Neaḃruiḋeaċ 3 - Tiomna Nua 1951 (de Siúnta)

¹ Uime sin, a ḃráiṫre naoṁṫa, a rannṗáirtiḋṫe san ngairm neaṁḋa, breaṫnuiġiḋ Abstal agus Árd‐Ṡagart an ċreidiṁ adṁuiġmíd, Íosa Críost;

² do ḃí dílis do’n té d’órduiġ é, mar ḃí Maois ’n‐a ṫiġ‐sean uile.

³ Óir do measaḋ gurḃ ḟiú eisean onóir san mbreis ar Ṁaois, san méid gur mó an onóir atá ag dul do’n té do ṫóg an teaċ ’ná do’n tiġ féin.

⁴ Óir do ṫóg duine éigin gaċ teaċ; aċt is é Dia do ṫóg gaċ a ḃfuil ann.

⁵ Agus go dearḃṫa, do ḃí Maois dílis mar ṡeirḃíseaċ ’n‐a ṫiġ‐sean uile, ċum fiaḋnaise do ṫaḃairt ar na neiṫiḃ do ḃí le h’innsin ’n‐a ḋiaiḋ sin;

⁶ aċt is aṁlaiḋ atá Críost mar Ṁac os cionn tiġe Dé; agus is sinne a ṫeaċ‐san, aċt ár muiniġin agus an dóċas atá mar aḋḃar glóire againn do ċongḃáil go daingean go deireaḋ.

⁷ Uime sin, mar deir an Spiorad Naoṁ, Indiu, má ċluineann siḃ a ġuṫ,

⁸ Ná cruaḋuiġiḋ ḃúr gcroiḋeaċa, aṁail le linn na ceannairce, Aṁail i lá an ċaṫuiġṫe san ḃfásaċ,

⁹ San áit ’n‐a ndearna ḃur sinnsir fróṁaḋ orm, Agus ’n‐a ḃfacadar m’oibreaċa ar feaḋ ḋá ḟiċid bliaḋan.

¹⁰ D’á ḃriġ sin do ḃíos i ḃfeirg leis an ngeinealaċ úd; Agus aduḃart, Bíonn siad i gcóṁnaiḋe ag dul amuḋa ’n‐a gcroiḋe: Agus do ḃíodar gan eolas ar mo ṡliġṫiḃ;

¹¹ Mar mionnuiġeas im’ ḟeirg, Ní raċaiḋ siad isteaċ im’ ṡuaiṁneas.

¹² Taḃraiḋ aire, a ḃráiṫre, ar eagla go mbéaḋ droċ‐ċroiḋe dí‐ċreidṁeaċ am ar biṫ i n‐aon duine agaiḃ, go dtréigfeaḋ siḃ an Dia beo:

¹³ aċt biḋiḋ ag brostú a ċéile lá i ndiaiḋ lae, a ḟaid agus glaoḋtar An Lá Indiu air; ar eagla go gcruaḋóċaiḋe aon duine

¹⁴ agaiḃ le meaḃlaireaċt an ṗeacaiḋ óir do rinneaḋ sinn rannṗáirteaċ le Críost, aċt go gcongḃuiġmíd ár gcéad ṁuiniġin go deireaḋ;

¹⁵ a ḟaid agus deirtear, Indiu, má ċluineann siḃ a ġuṫ, Ná ċruaḋuiġiḋ ḃur gcroiḋeaċa, aṁail le linn na ceannairce.

¹⁶ Óir ciarḃ iad do ċuala agus do rinne ceannairc? Nárḃ iad‐san go léir ṫáinig as an Éigipt i n‐éinḟeaċt le Maois iad?

¹⁷ Agus cia leo go raiḃ Dia i ḃfeirg ar feaḋ ḋá ḟiċid bliaḋan? Nárḃ iad‐san do rinne peacaḋ iad, gur ṫuit a gcuirp san ḃfásaċ?

¹⁸ Agus ciarḃ iad gur ḋearḃuiġ sé ḋóiḃ naċ racaidís isteaċ ’n‐a ṡuaiṁneas, aċt iad‐san aṁáin do ḃí easuṁal?

¹⁹ Ċímíd, d’á ḃriġ sin, nár ḟéadadar dul isteaċ ann mar ġeall ar easbaiḋ creidiṁ.