Ɔrɔmutɔnŋ kiri 3 - Jɔ Biibili ki

Konaŋ kiri bataa pɔli bi ki Kirinŋ ɲaanfɛ

¹ Niŋ ɲaan ki tɛ, nfɛnŋ Yawutu kiri pari-ra shiya pyɛ kiri wu? Sɔɔpeefɛ ki tukulu ǹʼdanwɔ sɛbɛ?

² Sɛli ki ra, ŋi i ji Yawutu u, nafan mwɔɔnna i ǹʼnu. Kirinŋ awɔ wulu ki wɔri-i Yawutu kiri tɛ ǹʼjɔnɔ.

³ Sɛli yɛ, ǹʼbɛɛ ri kɔniŋ ji-i kí ru, nwɔ̀ri ji-i dariwulu bali li i. Nka ábɛɛ ǹʼbi-a dɔɔkunŋ? Nini wɔ dariwulubalibi ki a Kirinŋ wɔ dariwulutinbi ki li wa?

⁴ Aayi dɛ! Yi bataa ka tɔ tu : hali konanmini kiri bataa ji purubitiiri i, Kirinŋ i sɛlitiŋ i, miŋ tu ǹʼsɛbɛ-i Kirinŋ wɔ wulu sɛbɛ kiri ru ɲaan wɔ̀ tɛ tu : « Miŋ kakan-i ŋi i tɔ koŋ telimaan a nʼdariwulu ki ra, niŋ fa, a kiti ki ji-a kwuru miŋ sun, ŋi i jii kila. »

⁵ Nka, a yibɔɔ telibalibi ki ji Kirinŋ wɔ telibi ki ji-a, yi a ǹʼbi dɔɔkunŋ sa? A Kirinŋ ji awɔ tɔnkwulu ki fɛɛn-na yibɛɛ sun, niŋ i ǹʼji-a tu Kirinŋ telimaan i kì wa? Míŋ wulu ki bi-a konanmini wɔ bika ra.

⁶ Aayi dɛ! A Kirinŋ ji wuru teli-li kì, ǹʼwuru-ra juniɲa ki kiti dɔɔkunŋ?

⁷ Walima ǹʼbɛɛ ra so ǹʼbi-i sɛbɛ tu : « A mɔ́ɔ́n puru ki ji Kirinŋ wɔ sɛli ki jika shɔ-a, fɔ niŋ i nɔɔri bili-li Kirinŋ sun, nfɛnŋ na kiti ki i ji faa fɛɛn-na míŋ sun tu míŋ bijɛmatɔnŋ i? »

⁸ Ǹʼtɔri ri ra so ta-i jɛŋ kí i ǹʼbi tu : « Yi bijɛ ki ma, nwɔma bi shɔɔrinŋ i po ǹʼnu. » Ǹʼbɛɛ ri i míŋ tɔ li-a tu míŋ niŋ kalinŋ kwuru ki wɔri-ra konaŋ ki tɛ. Kiti ki kakan-i ŋì i fɛɛn niŋ koŋ kwuru kiri sun.

Koŋ dantenŋ telimaan i kì

⁹ Aawe, yi a nfɛnŋ bi sa? Yibɛɛ Yawutu kiri, yibɛɛ pari-i koŋ pyɛ kiri wu wa? Aayi dɛ! Míŋ ǹʼji-i kɔ tu Yawutu kiri fa shiya tɔri kiri bataa bijɛmatiiri i Kirinŋ ɲaanfɛ.

¹⁰ Miŋ tu Kirinŋ wɔ wulu sɛbɛ ki i ǹʼbi-a ɲaan wɔ̀ tɛ tu : « Koŋ telimaan dantenŋ nmaŋ kì, hali koŋ tenŋ pe.

¹¹ Ɲakilitiŋ dantenŋ nmaŋ kì, koŋ dantenŋ Kirinŋ ceeli-la kì.

¹² Kí bataa fɔnimaan yɛ, kí saa shɔɔrinŋ ki pani-i arìmaŋ fan. Koŋ tɔri tenŋ bi shɔɔrinŋ ma-a kì, hali koŋ tenŋ pe.

¹³ Kí wɔlɔkɔta kiri i miŋ tu saali ta rawwulumaan ni, kí i arì nɛninɛŋ kiri sɔɔ-ri, kí i konaŋ ki fɔni-ni, kí tɔnŋ na wulu ki i juu, miŋ tu fɔnfɔniŋ baa.

¹⁴ Kí daru ki faa-a danka ra wulu kiri fa wulu jɛ kiri ra.

¹⁵ Kí kansunkwulu-i koŋ kilɛn ki ra.

¹⁶ Kí de saa ki bataa faa-a bi limaan ki fa bɔni ki ra.

¹⁷ Ɲaanfɛfili saa ki i nwɔ̀, kí niŋ tɔ-a kì.

¹⁸ Kirinŋ jɛŋ kɛmi dantenŋ kí ru kì. »

¹⁹ Yi i ǹʼtɔ tu sariya ki finŋ woo finŋ ǹʼbi-a tu niŋ i bili-la kpeeri sun, nwɔ̀ri i sariya ki fɛ. Ŋì i ninkunŋ, nwɔma wulu fa kila koŋ tɔri tenŋ daru kì, niŋ fa juniɲa nu tɔnŋ ki bataa i ji koŋ pɔlimaan ni i Kirinŋ ɲaanfɛ.

²⁰ Niŋ ɲaan ki tɛ, konanmini dantenŋ a jii kila Kirinŋ gbɛ awɔ sariya ki rasɔɔ ki baraka ra kì, sabu sariya ki i ncin-a konanmini i bijɛ ki tɔ.

Konanmini mwuka ɲaan ki Kirinŋ gbɛ

²¹ Nka dɔnsaŋ, Kirinŋ i konanmini ji-a koŋ telimaan a a ɲaanfɛ ɲaan wɔ̀ tɛ, ŋì niŋ ji-i. Sariya ki rasɔɔ ki wɔ finŋ tɔri tenŋ niŋ na kì. Musa wɔ sariya ki fa Kirinŋ wɔ cintɔnŋ kiri niŋ sunjo wuru-i.

²² Koŋ finŋ woo finŋ bili-i Yesu Kirisa ra, nini bataa i koŋ telimaan ni i Kirinŋ ɲaanfɛ arɔɔ bilinabi ki baraka ra, ŋì koŋ san-a koŋ nu kì.

²³ Sabu konanmini bataa bijɛ ma-i, ninki i ncin koŋ tɔri dantenŋ so-a Kirinŋ nɔɔritiŋ ki ja-i kì.

²⁴ Nka, Kirinŋ wɔ shɔɔrinŋ ki baraka ra, ŋì i konanmini ji-a koŋ telimaan a, a ɲaanfɛ ǹʼmaan a, sabu Yesu Kirisa kí ŋunsan-i arɔɔ bijɛ kiri bira.

^25-26 Kirinŋ mìntiŋ ji-i saraka a. Koŋ wɔ̀ri bili-i niŋ saraka ki ra, ŋì nini wɔ bijɛ kiri wu san-i kí ra ntiŋ wu. Kirinŋ niŋ ma-i, ŋì i ǹʼji tu afinŋ telimaan a. Sabu waarinŋ fwuudemaan kiri ra, ǹʼwɔ tɔnsunfili ki baraka ra, ŋì i konanmini kiri wɔ bijɛ kiri kɔni kiri sali-li kì. Nka dɔɔ, Kirinŋ ǹʼji-i tu afinŋ telimaan a, ŋì i ɲaan wɔri konanmini tɛ, ntiŋ i ji koŋ telimaan a a ɲaanfɛ, a ntiŋ bili Yesu Kirisa ra.

²⁷ Yɛri ragbɛ ŋuŋ i faa konanmini na wa? Aayi, niŋ wulu nmaŋ kili kì. Nfɛnŋ na? Sabu finŋ wɔ̀ i koŋ ji-a koŋ telimaan a Kirinŋ ɲaanfɛ, niŋ i ntiŋ wɔ sariya ki rasɔɔbi ki i walima ntiŋ mabi ki i kì, duu ntiŋ wɔ bilinabi ki.

²⁸ Yibɛɛ i wulu wɔ̀ sunjo-a, niŋ i kaa tu : Konanmini ji-a koŋ telimaan a Kirinŋ ɲaanfɛ sariya ki rasɔɔ bira kì, duu bilinabi ki baraka ra.

²⁹ Kirinŋ i Yawutu kiri bantenŋ wɔ Kirinŋ i wa? Shiya pyɛ kiri wɔ Kirinŋ i sɛbɛ kì wa? Aawe, shiya bataa wɔ Kirinŋ yɛ sɛbɛ,

³⁰ sabu Kirinŋ i tenŋ pe e. Mìŋ tenŋ pe ki i Yawutu kiri ji-ri koŋ telimaan ni i a ɲaanfɛ bilinabi ki baraka ra, ŋì i shiya pyɛ kiri bataa ji-ri koŋ telimaan ni i a ɲaanfɛ bilinabi ki baraka ra sɛbɛ.

³¹ A yibɛɛ ǹʼbi tu Kirinŋ konanmini ji-a koŋ telimaan a a ɲaanfɛ bilinabi ki baraka ra, niŋ i ǹʼji-a tu yibɛɛ sariya ki ciriki san-a nmaŋ wa? Aayi dɛ! Yibɛɛ i sariya ki tukulu ki yɛrima ki wɔri-ra ǹʼtɛ.