१ कोरिन्थी 5 - जिरेलमेलेबा काम खित्कानला सजाय तेरा फाप्क्यो 1 थेमे ज्येन बात काल्बा च्योक मि खानापेई ङे च्यि थोकीका सासीन ख्योकोन नाङ मेराज्यीक आबातेकी खुलाबाते फेम्मे मि थे खोरोङ आमा टिक्पी फाप्च्येतेताङ ख्यावा फेम्मे च्योकराङ ओङगीन देत्ला दुक्लो। थोक मेलेबा कामनी परमेश्वरला छ्या मास्येबाते मिओनगीङ नोमुङ मिक्किओ। 2 थेकी थोक खाबा थोङजीन च्यि ख्योकोनला मेलेबा मालासुङ? ख्योकोनला पीर लाङा फाप्च्येते ईन। थेमे खेराङताङ साङ माकेत सिन थेला तेन्ला तोङानी खापा ईन खापा झन ख्योकोनचेन आउदी लेमुतेबा ईन्दाच्योक खाला छ्येका खिन दुक। 3 ङा थारीला ओता ईन्सीनोङ ख्योकोनताङ ङ्योम्बु ओता च्योकराङ खाईन था च्यि खित्च्ये, चुक खित्च्ये सिन ङीन नुप ङा थे बात विचार खिनराङ ओतान। था थे मिला च्यि खिता फाप्कीते सिन ङे टुङ्गो खाईन सिन्दा ओत। 4 प्रभु येशूला छ्ये ज्वाप्ला ख्योकोन गाङेराङ रूबा ओते बेलाला ङाङ ख्योकोनताङ ङ्योम्बु ओताच्योक खाला ख्योकोनगी प्रभु येशू शक्ति छ्य्वापेकी थे मिला दोक खि। 5 चुक सासीन थेकी पाप खिता तोङस्यीत सिन थेला शैतान लाःक्तु सोम्पे खि। थोक खानामेई थे स्यिसीनोङ प्रभु येशू ग्युरला ओङे छोमु थेकी थेला पापकी सजाय मेतेरो। 6 ख्योकोन खेराङ आउदी लेमुतेबा ईन सिन छ्ये खिदुक। थोक खिता लेमु मेन। सोडा टिक्पीस्यिककामा लुक्सीनोङ ज्येन्ताक गाङेपा ठाम्ग्यो सिन च्यि ख्योकोनला छ्या मेत? 7 था ख्योकोन सोडा मुलुबा खाईन ङ्येबाते ज्येन्ताक डल्लो च्योक ओङाला ज्येन्ताक गाङेपा ठाम्च्येते सोडा च्योक ईन्दाते गोमाबा खिन ओताच्योक पाप खिता थोङ। च्यिला सासीन निस्तार चाडगी बेलाला पूजा खिता फाप्च्येते लुई रीउ च्योक ओङगीन ख्रीष्ट ङुरूङला पाप खित्च्येते बानीदुकी डेलाला ङुरूङ लाईदु स्यिइन सिन्दा ओत। 8 थोक ईन्देकी था ङुरूङगी मेलेबाते कामताङ पाप खिता तोङा फाप्क्यो। मेलेबाते कामताङ पाप खित्च्येते बानीचेन सोडा लुगीन स्येबाते स्योबेन च्योक्ते ईन। था सेमदु छ्याःङ पापताङ लोभ मोज्योबा खाला लेमुते कामताङ साँचोते बातकामा खिता फाप्क्यो। दोक खाबातेचेन ङुरूङगी सोडा मुलुबा खाईन स्येबाते स्योबेन सोकीन निस्तार चाड माने खाबा च्योक्ते ईन। 9 थेमे गोमाका टिबाते चिट्ठीला ङे ख्योकोनला रन्डीबाजी थेमे होदि च्योक्ते खिता मेङच्येते काम खित्कान्ते मिओनताङ साङ माकेत सिन साबा ओतान। 10 ङे थोक साबातेचेन रन्डीबाजी थेमे होदि च्योक्ते खिता मेङच्येते काम खित्कान्ते, लोभ खित्कान्ते, डाँकाओन थेमे ल्हा लु माने खित्कान्ते दि सा लुङबे मिओनताङ साङ खिताराङ मेङगो सिन साबाते मेन। ङे थोक साबाते ईन्दा ईन्सीन ख्योकोननी दि सा लुङबादु देताराङ थुप्च्या मेतान। 11 था दि चिट्ठीलाचेन ङा ख्योकोनला च्यि सिते सासीन सुइँदेकी ङाङ येशूला विश्वास खित्कान्ते मि ईन खिदुक तर रन्डीबाजी थेमे होदि च्योक्ते खिता मेङच्येते काम खित्च्येते, लोभ खित्च्येते, ल्हा लु माने खित्च्येते, ज्येनला मोत्च्येते, छ्याङ रक्सीकी जिलाकामा देत्च्येते थेमे ज्येनगीते लुटे खाला ख्याम्च्येते खिदुक सासीन थोक्ते मित्ताङचेन ख्योकोनगी साङ माकेत। थेत्ताङ ङ्योम्बुराङ देत्ला छ्यु मुठी खाङोङ माथुङ। 12 फलानेकी दोक दोक खासुङ सिन येशू ख्रीष्ट मिओन मेन्दाते मि बात खित्च्येते ङाला छ्याःङ खाँचो मेत। खेराङ नाङ मेलेबा काम खित्कानला सजाय तेरच्येते च्यि ख्योकोन काम मेनरो? 13 येशू ख्रीष्ट मिओन मेन्दाते मि न्याय खित्कान्ते परमेश्वर ईन। परमेश्वर बातला “मेलेबा काम खित्कान्ते मिला खेराङ नाङदुकी तेन्ला थोङ,” सिन साबा ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.