1 Chum na dTesaloníceach 5 - Tiomna Nua 1951 (de Siúnta)

¹ Aċt maidir leis na h‐aimsearaiḃ agus leis na tráṫaiḃ, a ḃráiṫre, ní gáḃaḋ éinniḋ do scríoḃaḋ ċugaiḃ.

² Óir atá a ḟios agaiḃ go maiṫ go dtagann lá an Tiġearna mar ṫagann gadaiḋe san oiḋċe.

³ Nuair adeir na daoine, Síoṫċáin agus neaṁ‐ḃaoġal, annsin is eaḋ ṫig léirscrios obann orṫa, mar ṫagann a pianta ar ṁnaoi atá ag iomċar clainne; agus ní raċaiḋ siad slán as.

⁴ Aċt, a ḃráiṫre, ní ḟuil siḃ‐se san dorċaċt, go dtiocfaḋ an lá úd oraiḃ mar ṫiocfaḋ gadaiḋe.

⁵ Clann an tsolais agus clann an lae is eaḋ siḃ go léir; ní daoine de ċlainn na h‐oiḋċe, ná de ċlainn na dorċaċta sinn.

⁶ Ná bímís ’n‐ár gcodlaḋ, mar sin, ar nós daoine eile, aċt bímís ag faire, agus bímís ’n‐ár gcéill.

⁷ Óir na daoine ċodlas, is san oiḋċe ċodlas siad, agus na daoine ḃíos ar meisce, is san oiḋċe ḃíos siad ar meisce.

⁸ Aċt sinne, daoine de ċlainn an lae, bímís ’n‐ár gcéill, tar éis lúireaċ an ċreidiṁ agus an ġráḋa do ċur orainn; agus an dóċas ċum slánuiġṫe ḃeiṫ mar ċlogad orainn.

⁹ Óir ní ċum díḃeirge do ċeap Dia sinn, aċt ċum slánuġaḋ d’ḟáġáil tré n‐ár dTiġearna Íosa Críost,

¹⁰ fuair bás ar ár son, ċum go mairfimís beo i n‐éinḟeaċt leis, má’s ’n‐ár ndúiseaċt nó ’n‐ár gcodlaḋ ḋúinn.

¹¹ D’á ḃriġ sin taḃraiḋ meisneaċ d’á ċéile, agus neartuiġiḋ a ċéile, fá mar tá d’á ḋéanaṁ agaiḃ.

¹² Impiḋmíd oraiḃ, a ḃráiṫre, cion do ḃeiṫ agaiḃ orṫa‐san atá ag obair ’n‐ḃur measc, iad‐san go ḃfuil ceannas aca oraiḃ san Tiġearna, agus ḃeireas cóṁairle ḃur leasa ḋaoiḃ;

¹³ agus árd‐ṁeas do ḃeiṫ agaiḃ orṫa as uċt a n‐oibre. Biḋiḋ go síoṫċánta eadraiḃ féin.

¹⁴ Agus iarraimíd oraiḃ, a ḃráiṫre, taḃraiḋ raḃaḋ do na fallsóirí, taḃraiḋ meisneaċ do na daoiniḃ atá lag‐ċroiḋeaċ, biḋiḋ mar ṫaca do na daoiniḃ atá i n‐ísle ḃriġe, biḋiḋ foiġdeaċ leis an uile ḋuine.

¹⁵ Féaċaiḋ ċuige naċ dtiuḃraiḋ aoinneaċ an t‐olc i n‐éiric an uilc d’aon duine; aċt leanaiḋ i gcóṁnaiḋe do’n ṁaiṫ eadraiḃ féin agus i dtaoḃ an uile ḋuine.

¹⁶ Ḋéanaiḋ gáirdeaċas i gcóṁnaiḋe;

¹⁷ biḋiḋ ag guiḋe gan stad.

¹⁸ Beiriḋ buiḋeaċas san uile niḋ; óir is é toil Dé é sin ’n‐ḃur dtaoḃ i nÍosa Críost.

¹⁹ Ná múċaiḋ an Spiorad;

²⁰ ná déan beag‐is‐fiú de ṫarngaireaċtaiḃ;

²¹ froṁaiḋ gaċ aon niḋ; greamuíġiḋ go daingean ḋá ḃḟuil maiṫ;

²² staonaiḋ ó olcas de gaċ saġas.

²³ Agus go naoṁuiġiḋ Dia na síoṫċána féin go h‐iomlán siḃ; agus go gcoiṁeádtar siḃ idir spiorad agus anam agus corp slán ó ċionnta go dtí teaċt ár dTiġearna Íosa Críost.

²⁴ Is dílis an té atá ’g‐ḃur nglaoḋaċ, is é ḋéanfas é.

²⁵ A ḃráiṫre guiḋiḋ orainn.

²⁶ Beannuiġiḋ do na bráiṫriḃ go léir le póig naoṁṫa.

²⁷ Cuirim mar aṫcuinġe oraiḃ as uċt an Tiġearna an eipistil seo do ċur d’á léiġeaṁ do na bráiṫriḃ go léir.

²⁸ Go raiḃ grása ár dTiġearna Íosa Críost liḃ.