2 Chum na gCoirinnteach 6 - Tiomna Nua 1951 (de Siúnta)

¹ Agus ag obair i n‐éinḟeaċt leis dúinne, impiġmíd oraiḃ gan grása Dé do ġlacaḋ go díoṁaoin.

² Óir duḃairt sé, I n‐am oireaṁnaċ d’éisteas leat, Agus i ló an tslánuiġṫe do ċaḃruiġeas leat. Féaċ, anois an t‐am oireaṁnaċ; féaċ, anois lá an tslánuiġṫe; gan aḋḃar tuisliḋ do ṫaḃairt d’aon duine,

³ ċum naċ ḃfaġtar loċt ar ár miniostrálaċt;

⁴ aċt cruṫaimís gur seirḃísiġ Dé sinn, i ḃfoiġid ṁóir,

⁵ i gcruaḋtan, i riaċtanas, i ngéiḃeann, i mbuilliḃ, i bpríosúnaiḃ, i n‐aċrannaiḃ, i ndian‐tsaoṫar, i ḃfaireaċán, i dtroscaiḋiḃ;

⁶ i ngeanṁaiḋeaċt, i n‐eolas, i ḃfad‐ḟulang, i gcáirdeaṁlaċt, san Spiorad Naoṁ,

⁷ le gráḋ gan ceilg, i mbriaṫar na fírinne, i gcuṁaċt Dé; le h‐armaiḃ fíréantaċta i gcóṁair na láiṁe deise agus clé,

⁸ fá onóir agus fá easonóir, fá ḋeaġ‐ċlú agus fá mí‐ċlú; mar ṁealltóirí,

⁹ aċt mar ḋaoine fíora; mar ḋaoine naċ n‐aiṫniġtear, aċt aiṫniġtear ’n‐a aiṁḋeoin sin; mar ḋaoine atá ag saoṫrú an ḃáis, agus, féaċ, atáimíd beo; mar ḋaoine curtar fá smaċt, gan ḃeiṫ marḃṫa;

¹⁰ mar ḋaoine brónaċa, aċt ag déanaṁ áṫais i gcóṁnaiḋe; mar ḋaoine boċta, aċt ag bronnaḋ saiḋḃris ar a lán; mar ḋaoine naċ ḃfuil rud ar biṫ aca, aċt gur leo gaċ uile rud.

¹¹ A Ċoirinnteaċa, atá ár mbéal ar ḟoscailt daoiḃ, atá fairsinge croiḋe againn.

¹² Ní ḟuil aon ċuṁangas croiḋe againn ’n‐ḃur dtaoḃ, aċt is ’n‐ḃur gcroiḋeaċaiḃ atá an cuṁangas.

¹³ Anois, ċum cúiteaṁ de’n tsaġas céadna do ṫaḃairt daṁ‐sa (ag laḃairt mar laḃarfainn lem’ ċáirdiḃ féin atáim), biḋiḋ fairsing mar an gcéadna.

¹⁴ Ná biḋiḋ fá ċuing i n‐éinḟeaċt le luċt dí‐ċreidiṁ: óir cia an cáirdeas atá ag fíréantaċt le h‐éagcóir? nó cia an cumann atá ag an solas leis an dorċaċt?

¹⁵ Agus cia an ċóṁaontú atá ag Críost le Bélial? nó cia an ċuid atá ag an duine ċreideas agus ag an duine naċ gcreideann le ċéile?

¹⁶ Agus cia an cóiṁċeangal atá idir teampall Dé agus íoḋla? óir is sinne teampall Dé ḃí; mar aduḃairt Dia, Déanfad cóṁnaiḋe ’n‐a measc, agus siuḃalfad ’n‐a measc; béiḋead‐sa im’ Ḋia aca, agus béiḋid‐sean ’n‐a bpobal agam‐sa.

¹⁷ D’á ḃriġ sin, Tagaiḋ amaċ as a lár, Agus biḋiḋ ar deaġailt, Adeir an Tiġearna, Agus ná bíoḋ aon ḃaint agaiḃ leis an rud neaṁ‐ġlan; Agus glacfad ċugam siḃ,

¹⁸ Agus béiḋead mar Aṫair agaiḃ, Agus béiḋ siḃ‐se mar ċlann‐ṁac agus mar ċlann‐inġean agam, adeir an Tiġearna Uile‐ċuṁaċtaċ.