Ṗilémoin 1 - Tiomna Nua 1951 (de Siúnta)

¹ Pól, príosúnaċ ar son Íosa Críost, agus Timóteus ár mbráṫair, ċum Filéamóin, cara ionṁain agus cóṁ‐oibriḋe linn,

² agus ċum Apfia, ár siur, agus ċum Arċippuis ár gcóṁ‐ṡaiġdiúir, agus ċum na h‐eaglaise atá id’ ṫiġ:

³ Grása ċugaiḃ agus síoṫċáin ó Ḋia ár nAṫair agus ó’n Tiġearna Íosa Críost.

⁴ Do‐ḃeirim buiḋeaċas lem’ Ḋia, ag cuiṁneaṁ i gcóṁnaiḋe ort im’ urnaiġṫiḃ,

⁵ toisc gur clos dom an creideaṁ atá agat do’n Tiġearna Íosa, agus do ġráḋ do na naoṁaiḃ go léir;

⁶ ag guiḋe go mbéaḋ an creideaṁ ’n‐a ḃfuil tú i gcóṁar leo éifeaċtaċ ar son Ċríost ċum a ḃfuil de ṁaiṫeas ionnainn do ċur i n‐uṁail go h‐iomlán.

⁷ Óir ba ṁór an t‐aḋḃar áṫais agus sóláis dom do ġráḋ‐sa a ḃráṫair, toisc gur tógaḋ croiḋeaċa na naoṁ tríot.

⁸ Ar an aḋḃar sin, giḋ go ḃfuil gaċ dánaiḋeaċt agam i gCríost ċum an niḋ is cuiḃe d’órdú ḋuit,

⁹ is é is fearr liom impiḋe do ḋéanaṁ ort, ar son an ġráḋa, agus gur mise Pól atá im’ ṡean‐ḟear, agus im’ ṗríosúnaċ anois ar son Íosa Críost:

¹⁰ atáim ag déanaṁ impiḋe ort ar son mo ṁic do ġeineas im’ ċuiḃreaċaiḃ, Onésimus,

¹¹ do ḃí gan tairḃe ḋuit tamall ó ṡoin, aċt atá tairḃeaċ dúinne araon anois.

¹² Tá sé féin curṫa agam ar ais ċugat, agus gur ab é mo ċroiḋe istiġ féin é.

¹³ Ba ṁian liom a ċongḃáil agam féin ċum go ndéanfaḋ sé seirḃís dom it’ ionad‐sa i gcuiḃreaċaiḃ an tsoiscéil:

¹⁴ aċt níor ṁaiṫ liom rud ar biṫ do ḋéanaṁ gan fios d’aigne ḃeiṫ agam; ċum naċ ndéanfá do ḋeaġ‐ġníoṁ ded’ aiṁḋeoin, aċt ded’ ḋeoin féin.

¹⁵ Óir dob’ ḟéidir gurḃ aṁlaiḋ do ḃí sé scarṫa leat ar feaḋ tréiṁse ċum go mbéaḋ sé agat go deo;

¹⁶ ní mar ṡeirḃíseaċ feasta, aċt mar ḋuine is mó ’ná seirḃíseaċ, mar ḃráṫair ionṁain, ionṁain liom‐sa, go mórṁór, aċt gur mó is annsa leat‐sa é san ḃfeoil agus san Tiġearna.

¹⁷ Mar sin de, már áirṁeann tú mise mar ċomrádaiḋe, glac ċugat é mar ġlacfá mé féin.

¹⁸ Agus má tá éagcóir ar biṫ déanta aige ort, nó má ḋliġeann sé éinniḋ ḋuit, cuir síos i gcoinniḃ mo ċunntais‐se é;

¹⁹ mise Pól atá g‐á scríoḃaḋ lem’ láiṁ féin, íocad‐sa as: gan a ċur i gcuiṁin duit go ndliġir‐se d’anam féin dom.

²⁰ Mar sin, a ḃráṫair, cuir fá’n gcomaoin seo mé san Tiġearna: taḃair suaiṁneas dom i gCríost.

²¹ Toisc muiniġin ḃeiṫ agam as d’uṁlaċt is eaḋ atáim ag scríoḃaḋ ċugat, agus a ḟios agam go ndéanfair ṫar mar deirim.

²² Aċt, ar an am céadna ullṁuiġ lóistín dom: óir atá súil agam go mbronnfar mé oraiḃ de ḃárr ḃur n‐urnaiġṫe.

²³ Beannuiġeann Epafras, cóṁ‐ṗríosúnaċ liom i nÍosa Críost, duit; mar aon le

²⁴ Marcus, Aristarċus, Démas agus Lúcás, cóṁ‐oibriḋṫe liom.

²⁵ Go raiḃ grása ár dTiġearna Íosa Críost ag ḃur spiorad. Amen.