खुशीकी ज्येनताङ फाङमा खिता थुप्क्यो। तर थे ख्योओ मिङ प्रभु येशू मिराङ ओङा फाप्क्यो। 40 ङालाचेन चुक लाङगीका सासीन थोक्ते फेम्मे मिकी लोक्ला फाङमा मिक्किता खाईन देत्सुङ सासीन लेमु ओङगो। दि ङे ख्योकोनला ङाराङ सल्लाहकामा बिन्दाते ईन। ईन्सीनोङ परमेश्वर आत्मेकीराङ ङाला चुक खाला बात खित्च्ये सिन लाप्ला तेरग्यो सिन ङाला छ्या ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.