१ कोरिन्थी 11 - जिरेलयेशू ख्रीष्ट मिओनगी जम्मा ओङजीन चुक चुक खिता फाप्कीते 1 ङा ख्रीष्टला ताला थेकी खाबा खाबाच्योक खिओ। ख्योकोनगीङ ङे खाबाते ताला ङे खाबा च्योकराङ खि। 2 ख्योकोनगी जहिलेङ ङाला सम्झे खिदुक्लो थेमे ङे लाःपा कोता च्योकराङ खाला काम खिदुक्लो सिरा ङे थोसुङ। ख्योकोनगी दोक खाबाते आउदी लेमु ईन। 3 था ङा ख्योकोनला बातज्यीक बात ङि सिरामीन। च्यि सासीन ख्योओ मि भन्दा ख्रीष्ट छ्ये ईन। थेमे फेम्मे मि भन्दा ख्योओ मि छ्ये ईन। थोकराङ खाला ख्रीष्ट भन्दा परमेश्वर छ्ये ईन। 4 थोगी सुइँदा ख्योओ मिकी ताकीछ्यी खोन खोनबालाराङ परमेश्वरताङ प्रार्थना खासुङ थेमे थेकी सिर च्युताते बात खासुङ सासीन थेकी थे खोरोङ भन्दा छ्ये ईन्दाते ख्रीष्टला मान माक्याबाते ईन। 5 थोकराङ खाला फेम्मे मिकीङ गोः मुउपा खाईन परमेश्वरताङ प्रार्थना खासुङ थेमे थेकी सिर च्युताते बात खासुङ सासीन थेकी थे मोरोङ भन्दा छ्ये ईन्दाते ख्योबोतेला मान माक्याबाते ईन। थोक्ते फेम्मे मिनी टातेबा गाङे ठेकीन मुन्डुला गालाते फेम्मे मि च्योक्तेराङ ईन। 6 गोः उपा सेम मिक्किकान्ते फेम्मे मिकीनी बरू खोपरोङ टा ठेकीन क्युरसीन लेमु ईन। थोक खिताङ ङोचा लाङगीदुक सासीन थेबेकी गोपुर खिता लेमु ईन। 7 परमेश्वरगी मि जोजीन ख्योओ मिला थे खोरोङ च्योकराङ जोबा ओतेकी ख्योओ मिकी थे खोरोङ गोः उपा मेङगो। ख्योओ मि ताला परमेश्वर चुक छ्येज्यीक शक्ति ओताते ईन्दे सिन छ्या स्येबा थुप्क्यो। थेमे फेम्मे मिकी दाक्पोन गोः उपा फाप्क्यो। थोक खाबाते खोपरोङ ख्योबोला मान खाबाते ईन। 8 च्यिला सासीन परमेश्वरगी मि जोजीन ख्योओ मि फेम्मे मि जीउदुकी जोबा मेतान बरू फेम्मे मि ख्योओ मि जीउदुकी जोबा ओतान। 9 थेमे फेम्मे मि लाईदु ख्योओ मि जोबाते मेन, ख्योओ मि लाईदुका फेम्मे मि जोबाते ईन। 10 थोगीराङ परमेश्वर दूतओन दोन्दु थे मोरोङ ख्योबोते अधीनला ओत सिन तेन्दाला फेम्मे मिकी गोः उपा फाप्क्यो। 11 बात दोक ईन्सीनोङ प्रभु येशूताङ जीउज्यीकराङ ओङाते मिओन बातराङ खिइ सासीन फेम्मे मि मेताला ख्योओ मिङ मेङगो, ख्योओ मि मेताला फेम्मे मिङ मेङगो। 12 चुक खाला सासीन मि जोजीन परमेश्वरगी फेम्मे मिलाचेन ख्योओ मि जीउदुकी जोबा ओतान। याङराङ फेम्मे मिकी फिजा केलाराङ ख्योओ मि ओङच्येते ईन। जे ईन्सीनोङ ओताते जति गाङे जोकान्तेचेन परमेश्वरराङ ईन। 13 लो ख्योकोनराङ सिते, च्यि फेम्मे मिकी गोः मुउपा खाला परमेश्वरला प्रार्थना खिता सोई खिओतरो? 14 थेमे च्यि ख्योओ मिकी टा रीम्बु खाईन सोसीन थे थेला सोई खिदुकरो? 15 फेम्मे मिते टा रीम्बु ओत्सीन थेचेन थेला सोई खित्च्येतेराङ ईन। थोक्ते टाराङ थेबेते प्रार्थना खित्जीन गोः उप्च्येते गा च्योक्ते ईन। 16 ङे साबाते दि बातला सुइँदा टेकाटेउरी खिता छोल्गीदुक सासीन खित्स्यीत। परमेश्वरगी सिर च्युताते बात सिरजीन थेमे प्रार्थना खित्जीन चुक खित्च्ये सिरच्येते बातला दि बाई ङ्योकोनगी सिरच्येते छ्याःङ बात मेत। थेमे ठाउँ ठाउँला जम्मा ओङकान्ते परमेश्वर मिओनतेङ ज्येन खुदुक चलन ओतराङ मेत। प्रभु भोज बात 17 थेमे दि बातलाचेन ङा ख्योकोनगी लेमु खाबाते ईन सिन मिसिरो। ख्योकोनगी खित्च्येते थोक्ते काम ङाला बान्दा गा मालाङदुक। ख्योकोन गाङेराङ ठाउँज्यीक्तु जम्मा ओङजीन लेमुते काम खिता भन्दा मेलेबाते कामका काल्बेई खित्च्याक्वा। 18 च्यि सासीन येशू ख्रीष्ट मि ख्योकोन जम्मा ओङजीन खेराङ नाङ मिडिक्तुक्लो सिन ङे थोसुङ। ङाला दि बात पक्काराङ ईन्दासीन सिराच्योक लाङगीदुक। 19 ईन्दाका परमेश्वर दोन्दु सु ठीक खित्कान्ते ईन्दे, सु गल्ती खित्कान्ते ईन्दे सिन ठालाला ख्योकोन नाङ थोक खाला मिडिक्च्येते ओङा फाप्च्येतेराङ ईन। 20 ख्योकोन जम्मा ओङगीन प्रभु भोज सिन सोबाते प्रभु भोज ईनराङ मेन। 21 च्यिला सासीन ख्योकोन जेसुकै ओतातेबेकी प्रभु भोज साप्ला सिन खेराङगी खेराते साप थुङातेबा ज्येनला गोतराङ मोगोता खाला खेराङ खेराङराङ हसुरे खिदुक्लो, कोईचेन भक्कुचूर थुला जिइदुक्लो थेमे ज्येनचेन तुक्पाराङ देत्कीदुक्लो। 22 च्यि ख्योकोनते साप थुङाला खेराङ खेराङ खाम्बा मेत? थेमे च्यि परमेश्वर मिओनला मेलेबा लोङालाराङ खेराङ नाङ छ्याःङ मेतातेबाला तुक्पा ज्याक्ला ङोचा लोङगो? ख्योकोनगी थोक खाबाते ठीक मेन। ङा ख्योकोनगी लेमु खाबाते ईन सिन मिसिरो। 23 प्रभु भोज चुक खाला सा फाप्कीते सिन प्रभु येशू थे खोरोङगी ङाला लाप्कीन बिन्दाते बातराङ ङेङ ख्योकोनला लाप्कीन बिन्दा ओतान। चुक सासीन थेला मेलेबा खित्कान्ते मिओनगी पक्रे खिते छोमु ग्वासे थोक खिता भन्दा गोमा प्रभु येशूकी स्योबेनज्यीक लाःक्तु लाबा ओतान। 24 थेमे थे स्योबेन लाईदु परमेश्वरला धन्यवाद बिन्गीन सिन्नामेकी थे च्याक्ला चेलातेबाला तेरगीनकामा “दि ङे जीउ ईन। ङा ख्योकोन लाईदु ङाराङ ज्यानराङ बिन्ला स्यिइओ। ङा ख्योकोन लाईदु स्याप्ते बात सम्झे खिताला ख्योकोनगीङ बेला बेलाला दोकराङ खाला स्योबेन च्याक्ला साच्येते खि,” सिन साबा ओतान। 25 थेमे साप सोनामेकी गोमा स्योबेन च्योकराङ खाईन अंगूर छ्याङ लुक्पाते कचौरा लाःक्तु लाकीन “दिचेन परमेश्वरगी मिओनताङ तिरी खिओ साबाते जमान ईन। ङे जीउदुकी थेन्दाते ठागीराङ दि जमान पूरो खित्च्येते ईन। ख्योकोन जुन जुन बेलाला दोक खाला थुङगीदुक, ङा ख्योकोन लाईदु स्याप्ते बात सम्झे खिताला थुङच्येते खि,” सिनोङ साबा ओतान। 26 थोगी प्रभु येशू ग्युरला ओङ ओङसाक जहिले जहिले ख्योकोनगी प्रभु भोज स्योबेन सेइदुक थेमे अंगूर छ्याङ थुङगीदुक थोक खित्जीन खित्जीन प्रभु येशू ङुरूङ लाईदु स्या ओतान सिन गाङेकी छ्या स्येक्यो। 27 प्रभु भोज बात दोक ईन्देकी दि छ्याःङ छ्येते बात मेन सिराच्योक खाला प्रभु भोजला साच्येते स्योबेनताङ थुङच्येते छ्याङ साच्या थुङच्या खिता मेङगो। थोक खित्कान्ते मिकीचेन प्रभु येशू जीउताङ ठाकला छ्याःङ मेन्दाच्योक ठाने खाईन पाप खाबाते ईन। 28 थोगी प्रभु भोज सा भन्दा गोमा मि गाङेकी खोपरोङगी थे स्योबेन सोसीन थेमे थे छ्याङ थुसीन ओङगीताना मेङते सिन लेमु खाला विचार खिता फाप्क्यो। 29 च्यिला सासीन थे भोजदु सोबाते स्योबेनताङ थुबाते छ्याङ प्रभु येशू जीउताङ ठाक ईन सिराच्योक मिक्किता खाईन छ्याःङ मेन्दाच्योक खासुङ सासीन थे भोज साकान्ते मिओन गोःनामा परमेश्वर सजाय फाप्क्यो। 30 थोक ईन्देकीराङ थे भोज छ्याःङ मेन्दाच्योक खाला साकान्तेबा ख्योकोन कोई स्याप खाबातेन्दे गाल्ला दुक, कोईचेन स्यिइनोङ सिन्सुङ। 31 थे भोज सा भन्दा गोमा ङुरूङगी दाक्पोनगी खइँदा मेलेबा खाबा मेताना सिन विचार खासीन ङुरूङगी परमेश्वर सजाय ङेत्कीता सिन ज्यीबा खिता माफाबो। 32 ङुरूङगी गल्ती खित्जीन प्रभु परमेश्वरगी ङुरूङला दुक्पा बिन्ला ताला लुच्येतेचेन था तिरी मि गाङे न्याय खिते छोमु ङुरूङगीङ दि सा लुङबे मिकी च्योक खाला सजाय मेङेत्स्यीत सिनराङ ईन। 33 थोगी आज्यो न्वावे, ख्योकोन प्रभु भोज साप्ला जम्मा ओङजीन जो थुप खाला साच्येतेताङ थुङच्येते मिक्किता खाला दोक्पोईकी ज्येनज्यीकला गुच्येते खि। 34 थेमे सुइँदाला त्वाबा लाङगीदुक सासीन बरू थेकी खाम्बादुराङ साप सोला ग्युक। प्रभु भोज साप्ला जम्मा ओङे बेलालाचेन ख्योकोनगी खेराङ गोःनामा परमेश्वर सजाय माफाप्स्यीत सिन लेमु खाला विचार खाला थे भोज सो। थेमे थरिङ ङे माटिबाते बातओनचेन था ङाराङ थेपा लेप्नामेकीराङ ख्योकोनला सिरामीन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.