१ कोरिन्थी 3 - जिरेलपरमेश्वर काम खित्कान्ते मिओन सुङ छ्ये टेक्टे मेन 1 आज्यो न्वावे, ङे ख्योकोनताङ परमेश्वर आत्मेकी खित ज्युता चालाच्योक खित्कान्ते मिओनताङ च्योक खाईन बात खिता माथुप्सुङ। बरू दाक्पोन खुशीला ख्याम्कान्ते मिओनताङ च्योक खाईन बात खिता फाप्सुङ। ख्रीष्टला विश्वास खित्च्येते बात विचार खित्जीन ख्योकोन थोरूमसाक पाको गाला मिन्दुक, बालकते फिजा च्योकराङ दुक। 2 थोगी ङे ख्योकोनला बालकते फिजाला च्योक खाईन ज्येनतोक साप मेतेरा खाईन ओमाकामा लुताप। ङा ख्योकोनताङ ओत्जीनोङ ख्योकोनगी फिजेकी च्योक ओमा बाई ज्येनतोक साप पच्चे खिता थुप्कीन मेतान। थोरूमसाकोङ थोक्ते साप पच्चे खिता थुप्कान गाला मिन्दुक। 3 च्यि सासीन ख्योकोननी दाक्पोन खुशीला ख्याम्कान्ते मिओन च्योकराङ दुक। ख्योकोन दाक्पोन दाक्पोन नाङ डार खिन थेमे थोम्मु खिन देत्ला परमेश्वर आत्मेकी च्यि खि सिका थे ङेनराङ मेङेन्दुक। थोगी च्यि ख्योकोन दाक्पोन खुशीला ख्याम्कान्ते ज्येन मि च्योकराङ मायाङसुङरो? 4 ख्योकोन दोक्पोईकी “ङा पावलगी साबाते ङेन्कान्ते ईन,” सिरच्या, ज्येनज्यीगी “ङा अपोल्लोसकी साबाते ङेन्कान्ते ईन,” सिन सिरच्येते च्यि परमेश्वर आत्मा ङेता मेताते मिओनगी खिताच्योक खाबाते मेनरो? 5 अपोल्लोस सु ईन्देरो? थेमे पावलका च्यि ईन्दे? ङ्योकोन ङिबोनी खालि प्रभु परमेश्वर काम खित्कान्ते मिकामा ईन। थेकी ङेराङ दाक्पोन दाक्पोनला जिम्मा बिन्दा च्योकराङ खाईन ङ्योकोनगी लापाते बात ङेन्गीन ख्योकोनगी येशूला विश्वास खासुङ। 6 ङे ख्योकोन नाङ खाबाते कामचेन सुइँदेकी खइँदे बिरूवा जुच्येते च्योक ओतान। थेमे अपोल्लोस कामचेन थे बिरूवाला छ्यु लुच्येते च्योक ओतान। ङ्योकोनगी दोक खासीनोङ थे बिरूवाला छार ज्युत्कान्तेचेन परमेश्वरराङ ईन। 7 बातचेन दिराङ ईन। च्यि सासीन बिरूवा जुकान्तेङ छ्यु लुकान्तेङ ङिकाराङ छ्याःङ मेन। छ्येतेचेन थे बिरूवाला छार ज्युत्कान्ते ईन। थेचेन परमेश्वरराङ ईन। 8 बिरूवा जुकान्तेताङ छ्यु लुकान्ते ङिकाराङ थोजोराङ ईन। परमेश्वरगी था तिरी गाङेला दाक्पोन दाक्पोनगी खाबाते काम ताला इनाम तेरग्यो। 9 ङ्योकोनचेन परमेश्वरताङ डिक्ला काम खित्कान्ते ईन। थेमे ख्योकोनचेन परमेश्वर स्यीङ च्योक्ते ईन। दोस्यिककामा मेन, ख्योकोननी परमेश्वरगी जोइन ओताते खाम्बाराङ ईन। ङीमाई येशूकी सु सुकी च्यि खाका सिन तेइओ 10 परमेश्वरगी ङाला दया खाईन थे खोरोङ काम खि साबा ओतेकी ङे खाम्बा ज्वाप्ला आउदी सिपालु ओताते मिकी च्योकराङ खाईन जग तिङाप। ज्येनगीचेन दि जगी लाक खाम्बा जोइन ओत। तर खाम्बा जोकान्ते मिकी थे खोरोङगी चुक खाला जोइन ओते सिन लेमु खाला छ्या स्येबा फाप्क्यो। 11 थेमे ङुरूङते तिङाते जगचेन येशू ख्रीष्टकामा ईन। सुङगीङ था ज्येन जग दिङा मुथुबो। 12 दि जगी लाकराङ कोईकी सेरगी खाम्बा जोओङ। कोईकी चाँदी खाम्बा जोओङ। थोकराङ खाला कोईकी आउदी महँगो महँगोते युईते, कोईकी स्यिङगीते, कोईकी काम्बाते चेते थेमे कोईकीचेन पराल खाम्बा जोओङ। 13 थेमे खाम्बा जोकान्ते मिओनगी सु सुकी चुक खाईन जोबा ओता ईन्दाका सिन ङीमाई गाङे छ्या स्येक्यो। येशू ख्रीष्ट ग्युरला वाला मि गाङे न्याय खिते छोमु सु सुकी चुक खाबा ओता ईन्दाका सिन डेल्ग्यो। सु मि काम चुक दुका सिन थे छोमु मे नाङ लुक्ला तेइओ। 14 थोक खाला मे नाङ लुजीनोङ सुइँदा मिकी थे जगी लाक जोबाते खाम्बा छिगीन थाला मागाल्सुङ सासीन थेलाचेन परमेश्वरगी इनाम तेरग्यो। 15 तर सुइँदेकी थे जगी लाक जोबाते खाम्बा मे नाङ लुजीन छिगीन थाला गाल्सुङ सासीन थोक्ते मिकीचेन छ्याःङ मेङेदो। थोक्ते मिचेन मे ऊराते खाम्बे नाङदुकी बल्ल बल्ल थेन्गीन थाराच्योक खाला पापकी सजायदुकी थारग्यो। 16 ख्योकोन खेराङराङ परमेश्वर मन्दिर ईन थेमे परमेश्वर आत्मा ख्योकोन नाङ देत्क्यो सिन च्यि ख्योकोनला छ्या मेत? 17 थोगी सुइँदेकी मेलेबा काम खाला परमेश्वर मन्दिरला ङ्ये ज्युत्कीदुक सासीन थोक्ते मिला परमेश्वरगी सजाय तेरग्यो। परमेश्वर मन्दिर नाङ मेलेबाते सिराते छ्याःङ मेङगो। थे मन्दिरचेन ख्योकोनराङ ईन। पावलगी मि काम ताला मिला छ्ये माजो साबाते 18 ख्योकोन सुङगीङ दाक्पोनगी ठुबाते डालुम नाङ दाक्पोनराङ स्यूक्च्येते काम माकेत। च्यि सासीन दि सा लुङबे मिकी कोईला आउदी बुद्धि ओताते मि ईन सिओ। ख्योकोन नाङ सुइँदाला खेराङ होथेबेकी साबा च्योक्ते मि ईन सिराच्योक लाङगीदुक सासीन बरू ख्योकोनगी ङानी छ्याःङ मेस्येकान्ते मि ईन सिराच्योक खि। दोक खाला छ्ये मिक्किकान्ते मिराङ बुद्धि ओताते मि ईन। 19 दि सा लुङबे मित्ताङ जतिराङ बुद्धि ओत्सीनोङ परमेश्वर दोन्दु थे छ्याःङ काम लै मिक्किओ। परमेश्वर लाईदु दिनी लेम्बे बात च्योक ईन। परमेश्वर बातला “आउदी बुद्धि ओताते मिओनगी जतिराङ बुद्धि खिये खाईन जे खासीनोङ परमेश्वरगी दाक थेबे गल्ती थेप्क्यो,” सिन साला दुक। 20 लोक्ला परमेश्वर बातला च्यि साला दुका सासीन “आउदी बुद्धि ओताते मिओनगी ङा दोक खितामीन, थोक खाला दि काम खितामीन सिन सासीनोङ थेबेकी थोक खाबाते छ्याःङ काम लै मिक्किओ सिन प्रभु परमेश्वरला छ्या ओत,” सिन टिला दुक। 21 बात दोक ईन्देकी ख्योकोनगी सुइँदे काम ताला फलाना चुक लेमु खित्कान्ते ईन्दे सिन थेला छ्ये माजो। ईन्दालाचेन जसकी जे काम खासीनोङ, जे ओङसीनोङ गाङे ख्योकोनला लेमु ओङालाराङ ईन। 22 च्यि सासीन पावल, अपोल्लोस, पत्रुस गाङे ख्योकोनला लेमु ओङाला काम खित्कान्ते मि ईन। थेमे दि सा लुङबादु ओताते जेसुकै ख्योकोन लाःक्तुराङ ओत। सोन्ला देत्च्येते, स्यिच्येते, थरिङोला ओङगीन ओताते थेमे था तिरी ओङच्येते दुक्पा किम्मु बात जेसुकै ख्योकोनला लेमु ओङालाराङ ईन। 23 थेमे ख्योकोन ख्रीष्टकी मि ईन। थोकराङ खाला ख्रीष्टचेन परमेश्वरते ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.