2 Chum na gCoirinnteach 3 - Tiomna Nua 1951 (de Siúnta)

¹ An ag tosnú arís ar ár molaḋ féin atáimíd? nó an ḃfuil gaḃaḋ againn le litreaċaiḃ molta ċugaiḃ nó uaiḃ, mar tá ag daoiniḃ áiriṫe?

² Is siḃ‐se ár litir, atá scríoḃṫa ’n‐ár gcroiḋeaċaiḃ, atá d’á ṫuigsin agus d’á léiġeaṁ ag an uile ḋuine;

³ mar is léir gur siḃ litir Ċríost do cuireaḋ fá n‐ár gcúram, litir do scríoḃaḋ, ní h‐é le duḃaċ, aċt le Spiorad Dé ḃí; ní h‐é ar ṫáiḃléadaiḃ cloiċe, aċt ar ṫáiḃléadaiḃ feola.

⁴ Agus is tré Ċríost atá an ṁuiniġin seo againn i dtaoḃ Dé:

⁵ ní h‐é gur féidir linn éinniḋ d’áireaṁ mar ḃéaḋ uainn féin; aċt is ó Ḋia ṫig ár gcumas;

⁶ is é ṫug éifeaċt dúinn, leis, ċum ḃeiṫ ’n‐ár seirḃíseaċaiḃ do ṫiomna nua; ní h‐é do réir na litre, aċt do réir an spioraid; óir marḃann an litir, aċt do‐ḃeir an spiorad beaṫa.

⁷ Agus miniostrálaċt an ḃáis, atá greanta ’n‐a litreaċaiḃ ar ċloċaiḃ, má ṫáinig sí le glóir, i rioċt nárḃ ḟéidir le clannaiḃ Israel féaċaint go grinn ar ġnúis Ṁaoise, mar ġeall ar ġlóir a ġnúise: glóir do ḃí ag dul i n‐éag:

⁸ cad ċuige naċ mbéaḋ glóir is mó ’ná sin ag miniostrálaċt an spioraid?

⁹ Óir má tá miniostrálaċt an damnuiġṫe glórṁar, is mó ’ná sin go mór atá miniostrálaċt na fíréantaċta glórṁar.

¹⁰ Óir an niḋ do‐rinneaḋ glórṁar, is dearḃ naċ ndearnaḋ é glórṁar san gcás so, mar ġeall ar an nglóir is fearr.

¹¹ Óir an niḋ do ḃí ag dul i n‐éag, má ḃí sé glórṁar, is mó ’ná sin go mór glóir an niḋ atá buan.

¹² Ó ṫárla a leiṫéid seo de ṁuiniġin ḃeiṫ againn, laḃraimíd as cainnt an‐dána,

¹³ agus ní ḟuilmíd mar ḃí Maois, do ċuir folaċ ar a ġnúis, ċum naċ ndearcfaḋ clanna Israel go grinn ar ḋeireaḋ a raiḃ ag dul i n‐éag:

¹⁴ aċt do ḃí a n‐aigne dallta, óir go dtí an lá so féin, le linn léiġte an tseantiomna, fanann an folaċ céadna gan tógáil: folaċ atá curṫa ar neaṁ‐niḋ i gCríost.

¹⁵ Aċt go dtí an lá so, nuair léiġtear Maois, luiġeann folaċ ar a gcroiḋe.

¹⁶ Aċt nuair ċasfaiḋ siad ċum an Tiġearna, tógfar an folaċ díoḃ.

¹⁷ Anois is é an Tiġearna an Spiorad; agus an áit ’n‐a ḃfuil Spiorad an Tiġearna, is ann atá saoirse.

¹⁸ Aċt sinne uile, ag dearcaḋ, mar ḃéaḋ i scaṫán, ar ġlóir an Tiġearna, gan folaċ ḃeiṫ ar ár ngnúis, atáimíd d’ár n‐aistriú san íoṁáiġ ċéadna ó ġlóir go glóir, mar ḃéaḋ ó’n Tiġearna an Spiorad.