Tite 1 - Jɔ Biibili ki

Pooli wɔ coolinŋ ki

¹ Míŋ Pooli wɔ̀ i Kirinŋ tɛ baara matɔnŋ i, niŋ fa Yesu Kirisa wɔ cindaŋ i, míŋ i ka sɛbɛ ka wɔri ta-a miŋ Tite tɛ. Kirinŋ koŋ wɔ̀ri ɲaannashi-i, ŋì míŋ dɔri-i, tu míŋ nini bo bilinabi saa ki fan, kí i sɛli ki bataa tɔ, ŋì i kɛɲɛ Kirinŋ saa shɔɔrinŋ ki wu.

² Nwɔma kí i arì gbɛbilimaŋ ki ji ɲaninkulutɔnbi kɔbali ki i. Kirinŋ wɔ̀ puru bi-a kì, niŋ a tɔnŋ wɔri-i yibɛɛ tɛ niŋ ɲaninkulutɔnbi kɔbali ki bi sun, niŋ i faa juniɲa namɔni-ni sun kì.

³ Ǹʼɲaanna waaci ki na-i so, ŋì i awɔ wulu ki ji konaŋ kiri wu awɔ Wulujii ki sunjomaanna ki wu, ŋì ninwɔ̀ biye-i míŋ gbɛsun, ŋì i kɛɲɛ yibɛɛ mwutɔnŋ Kirinŋ yɛrima ki wɔ cinŋ bimaan ki wu.

⁴ Ńʼwɔ coolinŋ i miŋ tɛ Tite, minwɔ̀ i míŋ daŋ i bilinabi ki ru, yibɛɛ dɛbɛ-i ninwɔ̀ sun. Yibɛɛ Tiŋ Kirinŋ niŋ fa yibɛɛ Mwutɔnŋ Yesu Kirisa shɔɔrinŋ fa ɲaanfɛfili wɔri nʼtɛ.

Cinŋ wɔ̀ biye Tite gbɛsun

⁵ Míŋ miŋ tu-i Kɛrɛti sɔɔta ki ru, nwɔma bi wɔ̀ri ɲaanpobali tu-i, ŋi i nini ɲaanpo ǹʼshɔɔrinŋ i, ŋi i egilisi ki cɛɛnni kiri bɛɛ ri sɔɔ kili ki fɔn bataa tenŋ tenŋ ciiru, miŋ tu míŋ ǹʼbi-i ɲaan wɔ̀ tɛ.

⁶ Pɔlimaŋ fa kila niŋ cɛɛnni ki tɔri ra kì, ntiŋ i ji shuru u, wɔ̀ a teli-i awɔ mari ki tɛ, ntiŋ fa ji mari tɔri ceelitɔnŋ i kì, ntiŋ daŋ kiri i ji bilinatɔnŋ ni i, koŋ i a gbɛ faa-ra nwɔ̀ri ru. Kí tɔ jɛ fa bi de-ri konaŋ kiri tɔnŋ na arɔɔ kakaalibi fa arɔɔ kulubalibi bira kì.

⁷ Sɛli ki ra, egilisi jɛntɔnŋ ki kakan-i ntiŋ i ji koŋ pɔlibali i, sabu ntiŋ i Kirinŋ wɔ konanbi ki ɲaannasuutɔnŋ ki i. Ntiŋ fa ji koŋ nagbɛmaan a walima tɔnŋ sinantiŋ i kì, walima lɔrutɛfɛ fɛ kì. Ntiŋ fa ji kari ceelitɔnŋ i kì, ntiŋ fa tɔnɔ ceeli-li namarinŋ sun kì.

⁸ Ntiŋ i ji jɛ ri maritɔnŋ i niŋ fa bi shɔɔrinŋ bi i di ntiŋ tɛ. Ntiŋ i ji koŋ ɲakilitiŋ i, koŋ telimaan a, ntiŋ i ji wɔlinŋ i, ntiŋ i so-ri a yɛri paka shɔ-i.

⁹ Ntiŋ kakan-i ntiŋ i ji koŋ i, nwɔ̀ a da-i Kirinŋ wɔ wulu sɛlɛsɛli ki ra, miŋ tu ntiŋ kali-i ǹʼna ɲaan wɔ̀ tɛ, nwɔma ntiŋ i so koŋ tɔri ri kali-i niŋ kalinŋ ki ra, ntiŋ i kí racin ŋì i kɛɲɛ niŋ kalinŋ telimaan ki wu, ntiŋ i wulu kɔ sɔsɔɔlintiŋ kiri daru.

Kalinŋ jɛ kiri bi ki

¹⁰ Koŋ mwɔɔnna i nmaŋ, nwɔ̀ri arì kulu sɛli ki tɛ sun kì, kí i ji wulu kulinŋ bitɔnŋ ni fa konaŋ fɔnitiiri i. Kí mwɔɔnna i Yawutu ri i, nwɔ̀ri arì tu-i, kí i ji Kirisa tɛ, kí i ji wuru cɛɛn-na sɔɔpeefɛmaanna ki cɛfan faanna.

¹¹ Kí tɔnŋ kiri kakan-i yìrì i rala, sabu kí kaniŋ kiri bɛɛ ri bataa ŋununli-i kalinŋ ni wu, nwɔ̀ri kakan yìrì i tan kì. Kí i niŋ bataa ma-a jalinŋ cɛfan.

¹² Kɔ́ɔ́ cintɔnŋ ki bɛɛ, nwɔ̀ wuru Kɛrɛtitɔnŋ i, niŋ ǹʼbi wuru tu : « Kɛrɛtitɔnŋ kiri i purubitɔnŋ ni i, waarinŋ bataa ru, kí juu-u miŋ tu kpalinŋ ni, jurubitiŋ ni fa fyikatiŋ ni yɛ. »

¹³ Niŋ wulu ki ji-i sɛli i, niŋ ki ra, jɛbi kí gbɛ kusɛbɛ, nwɔma kɔ́ɔ́ bilinabi ki i fɔɔ,

¹⁴ kí fa na ǹʼpa Yawutu kiri wɔ fɔlɔfɔlɔ wulu bwuumaan purutiŋ kiri cɛfan kì, niŋ fa nwɔ̀ri arì kaan-a sɛli ki tɛ, kí fa arì tu nini wɔ wulu kiri ra kì.

¹⁵ Koŋ wɔ̀ri fɔɔ-ɔ Kirinŋ ɲaanfɛ, finŋ ki fɔn bataa fɔɔ-ɔ nini gbɛ, nka nwɔ̀ri fɔɔ kì, bilinabali kiri, finŋ tɔri tenŋ fɔɔ nini gbɛ kì. Kí ɲakilila kiri fa kí ciiru kiri nɔɔ.

¹⁶ Kí i arì yɛri ji-a Kirinŋ tɔtɔnŋ ni i, niŋ i faa kí mabi kiri i ǹʼji-ri tu niŋ sɛli i kì. Kí Kirinŋ dintɛ bi ri ma-a kì, kí bikwɔ-i Kirinŋ sun, niŋ ɲaan ki tɛ, kí so-a shɔɔrinŋ dantenŋ ma-i kì.