Roṁánaċ 16 - Tiomna Nua 1951 (de Siúnta)

¹ Cuirim fá ḃur gcomairce Foíbé ár siúr, baindeoċan na h‐eaglaise i gCenċréa:

² go nglacaiḋ siḃ ċugaib í san Tiġearna, mar ba dual do na naoṁaiḃ, agus go gcuidiġiḋ siḃ léi i n‐aon ġnó ’n‐a mbéiḋ ḃur gcongnaṁ de ḋiṫ uirṫi; óir go deiṁin ṫug sí féin congnaṁ d’á lán daoine, agus daṁ‐sa, leis.

³ Beannuiġiḋ do Ṗrisca agus d’Acuila, cóṁ‐ṡaoṫraiḋṫe liom i nÍosa Críost,

⁴ daoine a ċuir a muineál féin i gcontaḃairt ar son m’anma‐sa; d’á ḃfuilim ag taḃairt buiḋeaċais, agus ní mise aṁáin,

⁵ aċt eaglaisí na gCineaḋaċ go léir: agus beannuiġiḋ do’n eaglais atá ’n‐a dtiġ. Beannuiġiḋ d’Epénatus, mo ċara ionṁain, céad‐ṫoraḋ na h‐Áise do Ċríost.

⁶ Beannuiġiḋ do Ṁáire, do rinne saoṫar mór ar ḃur son.

⁷ Beannuiġiḋ d’Andronícus agus do Iúnia, gaolta liom, agus cóṁ‐ḃraiġdeáin liom, daoine go ḃfuil árd‐ċlú orṫa i measc na n‐abstal, agus do ḃí i gCríost róṁam‐sa.

⁸ Beannuiġiḋ d’Ampliatus, mo ċara ionṁain san Tiġearna.

⁹ Beannuiġiḋ d’Urbán, ár gcóṁ‐ṡaoṫraiḋe i gCríost, agus do Staċus, cara ionṁain liom.

¹⁰ Beannuiġiḋ d’Apelles, an Ċríost‐aiḋe cruṫuiġṫe. Beannuiġiḋ do na cáirdiḃ ḃaineas le teaġlaċ Aristobúluis. Beannuiġiḋ do Héródian, mo ḋuine muinntearḋa.

¹¹ Beannuiġiḋ do na daoiniḃ ḃaineas le teaġlaċ Narcissuis atá san Tiġearna.

¹² Beannuiġiḋ do Ṫruféna agus do Ṫrufósa, mná ṡaoṫruiġeas san Tiġearna. Beannuiġiḋ do Ṗersis dileas, bean do rinne saoṫar mór san Tiġearna.

¹³ Beannuiġiḋ do Rúfus, fear atá sonnruiġṫeaċ san Tiġearna, agus d’á ṁáṫair, atá ’n‐a máṫair daṁ‐sa, leis.

¹⁴ Beannuiġiḋ d’Asuncritus, do Ḟlégon, do Hermés, do Ṗatróbas, do Hermas agus do na bráiṫriḃ atá ’n‐a ḃfoċair.

¹⁵ Beannuiġiḋ do Ḟilólogus agus do Iúlia, do Néreus agus d’á ḋeirḃṡiair, agus d’Olumpas, agus do na naoṁaiḃ uile atá ’n‐a ḃfoċair.

¹⁶ Beannuiġiḋ féin d’á ċéile le póig naoṁṫa. Beannuiġeann eaglaisí uile Ċríost daoiḃ.

¹⁷ Anois, a ḃráiṫre, impiḋim oraiḃ ḃeiṫ ar ḃur gcosaint ar an dream do‐ġní siosmaí agus scannail i n‐aġaiḋ an teagaisc atá foġlamṫa agaiḃ; agus druidiḋ uaṫa.

¹⁸ Óir ní do’n Tiġearna Críost atá a leiṫéidí ag déanaṁ seirḃíse, aċt d’á mbolg féin; agus tá siad ag meallaḋ croiḋeaċa na ndaoine simpliḋe le blastaċt cainnte agus le bladaireaċt.

¹⁹ Óir atá tuairisc ḃur n‐uṁlaċta i mbéal an uile ḋuine. Atá bród orm ’n‐ḃur dtaoḃ, d’á ḃriġ sin: aċt is mian liom siḃ ḃeiṫ glic i dtaoḃ maiṫeasa, agus ḃeiṫ neaṁ‐urċóideaċ i dtaoḃ an uilc.

²⁰ Agus is gearr go mbrúġfaiḋ Dia na síoṫċána Sátan fá ḃur gcosaiḃ. Go raiḃ grása ár dTiġearna Iosa Críost liḃ!

²¹ Beannuiġeann Timóteus, cóṁ‐ṡaoṫraiḋe liom, agus Lúcias, agus Iásón, agus Sosípatros, mo ḋaoine muinntearḋa, ḋaoiḃ.

²² Mise, Tertius, do scríoḃ an litir seo, beannuiġim‐se ḋaoiḃ.

²³ Beannuiġeann Gáius, ṫug aoiġeaċt daṁ‐sa agus do’n eaglais uile, beannuiġeann seisean daoiḃ. Beannuiġeann Erastus, cisteoir na caṫraċ, agus Cuartus, ár mbráṫair, daoiḃ.

²⁵ Anois, do’n té go ḃfuil ar ċumas dó siḃ do ḋaingniú do réir mo ṡoiscéil‐se, agus do réir seanmóireaċta Íosa Críost, do réir foillsiġṫe na rúndiaṁaire do cóngḃuiġeaḋ fá ċeilt leis na ciantaiḃ,

²⁶ aċt atá d’á noċtaḋ anois, agus d’á cur i dtuigsin do’n uile ċineaḋ tré scrioptúiriḃ na ḃfáiḋ, do réir aiṫne an Dé ṡíorraiḋe, ċum go mbéidís uṁal do’n ċreideaṁ;

²⁷ do Ḋia, an t‐aon eagnaiḋe aṁáin, dó‐san go raiḃ an ġlóir, tré Íosa Críost, go saoġal na saoġal. Amén.