१ कोरिन्थी 10 - जिरेलङुरूङगी दाक्पोन ज्युज्यु पुर्खेकी च्योक खिता मेङगो 1 आज्यो न्वावे, ङुरूङ ज्युज्यु पुर्खाला परमेश्वरगी मिश्रदुकी तेन्ला खुलाङजीन थेबा ख्याम्बा फाप्च्येते लाम तेन्दाला थेबे गोमा गोमा मुक्पा ताङा ओतान। थेमे थेबा गाङेला छ्याःङ मेलेबा ओङ मुज्युता खाईन समुन्द्र तेन्गीन खुलाबा ओतान। दि बात ख्योकोनगी टोक माज्येत। 2 थोक खाला थेबा मोशे तिरी ख्याम्जीन मुक्पाताङ समुन्द्रे नाङराङ गाङेकी छ्युला लुक्ला तेरच्येते बप्तिस्मा लाबा ओतान सिन ङुरूङ सिरा थुप्क्यो। 3 थेबा गाङेकी परमेश्वरगी स्वर्गनेकी बिन्दाते सापज्यीकराङ सोबा ओतान। 4 थोकराङ खाईन थेबेकी परमेश्वरगी बिन्दाते छ्युराङ थुबा ओतान। थेबा गाङेकी ठाःकज्यीकलाराङ दोलाते छ्यु थुबा ओतान। दि छ्यु दोल्च्येते ठाःक साबातेचेन थेबाताङ ङ्योम्बुराङ ख्याम्बाते ख्रीष्टराङ ईन। 5 थोक ईन्सीनोङ थेबा काल्बा च्योक्तेकी खाबाते काम परमेश्वरला लेमु मालासुङ। थोगी थेबा काल्बा च्योक्ते गाङे ठाःकताङ बालुवा बाई छ्याःङ मेत्से नाङलाराङ स्यिसुङ। 6 थेबेकी च्यि खित्जीन चुक चुक ओङसुङा सिन छ्या स्येनामेई ङुरूङगी थेबेकी च्योकराङ मेलेबा काम खित्च्येते सेम खिता मेङगो सिन खोबा फाप्क्यो। ख्योकोनगीङ थेबेकी खाबाच्योक माकेत। 7 थेबे नाङ लाला लालेकी परमेश्वरला माने खिता ताङगीन ल्हा लु माने खासुङ। थेबेकी चुक खासुङा सिन परमेश्वर बातला “मि गाङेराङ भोज साप्ला देत्सुङ थेमे सोकीन थुकीन सिन्नामेई थेबा गाङेराङ रन्डीबाजी खिताला स्यूसुङ,” सिन टिला दुक। 8 थेबा लाला लालेकी खाबाच्योक ङुरूङगी रन्डीबाजी थेमे होदि च्योक्ते खिता मेङच्येते काम खिता मेङगो। थोक खाबेकी खित्सादु परमेश्वरगी सजाय बिन्देकी ङीमाईलाराङ थेबा मेरा हजार खालज्यीकताङ सुम स्या ओतान। 9 थेमे थेबा लाला लालेकी खाबाच्योक ङुरूङगीङ प्रभु परमेश्वरगी दोक खित्च्या ईन्दाकाना मेन्दाका थेमे थेकी ङुरूङगी खाबाते काम थोङच्या ईन्दाकाना मेन्दाका सिन थे सेम ता मेङगो। परमेश्वर सेम ताबेकी खित्सादु थेकी रूल लै खाईन थोक च्युत्कीन थेबाला स्यिर च्युता ओतान। 10 लोक्ला ख्योकोनगी थेबा लाला लालेकी खाबाच्योक परमेश्वरगी दि काम लेमु माक्यासुङ, दोक मायाङसुङ सिन गनगन खिता मेङगो। थेबेकी थोक खाबेकी परमेश्वरगी नाश जोकान्ते दूत ताङगीन थेबाला सेत च्युता ओतान। 11 थेबेकी च्यि खित्जीन चुक चुक ओङसुङा सिरच्येते दि बातओन ताला ङुरूङ दाक्पोनगी चुक खिता फाप्च्या ईन्दाका सिन छ्या स्येबा फाप्क्यो। था दि जुग सिन्ला डोच्ये बेला ख्योल्गीन सिन्सुङ। थोगी ङुरूङगीङ थेबेकी खाबाच्योक खिता मेङगो सिन छ्या स्येस्यीत सिनराङ दि बातओन टिबा ओतान। 12 थोगी ङा नोमुङ थोक मेलेबा काम मिक्किओ सिरकान्तेबा ख्योकोन च्याङबो खाला देत। थोक सिरकान्ते मिकी झन होत्ता मेलेबा काम खिता थुप्क्यो। 13 थेमे दुक्पेकी कि खइँदा कारणगी खित्सादु मिला खइँदा दोक खिइ खिइ सिराच्योक लाङच्येते ख्योकोनलाकामा ओङच्येते मेन। परमेश्वर थे खोरोङगी खिओ साबा च्योकराङ खित्कान्ते ईन्देकी होथोक खाला खेराङला खिइ खिइ सिराच्योक लाबाते माक्याबाला ओङराङ मेङगो सिराच्योक ओङे बेलाला थेकी ख्योकोनला पाप खित्सादुकी रोके खिओ। दोक्ते बेलाला थेकी ख्योकोनला पाप खिता माफाप्च्येते शक्ति बिन्ला थार ज्युत्क्यो। पावलगी ल्हा लु माने माकेत सिन साबाते 14 थोगी ङिङज्येते आज्यो न्वावे, ल्हा लु सिराते ख्योकोनगी माने खिताराङ मेङगो। 15 ङा ख्योकोनताङ लेमु खाला बात खोकान्ते मिओनताङ च्योक खाला बात खिन ओत। ङे बात ठीक ईन्दाना मेन्दे सिन ख्योकोन खेराङगी विचार खि। 16 प्रभु भोज साजीन ङुरूङ अंगूर छ्याङ लुक्पाते कचौरा लाःक्तु लाला थे ख्रीष्टकी ठाक ईन सिन सम्झे खाला परमेश्वरला धन्यवाद बिन्ला गाङेराङ थे नोतज्यीकलाराङ थुङगो। थोक खित्जीन ङुरूङ ख्रीष्टकी ङुरूङ लाईदु थे खोरोङ ज्यान बिन्गीन स्याप्ते बात सम्झे खिओ। ख्रीष्टकी जीउ सिन सम्झे खाला थेजीन स्योबेन च्याक्ला साजीनोङ ङुरूङ होथे बातराङ सम्झे खिओ। 17 स्योबेनज्यीकराङ च्यागीन सोबातेचेन ङुरूङ मेरा काल्बेई ओत्सीनोङ गाङे जीउज्यीकराङ ईन सिन साबाते ईन। 18 थेमे इस्राएलीओनला ताला ख्योकोनगी बातज्यीक विचार खि। परमेश्वरला पूजा खाईन थानदु चढे खाबाते स्या सोनामेई च्यि थेबा परमेश्वरताङ डिक्पाते मेनरो? 19 ङे दोक सिरजीन ल्हाला पूजा खित्च्येते छ्येते बात ईन, ल्हे मूर्तिङ छ्ये ईन सिन साबाते मेन याङ। 20 बात चुक ईन्दे सासीन परमेश्वरला छ्या मेस्येकान्ते मिओनगी परमेश्वरला पूजा खाबाते मेन। थेबेकीनी ल्हा ल्हन्डीकलाका पूजा खाबाते ईन। ख्योकोन ल्हा ल्हन्डीकताङ डिक्पाते ङाला बान्दा गा मालाङदुक। 21 ख्योकोन प्रभु भोज साजीन चले खाबाते अंगूर छ्याङ थुङकान्ते मिकी ल्हा ल्हन्डीकला पूजा खाईन भोज लै खाबे बेलाला चले खाबाते छ्याङ चुक खाला थुङा ओङगीते? थोकराङ खाला प्रभु भोजकी स्योबेन थेमे ल्हा ल्हन्डीकला चढे खाबाते प्रसाद थोक ङिकाराङ सा ओङराङ मेङगो। 22 ख्योकोनगी थोक खासीन प्रभु येशूला लेमु मालाङो, स्येदाङ लाङगो। थेला स्येदाङ लोङकान च्यि ङुरूङ थे भन्दाङ छ्ये ईनरो? जे खित्जीनोङ ज्येनगी वास्ता ज्य्वाबा फाप्क्यो 23 थेमे मिओनगी खोपरोङगी जे खासीनोङ ओङगो सिन खिदुक। ईन्दानी ईन, खिता ओङगो। थोक ईन्सीनोङ गाङे काम लेमुकामा मेन। जेङ खित्जीन ज्येनला मेलेबा ओङगो। 24 थोगी ख्योकोनगी जे खासीनोङ खेराङ विचारकामा मिक्किता खाला ज्येनगीतेङ ख्याल ज्याक्ला खि। 25 स्या छोङसाला गाल्ला ख्योकोनगी दि स्या खापेकी खुलाबाते ईन्ताका, ना खइँदाला पूजा खाबातेका ईन्दा सिन छ्याःङ शंका मिक्किता खाला ङ्योला सो। 26 च्यिला सासीन परमेश्वर बातला “दि सा लुङबा खाङ ओताते जति गाङे प्रभु परमेश्वरतेराङ ईन,” सिन टिबा ओत। 27 थेमे येशूला विश्वास खाबा मेताते सुइँदेकी ख्योकोनला साप साप्ला काताङसुङ सासीन ड्वा सेम लासीन गाल्सीन ओङगो। थेमे थेकी खेराङला बिन्दाते साप सेमला छ्याःङ धुकचुक माने मिक्किता खाला सो। 28 तर साप सा भन्दा गोमाराङ सुइँदेकी ए दिनी ल्हाला पूजा खाईन खुलाबाते स्याका ईन सिन सासीन थे स्या साराङ मासा। थेजीन ख्योकोनगी खेराङ विचारकामा मिक्किता खाला थोक सिरकान्ते मि ख्याल ज्याक्ला थे स्या मासा। 29 ङे दोक साबाते ख्योकोन बात लेमु खाईन खोकीन सिन्दाते मि लाईदु मेन्देकी ख्योकोनला थोक सिरकान्ते मि ख्याल स्योक सिराला साबाते ईन। ईन्सीनोङ ङे खुशीकी सा चालाते सापला ज्येनगी मासा सिरच्येते च्यि अधिकार ओतेरो? 30 थेमे ल्हाला पूजा खाबाते थे स्ये लाईदु ङे परमेश्वरला धन्यवाद बिन्गीन सोसीन ङाराङगी परमेश्वरला धन्यवाद बिन्दाते थे स्या सोबाते पाप खाबाते ईन सिन ज्येनगी च्यिला सिरच्ये? 31 बात दोक दोक ईन्देकी ख्योकोनगी साजीन ईन्स्यीत, थुङजीन ईन्स्यीत जे खित्जीनोङ खालि परमेश्वरला छ्ये जोच्येते कामकामा खि। 32 ख्योकोनगी खाबाते कामगी खित्सादु ज्येनला पाप खित माज्युत। यहूदीओनला ईन्सीनोङ, ग्रीकओनला ईन्सीनोङ कि परमेश्वर मिओनलाराङ ईन्सीनोङ सुङलाङ ख्योकोनगी खाबाते कामगी खित्सादु पाप खित माज्युत। 33 ङाचेन ङाराङ विचारकामा मिक्किता खाला मि गाङेराङ येशूला विश्वास खाला पापकी सजायदुकी थारस्यीत सिन थेबा गाङेला लेमु ओङच्येते कामकामा खिओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.