१ कोरिन्थी 4 - जिरेलयेशू ख्रीष्टकी खटे खाबाते मिओन बात 1 दोक ईन्देकी मिओनगी ङ्योकोन खालि ख्रीष्टकी काम खित्कान्ते थेमे परमेश्वरगी गोमा सुङलाङ छ्या स्ये च्युता मेताते बात लोप्च्येते जिम्मा बिन्दाते मिकामा ईन सिन छ्या स्येबा फाप्क्यो। 2 तर दाक्पोनला जिम्मा बिन्दाते काम खित्कान्ते मिकी थे काम जिम्मा तेरकान्तेकी खि साबा च्योकराङ खाला खिता फाप्क्यो। 3 ङाराङ बात खिइ सासीन ख्योकोनगी ईन्स्यीत, ज्येनगी ईन्स्यीत फलानानी दोक्तेका ईन सासीनोङ थे ङाला छ्याःङ च्योक मालाङदुक। ङा दोक्तेराङ ईन सिन ङा ङाराङोङ मिसिरो। 4 ङाराङ काम खित्जीन ङे खइँदा गल्ती खाबा ओत सिराच्योक ङाला मालाङदुक। दोक सिरजीनमेईराङ ङे छ्याःङ गल्ती खाबा मेत सिन साबाते मेन। ङे खाबाते काम खाङ ठीक ईन्दे, खाङ ठीक मेन्दे सिन डेल्कान्ते प्रभु येशूकामा ईन। 5 थोगी ङा ख्योकोनला च्यि सिते सासीन प्रभु येशू ग्युरगीन मावाथुप ख्योकोन सुङगीङ दि दोक्तेताङ थे थोक खित्कान्ते सिन ज्येनगी गल्ती मातेन। था वाला च्याला प्रभु येशूकी मिकी ज्येनगी छ्या मेस्येबा खाईन खाबाते काम ईन्स्यीत, खोपरोङ सेमलाकामा विचार खाबाते बात ईन्स्यीत, लेमु मेलेबा चुक ईन्दे सिन डेल्ग्यो। थेमे लेमु काम खित्कानलाचेन गाङेला परमेश्वरगी खुई आउदी लेमु खासुङ सिन सिओ। 6 आज्यो न्वावे, ख्योकोनगी लेमु खाला खोस्यीत सिन थाल्लासाक खाबाते गाङे बात ङे अपोल्लोसताङ ङाराङ बात खुलाकीन खाबाते ईन। परमेश्वर बातला खि साबा च्योकराङ खाला काम खि। थोक खित्च्येते बानी ख्योकोनगी ङ्योकोन छ्य्वापेई लोप। थेमे ख्योकोनगी फलाना चुक लेमु खित्कान्ते ईन्दे सिन दोक्पोईला छ्ये जोच्येतेताङ ज्येनज्यीकलाचेन थेङ सु ईन्देरो सिराच्योक खित्च्येते बानी थोङ। 7 ज्येन भन्दा ख्योकोन छ्ये ईन सिन ख्योकोनला सुई सिका? च्यि ख्योकोनताङ ओताते जेसुकै परमेश्वरगी बिन्दाते मेनरो? थोक ईन्सीनोङ ख्योकोन च्यिला सुङगीङ बिन्दाते मेन्देई थाराङ दाक्पोनगी ङेताते च्योक खाला छ्ये खिते? 8 खेराङगी चालाते ख्योकोनगी गाङे ङेत्कीन सिन्दुक। था ख्योकोन छ्याःङ मोगोच्या गाल्गीन सिन्दुक। था ख्योकोनला ङ्योकोन मोगोच्याक्वा। ख्योकोननी गेल्बोङ ओङगीन सिन्दुक। ख्योकोन गेल्बो ओङाते ङाला गा लाङगीदुक। साँच्चीराङ ख्योकोन थोक ओङाते ईन्सीन ङ्योकोनोङ ख्योकोनताङ गेल्बो ओङला राज्य खित्च्या ओतान। 9 ङाला चुक लाङगीका सासीन येशू ख्रीष्टकी खटे खाबाते मि ङ्योकोनला परमेश्वरगी जुलूस तिरी टीला मि दोन्दुराङ सेता फाप्च्येते सजाय ङेताते मिओन च्योकराङ जोबा ओत। दोक खाईन दि सा लुङबे मि थेमे परमेश्वर दूतओन दोन्दु ङ्योकोन तेमु च्योकराङ ओङा ओत। 10 ख्रीष्टकी मि ईन्देकी ङ्योकोनचेन छ्याःङ मेस्येकान्ते लेम्बाते मि च्योक ओङा ओत। तर ख्रीष्टकी खित्सादु ख्योकोननी आउदी च्याङबो गाल्दुक। थेमे ङ्योकोन छ्याःङ खिता मुथुप्कान्ते मि ईन। ख्योकोनचेन जेङ खिता थुप्कान्ते ईन। थोकराङ खाला मिओनगी ङ्योकोनला दिबाङ सु ईन्देरो सिराच्योक खिदुक। ख्योकोनलाचेन गाङेकी मान खिओ। 11 थोरूमसाकोङ ङ्योकोन साप थुङा माङेत्ला पालोताङ पालो त्वाबा तुक्पाराङ ख्याम्गीन ओत। खोलाक डाकस्याक डिकस्यिकराङ काल्ला ख्याम्ग्यो। थेमे मिओनगी ङ्योकोनला छ्याःङ दया मोज्योबा खाला दुङगीदुक। ङेराङते सिराते खाम्बा जग्गा छ्याःङ मेताच्योक खाला ङ्योकोन युगीन देत्क्यो। 12 साप थुङाताङ खोन्दे लाईदु ङ्योकोन स्याप स्याप खाला काम खिओ। ङेराङला मोता सराप खित्कान्ते मिओनला ङ्योकोन आशी तेरग्यो। थेमे ज्येनगी खेदापानी खित्जीनोङ ङ्योकोन छ्याःङ मिक्किता खाला खपेराङ खाला देत्क्यो। 13 दोस्यिककामा मेन, ङेराङला मोत्कीन ख्याम्कान्ते मिओनताङोङ स्येदाङ मिक्किता खाला बात खिओ। ङ्योकोननी दि सा लुङबे मिओन मिगी जेकका ओङा ओत। ङ्योकोनलानी मिओनगी काम्बे पुज्या छेदोङ गने मिक्किदुक। 14 ङे थाल्लासाक टिबाते दि गाङे बात ख्योकोनला ङोचा लोङाप सिन मेन्देकी लेमुते बात च्यि ईन्दे सिन लोप्स्यीत सिन टिबाते ईन। ख्योकोन ङाराङ फिजा च्योकराङ ईन। ङा ख्योकोनला ङिङज्ये खिओ। 15 ख्योकोनला दोक खि, थोक माकेत सिन ख्रीष्टकी बात लोप्कान्ते हजार च्युताम्बा मि ओत्सीनोङ थेबा ख्योकोन आबा मेन। ङे ख्योकोनला गा लाङच्येते बात लाप्कीन बिन्गीन ख्योकोन येशू ख्रीष्टताङ जीउज्यीकराङ ओङाते ईन्देकी ङाराङ ख्योकोन आबा ईन। 16 थोक ईन्देकी ङा ख्योकोनला च्यि सिते सासीन ङे चुक खिका, च्यि सिका थे ताला ख्योकोनगीङ ङे खाबा च्योकराङ खि। 17 ङे खाबा च्योकराङ खित्च्येते ख्योकोनला लाप्ला तेरस्यीत सिनराङ तिमोथीला ङा ख्योकोन ओत्सापा तोङगीन ओत। दि प्रभु येशूकी खि साबा च्योकराङ खाला काम खित्कान्ते मि ईन। दिला ङा ङिङज्ये खिओ। दि ङेते ङाराङ फुज्युङ च्योकराङ ईन। ङा येशू ख्रीष्टताङ जीउज्यीकराङ ओङाते मि ईन्देकी ङे चुक खिका, च्यि खिका सिरच्येते गाङे बात था दिकी ख्योकोनला लोप्क्यो। ङे तिमोथीला ख्योकोनला लोप ताङाते बातराङ ङा गाङेपा ठाउँ ठाउँला जम्मा ओङकान्ते येशू ख्रीष्ट मि गाङेला लोप्कीन ओत। 18 थेमे ख्योकोन कोई कोईचेन था ङा ख्योकोन ज्यीबेकी थेपा ओङाराङ मुथुबोत्लो सिन छ्ये खिन बात खिदुक्लो। 19 प्रभु येशूकी ग्युक सिन सासीन था होत्ताराङ ङा ख्योकोन ओत्सापा ओङगो। थेमे ङा थेपा वाला थेबेकी छ्ये खिन बातकामा खित्च्येते ईन्दाकाना थेबाताङ परमेश्वर शक्तिङ ओता ईन्दाका सिन लेमु खाला छ्या स्येबा खिओ। 20 परमेश्वर राज्यदु बातकामा खाला छ्याःङ काम लै मिक्किओ। परमेश्वर शक्ति छ्य्वापेई काम खाला तेन्दा फाप्क्यो। 21 लो था ख्योकोन च्यि सिते? ङाला थेपा फेर्का खुरला स्योक सिताना ङिङज्ये खाला लेमु खिताला स्योगे? |
© 1992 Wycliffe Bible Translators Inc. All rights reserved.
Wycliffe Bible Translators, Inc.