१ कोरिन्थी 12 - जिरेलपरमेश्वर आत्मेकी तेरच्येते सीपताङ शक्ति बात 1 आज्यो न्वावे, परमेश्वर आत्मेकी मिओनला तेरच्येते सीपताङ शक्ति बात च्यि ईन्दे, चुक्ते ईन्दे सिन ख्योकोनगी लेमु खाला खोस्यीत सिन ङा दि बात सिन ओत। 2 ख्योकोनला दि बात लेमुराङ खाला छ्या ओतासीन। च्यि सासीन येशूला विश्वास खिता भन्दा गोमा ख्योकोन ल्हा लु माने खिन ओतान। थे ल्हा लुओनगी ख्योकोनताङ बात खिता थेमे छ्याःङ लेमु खिता मुथुप्च्येते ईन्सीनोङ दिबाला माने माक्याबाला मेङगो सिराच्योक खाला ख्योकोन होथेबालाराङ माने खिन ओतान। 3 ख्योकोनगी दि बात छ्या स्येबा खि। च्यि सासीन परमेश्वर आत्मे छ्य्वापेई बात खित्कान्ते मि सुङगीङ येशूला मोता सराप मिक्किओ। थोकराङ खाला परमेश्वर आत्मे छ्य्वापेई बाई सुङगीङ येशूराङ छ्ये ईन, थेराङ प्रभु ईन सिन सिरा मुथुबो। 4 परमेश्वर आत्मेकी मिओनला खुदुक खुदुक काम खित्च्येते सीपताङ शक्ति तेरग्यो। मिओनला खुदुक खुदुक काम खित्च्येते सीपताङ शक्ति बिन्सीनोङ परमेश्वर आत्माचेन दोक्पोईराङ ईन। 5 थेमे मिओनगी खुदुक खुदुक काम खासीनोङ थेबा गाङेते मालिकचेन प्रभु येशू दोक्पोईराङ ईन। 6 मिओनगी खुदुक खुदुक काम खासीनोङ मि दाक्पोन दाक्पोनला होथोक्ते सीपताङ शक्ति बिन्ला थेबाला होदोक्ते काम खित ज्युत्कान्ते परमेश्वरचेन दोक्पोईराङ ईन। 7 परमेश्वर आत्मेकी मिला तेरच्येते सीपताङ शक्ति दाक्पोन लाईदु चले खिताला बिन्दाते मेन। खोपरोङ नाङ गाङेला लेमु ओङाला चले खित्स्यीत सिन बिन्दाते ईन। 8 चुक सासीन परमेश्वर आत्मेकी कोईला परमेश्वर बातकी अर्थ खोले खित्च्येते बुद्धि बिन्दा ओङगो सासीन थेकीराङ कोईला परमेश्वरगी चुक खाला काम खिते सिन छ्या स्ये च्युताते बात लोप्च्येते शक्ति बिन्दा ओङगो। 9 थेमे दोक्पोईला परमेश्वरगी जेङ खिता थुप्क्यो सिन थेला आउदी खाला विश्वास खित्च्येते शक्ति बिन्दा ओङगो सासीन ज्येनज्यीकलाचेन नाबाते मिओनला ठाक्पा खित ज्युत्च्येते शक्ति बिन्दा ओङगो। 10 लोक्ला कोईला अचम्ब अचम्बतेन्दे काम खित्च्येते शक्ति बिन्दा ओङगो सासीन कोईला परमेश्वरगी सिर च्युताते बात खित्च्येते शक्ति बिन्दा ओङगो। थोकराङ खाला कोईला सुइँदेकी खाबाते बात परमेश्वर आत्मेकी सिर च्युताते ईन्दाना मेन्दे सिन डेल्च्येते शक्ति बिन्दा ओङगो। थेमे कोईला खोपरोङगी छ्या मास्येबाते खुदुक खुदुकते भाषाला बात खित्च्येते शक्ति बिन्दा ओङगो सासीन ज्येनज्यीकलाचेन होथोक्ते भाषाला बात खित्कान्ते मिकी खाबाते बातकी अर्थ खोले खित्च्येते शक्ति बिन्दा ओङगो। 11 मिओनला होदि गाङे काम खित ज्युत्कान्ते परमेश्वर आत्माचेन दोक्पोईराङ ईन। सु सुला च्यि खित्च्येते सीपताङ शक्ति तेरच्ये सिन छ्या स्येला थेकी मि दाक्पोन दाक्पोनला होथोक खुदुक खुदुक काम खित्च्येते सीपताङ शक्ति तेरग्यो। ङुरूङ दोक्पोईला ज्येनज्यीक खाँचो ओत 12 दि बात विचार खि। च्यि सासीन मि जीउला लाक्पा, काम्बा, मिक, नामज्योक, नोउ जेसुकै ओङगो। लाक्पा, काम्बा, मिकतेबा ताजीन खुदुक खुदुकतेन्दे ओत्सीनोङ गाङे जीउज्यीक्तेराङ ईन। ख्रीष्टकी मि ङुरूङ फारगी नाङ बादोङ होथोकराङ ईन। 13 यहूदी ईन्सीनोङ, ग्रीक ईन्सीनोङ, योक्पो योङमु ईन्सीनोङ, ज्येन ईन्सीनोङ बप्तिस्मा लानामेई ङुरूङ गाङेराङ जीउज्यीकराङ ओङा ओत। थेमे ङुरूङ गाङेकी परमेश्वर आत्माज्यीकराङ ङेता ओत। 14 च्यि सासीन मि जीउला लाक्पाराङ लाक्पा कि काम्बाराङ काम्बाकामा मेन्गीन खा, मिक, नोउ ज्येनोङ ओङगो। 15 था सिइना, काम्बेकी ङानी लाक्पा मेन थोगी ङा जीउकीते मेन सिरजीनमेईराङ च्यि काम्बा जीउकीते मेनरो? 16 थोकराङ खाला नामज्योककी ङानी मिक मेन थोगी ङा जीउकीते मेन सासीन च्यि नामज्योक जीउकीते मेनरो? 17 मि जीउ खाङ मिककामा ओत्कीन नामज्योक मेत्सुङ सासीन थे मिकी च्यिकी ङेन्च्ये? थोकराङ खाला जीउ खाङ नामज्योकराङ नामज्योक ओत्कीन नोउ मेत्सुङ सासीन थोक्ते मिकी च्यिकी ठीमा नोच्ये? 18 बातचेन दिराङ ईन, परमेश्वरगी मि जीउला गोच्येते जेसुकै थे खोरोङगी ज्वा चाला च्योकराङ खाईन ठीक ठीक ठाउँदु ज्यागीन बिन्दा ओत। 19 लाक्पाराङ लाक्पा कि काम्बाराङ काम्बा थोकज्यीक्तेकामा मि जीउ ओङच्या ईन्सीन थे जीउ चुकस्यिक ओङोङा? 20 च्यि मि जीउला लाक्पा, काम्बा, मिक, नोउ जेसुकै ओङच्येते मेनरो? 21 थोक ईन्देकी मिगी लाक्पाला ङाला खो गोराङ मोगोओ सिन सिरा मुथुबो। थोकराङ खाला गोःकीङ काम्बाला ङाला खो मोगोओ सिन सिरा मुथुबो। 22 बरू ङुरूङगी विचार खित्जीन छ्याःङ काम लै मिक्किओ सिराच्योक थोङच्येते थोकओनराङ झन ङुरूङ जीउला मेताला ओङराङ मेङगो। 23 दाक्पोन जीउकीते ताजीन थोक लेमु मोथोङच्येते थोकओनते थेमे बात खिता टिक्पी ङोचा लाङच्येते थोकओनतेराङ ङुरूङ लेमु खाला स्याहार सुसार खिओ। 24 बरू ताजीन लेमु थोङच्येते ज्येन ज्येन थोकओनते ङुरूङ थोक खाला वास्ता मिक्किओ। ताजीन थोक लेमु मोथोङच्येते थेमे बात खिता टिक्पी ङोचा लाङच्येते थोकओनलाराङ झन काल्बा स्याहार सुसार खिता फाप्च्या खाईन परमेश्वरगी ङुरूङ जीउदु दिबाला ठीक ठीक ठाउँदु डिक्पा खाईन ज्याक्पाते ईन। 25 थोगी जीउज्यीगी लाक्पा, काम्बा च्योक्ते थोकओन नाङ ङा छ्येताङ खो टेक्टे थेमे दि लेमुताङ थे मेलेबा सिन मिडिक्च्येते ओङा मेङगो। थोक ओङा साटोला बरू थेबा गाङेकी थोजोराङ छ्ये टेक्टेते ईन सिन डिक्ला देता फाप्क्यो। 26 च्यिला सासीन दिबे नाङ दोक्पोईला खइँदा सुक थोत्सीन जीउ खाङराङ दुक्पा ओङगो। थेमे दोक्पोईला खइँदा लेमु ओङसीन जीउ खाङराङ लेमु ओङगो। 27 बात च्यि सासीन ख्योकोन गाङेराङ ख्रीष्टकी जीउ ईन। थेमे ख्योकोन मेरा रेरेचेन थे जीउकी लाक्पा, काम्बा थोक रेरे च्योक ईन। 28 येशू ख्रीष्ट मिओन नाङ परमेश्वरगी छ्येदुकी शुरू खाईन टेक्टेसाक गाङेला दाक्पोन दाक्पोन जिम्मा बिन्दा ओत। थेबे नाङ गाङे भन्दा गोमाचेन येशू ख्रीष्टकी खटे खाबाते मिओन, थेबे तिरी परमेश्वर बात खित्कान्तेबा, थेरूकी परमेश्वर बात लोप्कान्तेबा फाप्क्यो। थोकराङ खाला अचम्ब अचम्बतेन्दे काम खित्कान्तेबा, नाबाते मिओनला ठाक्पा खित्च्येते शक्ति ङेता ओतातेबा, ज्येनला मद्धत खित्कान्तेबा, खाङ काम चुक खाला खिता फाप्कीते सिन छ्या स्येकान्तेबा थेमे खोपरोङगी छ्या मास्येबाते खुदुक खुदुकते भाषाला बात खित्कान्ते मिओन फाप्क्यो। 29 बात दोक ईन्देकी च्यि येशू ख्रीष्ट मि नाङ गाङेराङ येशू ख्रीष्टकी खटे खाबाते मिकामा ओङगो? ना गाङेराङ परमेश्वर बात खित्कान्तेबा कि परमेश्वर बात लोप्कान्तेबाकामा ओङगीते? च्यि थेबे नाङ गाङेराङ अचम्ब अचम्बतेन्दे काम खिता थुप्कानकामा ओङगो? 30 थेमे च्यि गाङेताङ नाबाते मिओनला ठाक्पा खित्च्येते शक्ति ओङगो? थोकराङ खाला च्यि गाङेकी खोपरोङगी छ्या मास्येबाते खुदुक खुदुकते भाषाला बात खिता थुप्क्योतरो? थेमे च्यि गाङेकी थोक्ते भाषे अर्थ खोले खिता थुप्क्यो? दोकनी ओङराङ मेङगो। 31 परमेश्वर आत्मेकी तेरच्येते सीपताङ शक्ति नाङ छ्ये छ्ये सीपताङ शक्ति चुक खाला ङेदोङा सिन ख्योकोनगी थे छ्य्वापाकामा सेम लै खि। ङा ख्योकोनला दोक्ते सीपताङ शक्ति ङेत्च्येते बात भन्दाङ छ्येते बात सिरामीन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.