१ कोरिन्थी 1 - जिरेल1 दि चिट्ठी टिक्कान्ते ङा पावल थेमे ङुरूङ न्वा सोस्थेनेस ईन। ङा येशू ख्रीष्टकी खटे खाबाते मि ईन। ङा थोक्ते मि ईन सिन परमेश्वरगी ङाला छाने खाबा ओत। 2 ङा दि चिट्ठी कोरिन्थ सारदु जम्मा ओङकान्ते परमेश्वर मिओन ख्योकोनला टिगीन ओत। येशू ख्रीष्टकी खित्सादु परमेश्वरगी ख्योकोन सेम खुदुक जोकीन थे खोरोङ सन्तान ईन सिन छाने खाबा ओत। दुरू टिबाते बातचेन ख्योकोन च्योकराङ प्रभु येशू ख्रीष्टला प्रभु सिन सिरकान्ते गाङेपे मिलाङ ईन। येशू ख्रीष्टचेन थेबेतेङ ङुरूङतेङ मालिक ईन। 3 ङुरूङ आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। परमेश्वरला धन्यवाद तेरच्येते बात 4 ङा ख्योकोन लाईदु सधैँ परमेश्वरला धन्यवाद तेरग्यो। च्यिला सासीन येशू ख्रीष्टकी खित्सादु थेकी ख्योकोनला दया खाबा ओत। 5 थेकी खित्सादुराङ परमेश्वरगी ख्योकोनला तेरासम्म आशी बिन्दा ओत। च्यि सासीन येशू ख्रीष्ट बात ज्येनला लेमु खाला लोप्च्येते सीपताङ शक्ति ख्योकोनगी ङेता ओत थेमे परमेश्वरगी छ्या स्ये ज्युत्च्येते गाङे बात लेमु खाला छ्या स्येकान गाला ओत। 6 ङ्योकोनगी ख्योकोनला लाप्कीन बिन्दाते ख्रीष्टकी बात ख्योकोनगी लेमु खाईन ङेन्सुङ, थे बात ख्योकोनगी लेमु खाईन खोबा ओत। 7 थोक ईन्देकी था प्रभु येशू ख्रीष्ट नामराङ ग्युरला वाओङा सिन गुला देत्जीन ख्योकोनला गोच्येते परमेश्वर आत्मेकी तेरच्येते सीपताङ शक्ति ख्योकोनगी गाङे ङेता ओत। 8 येशू ख्रीष्टकी ख्योकोनला तिरीसाकराङ थे खोरोङला विश्वास खिन देत ज्युत्क्यो। थोक खाला ङुरूङ प्रभु येशू ख्रीष्ट ग्युरला ओङे छोमु सुङगीङ ख्योकोनला दिबा दोक दोक गल्ती खित्कान्ते मि ईन सिरा मुथुबो। 9 परमेश्वरचेन थे खोरोङगी खिओ साबा च्योकराङ खित्कान्ते ईन। थेकीराङ ख्योकोनला थे खोरोङ फुज्युङ ङुरूङ प्रभु येशू ख्रीष्टताङ ङ्योम्बुराङ डिक्ला देताला थे खोरोङ दोन्दु स्योक सिन काताङाते ईन। येशू ख्रीष्ट मिओन नाङ फाटो ओङा मेङच्येते बात 10 आज्यो न्वावे, ङुरूङ प्रभु येशू ख्रीष्टकीराङ ङाला दोक खित्च्येते अधिकार बिन्दा ओतेकी ङा ख्योकोनला च्यि सिते सासीन ख्योकोनगी खेराङ नाङ फाटो ओङच्येते काम माकेत। बरू गाङेकी सेमज्यीकराङ खाला डिक्ला काम खि। 11 ङा ख्योकोनला च्यिला दोक सिन ओते सासीन ङुरूङ नुमु क्लोए खाम्बे मिओन खानापेकी ङे ख्योकोन खेराङ नाङ मिडिक्च्याक्वालो सिन थोसुङ। 12 चुक सासीन ख्योकोन कोईकी “ङा पावलगी साबाते ङेन्कान्ते ईन,” खिदुक्लो, कोईकी “ङा अपोल्लोसकी साबाते ङेन्कान्ते ईन,” खिदुक्लो। लोक्ला कोईकी “ङा पत्रुसकी साबाते ङेन्कान्ते ईन,” खिदुक्लो सासीन ज्येनज्यीगीचेन “ङानी ख्रीष्टकी साबातेकामा ङेन्कान्ते ईन,” खिदुक्लो। 13 ख्योकोनगी थोक थोक खित्च्या च्यि ख्रीष्ट मेराज्यीकराङ मेन्देकी खुदुक खुदुक मि लाईदु खुदुक खुदुक ईनरो? ना ख्योकोन लाईदु स्यिङगी थामला टाँए खाला स्यिकान्ते ङा पावल ईन्दे? थेमे च्यि ख्योकोनला पावल मिनगी छ्य्वापेई छ्युला लुगीन बप्तिस्मा बिन्दाते ईनरो? 14 दि बातकी लाईदु ङा परमेश्वरला धन्यवाद सिओ। च्यि सासीन क्रिस्पसताङ गायसला बाई ङे ख्योकोन सुङलाङ बप्तिस्मा बिन्दा मेत। 15 थोगी सुङगीङ ङालानी पावल मिनगी छ्य्वापेई बप्तिस्मा बिन्दाते ईन्देकी ङानी थे मिराङ ईन सिन सिरा मुथुबो। 16 अँ साँच्ची ङे स्तिफनास खाम्बे मिओनलाङ बप्तिस्मा बिन्दा ओतान। होदिबाला बाई ङे ज्येन सुङलाङ बप्तिस्मा बिन्दाते ङाला ठेम्बा मालाङदुक। 17 ख्रीष्टकी ङाला मिओनला बप्तिस्मा बिन सिन खटे खाबाते मेन। ङालानी थेकी गा लाङच्येते बात लोपालाका खटे खाबाते ईन। थेमे थे बात लोप्जीन नोमुङ ङे आउदी पढे खाबाते मिओनगी च्योक खाईन बात माक्या। थोक खाबा ईन्सीन ख्रीष्टकी थे खोरोङ ज्यान बिन्गीन स्यिङगी थामला टाँए खाईन स्याप्ते बात छ्याःङ च्योक ओङच्या मेतान। परमेश्वर शक्तिताङ बुद्धि बात छ्या स्ये ज्युत्कान्ते ख्रीष्ट ईन 18 बात चुक सासीन ख्रीष्ट मिओनला पापकी सजायदुकी डेलाला स्यिङगी थामला टाँए खाईन स्याप्ते ईन सिरजीन तिरी नरककुण्डमा स्यूक्कान्ते मिओनगीचेन दि लेम्बे बात ईन सिन पत्ते मिक्किओ। दोक ईन्सीनोङ परमेश्वरगी पापकी सजायदुकी टालाते मि ङुरूङगीचेन ख्रीष्टकी खाबाते थे काम ताला परमेश्वर शक्ति चुक छ्ये ईन्दे सिन छ्या स्येबा थुप्क्यो। 19 परमेश्वरगी साबाते बात परमेश्वर बातला दोक सिन टिला दुक। चुक सासीन “आउदी बुद्धि ओताते मिओनला ङा लेम्बा जोइओ। थेमे काल्बेई पढे खाबाते मिओन बुद्धि छ्याःङ काम लै मिक्किच्या जोइओ,” सिन साला दुक। 20 परमेश्वरगी थोक साबेकी च्यि था आउदी बुद्धि ओताते मिओन बुद्धि काम लै खित्च्या ओङसुङ? थेमे च्यि काल्बेई पढे खित्कान्तेबेकी था खइँदा खिता थुप्च्या ओङसुङरो? थोकराङ खाला च्यि थरिङोला बात खिताला आउदी सिपालु ओत्कान्तेबेकीङ था खइँदा खिता थुप्क्योतरो? दि सा लुङबे मिओनगी आउदी बुद्धिताङ सीप ओताते मि साबाते मिओन बुद्धि परमेश्वरगी छ्याःङ काम लै मिक्किच्या जोबा ओत। 21 दोक खाईन आउदी बुद्धि पुरे खाला काम खित्कान्ते परमेश्वरगी दि सा लुङबे मिओनगी जति बुद्धि खिये खासीनोङ खोपरोङ बुद्धिकी थेला छ्या स्येबा मुथुबो सिन तेन्गीन बिन्दा ओत। मिओनगी लेम्बे बात ईन सिरच्येते ङ्योकोनगी लोप्च्येते बातराङ मिओनगी ङेन्स्यीत थेमे दि बात ङेन्ला येशूला विश्वास खित्कान्तेबाला पापकी सजायदुकी डेल्ग्यो सिन परमेश्वरगी टुङ्गो खाईन दोक खिताराङ थेला लेमु लासुङ। 22 यहूदीओन लो दि बात सत्यते ईन्सीन खइँदा अचम्बते काम खाला तेन खिदुक। थोकराङ खाला ग्रीकओनचेन बुद्धि बातकामा ङेन्दा छोल्गीदुक। 23 दोक ईन्सीनोङ ङ्योकोनचेन ख्रीष्ट मिओनला पापकी सजायदुकी डेलाला स्यिङगी थामला टाँए खाईन स्याप्ते ईन सिन मिओनला लोप्क्यो। दि बात लोप्जीन यहूदीओनचेन दिनी परमेश्वर विरोध खाबाते ईन सिन स्येदाङ खिदुक। थेमे ग्रीकओनचेन दि लेम्बे बात ईन सिन ङेनराङ मेङेन्दुक। 24 जे ईन्सीनोङ परमेश्वरगी थे खोरोङ दोन्दु स्योक सिन काताङाते मिओनगीचेन यहूदी ईन्स्यीत, ग्रीक ईन्स्यीत गाङेकी ख्रीष्टला ताला परमेश्वरताङ चुक छ्येज्यीक शक्ति ओते थेमे थे चुक बुद्धि पुरे खाला काम खित्कान्ते ईन्दे सिन छ्या स्येक्यो। 25 मिओनला परमेश्वरगी खाबाते काम लेम्बे काम ईन सिराच्योक लासीनोङ मित्ताङ भन्दा थेत्ताङ झन आउदी बुद्धि ओत। थेमे मिओनला परमेश्वरगी छ्याःङ खिता मुथुबो सिराच्योक लासीनोङ मिते भन्दा थेत्ताङ खापान खापान छ्येज्यीक शक्ति ओत। पावलगी परमेश्वरगी चुक खिन ओते सिन साबाते 26 थेमे आज्यो न्वावे, परमेश्वरगी ख्योकोनला थे खोरोङ दोन्दु स्योक सिन कातोङजीन खेराङ चुक चुक्तेन्दे ओताने सिन विचार खि। सिइराङ सासीन ख्योकोन नाङ काल्बा च्योक आउदी बुद्धि ओताते मि मेतान, ख्योकोन ज्येनगी मान खिता फाप्च्येते छ्ये छ्ये मिङ मेतान थेमे खानदान मिङ मेतान। 27 दोक ईन्सीनोङ आउदी बुद्धि ओताते मिओनला ङोचा लोङाला दि सा लुङबे मिओनगी छ्याःङ छ्या मेस्येकान्ते साबाते मिओनलाराङ परमेश्वरगी छाने खासुङ। थोकराङ खाईन ङा ङाराङ ईन सिराच्योक खित्कान्तेबाला ङोचा लोङाला थेबेकी दिबाङ सु ईन्देरो सिराच्योक खाबाते मिओनलाराङ थेकी छाने खासुङ। 28 परमेश्वरगीचेन ज्येनगी दिबाङ सु ईन्देरो, दिबा ङुरूङ छेतते मेन सिन साबाते मिओनलाराङ छाने खासुङ। दोक खाईन ज्येनगी दिबा छ्येते मि ईन सिन साबाते मिओनलाचेन थेकी छ्याःङ मेन्दाच्योक जोसुङ। 29 सुङगीङ थे खोरोङ दोन्दु छ्ये खिता मेङेत्स्यीत सिनराङ थेकी दोक खाबाते ईन। 30 परमेश्वरगी खित्सादुकामा ख्योकोन येशू ख्रीष्टताङ जीउज्यीकराङ ओङाते ईन। येशू ख्रीष्टला ताला परमेश्वर चुक बुद्धि पुरे खाला काम खित्कान्ते ईन्दे सिन छ्या स्येक्यो। च्यि सासीन ख्रीष्टकी खित्सादु परमेश्वरगी ङुरूङला दोषी मेन सिओ, थेकी ङुरूङ सेम खुदुक जोबा ओत थेमे ङुरूङला पापकी सजायदुकी टाला ओत। 31 परमेश्वर बातला “सुइँदा मि छ्ये खिदुक सासीन थेकी प्रभु परमेश्वरगी थे खोरोङ लाईदु चुक छ्ये छ्ये काम खासुङा सिरच्येते बातलाकामा छ्ये खित्स्यीत,” सिन साबा ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.