Tite 3 - Jɔ Biibili ki

Bilinatɔnŋ ki wɔ ɲaninkulutɔnbi maka ɲaan ki

¹ Bilinatɔnŋ kiri ɲakilila bo tu kí kakan kí i arì kulu arì ŋununtiŋ kiri fa faantiŋ kiri tɛ, kí i kí wulu pa, kí i ji shɔɔrinŋ matiiri i, bi bataa ru.

² Kí fa koŋ tɔri tenŋ tɔ li kì, kí i sawari, kí arì yɛri ji koŋ sɔbɛ ri i, kí i arì tɔnsunfili koŋ bataa tɛ.

³ Sabu fɔlɔfɔlɔ yibɛɛ yɛrima kiri wuru ɲakili bali li i, niŋ fa Kirinŋ wulu pabali li i, yi i ji koŋ fɔnimaan ni i. Yibɛɛ wuru firi ki dintɛ bi jɛ kiri fa ɲaannabyɛ kwuru ki bataa wɔ joŋ ni i, yi i ji wuru koŋ juumaan ni fa koŋ ɲaannajuutɔnŋ ni i. Yibɛɛ bikwɔ wuru konaŋ kiri sun, yibɛɛ yɛrima kiri i yi yɛri bikwɔ-ri yimaŋ sun sɛbɛ.

⁴ Nka yibɛɛ Mwutɔnŋ Kirinŋ awɔ shɔɔrinŋ ki fa awɔ bidintɛbi ki ji-i waarinŋ wɔ̀ ru konaŋ kiri wu, ŋì yibɛɛ mwu-i.

⁵ Yibɔɔ mabi shɔɔrinŋ kiri mwɔɔn niŋ i kì dɛ! Kirinŋ niŋ ma-i awɔ koŋ sunmakwulupabi ki bira. Ŋì yibɛɛ wu po san-i yɔɔ bijɛ kiri ru Ɲiniwɔlinŋ ki wɔ so ki wu, yi i ji koŋ ŋunaŋ ni i, ŋì i ɲaninkulutɔnbi ŋunaŋ wɔri yi tɛ.

⁶ Kirinŋ niŋ Ɲiniwɔlinŋ ki jɛri-i yibɛɛ sun ǹʼmwɔɔnna yibɛɛ Mwutɔnŋ Yesu Kirisa baraka ra.

⁷ Niŋ na, ŋì yibɛɛ ji-i koŋ telimaan ni i a yɛri ɲaanfɛ awɔ shɔɔrinŋ ki baraka ra, nwɔma yibɛɛ yi gbɛ bili-i ɲaninkulutɔnbi kɔbali wɔ̀ bi sun, yi i ji niŋ kanishitɔnŋ ni i.

⁸ Ka wulu kari i sɛli yɛrima ki i. Míŋ i ǹʼtɛ, miŋ i tu konaŋ kiri ɲakilila bo-a niŋ bi kiri bi tɛ waarinŋ bataa ru, nwɔma nwɔ̀ri bili-i Kirinŋ na, nini i bi shɔɔrinŋ ma. Ninki shɔ-i, tɔnɔ i ji niŋ ma ki ru konaŋ kiri gbɛ sɛbɛ.

Koŋ bo maŋ natɔnŋ kiri paka ɲaan ki

⁹ Fa nʼtɔnŋ de sɔsɔɔlinŋ gbansanŋ nu kì, fa sɔsɔɔlinŋ tan nupobi sun kì, fa kari myɛɛnniŋ tan kì, fa sɔsɔɔlinŋ fa kari gbansanŋ tan Musa wɔ sariya ki bi sun kì. Niŋ bi kiri bataa i bi gbansanŋ ni i.

¹⁰ A konwɔtiŋ ji bilinatɔnŋ kiri bo-a arìmaŋ na, ntiŋ nacin, ŋi i so kaan fuuli sun, a ntiŋ a tu kì, nʼkanŋ po san nintiŋ kanŋ nu.

¹¹ Sabu miŋ ǹʼtɔ-i tu niŋ koŋ bishi ki bilinabi saa fɔ ki bo kɔ, ntiŋ i fɔni saa ki shi. Ntiŋ i bijɛ ki ma-a, ntiŋ i Kirinŋ wɔ kiti ki fɛɛn a yɛri sun.

Pooli wɔ racinwulu lakɔɔra kiri

¹² A míŋ na Aritɛmisi walima Tisike bo ta miŋ tɛ waarinŋ wɔ̀ ru, ŋi i ncusun, ŋi i nʼnukwulu tiri míŋ cɛsun Nikopolisi, sabu míŋ i ǹʼtɛ, ŋí i ta shii waari ki ma niŋ mani nu.

¹³ Nʼɲakili tu sariya kalimɔɔ Nsenasi fa Apolɔsi ra, ŋi i ye kí tɛ arɔɔ wɔru ta ki ra, nwɔma finŋ tɔri fa waa kí ra kì.

¹⁴ Yibɛɛ tindaŋ kiri kakan-i, kí i arì yɛri kini bi shɔɔrinŋ ma ki ra, nwɔma kí i so ye-i ǹʼbɛɛ ri tɛ arì fɔɔn bi kwulumaan kiri ra, kí kakan kí i ji koŋ kulu bali li i kì.

Pooli wɔ coolinŋ nakɔɔra kiri

¹⁵ Koŋ wɔ̀ri bataa i míŋ fan kwumaŋ, nini bataa i miŋ co-a. Yɔɔ coolinŋ i bilinatɔnŋ kiri bataa tɛ, yibɛɛ bidi-i nini wɔ̀ri tɛ. Kirinŋ shɔɔrinŋ ma á bataa tɛ.