2 Chum na dTesaloníceach 3 - Tiomna Nua 1951 (de Siúnta)

¹ I ndeireaḋ scéil, a ḃráiṫre, guiḋiḋ orainne, ċum go leaṫaiḋ briaṫar an Tiġearna, agus go nglóiriġtear é, mar tá d’á ḋéanaṁ agaiḃ‐se;

² agus ċum go saorfar sinn ó ḋaoiniḃ míréasúnta, cuirpṫeaċa; óir ní h‐é gaċ aon duine go ḃfuil an creideaṁ aige.

³ Aċt atá an Tiġearna creideaṁnaċ; is é ḋaingneoċas siḃ agus ċoiṁeádfas slán ó’n ainspiorad siḃ.

⁴ Agus atá muiniġin againn as an Tiġearna ’n‐ḃur dtaoḃ, go ḃfuil siḃ ag déanaṁ na neiṫe órduiġmíd, agus go ndéanfaiḋ siḃ iad.

⁵ Agus go dtreoruiġiḋ an Tiġearna ḃur gcroiḋeaċa ċum gráḋa Dé, agus ċum foiḋne Ċríost.

⁶ Órduiġmíd daoiḃ anois, a ḃráiṫre, i n‐ainm ár dTiġearna Íosa Críost, druidim ó gaċ bráṫair atá ag maireaċtain go fallsa, agus naċ do réir an teagaisc fuaradar uainne.

⁷ Óir is eol daoiḃ féin cionnas ba ċeart daoiḃ aiṫris do ḋéanaṁ orainne: óir níor iomċaramar sinn féin go fallsa ’n‐ḃur measc;

⁸ agus níor iṫeamar arán aon duine i n‐aisce, aċt ag obair go cruaiḋ, dóċaṁlaċ, d’oiḋċe agus de ló, ċum naċ mbéimís mar ualaċ ar aon duine agaiḃ.

⁹ Ní h‐é nárḃ é ár gceart é, aċt ċum sompla do ṫaḃairt daoiḃ, ċum go ndéanfaḋ siḃ aiṫris orainn.

¹⁰ Óir nuair ḃíomar ’n‐ḃur ḃfoċair féin, ba é ár n‐órdú ḋaoiḃ, Munab áil le h‐aoinneaċ obair do ḋéanaṁ, nár iṫeaḋ sé.

¹¹ Óir is clos dúinn go ḃfuil daoine ’n‐ḃur measc ċaiṫeas a saoġal go fallsa, gan obair do ḋéanaṁ, aċt iad ag taḃairt a n‐aire do ġnóṫaiḃ daoine eile.

¹² Anois órduiġmíd d’á leiṫéidiḃ sin, agus spreagaimíd tríd an Tiġearna Íosa iad, saoṫrú le ciúnas, agus a gcuid aráin féin d’iṫe.

¹³ Aċt, a ḃráiṫre, ná biḋiḋ‐se tuirseaċ ag déanaṁ maiṫeasa.

¹⁴ Agus má tá aon duine naċ n‐uṁluiġeann d’ár ḃfocal san eipistil seo, taḃraiḋ aire do’n duine sin, gan dul ’n‐a ċuideaċtain, ċum go gcuirfiḋe náire air.

¹⁵ Aċt ’n‐a ḋiaiḋ sin, ná breaṫnuiġiḋ air mar ḃéaḋ náṁa ann, aċt cóṁairliġ leis aṁail bráṫair.

¹⁶ Anois go dtugaiḋ Dia na síoṫċána síoṫċáin daoiḃ i gcóṁnaiḋe ar an uile ṡliġe. Go raiḃ an Tiġearna liḃ go léir.

¹⁷ Beannuiġim‐se Pól daoiḃ lem’ láiṁ féin. Is é mo ċóṁarṫa i ngaċ eipistil é: mar sin scríoḃaim.

¹⁸ Go raiḃ grása ár dTiġearna Íosa Críost liḃ go léir.