१ कोरिन्थी 2 - जिरेलपावलगी कोरिन्थदु गोमा चुक खाबा ओताने सिन साबाते 1 आज्यो न्वावे, ङा गोमा ख्योकोन ओत्सापा परमेश्वरगी येशू ख्रीष्टकी खित्सादु मिओन लाईदु च्यि खासुङा सिरच्येते बात लोप ओङजीन ङे आउदी पढे खाबाते मिकी च्योक खाईन बात माक्या। जे बादोङ छ्या स्येकान्ते मिकी च्योक खाईनोङ मालाप। 2 बरू ङेनी येशू ख्रीष्ट सु ईन्दे सिरच्येतेताङ थेला स्यिङगी थामला टाँए खाईन सेताते बातकामा लोप्च्ये टुङ्गो खाईन थे बातकामा ख्योकोनला लापाप। 3 थेजीन ङा चुक खाला थे बातओन लेमु खाला लोपा थुप्कीका सिन थेतेकामा सुर्ता खिन ज्यीबा खिन देताप। 4 ख्योकोनला येशू ख्रीष्ट सु ईन्दे सिरच्येतेताङ थेला स्यिङगी थामला टाँए खाईन सेताते बातओन लोप्जीन मिओनला बातकीराङ ल्वा थुप्कान्ते सिपालुते मिओनगी च्योक खाईन ङे ङाराङ बुद्धिकी मालाप बरू परमेश्वरताङ चुक छ्येज्यीक शक्ति ओते सिन ङेचेन परमेश्वर आत्मे छ्य्वापेई थे बातओन लापाप। 5 ख्योकोनगी येशू ख्रीष्टला विश्वास खाबाते मिओनगी खोपरोङ बुद्धि खिये खाईन लापाते बात ङेन्गीन मेन्देकी परमेश्वर शक्ति चुक छ्येज्यीक ईन्दाका सिन छ्या स्येबेकी खित्सादु ईन सिरालाराङ ङे थोक खाईन लापाते ईन। परमेश्वर आत्मेकी छ्या स्ये च्युताते बात 6 ईन्सीनोङ बात लेमु खाला खोबा थुप्कान्ते पाकोते मिओनताङचेन ङ्योकोन बुद्धि बादोङ खिओ। तर ङ्योकोनगी खित्च्येते बुद्धि बातचेन दि सा लुङबे मिओन थेमे ज्येनला राज्य खित्कान्ते मिओनगी खित्च्येते बुद्धि बात च्योक्ते मेन। थे छ्ये छ्ये मिनी ङीमाई दाक स्यिला थेबेते जेसुकै तोरला डुइओ। 7 ङ्योकोन ख्योकोनला थेकी गोमा सुङलाङ छ्या स्ये च्युता मेताते परमेश्वर बुद्धि बातज्यीक सिरामीन। दि बात गोमा परमेश्वरगी मिओनताङ ब्वाकीन ज्याक्पा ओतान। च्यि सासीन दि साताङ नाम ज्वा भन्दा गोमामेकीराङ थेकी ङुरूङला मान बिन्ला थे खोरोङगी ज्वा चाला च्योकराङ लेमु जोइओ सिन साबा ओतान। 8 दि बात दुरू लुङबा लुङबाला राज्य खित्कान्तेबा सुङगीङ छ्या मास्येसुङ। छ्या स्येबा ईन्दा ईन्सीन छ्येज्यीक शक्ति ओताते प्रभु येशूला थेबेकी स्यिङगी थामला टाँए खाला सेत्च्या मेतान। 9 दि बात थेबा सुङगीङ छ्या मास्येसीनोङ परमेश्वर बातला चुक सिन टिला दुका सासीन “सुङगीङ माथोङाते, माथोबाते थेमे मिकी दोक ओङगीता सिन नोमुङ विचारराङ माक्याबाते कामतेबा परमेश्वरगी थे खोरोङला ङिङज्ये खित्कान्ते मिओनला खाला तेरग्यो सिन ठीक खाबा ओत,” सिन साला दुक। 10 परमेश्वर बातला साबा च्योकराङ खाईन थे खोरोङगी गोमा सुङलाङ छ्या स्ये च्युता मेताते बात परमेश्वरगी ङुरूङलाचेन थे खोरोङ आत्मे छ्य्वापेई छ्या स्ये च्युता ओत। परमेश्वर आत्मेकीचेन गाङे बात छ्या स्येक्यो, परमेश्वरगी च्यि खिता चाल्ला दुका सिरच्येते बात समेदोङ छ्या स्येक्यो। 11 दाक्पोन चुक्ते मि ईन्दे थेमे सेमदु चुक ओते सिन मि दाक्पोनगीकामा छ्या स्येक्यो। थोकराङ खाला परमेश्वर आत्मेकीकामा परमेश्वरते गाङे बात छ्या स्येक्यो। 12 ङुरूङगी ङेताते परमेश्वर आत्माताङ दि सा लुङबे मिओनगी खित्च्येते बुद्धि बात दोक्पोईराङ मेन। परमेश्वर आत्मे छ्य्वापेईराङ ङुरूङगी परमेश्वरगी ङुरूङला च्यि बिन्दा ओते, चुक खाबा ओते सिन छ्या स्येक्यो। 13 थोगी ङ्योकोनगी लोप्च्येते बातचेन सुइँदा मिकी ङ्योकोनला लाप्कीन बिन्दाते बात मेन, परमेश्वर आत्मेकी लाप्कीन बिन्दाते बात ईन। दोक खाला ङ्योकोन परमेश्वर आत्मा ङेता ओताते मिओनला परमेश्वर आत्मेकी लोप साबाते सत्यते बात लोप्क्यो। 14 परमेश्वर आत्मा ङेता मेताते मिओनगीनी परमेश्वर आत्मेकी लापाते बातओन ङेनराङ मेङेनो। दोक्ते बातनी थेबे लाईदु कामराङ लै मिक्किच्या लेम्बे बात च्योकका ओङगो। परमेश्वर आत्मे छ्य्वापेईकामा थे बात चुक्ते ईन्दे सिन छ्या स्येबा थुप्च्येते ईन्देकी परमेश्वर आत्मा ङेता मेताते मिओनगी दोक्ते बात छ्याःङ खोबाराङ मुथुबो। 15 परमेश्वर आत्मा ङेता ओताते मिओनगी च्यि बात चुक ईन्दे सिन गाङे डेला थुप्क्यो। तर थेबेकी खित्च्येते कामताङ बात चुक्ते ईन्दे सिनचेन ज्येनगी डेलाराङ मुथुबो। 16 परमेश्वर बातला “सुईचेन प्रभु परमेश्वर सेमगी बात छ्या स्येबा ओते? थेमे थेला सुई लोपा थुप्कीतेरो?” सिन साला दुक। दोक ईन्सीनोङ थेकी खित ज्युता चालाते छ्या स्येबाला ङुरूङगीचेन ख्रीष्टकी आत्मा ङेता ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.