१ कोरिन्थी 14 - जिरेलपरमेश्वर आत्मेकी बिन्दाते सीपताङ शक्ति चुक खाला चले खिता फाप्कीते 1 थोगी ख्योकोनगी चुक खाला ज्येनला ङिङज्ये खिता थुप्कीका सिरच्ये छ्य्वापा विचार खि। थेमे परमेश्वर आत्मेकी तेरच्येते खुदुक खुदुकते सीपताङ शक्ति चुक खाला ङेदोङा सिरच्ये छ्य्वापा सेम लै खि। थोक्ते सीपताङ शक्ति नाङदुङ परमेश्वरगी सिर च्युताते बात खित्च्येते शक्ति ङेतालाचेन ख्योकोनगी आउदी सेम खि। 2 दाक्पोनगी छ्या मास्येबाते खुदुक खुदुकते भाषाला बात खित्कान्ते मिकी मित्ताङ मेन्देकी परमेश्वरताङ बात खिओ। थेकी परमेश्वर आत्मे छ्य्वापेकी खोराङ मोखोच्येते बात खित्च्येते ईन्देकी थेकी च्यि सिन दुका सिन ज्येनगी खोराङ मोखोओ। 3 तर परमेश्वरगी सिर च्युताते बात खित्कान्तेकीचेन ज्येनतेबेकीङ खोच्येते बात खिओ। थेकी खाबाते बात थोला येशू ख्रीष्ट मिओनगी झन लेमु खाला येशूला विश्वास खिता थुप्क्यो, जस्तो ओङजीनोङ सेम सेता मेङच्याक्वा सिन छ्या स्येक्यो थेमे आँटोङ ङेत्क्यो। 4 दाक्पोनगी छ्या मास्येबाते खुदुक खुदुकते भाषाला बात खित्कान्ते मिकी थोक्ते बात खित्जीन थे खोरोङ लाईदुकामा लेमु ओङगो। परमेश्वरगी सिर च्युताते बात खित्कान्ते मिकी खाबाते थे बातकी छ्य्वापेईचेन थेरू जम्मा ओङा ओताते येशू ख्रीष्ट मि गाङेला लेमु ओङगो। 5 ख्योकोन गाङेकी खेराङगी छ्या मास्येबाते खुदुक खुदुकते भाषाला बात खिता थुप्स्यीत सिरच्येते ङे सेम ओत। ईन्सीनोङ दि भन्दा ख्योकोनगीचेन परमेश्वरगी सिर च्युताते बात खित्च्येते शक्ति ङेताते ङाला आउदी लेमु लाङगीदुक। च्यिला सासीन खोपरोङगी छ्या मास्येबाते खुदुक खुदुकते भाषाला बात खित्कान्ते भन्दा परमेश्वरगी सिर च्युताते बात खित्कान्ते मि छ्ये ईन। ईन्दानी खोपरोङगी छ्या मास्येबाते खुदुक खुदुकते भाषाला बात खित्जीन थे बातकी अर्थ ज्येन सुइँदेकी खोले खाईन बिन्सीन थेकी खाबाते बातकीङ येशू ख्रीष्ट मिओनला लेमुराङ ओङगो। 6 थोगी आज्यो न्वावे, ङे ख्योकोन ओत्सादु ओङजीन परमेश्वरगी ङाला तेन्गीन बिन्दाते तिरी ओङच्येते बात कि परमेश्वरगी चुक खाला काम खिते सिन छ्या स्येबाते बात कि परमेश्वरगी सिर च्युताते बात कि ख्योकोनगी चुक चुक खिता फाप्कीते सिरच्येते बात मोलोपा खाईन खालि ङाराङगी छ्या मास्येबाते खुदुक खुदुकते भाषाला बात खासुङ सासीन च्यि ख्योकोनला खइँदा फाइदा ओङगोतरो? ङे थोक्ते भाषाला बात खालानी ख्योकोनला छ्याःङ लेमु मेङगो। 7 था सिइना, मुरली कि वीणा सिराते बाजा मिकी फुसीन कि दुसीनकामा ङोरो थेन्ग्यो। फुत्कान्ते कि दुङकान्ते मिकी ङा दि पारला फुत्क्यो कि दुङगो सिन माफुसुङ कि मादुसुङ सासीन च्यि पारला थे फुबाते कि दुबाते ईन्दे सिन चुक खाला डेला थुप्कीते? 8 थोकराङ खाला लडाइँला ड्वा बेलाला बिकुल फुत्जीन बिकुल ङोरो लेमु खाईन माथेन्सुङ सासीन च्यि मिल्टेरीओन लडाइँला डुइओतरो? 9 ख्योकोन बादोङ होदोकराङ ईन। च्यि सासीन ख्योकोनगी बात खित्जीन ज्येनगी लेमु खाला खोच्येते बात माक्यासीन ख्योकोनगी च्यि साबाते ईन्दे सिन ज्येनगी चुक खाला खोकीतेरो? थोक्ते बात खित्कान्ते मिओननी थाराङ खोपरोङकामा बात खाबा च्योकराङ ईन। 10 ईन्दानी दि सा लुङबा खाङ खुदुक खुदुकते भाषा काल्बेई ओत। ईन्सीनोङ मि सुङगीङ मोखोच्येते भाषाचेन दोक्पोईओङ मेत। 11 सुइँदेकी ङात्ताङ बात खित्जीन थेकी खाबाते बात ङे माखोसुङ सासीन थेकी ङात्ताङ बात खिता मुथुबो, ङेङ थेत्ताङ बात खिता मुथुबो। 12 ख्योकोन बादोङ होदोकराङ ईन। परमेश्वर आत्मेकी तेरच्येते सीपताङ शक्ति ङेत्स्यीत सिन ख्योकोन आउदी सेम खिदुक। खेराङला परमेश्वर आत्मेकी बिन्दाते सीपताङ शक्ति चुक खाईन चले खासीन येशू ख्रीष्ट मि गाङेला लेमु ओङगीका थे विचार खाला चले खि। 13 बात दोक ईन्देकी दाक्पोनगी छ्या मास्येबाते खुदुक खुदुकते भाषाला बात खित्कान्ते मिकी थे खोरोङगी खाबाते थे बातकी अर्थ खोले खाला ज्येनला लाःपा थुप्च्येते शक्तिङ ङेत्स्यीत सिन परमेश्वरताङ प्रार्थना खि। 14 ङाराङगी छ्या मास्येबाते खुदुक खुदुकते भाषाला प्रार्थना खित्जीन ङाराङ आत्माला परमेश्वर आत्मेकी कोता ओता च्योकराङ खाला ङा प्रार्थना खिओ। ईन्सीनोङ ङाराङगी दोक दोक सिन ओत सिन थे बातकी अर्थचेन ङाला छ्या मेङगो। 15 ङा चुक खिते सासीन ङाराङ आत्माला परमेश्वर आत्मेकी कोता ओता च्योकराङ खाला ङाराङ आत्मेकीङ प्रार्थना खिओ। ङाराङगी दोक दोक सिन ओत सिरच्येते छ्या स्येलाङ प्रार्थना खिओ। थोकराङ खाला ङाराङ आत्माला परमेश्वर आत्मेकी कोता ओता च्योकराङ खाला ङा ङाराङ आत्मेकी लु लिन्ग्यो थेमे ङाराङगी दोक दोक सिन ओत सिरच्येते छ्या स्येलाङ लु लिन्ग्यो। 16 था सिइना, ख्योकोनगी परमेश्वर आत्मेकी खेराङ आत्माला कोता ओता च्योकराङ खाईन खेराङ आत्मेकी परमेश्वरते जय जय खासुङ सासीन थे बात खोराङ मोखोकान्ते थेरू ओताते ज्येनगी चुक खाला खुई साबा च्योकराङ ओङस्यीत सिन आमेन सिरा थुप्कीते? 17 खुई थोक खाईन परमेश्वरते जय जय खाबाते आउदी लेमु ईन्सीनोङ थे बात मोखोकान्ते मिओनला छ्याःङ फाइदा मेङगो। 18 ङा परमेश्वरला धन्यवाद तेरग्यो। च्यि सासीन ख्योकोन गाङेकी भन्दा ङा ङाराङगी छ्या मास्येबाते खुदुक खुदुकते भाषाला काल्बेई बात खिओ। 19 थोक ईन्सीनोङ ज्येनतेबाला लेमु ओङस्यीत सिन येशू ख्रीष्ट मिओन रूसादुचेन ङा ङाराङगी छ्या मास्येबाते खुदुक खुदुकते भाषाला आउदी काल्बासाक बात खिता भन्दा बरू गाङेकी खोबा थुप्च्येते बात ङिचो सुमजोराङ खाला लोप्क्यो। 20 आज्यो न्वावे, था ख्योकोनगी लेमुताङ मेलेबा डेला मुथुप्कान्ते फिजा च्योक माकेत बरू छारगीन लेमु खाईन बुद्धि स्यूबाते मिकी च्योक खाला काम खि। मेलेबाते कामचेन छ्याःङ खिता मास्येबाते बालकते फिजा च्योक ओङला देत। 21 परमेश्वर बातला प्रभु परमेश्वरगी चुक साबा ओते सासीन “खोपरोङगी छ्या मास्येबाते भाषाला थेमे ज्येन लुङबे मि खानापेकी ङा दि मिओनताङ बात खिओ। ङे थोक खाईन बात खासीनोङ थेबेकी ङे बात पटक्क मेङेनो,” सिन साबा ओत। 22 थोगी खोपरोङगी छ्या मास्येबाते खुदुक खुदुकते भाषाला बात खित्च्येतेचेन येशूला विश्वास खाबा मेताते मिओन लाईदु परमेश्वर सु ईन्दे, चुक्ते ईन्दे सिन छ्या स्ये ज्युत्च्येते दोक्पोई चिनु ईन। थोकराङ खाला परमेश्वरगी सिर च्युताते बात खित्च्येतेचेन येशूला विश्वास खाबा मेतातेबे लाईदु मेन्देकी थेला विश्वास खित्कान्ते मिओन लाईदु चिनु ईन। 23 था सिइना, येशू ख्रीष्ट मि ख्योकोन गाङेराङ रूबा ओते बेलाला परमेश्वर बात छ्याःङ छ्या मेताते कि येशूला विश्वास खाबा मेताते मिज्यीक थेरू ख्योल्सुङ थेमे थे बेलाला ख्योकोन खेराङगी छ्या मास्येबाते खुदुक खुदुकते भाषाला बात खिन ओता थोसुङ सासीन थेकी ख्योकोनला च्यि सारोङा? च्यि थेकी ख्योकोनला ङ्योबाते मि दुका सिन मिसिरोतरो? 24 तर ख्योकोन गाङेराङ परमेश्वरगी सिर च्युताते बात खिन ओते बेलाला येशूला विश्वास खाबा मेताते कि परमेश्वर बात छ्याःङ छ्या मेताते मिज्यीक थेरू ख्योल्सुङ सासीन थेजीन थेकी ख्योकोनगी खिन ओताते गाङे बात खोला दिबेकीनी ङा चुक्ते ईन्दाका सिरच्येते बातका खासुङ साला थे खोरोङ पापी दुका सिन छ्या स्येक्यो। 25 थोक खाईन थेकी थे खोरोङ सेमला ओताते गाङे लेमु मेलेबा बात परमेश्वर दोन्दु छ्याःङ बोङा मुथुप्च्याक्वा सिन छ्या स्येनामेई “ख्योकोन नाङ साँच्चीराङ परमेश्वर ओताक्वा,” सिन खोबुकला देत्ला थेकी परमेश्वरते जय जय खिओ। येशू ख्रीष्ट मिओन जम्मा ओङजीन च्यि बात चुक खिता फाप्कीते 26 आज्यो न्वावे, ख्योकोन गाङेराङ जम्मा ओङजीन ख्योकोन कोई परमेश्वरला छ्ये जोच्येते लु लिन्कान्ते, कोई सु सुकी चुक चुक खिता फाप्कीते सिन लोप्कान्ते थेमे कोईचेन परमेश्वरगी खोपरोङला तेन्गीन बिन्दाते तिरी ओङच्येते बात खित्कान्ते मि ओङगो। थोकराङ खाला कोई खोपरोङगी छ्या मास्येबाते खुदुक खुदुकते भाषाला बात खित्कान्ते मि ओङगो सासीन कोईचेन थे भाषाला खाबाते बातकी अर्थ खोले खित्कान ओङगो। ख्योकोनगी जे खासीनोङ येशू ख्रीष्ट मि गाङेला लेमु ओङे लाईदु खि। 27 खेराङगी छ्या मास्येबाते खुदुक खुदुकते भाषाला बात खित्कान्तेबेकी मेरा ङि, काल्बेई ईन्सुङ सासीन मेरा सुमगीकामा पालो पालो खाला थोक्ते बात खि। थेमे दोक्पोईकीचेन थेरू ओतातेबा ज्येनला थे बातकी अर्थ खोले खाला बिन। 28 थे बातकी अर्थ खोले खित्कान्ते थेरू सुङ माथेन्सुङ सासीन थोक्ते बात खित्कान्ते मि खाराक्पा देत्ला बरू परमेश्वरताङ थे खोरोङकामा बात खासीन लेमु ईन। 29 थोकराङ खाला परमेश्वरगी सिर च्युताते बात खित्कान्तेबेकीङ पालो पालो खालाकामा मेरा ङि सुमगी थे बात खित्च्येते खि। थेमे ज्येनबरीकीचेन थेबेकी च्यि सिका सिन लेमु खाला ङेन्ला थे बात ठीक ईन्दाताङ मेन्दा डेल्च्येते खि। 30 दोक्पोईकी परमेश्वरगी सिर च्युताते बात खिन खिनलाराङ थेरू देताते ज्येनज्यीकला परमेश्वरगी तिरी ओङच्येते बात खित च्युत्सुङ सासीन परमेश्वरगी सिर च्युताते बात खित्कान्तेचेन खाराक्पा देत। 31 परमेश्वरगी सिर च्युताते बात ख्योकोनगी पालो पालो खाईन खासीन ख्योकोनगी च्यि सिका सिन ज्येनतेबेकी लेमु खाला खोबा थुप्क्यो। थेमे ख्योकोन बात थोनामेई ज्येनतेबेकी आँट ङेत्क्यो। 32 परमेश्वरगी सिर च्युताते बात खित्कान्ते मिकी थे बात थे खोरोङगी सिरा चाले बेलाला सिराङ थुप्क्यो थेमे खाराक्पा देता फाप्सीन खाराक्पाङ देता थुप्क्यो। 33 च्यिला सासीन परमेश्वरगी जुन कामोङ बताङ बुतुङ खाला पालोईला खित मुज्युता खाला गाङे ठीक ठीक खाला खित ज्युत्क्यो। ङुरूङला डिक्ला थुन्ला देत ज्युत्कान्ते थेराङ ईन। परमेश्वर सन्तानओन जम्मा ओङजीन ठाउँ गाङेपा खिन ओता च्योकराङ 34 येशू ख्रीष्ट मिओन ख्योकोन जम्मा ओङा ओते बेलाला फेम्मे मि सुङगीङ बात खिता मेङगो। परमेश्वर नियमला साबा च्योकराङ खाला थेबाचेन खोपरोङ ख्योबो अधीनला देत्ला खाराक्पाराङ देता फाप्क्यो। 35 थेबाला खइँदा बात छ्या स्येबा सेम लासीन खोपरोङ खाम्बाला ख्योबोतेबाताङ ठा फाप्क्यो। येशू ख्रीष्ट मिओन जम्मा ओङसादु फेम्मे मिकी बात खिता लेमु मेन। 36 थेमे च्यि परमेश्वर बात ख्योकोन नाङदुईराङ शुरू ओङाते ईन? ना परमेश्वर बात ख्योकोनगीकामा थोबा ओत सिराच्योक लाङगीका? 37 सुइँदेकी ङा परमेश्वरगी सिर च्युताते बात खित्कान्ते मि ईन कि परमेश्वर आत्मेकी ङाला थोक खित्च्येते शक्ति बिन्दा ओत खिदुक सासीन थोक्ते मिला ङा दि बात सिओ। च्यि सासीन थेकी ङे टिबाते दि बातओन प्रभु येशूकीराङ खि सिन कोताते ईन सिन छ्या स्येबा फाप्क्यो। 38 तर थेकी ङे टिबाते दि बातओन माङेन्सुङ सासीन प्रभु येशूकीङ थेला छ्याःङ वास्ता मिक्किओ। 39 आज्यो न्वावे, परमेश्वरगी सिर च्युताते बात खित्च्येते शक्ति चले खिता मातोङ। थेमे खोपरोङगी छ्या मास्येबाते खुदुक खुदुकते भाषाला बात खित्कान्तेलाङ थोक खिता मेङगो सिन सुङगीङ रोके माकेत। 40 ख्योकोनगी जे खासीनोङ च्यि काम चुक खाला खिता फाप्कीते सिन छ्या स्येला ठीक ठीक खाला खि। |
© 1992 Wycliffe Bible Translators Inc. All rights reserved.
Wycliffe Bible Translators, Inc.