१ कोरिन्थी 6 - जिरेलपावलगी दाक्पोन नाङ मुद्धा रीला मेङगो सिन साबाते 1 ख्योकोन चुक खाला दोक खिता थुप्कीका? ख्योकोननी थोम्मु स्योरसीन परमेश्वर सन्तान खेराङ नाङ बात डिक्पा खिता ताङला परमेश्वरला छ्या मास्येबाते मिओन ओत्साला अड्डालाका न्याय छोल डोच्याक्वा। 2 परमेश्वर सन्तानओनगीराङ दि सा लुङबे मि न्याय खिओ सिन च्यि ख्योकोनला छ्या मेत? थोक छ्येते कामनी खिओ सासीन च्यि थोम्मु स्योराते बातज्यीगोङ ख्योकोनगी डिक्पा खिता मुथुप्तुक? 3 थेमे परमेश्वर दूतओनते समेदोङ ङुरूङ न्याय खिओ सिन ख्योकोनला छ्या मेताना च्यिन्दे? तिरी ङुरूङ थोक्ते कामनी खिओ सासीन दि जुनीला दाक्पोन नाङ खइँदा मिडिक्च्येते बात ओङजीन च्यिला डिक्पा खिता मुथुप्तेरो? 4 थोगी खेराङ नाङ होदोक्ते खइँदा बात मिडिक्जीन थे बात डिक्पा खाला नाङ सिराला ख्योकोन च्यिला येशू ख्रीष्ट मिओन बात छ्याःङ छ्या मेताते मिओन ओत्सादु डुइते? 5 ख्योकोनला ङोचा लोङालाराङ ङे दि बात टिबाप। आज्यो न्वा खेराङ नाङ खइँदा मिडिक्च्येते बात ओङजीन दि डिक्पा खिता थुप्कान च्यि ख्योकोन नाङ सुङ मेत? 6 खेराङ नाङ मुद्धा कोन्ला बात डिक्पा खाला नाङ सिन दोक्पोईकी ज्येनज्यीकला येशूला विश्वास खाबा मेताते मिओन दोन्दुका अड्डाला टीला खेरच्याक्वा। 7 थोक खाला दाक्पोन नाङ मिडिक्च्येते थेमे थोम्मु खित्च्येते ख्योकोनला सोई मिक्किच्येते बात ईन। मुद्धा रीला भन्दानी बरू ज्येनगी अन्याय खासीनोङ थेमे खेराङते खइँदा ठ्वासीनोङ खाराक्पाराङ देता लेमु मेनरो? 8 ज्येनला अन्याय खित्च्येतेताङ ज्येनगीते ठोक्च्येतेनी ख्योकोन खेराङगीराङ खिदुक। थोरूम थेङ आज्यो न्वा खेराङ खेराङ थोक खिदुक। 9 ज्येनला अन्याय खित्कानताङ मेलेबा काम खित्कान्ते मि सुङ परमेश्वर राज्यने स्यूक्पा मेङेदो सिन च्यि ख्योकोनला छ्या मेत? ख्योकोन सुङगीङ दाक्पोनगी ठुबाते डालुम नाङ दाक्पोनराङ स्यूक्च्येते काम माकेत। चुक सासीन रन्डीबाजी थेमे होदि च्योक्ते खिता मेङच्येते काम खित्कान्तेबा, ल्हा लु माने खित्कान्तेबा, मि ख्यावा फेम्मेताङ ङ्याल्कान्तेबा, ख्योओ मिकी फेम्मे मि च्योक खाला ख्योओ मि ज्याक्ला खिता मेङच्येते काम खित्कान्तेबा, 10 चोरओन, लोभीओन, छ्याङ रक्सीकी जिलाकामा देत्कान्तेबा, मिला मोत्कान्तेबा थेमे डाँकाओन होदोक्ते मि सुङ परमेश्वर राज्यने स्यूक्पाराङ मेङेदो। 11 ख्योकोनोङ कोई कोई गोमाबा होथोक्ते मिराङ ओतान। तर प्रभु येशू ख्रीष्टताङ परमेश्वर आत्मेकी ख्योकोनला ठु खाईन चोके खाबाच्योक खाईन पापदुकी टाल्गीन बिन्दा ओत, ख्योकोन सेम खुदुक जोबा ओत थेमे परमेश्वर दोन्दु दोषी मेन साबा ओत। ङुरूङगी दाक्पोन खुशी खिता मेङगो 12 ख्योकोन कोई कोईकी “ङा ङाराङ खुशीकी जेङ खिता थुप्क्यो,” खिदुक्लो। थोक सिरा ठीकराङ ईन। तर जेङ खिता लेमु मेन। कोई काम खासीन ख्योकोनला मेलेबाकामा ओङगो। “ङा ङाराङ खुशीकी जेङ खिता थुप्क्यो,” सिरा ठीक ईन। तर ङे दि काम माक्याबाला ओङराङ मेङगो सिराच्योक खाला दाक्पोन सेमला लाबा लाबा खिता लेमु मेन। 13 ख्योकोनगी “मिला साप थुङा गोक्यो, साप थुङा मेताला मि चुक खाला सोन्गीते?” सिरा ठीकराङ ईन। तर ङीमाई परमेश्वरगी मि जीउ साप थुङा मोगोच्या खुदुक जोइओ। बात च्यि सासीन परमेश्वरगी ङुरूङला दि जीउ बिन्दाते रन्डीबाजी थेमे होदि च्योक्ते खिता मेङच्येते काम खिताला मेन, प्रभु येशूला मन परे खित्च्येते काम खिताला ईन। ङुरूङला गोच्येते तेरकान्ते प्रभु येशूराङ ईन। 14 परमेश्वरगी थे खोरोङ शक्तिकी प्रभु येशूला स्यिसादुकी सोम्बो लोक्सुङ। था थेकी थे खोरोङ होथे शक्तिकी ङुरूङलाङ सोम्बो लोइओ। 15 ख्रीष्टकी जीउकी लाक्पा, काम्बा, मिक च्योक्तेबाचेन ख्योकोनराङ ईन सिन च्यि ख्योकोनला छ्या मेत? थोगी च्यि ङुरूङ गाल्ला रन्डीताङ ङ्याला ओङगो? थोक्ते काम नोमुङ खिता मेङगो। 16 रन्डीताङ ङ्याल्कान्ते मि थेत्ताङ जीउज्यीकराङ ओङगो सिन च्यि ख्योकोनला छ्या मेत? परमेश्वर बातला “ख्यावा फेम्मे ओङनामेई थेबा ङिबो जीउज्यीकराङ ओङगो,” सिन टिबा ओत। 17 थोकराङ खाला प्रभु येशूताङ डिक्कान्ते मिचेन थेत्ताङ सेमज्यीकराङ खाला डिक्ला देत्क्यो। 18 थोगी ङा ख्योकोनला च्यि सिते सासीन रन्डीबाजी थेमे होदि च्योक्ते खिता मेङच्येते काम सिराते ख्योकोनगी खितराङ माकेत। रन्डीबाजी थेमे होदि च्योक्ते खिता मेङच्येते काम खित्कान्ते मिकीचेन दाक्पोनलाराङ मेलेबा ओङ ज्युत्क्यो। ज्येनतोक पाप जे खासीनोङ पापनी पापराङ ईन। ईन्सीनोङ ज्येनतोक पापकी दाक्पोन जीउला मेलेबा ओङ मुज्युदो। 19 परमेश्वरगी ख्योकोनला बिन्दाते परमेश्वर आत्मा ख्योकोन नाङ देत्क्यो। थोगी ख्योकोन जीउ परमेश्वर आत्मे मन्दिर ईन सिन च्यि ख्योकोनला छ्या मेत? थोक ईन्देकी ख्योकोनगी खेराङ खुशी खिता मेङेदो। परमेश्वर ख्योकोन मालिक ईन। 20 थेकी ख्योकोनला आउदी काल्बेई मोल च्याल्गीन ङ्योबाते ईन। थोगी ख्योकोनगी काम बात जे खासीनोङ परमेश्वरला मन परे खित्च्येतेकामा खि। दोक खाला थेला मान खि। |
© 1992 Wycliffe Bible Translators Inc. All rights reserved.
Wycliffe Bible Translators, Inc.