Ɔrɔmutɔnŋ kiri 1 - Jɔ Biibili ki

Pooli wɔ coolinŋ ki

¹ Míŋ Pooli wɔ̀ i Yesu Kirisa tɛ baara matɔnŋ i, Kirinŋ i ji míŋ dɔri ji cindaŋ i, tu ŋí awɔ Wulujii ki sunjo, mínki i ka sɛbɛ ka wɔri ta-a ábɛɛ tɛ.

² Kirinŋ a tɔnŋ wɔri wuru awɔ Sɛbɛ wɔlinŋ kiri ru, niŋ Wulujii ki bira kabi fɔlɔfɔlɔ, awɔ cintɔnŋ kiri tɔnŋ na.

³ Danshuru tenŋ pe wɔ̀ po-i Kirinŋ nu, niŋ Wulujii ki i wulubi-a niŋ bi sun, ninwɔ̀ ji-i masa Dawuda nupo gbɛ, ŋì i kɛɲɛ konanminibi ɲaan ki wu.

⁴ Nka ŋì i kɛɲɛ Ɲiniwɔlinŋ ki ɲaan ki wu, ntiŋ ŋmɛni po sanmaan ki konkwuu kiri kanfɛ, niŋ ǹʼji-i sotinbi wu, tu ntiŋ Kirinŋ Danshuru ki i. Mìntiŋ ki i Yesu Kirisa a, yibɛɛ Ŋuntiŋ ki i.

⁵ Mìntiŋ ki bira, Kirinŋ shɔɔrinŋ ma-i yibɛɛ tɛ, ŋì i yi ji cindaŋ ni i, nwɔma yi i ye shiya kiri bataa tɛ, kí i a gbɛ, kí i bili a ra.

⁶ Kirinŋ ábɛɛ wɔ̀ri dɔri ji-i Yesu Kirisa wɔ konanbi ki i, ábɛɛ wuru niŋ shiya kiri bɛɛ ri i.

⁷ Ńʼtindaŋ byii ri, Kirinŋ ábɛɛ wɔ̀ri dɔri-i, á i ji ǹʼwɔ konanbi Ɔrɔmu kili ki ru, míŋ i ka sɛbɛ ka wɔri ta-a ábɛɛ bataa tɛ. Yi Tiŋ Kirinŋ fa yi Ŋuntiŋ Yesu Kirisa shɔɔrinŋ fa ɲaanfɛfili wɔri á tɛ.

Pooli fa Ɔrɔmu bilinatɔnŋ kiri bi ki

⁸ Míŋ a ǹʼtɔnpa, ŋí i coolinŋ wɔri ńʼwɔ Kirinŋ ki tɛ Yesu Kirisa baraka ra ábɛɛ bataa bira, sabu ábɔɔ bilinabi ki wulu ki i bi-a juniɲa mani ki bataa ru.

⁹ Míŋ baara ki ma-a Kirinŋ wɔ̀ tɛ ńʼciiru tɔnŋ ki bataa wu, ŋí i ǹʼDanshuru ki Wulujii ki sunjo-ri, niŋ Kirinŋ ki i míŋ shɛɛri ki i, tu míŋ ńʼɲakili tu-a ábɛɛ bira ńʼwɔ rafɛ kiri bataa ru.

¹⁰ Míŋ i ǹʼnafɛ-a waarinŋ bataa ru ńʼtu, a ninki ji ǹʼdintɛ bi ki i, ńʼtu ŋì i ɲaan wɔri míŋ tɛ, ŋí i ta po ábɛɛ tɛ nmaŋ.

¹¹ Ábɛɛ ja tɔ ki i míŋ nu haali, nwɔma ŋí i Ɲiniwɔlinŋ ki wɔ kafinŋ kiri bɛɛ ri raso ábɛɛ sun, á i baraka kila bilinabi ki ru.

¹² Bika ɲaan tɔri tɛ, yi i so yimaŋ cunadi-i bilinabi ki ru, ábɛɛ fa míŋ, yibɛɛ dɛbɛ-i ninwɔ̀ sun.

¹³ Míŋ tindaŋ ni, míŋ i ǹʼtɛ ábɛɛ i ǹʼtɔ tu míŋ ábɛɛ tɛ po ki gbɛbili kaan mwɔɔnna, nwɔma ńʼwɔ baara ki mwɔɔn i ja ábɛɛ kanfɛ, miŋ tu ǹʼja-i shiya pyɛ kiri kanfɛ ɲaan wɔ̀ tɛ, nka tu ŋì i na so dɔnsaŋ sun, míŋ so ǹʼsaa ki kila-i sun kì.

¹⁴ Koŋ bataa wɔ kɔni i míŋ na, sabu míŋ kakan-i ŋí i Wulujii ki sunjo Girɛki kiri fa shiya tɔri kiri tɛ, niŋ fa koŋ kalimaan kiri fa koŋ kalibali kiri tɛ.

¹⁵ Niŋ ki ra, míŋ tɔnnabi yɛ kusɛbɛ, ŋí i ta Wulujii ki sunjo ábɛɛ tɛ sɛbɛ, ábɛɛ wɔ̀ri i Ɔrɔmu kili ki ru.

Wulujii ki wɔ sotinbi ki bi ki

¹⁶ Míŋ ɲaankwun-a Wulujii ki wu kì, sabu Kirinŋ wɔ sotinbi ki yɛ. Nwɔ̀ri bili-i ǹʼna, ŋì i nini mwu-a niŋ sotinbi ki baraka ra, ŋì i tɔnpa Yawutu kiri sun, nini kɔɔtɛ, ŋì i so shiya pyɛ kiri sun.

¹⁷ Wulujii ki i nwɔ̀ ji-a, niŋ i kaa tu : Kirinŋ konanmini kiri shɛɛli-la ǹʼtelimaan ni i, a kí bili ǹʼna. Niŋ telibi ki i kila-a bilinabi ki sababu ra, miŋ tu ǹʼsɛbɛ-i Kirinŋ wɔ wulu sɛbɛ kiri ru ɲaan wɔ̀ tɛ tu : « Koŋ telimaan ki a awɔ ɲaninkulutɔnbi ki ma bilinabi ki baraka ra. »

Juniɲa nu tɔnŋ kiri wɔ telibali bi ki Kirinŋ ɲaanfɛ

¹⁸ Sɛli ki ra, koŋ wɔ̀ri Kirinŋ gbɛ-a kì, kí i arɔɔ telibalibi kiri sɔɔ-ri, kí i ǹʼwɔ sɛli ki radu-ri, Kirinŋ awɔ tɔnkwulu ki ji-i nini bataa wu, ŋì i po kirinpɔli ki ra.

¹⁹ Sabu bi wɔ̀ a so ɲaantɔ-i Kirinŋ bi ki ru, niŋ fɔɔmaan yɛ kíbɛɛ tɛ, Kirinŋ yɛrima ki yìrì ji-i kí wu.

²⁰ Sɛli ki ra, kabi juniɲa cɛtu ki sun, konanmini kiri i so-a Kirinŋ wɔ bi jabali kiri ja-i fɛrifɛri, nini wɔ̀ri i ǹʼwɔ sotinbi kɔbali ki fa ǹʼwɔ kirinbi ki i. Nini ɲaan i tɔ-a ǹʼwɔ baara mamaan ki mwɔɔn tɛ. Niŋ ki ra, sɛli kilamaŋ kí gbɛ kì.

²¹ Sabu kí Kirinŋ tɔ-i, nka niŋ fa a fɔn na, kí arì tu kí i ǹʼgbɛ miŋ tu Kirinŋ i kì, kí fani baraka bi ǹʼtɛ kì. Kí ciiru ɲakili kwuu kiri kí fɔni-i, mancinŋ ki i a la kí ciiru ɲakili kiri sun.

²² Kí i arì yɛri ji-a ɲakilitiŋ ni i, nka ɲakili bali li yɛ.

²³ Kí waarinŋ bataa ru Kirinŋ ɲaninkulutɔnŋ nɔɔritiŋ ki gbɛrama ki tɔnbo-i. Kí i konanmini gbansanŋ wɔ̀ a beeni, niŋ fa ɲaannaanŋ ni fa kanpyiirantinfinŋ ni fa cɛɛnkunsunfinŋ ni miniŋ ni gbɛ-ri.

²⁴ Niŋ ki ra, Kirinŋ i kí tu nɔɔkɔnɔbi ki ru, ŋì i kɛɲɛ kí dintɛ bi jɛ kiri wu, fɔ kí i bi ri ma-ni, nwɔ̀ri i kí firi kiri rufyɛ-a arìmaŋ kanfɛ.

²⁵ Sɛli ki ra, nwɔ̀ i Kirinŋ wɔ sɛli ki i, kí niŋ nucini-i puru ra, kí i Kirinŋ wɔ finŋ pomaan kiri gbɛ-ri, nka kí dumiŋ niŋ finŋ kiri potɔnŋ Kirinŋ ki gbɛ-a kì. Niŋ Kirinŋ ki kakan-i ŋì i gbɛ waarinŋ bataa ru. Amiina!

²⁶ Niŋ ki ra, Kirinŋ i kí tu arì sɔli jɛ ki ru, ninwɔ̀ i ɲaankwunŋ na bi i. Kɔ́ɔ́ mari kiri i arì kaan-ni arì bili arɔɔ shuru kiri wu, kí i bi mabali li ma-ni arìmaŋ faninmwuŋ.

²⁷ Mìŋ ɲaan tenŋ ki tɛ, shuru kiri mari ri bili-la kili kì. Kí kaashi shuru ri tɔ i kwulu-la kí ra, kí i ɲaankwunŋ na bi ri ma-ni arìmaŋ faninmwuŋ. Niŋ ɲaan ki tɛ, kíbɛɛ arì sali ki kila-i, ŋì i kɛɲɛ arɔɔ fɔni ki wu.

²⁸ Kí ǹʼceeli arì i Kirinŋ tɔ kì, niŋ ki ra, Kirinŋ i kí tu arɔɔ ɲakilila jɛ kiri wu, fɔ kí i mabali bi kiri ma-ni.

²⁹ Kí ciiru kiri faa-a telibalibi kwuru ki bataa ra. Kí i bi kulinŋ ma-a, kí i ji koŋ juumaan fyikatiŋ ni i, kí ɲaanna i juu-u. Koŋ kilɛn ki di-i kí tɛ, niŋ fa kari ki, fa daalinŋ ki. Kí sɔŋ i juu-u, kí i puru ye-ri arìmaŋ wu.

³⁰ Koŋ tɔ litiiri yɛ, Kirinŋ ɲa ni, nwɔ̀ri ɲaankwun-a kì, kí i arì yɛri ragbɛ-ri, niŋ fa kí i arì yɛri rakali-li. Kí cunadi-i bi kulinŋ ma ki ra kusɛbɛ, kí arì jifinŋ kiri wulu pa-a kì.

³¹ Koŋ ɲakili bali dariwulu bali li yɛ, bi kí ŋununsuntiri-ra kì, niŋ fa kí koŋ sunmakwulu pa-a kì.

³² Ka bataa ciiru, kí i ǹʼtɔ-ri nmaŋ cɛcɛ tu Kirinŋ wɔ kiti ki fɛɛn-na ka koŋ kwuru kari sun, tu kí fa beŋ ki kakan. Niŋ fa a fɔn na, kí tu-a niŋ bi kulinŋ kiri bishi ki ma ki sun kì, fɔ kí i tu-ri ǹʼmatɔnŋ kiri cɛru.