Timote (1) 3 - Jɔ Biibili ki

Egilisi jɛntɔnŋ kiri bi ki

¹ Ka wulu ka i sɛli i, tu : « Konwɔtiŋ i egilisi ki jɛnbi ceeli-la, nintiŋ i cinŋ shɔɔrinŋ cɛfan. »

² Niŋ ki ra, egilisi jɛntɔnŋ ki kakan-i ntiŋ i ji koŋ pɔlibali i, shuru wɔ̀ a teli-i awɔ mari ki tɛ, ntiŋ fa a ɲaniŋ bo mari tɔri ru kì, yɛri rasɔɔtɔnŋ i, koŋ ɲakilitiŋ i, ntiŋ i ji koŋ sɔbɛ ɛ, ntiŋ i ji jɛshi shɔɔrinŋ i, ntiŋ i so konaŋ ni kali-i.

³ Ntiŋ fa ji lɔrutɛfɛ walima koŋ fyintiŋ i kì, ntiŋ fa ji kari ceelitɔnŋ i kì, fɔ ntiŋ ji koŋ tɔnsunfilimaan a. Ntiŋ fa ji wari sɔlitiŋ i kì.

⁴ Ntiŋ i so-ri awɔ kaniŋ ki paka shɔ-i, ntiŋ daŋ kiri i ji daŋ ni i, nwɔ̀ri i arì jifinŋ kiri wulu pa-a gbɛbi wu.

⁵ Sabu konwɔtiŋ so-a a yɛri ki wɔ kaniŋ gbɛrinpa-i kì, nintiŋ a so Kirinŋ wɔ konanbi ki gbɛrinpa-i dɔɔkunŋ?

⁶ Ntiŋ fa ji bilinatɔnŋ ŋunaŋ i kì, a niŋ ji-i ntiŋ a so a yɛri ragbɛ-i, kiti ki i fɛɛn ntiŋ sun, miŋ tu ǹʼfɛɛn-ɛ shitaanni sun ɲaan wɔ̀ tɛ.

⁷ Ntiŋ tɔ shɔɔrinŋ i ji bilinabali kiri tɔnŋ na, nwɔma ntiŋ fa ji rufyɛfinŋ i kì, nwɔma shitaanni wɔ daalinŋ ki fa na so ntiŋ fɛ kì.

Jɛntɔnŋ kiri tɛ yentɛtɔnŋ kiri bi ki

⁸ Egilisi ki ru cinŋ matɔnŋ kiri kakan-i kí i ji koŋ sɔbɛ ri i, kí fa ji wulufuulibitɔnŋ ni i kì. Kí fa ji lɔrutɛfɛ ri i kì, niŋ fa daalinŋ na jalinŋ ceelitiiri i kì.

⁹ Sɛli wɔ̀ i kila-a bilinabi ki baraka ra, kí arì da tu niŋ na ciirufɔɔbi wu.

¹⁰ Miŋ kí sunsunu sun, niŋ kɔɔtɛ, a pɔlimaŋ kila kí ra kì, kí i so bo-i egilisi ki ru cinŋ matɔnŋ ni i.

¹¹ Mari wɔ̀ri i jɛntɔnŋ ni i, mìŋ ɲaan tenŋ ki tɛ, nini kakan-i kí i ji mari sɔbɛ ri i, kí fa ji koŋ tɔ bitɔnŋ ni i kì. Kí i arì yɛri paka tɔ-ri, kí i ji kpeeri i, koŋ i bili-la nwɔ̀ri ra bi bataa ra.

¹² Egilisi ki ru cinŋ matɔnŋ ki ji shuru u, nwɔ̀ a teli-i awɔ mari ki tɛ, ntiŋ fa a ɲaninpo koŋ tɔri mari tɛ kì, ntiŋ i a daŋ kiri fa awɔ kaniŋ ki paka shɔ-ri.

¹³ Sabu, nwɔ̀ri i arɔɔ cinŋ ki maka shɔ-a, niŋ kiri a gbɛbi kila arɔɔ jɛnbi ki ru, kí i tɔnnafurubi kila-ri arɔɔ cinŋ ki bi ru Yesu Kirisa bilinabi ki baraka ra.

Sɛli wɔ̀ radu-i Kirinŋ wɔ saa ki ru

¹⁴ Ŋì i míŋ ciiru, ńʼtu ŋì a cin kì, ńʼtu míŋ a ta po miŋ tɛ nmaŋ, nka míŋ i ka sɛbɛ ka wɔri tiri-ra miŋ tɛ sun,

¹⁵ nwɔma hali míŋ na cin tabali, miŋ kakan-i ŋi i nwɔ̀ ma Kirinŋ wɔ konanbi ki faninmwuŋ, ninwɔ̀ i Kirinŋ ɲaninkulutɔnŋ ki wɔ egilisi ki i, miŋ i niŋ tɔ. Niŋ egilisi ki i sɛli ki cɛ sɔɔmaŋ ki fa ǹʼpa tumaŋ ki i.

¹⁶ Aawe, sɛli wɔ̀ radu-i Kirinŋ wɔ saa ki ru, niŋ i bi sinaŋ i, sɔsɔɔlinŋ nwɔ̀ ru kì, niŋ i kaa tu : Kirisa a yɛri ji konanmini i, ŋì i na pwɔkulinŋ sun, Ɲiniwɔlinŋ ki i ǹʼwɔ telibi ki ji, mɛlɛkɛn kiri i ǹʼja. Ǹʼwulu ki i ji sunjo shiya tɔri kiri kanfɛ. Konaŋ kiri i bili ǹʼna juniɲa ki ciiru. Kirinŋ fani i ji ǹʼshi tiri a nɔɔri ki ru.