१ कोरिन्थी 13 - जिरेलज्येनला ङिङज्ये खित्च्येते बात 1 च्यि सासीन ङे दि सा लुङबा खाङगी मि भाषाला थेमे परमेश्वर दूतओन भाषाला बात खिता स्येसीनोङ ज्येनला ङिङज्ये माक्यासुङ सासीन ङा खालि नामज्योक बुराङ साच्या खाला ङोरो थेन्च्येते घण्टा कि झ्याली ङोरो च्योक्तेकामा ईन। 2 ङेचेन परमेश्वरगी सिर च्युताते बात खित्च्येते शक्ति ङेता ओत्सीनोङ, परमेश्वरगी गोमा सुङलाङ छ्या स्ये च्युता मेताते बाततेबा गाङे छ्या स्येकान्ते ईन्सीनोङ थेमे परमेश्वरगी चुक खाला काम खिते सिरच्येते बात गाङे छ्या स्येबा ओत्सीनोङ ङे ज्येनला ङिङज्ये माक्यासीन दि बाततेबा छ्या स्येला छ्याःङ काम लै मिक्किओ, ङा छ्याःङ मेन। थेमे परमेश्वरगी जेङ खिता थुप्क्यो सिन थेला विश्वास खाला बोमज्यीकला सरे खाला ग्युक साला थे बोमला समेत सरे खित ज्युता थुप्सीनोङ ङा छ्याःङ मेन। 3 थेमे ङाराङ सम्पत्तिबरी छ्याःङ मेताते मिओनला गोकीन बिन्सीनोङ थेमे ज्येनगी ङाराङला छ्ये मि ईन सिरस्यीत सिन ङाराङला मे लै खाईन स्यिसीनोङ ङे ज्येनला ङिङज्ये माक्यासुङ सासीन ङे थोक खाबाते ङाला छ्याःङ फाइदा मेङगो। 4 ज्येनला ङिङज्ये खित्कान्ते मिचेन दाक्पोनला मेलेबा खासीनोङ खाराक्पाराङ देत्क्यो, थेकी ज्येनला दया खिओ, ज्येनगीते साबा च्योक ओङा थोङला डार मिक्किओ, ज्येनताङ सेखी मिक्किओ थेमे ङा छेतते सुङ मेन सिराच्योक खित्च्येतेङ मिक्किओ। 5 ज्येनला ङिङज्ये खित्कान्ते मिकी ज्येनला खा छ्येत लेमु खिओ, थेकी चुक खासीन थे खोरोङला फाइदा ओङोङा सिराच्योक खाला काम मिक्किओ, थे होत्ताराङ स्येदाङ मिक्किओ, ज्येनगी मेलेबा खाबाते स्येदाङ साला मोज्योओ, दाक टोक ज्येत्क्यो। 6 थोक्ते मिलाचेन सुइँदेकी मेलेबा काम खाबाते गा मालाङो बरू खइँदा लेमु काम खाबा थोङसीन आउदी खाला गा खिओ। 7 थेकी दाक्पोनला जति दुक्पा बिन्सीनोङ थोक्ते मिलाङ ङिङज्ये खिन देत्क्यो, थेकी सुङलाङ शंका मिक्किओ, थेकी जो मिङ लेमु काम खित्कान ओङा थुप्क्यो सिन आश खिओ थेमे जस्तो दुक्पा ओङसीनोङ थे सेम मेसेता खाला देत्क्यो। 8 ज्येनला ङिङज्ये खित्च्येतेचेन नोमुङ छ्याःङ काम लै मिक्किच्या डोच्येते बात मेन। परमेश्वरगी सिर च्युताते बात खित्च्येते शक्ति था ङीमा लेनज्यीक चले खिता माफाबो थेमे दाक्पोनगी छ्या मास्येबाते खुदुक खुदुकते भाषाला बात खित्च्येते शक्तिङ गोराङ मोगोओ। थोकराङ खाला परमेश्वरगी चुक खाला काम खिते सिन छ्या स्येच्येते शक्तिङ था ङीमाई छ्याःङ काम लै मिक्किओ। 9 च्यिला सासीन परमेश्वरगी चुक खाला काम खिते सिन थरिङोला ङुरूङगी गाङे छ्या स्येबा मेत, परमेश्वरगी सिर च्युताते बादोङ थरिङोला ङुरूङगी खाबा छेतकामा मेन। 10 था परमेश्वरगी ङुरूङला बात गाङे छ्या स्ये ज्युत्च्येते समय वानामेईचेन थरिङोला ङुरूङगी छ्या स्येबा मेताते बाततेबा गाङे छ्या स्येक्यो। 11 ङा फिजा ओत्जीन फिजा च्योकराङ खाला बात खिन ओतान, फिजेकी च्योकराङ खाला विचार खिन ओतान थेमे ङे बुद्धिङ फिजेते च्योकराङ ओतान। तर था ङा पाकोते मि ईन्देकी फिजा ओत्जीन च्योकराङ मिक्किओ। 12 परमेश्वर दोकस्यिकराङ दुक सिन थरिङोलाचेन ङुरूङगी टिक्पी टिक्पीकामा थोङच्येते ऐनाला थोङाच्योक खाला थोङगो। था तिरीचेन थे दोकस्यिक ओताक्वा सिन थेला ठामासोमुला मिगी दोन्दुराङ थोङगो। परमेश्वर सु ईन्दे, थेकी चुक खाला काम खिते सिरच्येते बात थरिङोला ङे टिक्पी टिक्पीकामा छ्या स्येबा ओत। थेकी ङाला दि मि दोक्ते ईन सिन छ्या स्येबाच्योक खाला था तिरीचेन परमेश्वर दोक्ते दुका, थेकी दोकराङ खाला काम खित्च्याक्वा सिन ङे गाङे लेमु खाला छ्या स्येक्यो। 13 ज्येनतोक गाङे ङीमा लेनज्यीक छ्याःङ काम लै मिक्किच्या गाल्सीनोङ परमेश्वरला विश्वास खित्च्येते, थेकी ङुरूङला तेरग्यो साबाते ङेत्क्यो सिन खित्च्येते आश थेमे ज्येनला ङिङज्ये खित्च्येते दि बात सुमचेन नोमुङ छ्याःङ काम लै मिक्किच्या मोन्डोओ। दि बात सुमगी नाङदुङ छ्येते बातचेन ज्येनला ङिङज्ये खित्च्येतेराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.