१ कोरिन्थी 16 - जिरेलपरमेश्वर मिओनला ताच्येते बात 1 थेमे ज्येन बात यरूशलेमदु परमेश्वर मिओनला तेराला पैसा जम्मा खित्जीन ख्योकोनगीङ ङे गलातिये अञ्चलदु ठाउँ ठाउँला जम्मा ओङकान्ते येशू ख्रीष्ट मिओनला साबा च्योकराङ खाला जम्मा खि। 2 चुक सासीन हप्ताई पिच्छे आदेरी छोमु छोमु ख्योकोन गाङेकी दाक्पोन दाक्पोन कमाइ ताला खेराङगी तेरा थुप्च्या थुप्च्याज्यीक पैसा थेबे लाईदु टाल्ला ठाउँज्यीक्तु जम्मा खाला स्योक। थोक खाईन जम्मा खाईन ज्याक्सीन ङा थेपा वानामेकी थे पैसा दुत्च्येते काम खिता माफाबो। 3 ङाचेन थेपा वाला थे पैसा केल ड्वाप्ला खेराङगी छाने खाबाते मिओनला थेबा सु ईन्दे सिन खालि चिट्ठीज्यीककामा टिला कुरला यरूशलेमपा तोङगो। 4 तर ङाराङोङ थेपा ड्वाप्ला ठीक च्योक लासीन थेबा ङात्ताङ ङ्योम्बुराङ गालोङ। पावलगी सल्लाह खिताला टिबाते बात 5 ङा म्यासिडोनिये लुङबापेकी खाला ख्योकोन ओत्सापा ओङगो। च्यिला सासीन ङाला म्यासिडोनियापेकीराङ खाला ओङा फाप्च्या ओत। 6 ङा ख्योकोनताङ आदोराङ देते लाईदु ओङगो। थुप्सुङ सासीन गुन खाङराङ ङा ख्योकोनताङ देत्कीतासीन। थे तिरीचेन ङा जता गाल्सीनोङ ख्योकोनगी ङाला थेरूई लेमु खाला तोङा थुप्क्यो। 7 ङा ख्योकोनला रकस्यिककामा ठेता खिताला ओङच्येते मेन। प्रभु येशूकी ङाला थेरूराङ देत्सीन ओङगो सासीन ङेते ख्योकोनताङ आदोराङ देत्च्येते सेम ओत। 8 पेन्तिकोस चाडसाकचेन ङा एफिससदुराङ देत्क्यो। 9 ङे खित्च्येते काम रोके खिता छोल्कानताङ ङे विरोध खित्कान दुरू काल्बेई ओत्सीनोङ ङाराङगी खिन ओताते काम खित्च्येते छ्येज्यीक मौका ङेत्कीन थे काम ङे आउदी लेमु खाईन खिता थुपा ओत। 10 थेमे तिमोथी थेपा ओङजीन ख्योकोनगी थेला डोम्बोला च्योकराङ खि। च्यिला सासीन थेकीङ ङे च्योकराङ प्रभु येशूकी खि साबाते कामराङ खिन ओत। 11 थोगी सुङगीङ थेला दिङ सु ईन्देरो सिराच्योक खाला थे सेमला फोक्च्येते काम माकेत। थेपेकीङ थेला थेत्ताङ ओङकान्ते आज्यो न्वाओनताङ लेमु खाला ग्युरला थोङ। ङा थेबे लाम ताला देत्क्यो। 12 थेमे न्वा अपोल्लोसलाङ ज्येन आज्यो न्वाओनताङ ख्योकोन ओत्सापा ग्युक सिन ङे झन्दै काम्बा तेगीन सेकामा माक्या। थोक ईन्सीनोङ थेला दि पालोला थेपा ड्वाप्ला ठीक च्योक मालासुङलो। थोगी था तिरी मौका ङेतासात्तु थे ख्योकोन ओत्सापा ओङगोत्लो। 13 खेराङला छक्के खिता छोल्कानताङ च्याङबो खाला देत, प्रभु येशूला लेमु खाला विश्वास खिन देत, फिजा च्योक ज्यीबा माकेत बरू पाकोते मिकी च्योक खाला काम खि। 14 काम बात जे खित्जीनोङ ख्योकोनगी दोक्पोईकी ज्येनज्यीकला ङिङज्ये खिन खि। 15 थेमे अखैये लुङबादु ओताते मिओन नाङ गाङे भन्दा गोमा येशूला विश्वास खित्कान्ते स्तिफनासताङ थे खाम्बे मिओन ख्योकोनला छ्याराङ ओतासीन। थेबाचेन जहिलेङ परमेश्वर सन्तानओनला च्यि चुक दुका ताला थुपासम्म थेबाला लेमु खित्कान्ते मि ईन। आज्यो न्वावे, ङा ख्योकोनला च्यि सिन बिन्ती खिते सासीन 16 ख्योकोनगी स्तिफनासबा च्योक्ते मि अधीनला देत्ला थेबेकी साबाते ङेन। 17 स्तिफनास, फोर्टुनाटसताङ अखाइकस दुरू वानामेई ङाला आउदी लेमु ओङसुङ। च्यिला सासीन ङा थारीला ओतेकी ख्योकोनगी खिता माथुपाते काम दिबेकी वाकीन खासुङ। 18 दिबेकी थोक खाबेकी ङुरूङ गाङेला लेमु ओङसुङ। थोगी ख्योकोनगी होदोक्ते मिला सधैँ मान खि। ज्येनला नमस्ते सिरच्येते बात 19 एशिये अञ्चलदु ठाउँ ठाउँला जम्मा ओङकान्ते येशू ख्रीष्ट मिओनगी ख्योकोनला नमस्ते ओत्लो। अक्वीलाताङ प्रिस्का थेमे थेबे खाम्बादु जम्मा ओङकान्ते येशू ख्रीष्ट मिओनतेङ प्रभु येशू छ्य्वापेई ख्योकोनला काल्बेई नमस्ते ओत्लो। 20 दुरू ओताते आज्यो न्वाओनगीङ गाङेकी ख्योकोनला नमस्ते ओत्लो। ठेत्जीन ख्योकोनगी दोक्पोईकी ज्येनज्यीकला मान खिन नमस्ते खि। 21 थेमे ङेतेङ ख्योकोनला नमस्ते सिनचेन ङा पावल ङाराङ लाक्पेकीराङ टिगीन ओत। 22 सुइँदेकी प्रभु येशूला ङिङज्ये मिक्किदुक सासीन थोक्ते मिला परमेश्वरगी सराप तेरस्यीत। स्योक स्योक प्रभु येशू, खो होत्ता स्योक। 23 लो ख्योकोन गाङेला प्रभु येशूकी दया खिनराङ देत्स्यीत। 24 येशू ख्रीष्टताङ जीउज्यीकराङ ओङाते ख्योकोन गाङेला ङा ङिङज्ये खिनराङ देत्क्यो। आमेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.