१ कोरिन्थी 15 - जिरेलयेशू सोम्बो लोक्पा ओताते बात 1 आज्यो न्वावे, ख्योकोनला ठेम्बा लोङाला ङा थरिङोङ ङे ख्योकोनला गोमाका लापाते गा लाङच्येते बातराङ सिन ओत। थेजीन ङे ख्योकोनला लापाते बात ख्योकोनगी ङेन्सुङ। थेमे थे सत्यते बात ईन सिन ख्योकोनगी थोरूमसाक ङेन्दा ताङा मिन्दुक। 2 ङे ख्योकोनला लापाते थे गा लाङच्येते बातला खि साबा च्योकराङ खिन देत्सुङ सासीन ख्योकोनगी पापकी सजाय भोगे खिता माफाबो। थोक खिन मादेत्सीन थे बात ङेन्दाते ख्योकोनला छ्याःङ काम लै मिक्किओ। 3 थेजीन ङे ख्योकोनला गाङे भन्दा छ्येते बात दिराङ ईन सिन ङाराङगी छ्या स्येबाते बात लाप्कीन बिन्दा ओत। च्यि सासीन परमेश्वर बातला गोमाका साबा च्योकराङ खाईन ख्रीष्टचेन ङुरूङला पापदुकी डेलाला थे खोरोङ ज्यान बिन्गीन स्या ओतान, 4 स्यिनामेकी थेला दिबाङ ओतान थेमे ङीमा सुमगी छोमु परमेश्वरगी थेला सोम्बो लोक्पा ओतान। थोक ओङगो सिनोङ परमेश्वर बातला गोमाका टिबा ओतान। 5 सोम्बो लोक्नामेकी थेकी पत्रुसला ठेता खाबा ओतान। थेमे थे तिरी थे खोरोङ चेलातेबा च्युन्ङीला ठेता खाबा ओतान। 6 थेबालाकामा मेन्देकी थेकी थे खोरोङला विश्वास खित्कान्ते मि काल्बेईला बाजिईला ठेता ओतान। थेबा मेरा सय ङा भन्दाङ ल्हाक्पा ओतान। थेबा कोई स्यिइन सिन्सीनोङ काल्बा च्योकचेन थोरूमसाकोङ सोम्बोराङ ओत। 7 थेबा थेबाला ठेत्नामेई तिरी थेकी याकूबला ठेता ओतान। थेला ठेता खानामेई याङराङ थेकी थे खोरोङगी खटे खाबाते मि गाङेला ठेता खाबा ओतान। 8 थेमे थे तिरीचेन थेकी ङात्ताङोङ ठेता खाबा ओतान। ईन्दानी ङा थेकी थोक खाला ठेता खिता सोई खित्च्ये मि मेतान। 9 येशू ख्रीष्टकी खटे खाबाते मि गाङे नाङ ङानी थेबा छेत ईनराङ मेन। ङानी येशू ख्रीष्टकी खटे खाबाते मि ईन सिराङ सोई मिक्किओ। च्यिला सासीन ङेनी गोमाबा परमेश्वर मिओनला गाङेपा चाल्गीन चाल्गीन थेबे खेदापानी खाबाप। 10 ङे थोक मेलेबा खाबा ईन्सीनोङ परमेश्वरगी ङाला दया खाईन ज्येनला येशू ख्रीष्ट बात लोप्कान्ते मि जोसुङ। परमेश्वरगी ङाला दया खाबाते थाराङ खेरो मागाल्सुङ। ङेचेन ङाराङ च्योकराङ येशू ख्रीष्टकी खटे खाबाते मि गाङेकी भन्दा दुक्पा खाईन खाईन ल्हाक्पा काम खाबा ओत। ईन्सीनोङ ङे खाबाते काम ङाराङ स्येतताङ बुद्धिकी खाबाते मेन। दि गाङे परमेश्वर दयेकी खित्सादु खिता थुपाते ईन। 11 थोगी ङे ईन्सीनोङ थेमे ङा च्योकराङ येशू ख्रीष्टकी खटे खाबाते ज्येनगी ईन्सीनोङ ङ्योकोन गाङेकी ङे ख्योकोनला गाङे भन्दा छ्येते ईन सिन लापाते होदि बातज्यीकराङ लोप्क्यो। ख्योकोनगी ङेन्दाते बादोङ होदिराङ ईन। स्याप्ते मिओन सोम्बो लोक्च्येते बात 12 दोक खाला ङ्योकोन ख्रीष्टला परमेश्वरगी सोम्बो लोक्पा ओत सिन ज्येनला लोप्क्यो। ईन्सीनोङ मि पालोई स्यिनामेकी सोम्बोराङ मोलोगो सिन ख्योकोन कोई कोई चुक खाला सिते? 13 ख्योकोनगी साबा च्योकराङ ईन्सुङ सासीन परमेश्वरगी ख्रीष्टलाङ सोम्बो लोक्पाते मेन। 14 थेकी ख्रीष्टला सोम्बो लोक्पाते मेन्दा ईन्सुङ सासीनका ङ्योकोनगी लोप्कीन ओताते बाततेबा छ्याःङ काम लै मिक्किच्या ओङसुङ, ख्योकोनगी थेला विश्वास खाबातेङ छ्याःङ काम लै माक्यासुङ। 15 थोरूम ज्येन बात च्यि सासीन ङ्योकोननी परमेश्वर विषयला ईनराङ मेन्दाते बात लोप्कान्ते मिका ओङसुङ। च्यिला सासीन परमेश्वरगीराङ ख्रीष्टला सोम्बो लोक्पाते ईन सिन ङ्योकोनगी मिओनला साबा ओत। तर मि स्यिनामेई स्याप्ते स्यापराङ ओङच्या ईन्सीनका परमेश्वरगी ख्रीष्टलाङ सोम्बो लोक्पाते ईनराङ मेन। 16 थोगी स्याप्ते मिओन सोम्बो मोलोक्च्येते ईन्सीन परमेश्वरगी ख्रीष्टलाङ सोम्बो लोक्पाते मेन। 17 थेकी ख्रीष्टला सोम्बो लोक्पाते मेन्सीनका ख्योकोनगी थेला विश्वास खाबाते छ्याःङ फाइदा मेत। ख्योकोन थोरूमोङ पापलाराङ नुपा ओत। 18 दोस्यिककामा मेन, थेला विश्वास खिन खिन स्याप्ते मिओनतेङ सोम्बो लोक्च्येते छ्याःङ आश मायाङसुङ। थेबाङ गाङे स्याप्ते स्यापराङ ओङच्या ओङसुङ। 19 थेमे दि जुनी लाईदुकामा ङुरूङगी ख्रीष्टला विश्वास खाबाते ईन्गीन स्यिनामेई तिरी छ्याःङ आश मेत्सुङ सासीन ङुरूङनी ज्येन मि भन्दाङ झन बिरोक लाङच्ये खालगी मिकामा ईन। 20 तर ख्रीष्टला परमेश्वरगी सोम्बो लोक्पाते बात पक्काराङ ईन। स्याप्ते मिओन नाङ गाङे भन्दा गोमा सोम्बो लोक्कान्ते थेराङ ईन। 21 गोमा मिज्यीगी पाप खाबेकी खित्सादु मि गाङेराङ स्या फाप्च्या ओङसुङ। थेमे मिज्यीगी खाबाते कामगी खित्सादु थाचेन स्याप्ते मिओन सोम्बो लोइओ। 22 च्यिला सासीन मि गाङे आदम सन्तान ईन्देकी पालोई गाङेराङ स्यिइओ। ख्रीष्टताङ जीउज्यीकराङ ओङाते मिओनलाचेन परमेश्वरगी तिरी सोम्बो लोइओ। 23 थेकी दोक खित्च्येते पालो पालो खाला खिओ। च्यि सासीन गाङे भन्दा गोमा थेकी ख्रीष्टला सोम्बो लोक्सुङ। था दि तिरीचेन थेकी ख्रीष्टला विश्वास खित्कान्ते मिओनला सोम्बो लोइओ। थेबाला सोम्बो लोक्च्येते ख्रीष्ट दुरू ग्युरला ओङे छोमु ईन। 24 थेमे शैतान ईन्स्यीत, ल्हा ल्हन्डीक जोराङ ईन्स्यीत, स्वर्गदु, नरककुण्डमा थेमे सा नाम खाङ राज्य खित्कान्तेबा गाङेला पूरो खाईन ग्याल्गीन सिन्नामेकीचेन ख्रीष्टकी थे खोरोङ राज्य आबा परमेश्वरला सोम्पे खिओ। थेकी थेबा गाङेला ग्याल्गीन सिन्नामेईचेन दि जुगोङ सिन्ग्यो। 25 ख्रीष्टकी थोक खाला थे खोरोङ शत्रु गाङेला ग्याल्गीन थे खोरोङ तिङबे ओक्तु माज्याकथुप राज्य खिनराङ देत्क्यो। 26 थेकी गाङे भन्दा तिरी ग्याला फाप्च्येतेचेन स्यिच्येते काललाराङ ईन। 27 च्यिला सासीन परमेश्वर बातला “परमेश्वरगी ओताते जति गाङेला थे तिङबे ओक्तु ज्याक्ला तेरग्यो,” सिन टिबा ओत। ओताते जति गाङेला थे तिङबे ओक्तु ज्याक्ला तेरग्यो साबाते परमेश्वर खोरोङोङ थे तिङबे ओक्तु ओङगो साबाते मेन। दोक साबातेनी गाङेला ख्रीष्टकी तिङबे ओक्तु ज्याक्ला तेरकान्तेचेन परमेश्वर ईन साबाते ईन। 28 थेकी गाङेला ख्रीष्टकी तिङबे ओक्तु ज्यागीन सिन्नामेकीचेन परमेश्वर फुज्युङ ख्रीष्ट थे खोरोङोङ परमेश्वर अधीनलाराङ देत्क्यो। थोक ओङगीन सिन्नामेई परमेश्वरगीराङ गाङेपा गाङेला राज्य खिओ। 29 स्याप्ते मिओनला परमेश्वरगी सोम्बो लोकराङ मोलोक्च्येते ईन्सीन ख्योकोन नाङ कोई कोईकी च्यि आशकी स्याप्ते मि लाईदु बप्तिस्मा लिन्गीका ओना? थेकी स्याप्ते मिओनला सोम्बोराङ मोलोक्च्या ईन्सीन थेबे लाईदु थेबेकी च्यिला थोक खिका? 30 थेमे सोम्बो लोक्च्येते छ्याःङ आश मेत्सीनका मिओनगी ङीन नुप खेदापानी खिन खिनोङ ङ्योकोनगी च्यिला दुक्पा खिन देत्च्ये? 31 आज्यो न्वावे, ङा ङीमे ठाङमा स्यिइओ। च्यि सासीन ङीन नुप ङे दुक्पा खपे खिता फाप्सीनोङ ङे लापाते बात ङेन्गीन ख्योकोनगी ङुरूङ प्रभु येशू ख्रीष्टला विश्वास खाबाते ईन्देकी ङाला गा लाङगीदुक। 32 मिकी साबा च्योकराङ स्याप्ते मिओन सोम्बो मोलोक्च्या ईन्सीनका ङा एफिससदु ङाराङ ज्यानगी मायाङ मारे खाला थोक खाला च्येन थोमताङ जीङच्या मेतान। स्यिनामेई सोम्बो लोक्च्येते बात छ्याःङ मेत्सीनका ज्येनगी च्योकराङ “लो स्योक ङुरूङ स्यीम्बु स्यीम्बु सेइ, थुङगी। च्यिला सासीन ङारो दाक स्याङ थुप्क्यो,” सिन सिइ ओना। 33 ख्योकोन मि बात ङेन्ला छक्के माकेत। मेलेबा मित्ताङ साङ खासीन लेमु मिङ ङ्येक्यो। 34 थोगी था ख्योकोनगी लेमु मेलेबा च्यि ईन्दे सिन डेला थुप्कान्ते मि च्योक ओङला काम खि। पाप खिन देता थोङ। ख्योकोनला ङोचा लोङाप सिनराङ ङा दोक सिन ओत। च्यिला सासीन ख्योकोन कोईकीनी थोरूमोङ परमेश्वर सु ईन्दे, थेकी चुक खाला काम खिते सिन छ्याःङ खोबा मिन्दुक। मिओन तिरी चुक खाला सोम्बो लोइते 35 थेमे ख्योकोन कोई कोईकी स्यिइन सिन्दे मिङ चुक खाला सोम्बो लोगोङा? थेमे सोम्बो लोक्जीन थेबे जीउ चुकस्यिक ओङगीताका सिनोङ साओङ। 36 ख्योकोनला होदोक्तेन्दे बात ठाप्ला ङोचा मालाङदुक? च्यि ख्योकोनगी खइँदे सोन ताप्नामेई थे सोन मुरूला खाईन बिरूवा केबाते थोङा ओत? 37 ठा ईन्सीनोङ ज्येनतोक अन्न ईन्सीनोङ मिकी सोनकामा देप्क्यो, ठे झाङराङ सुङगीङ मेदेबो। 38 मिकी सोनकामा ताप्सीनोङ परमेश्वरगीराङ थे सोन केर ज्युत्क्यो। थे जुन अन्ने सोन दुक परमेश्वरगी थे अन्ने झाङराङ केर ज्युत्क्यो। 39 थेमे ङेपाक ओत्कान गाङे जीउ परीज्यीकराङ मेङगो। मि जीउ परीज्यीक ओङगो सासीन जन्तुओनते परीज्यीक ओङगो। थेमे छ्योज्युङमे जीउ परीज्यीक ओङगो सासीन ङ्येते ज्येनज्यीकराङ ओङगो। 40 थोकराङ खाला नामगी दागार, ङीमा थेमे कार्मे विचार खाला तो। दि सा लुङबादु ओताते ङेपाक ओतातेबेते परी परी जीउ ओता च्योकराङ नामदु ओतातेबाङ परी परीतेन्देराङ ओत। थेमे दिबा लेमु थोङच्येते बात खित्जीन नामने ओतातेबा परीज्यीक थोङगो सासीन दुरू ओतातेबाचेन खुदुकज्यीकराङ थोङगो। 41 च्यि सासीन दागार भन्दा ङीमा खुदुकराङ खाला टल्के खिओ। थोकराङ खाला दागारोङ कार्मा भन्दा खुदुकज्यीकराङ खाला टल्के खिओ। थेमे कार्माओनोङ कोई टिक्पी टिक्पी कोई आउदी खाला टल्के खिओ। 42 स्याप्ते मिओन सोम्बो लोक्च्येते बादोङ दोकराङ ईन। चुक सासीन मि स्यिइन दिनामेकी थे रो रूल्ग्यो। तर था तिरीचेन नोमुङ मिस्यिच्येते, मुरूल्च्येते जीउ ङेत्ला सोम्बो लोइओ। 43 स्यिइन सिन्दाते मिकी छ्याःङ खिता मुथुबो। थोगी थे रो छ्याःङ काम लै मिक्किओ सिन दिइओ। तर था तिरी परमेश्वरगी सोम्बो लोक्जीन तेरच्येते जीउचेन जेङ खिता थुप्च्या आउदी लेमु ओङगो। 44 मि स्यिइन दिनामेई थे रो रूल्ग्यो। था तिरी सोम्बो लोक्जीनचेन थरिङोलेते च्योक्ते मेन्देकी परमेश्वर आत्मे छ्य्वापेई खुदुकते जीउ ङेत्क्यो। बात दिराङ ईन। थरिङोलेते च्योक्ते जीउकामा मेन्देकी परमेश्वर आत्मे छ्य्वापेई ङेत्च्येते जीउओङ ओङगो। 45 परमेश्वर बातला चुक साला दुका सासीन “परमेश्वरगी गाङे भन्दा गोमा जोबाते मि आदमला नोउनामेई ङेपाक लुगीन बिन्सुङ। दोक खानामेई थे सोन्सुङ,” सिन टिला दुक। तिरी आदम सिन साबाते ख्रीष्टचेन नोमुङ मिसिन्च्येते जुनी तेरकान्ते आत्मा ईन। 46 परमेश्वरगी गोमा जोबाते मि जीउचेन परमेश्वर आत्मे छ्य्वापेई ङेत्च्येते जीउ मेतान। दिनी थरिङोलेते च्योक्ते जीउराङ ओतान। थे तिरी जीउकामा परमेश्वर आत्मे छ्य्वापेई ङेत्च्येते जीउ ईन। 47 परमेश्वरगी गाङे भन्दा गोमा जोबाते मि आदमचेन से सबीदुकी जोबाते ईन। तर तिरी आदम सिन साबाते ख्रीष्टचेन स्वर्गनेकी वाबाते ईन। 48 थोगी आदम सन्तान ईन्देकी मि गाङे जीउ आदमते च्योकराङ ईन। थेमे ख्रीष्ट स्वर्गनेकी वाबाते ईन्देकी स्वर्गने ड्वा ङेत्कान्ते मिओन जीउचेन ख्रीष्टते च्योकराङ ओङगो। 49 थोक ईन्देकी ङुरूङ गाङेते थरिङोले जीउचेन आदम जीउ च्योक्तेराङ ईन। थरिङोले जीउ ओता च्योकराङ था तिरीचेन ङुरूङगी ख्रीष्टते च्योक्ते जीउ ङेत्क्यो। 50 थोगी आज्यो न्वावे, बात दिराङ ईन। च्यि सासीन दि स्या ठाक ओताते जीउताङचेन ङुरूङ परमेश्वर राज्यने स्यूक्पाराङ मेङेदो। थोकराङ खाला दि स्यिला रूल्ला डोच्येते जीउओङ नोमुङ स्यिला रूल्ला मोन्डोच्येते ओङाराङ मुथुबो। 51 लो ङेन, ङा ख्योकोनला परमेश्वरगी गोमा छ्या स्ये च्युता मेताते अचम्बते बातज्यीक लाःप्क्यो। च्यि सासीन ङुरूङ गाङेराङ मिस्यिओ। बरू मास्यिबालाराङ परमेश्वरगी था तिरी ङुरूङला रकस्यिकला खुदुक जोइओ। 52 थेजीन गाङे भन्दा तिरी फुबाते बिकुल ङोरो थोबासात्तु, छिनज्यीकला मिक छुम खाईन सिन मासिन्लाराङ परमेश्वरगी ङुरूङला खुदुक जोइओ। थे बिकुल फुबाते ङोरो थोबासात्तु परमेश्वरगी स्याप्ते मि गाङेला नोमुङ स्यिला रूल्ला मोन्डोच्या खाला सोम्बो लोइओ। थेमे ङुरूङ सोम्बोराङ ओतातेबालाङ थेकी खुदुक जोइओ। 53 च्यिला सासीन थरिङोलेते दि स्यिला रूल्ला डोच्येते जीउचेन नोमुङ स्यिला रूल्ला मोन्डोच्येते ओङा फाप्क्यो। थेमे मि स्यापराङ फाप्च्येते ईन्देकी नोमुङ मिस्यिच्या ओङाराङ फाप्क्यो। 54 होदोक खुदुक ओङगीन सिन्नामेईचेन परमेश्वर बातला “था कालगी सुङलाङ छ्याःङ खिता मुथुप्च्या खाईन परमेश्वरगी कालला पूरो खाईन ग्याला ओत,” सिन टिबा ओताते बात साबा च्योकराङ ओङगो। 55 “था कालगी सुला च्यि खिता थुप्कीतेरो? च्यि था कालगी खइँदा खिता थुप्क्योतरो?” 56 पाप खाबेकीराङ मि कालगी खाला फाप्च्येते ईन। थेमे परमेश्वर नियमला जे जे माकेत साला दुक झन थे थे खालाराङ पाप खित्च्येते ईन। 57 था ङुरूङ परमेश्वरला धन्यवाद सिइ। थेकी ङुरूङ प्रभु येशू ख्रीष्टकी खाबाते कामगी खित्सादु ङुरूङला जेसुकैला ग्याला थुप्च्येते शक्ति तेरग्यो। 58 थोगी ङिङज्येते आज्यो न्वावे, जस्तो ओङसीनोङ प्रभु येशूला विश्वास खिन देत, मि बात ङेन्ला शंका माकेत। प्रभु येशूकी खेराङला जिम्मा बिन्दाते काम थुपासम्म स्येत खाला खि। च्यिला सासीन थेकी खेराङला खि साबाच्योक खाबाते थाराङ खेरोला डोच्येते मेन सिन ख्योकोनला छ्याराङ ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.