Timote (2) 1 - Jɔ Biibili ki

Pooli wɔ coolinŋ ki

¹ Míŋ Pooli wɔ̀ i Yesu Kirisa wɔ cindaŋ i, ŋì i kɛɲɛ Kirinŋ dintɛ bi ki wu, míŋ cin-i tu míŋ ɲaninkulutɔnbi ki wulu ki sunjo, ninwɔ̀ tɔnŋ wɔri-i yibɛɛ tɛ Yesu Kirisa bira.

² Míŋ i ka sɛbɛ ka wɔri ta-a miŋ Timote tɛ, minwɔ̀ i míŋ danshuru byii i bilinabi ki ru. Yibɛɛ Tiŋ Kirinŋ fa yi Ŋuntiŋ Yesu Kirisa nʼsunmakwulupa, ŋì i ɲaanfɛfili wɔri nʼtɛ, ŋì i shɔɔrinŋ ma nʼtɛ.

Pooli wɔ coolinŋ ki Kirinŋ tɛ Timote bira

³ Míŋ i coolinŋ wɔri-ra Kirinŋ tɛ, míŋ i cinŋ ki ma-a ninwɔ̀ tɛ fɔɔbi wu, miŋ tu míŋ tiŋ cɛɛnni kiri ǹʼma-i ɲaan wɔ̀ tɛ. Cii fa sunŋ, a míŋ ji Kirinŋ nafɛ-a, míŋ i ńʼɲakili tu-a miŋ na waarinŋ bataa ru.

⁴ Miŋ ɲaannaju wɔ̀ po-i míŋ fa miŋ san waari ki ru yimaŋ na, a míŋ ɲakilila bo niŋ tɛ waarinŋ wɔ̀ ru, miŋ fyii i míŋ pa-a kusɛbɛ. Niŋ na, miŋ ja tɔ i míŋ pa-a sɛbɛ, nwɔma ŋí i ciirudibi sinaŋ kila.

⁵ Míŋ ɲakili tu-i mɔɔn bilinabi sɛlɛsɛli ki ra, ninwɔ̀ wuru miŋ ɲiŋ cɛɛnni Loyisi fa miŋ ɲiŋ Enisi ru miŋ jɛŋ. Míŋ bili-i ǹʼna tu mìŋ bilinabi ki miŋ yɛrima ki ru sɛbɛ.

⁶ Niŋ ki ra, míŋ i miŋ ɲakilila bo-a, ńʼtu miŋ Kirinŋ wɔ kafinŋ wɔ̀ kila-i míŋ gbɛ bili ki sababu ra miŋ ŋununu, ńʼtu a fa ncusun niŋ tuunɛninɛŋ ki i byi kì.

⁷ Sabu Kirinŋ ɲini wɔ̀ wɔri-i yibɛɛ tɛ, niŋ ɲini kɛmitiŋ i kì. Nka, faantinbi fa bidintɛbi fa so yɛri ra ɲini wɔri-i yibɛɛ tɛ.

⁸ Yibɛɛ Ŋuntiŋ ki wulu ki sunjorama ki fa nʼɲaankwun kì. Nʼdumiŋ fa ɲaankwun míŋ wu kì, mínwɔ̀ i nkasudaŋ i, Ŋuntiŋ ki bira. Nka nʼtu, ŋi i cɔɔri míŋ sali Kirinŋ wɔ Wulujii ki bira, ŋi i nʼgbɛ bili Kirinŋ wɔ sotinbi ki sun.

⁹ Mìnki yibɛɛ mwu-i, ŋì i yi dɔri, yi i ji awɔ konanbi i. Yibɔɔ mabi shɔɔrinŋ ncin ŋì i niŋ ma kì, nka ŋì niŋ ma-i, ŋì i kɛɲɛ awɔ bi gbɛbilika ɲaan ki fa awɔ shɔɔrinŋ ki wu, ŋì ninwɔ̀ wɔri-i yibɛɛ tɛ Yesu Kirisa bira juniɲa cɛtu ki jɛŋ.

¹⁰ Ŋì niŋ shɔɔrinŋ ki ji-i yibɛɛ wu dɔnsaŋ, yibɛɛ Mwutɔnŋ Yesu Kirisa na ki wu. Mìntiŋ ki beŋ ki faan ki li-i, ntiŋ i ɲaninkulutɔnbi gbɛbali ki ji manisarinŋ nu, Kirinŋ wɔ Wulujii ki baraka ra.

¹¹ Niŋ Wulujii ki bira, míŋ ji-i wulusunjotɔnŋ fa cindaŋ fa kalimɔɔ ɔ.

¹² Niŋ ki ra, hali míŋ ji ka cɔɔri ka bataa kila-a, niŋ ɲaankwunŋ míŋ pa-a kì, sabu míŋ ńʼgbɛ bili-i konwɔtiŋ sun, míŋ ntiŋ tɔ-i, ŋí i ji bili ǹʼna, ńʼtu ntiŋ cinŋ wɔ̀ biye míŋ gbɛsun, ńʼtu so ntiŋ gbɛ, ntiŋ i niŋ gbɛrinpa, fɔ ŋì i ta so kiti ki kwuru shikaŋ ki sun.

¹³ Míŋ kalinŋ shɔɔrinŋ wɔ̀ wɔri-i miŋ tɛ, ǹʼpaka shɔ bilinabi fa bidintɛbi wu, yibɛɛ i ninwɔ̀ kila-a Yesu Kirisa ra, ŋi i tiri kɛɲɛ ǹʼwu.

¹⁴ Finŋ shɔɔrinŋ wɔ̀ biye-i miŋ gbɛsun, niŋ paka shɔ Ɲiniwɔlinŋ ki wɔ sotinbi ki baraka ra, ninwɔ̀ sɔɔ yibɛɛ ciiru.

Onensifɔri wɔ dariwulutinbi ki

¹⁵ Miŋ ǹʼtɔ-i tu Asi sɔɔta ki ru tɔnŋ kiri bataa arì kaan míŋ tɛ. Fijɛli fa Erimojɛni fɔn i nini fan.

¹⁶ Kirinŋ Onensifɔri wɔ kaniŋ ki sunmakwulupa, sabu ntiŋ cunadi wulu li bi-i míŋ tɛ waarinŋ mwɔɔnna. Ntiŋ ɲaankwun míŋ wu, tu míŋ nkasu ru kì,

¹⁷ nka ntiŋ so-i Ɔrɔmu waarinŋ wɔ̀ ru, ntiŋ míŋ maŋ ceeli-i fɔ ntiŋ i ta míŋ ja.

¹⁸ Ŋuntiŋ ki ncusun Kirinŋ i ntiŋ sunmakwulupa kiti kwuru shikaŋ ki ru. Ntiŋ bi shɔɔrinŋ wɔ̀ri ma-i míŋ tɛ, ŋì i míŋ tu Efɛsi kili ki ru, niŋ tɔri tenŋ fɔni miŋ yɛrima ki sun kì.