Filipitɔnŋ kiri 4 - Jɔ Biibili ki

Pooli wɔ racinwulu kiri

¹ Niŋ ki ra, míŋ tindaŋ byii ri, ábɛɛ wɔ̀ri ja tɔ i míŋ nu, niŋ fa ábɛɛ wɔ̀ri i míŋ ciirudi ŋuŋ ki fa míŋ ŋununfɛshi ŋuŋ ki i, ńʼwɔ wɔshuru ri, á á cɛrukɔli tu ka ɲaan ka tɛ Ŋuntiŋ ki wɔ saa ki fan.

² Míŋ i ǹʼceeli-la Efodi fa Sɛtisi gbɛ, tu kí ǹʼma Ŋuntiŋ ki bira, kí i fu tenŋ sun.

³ Minwɔ̀ ji-i míŋ baara mashi sɔbɛ ɛ, míŋ i miŋ nafɛ-a, tu a ye kí tɛ, sabu kí yɛrima kiri yɛli-i míŋ fan Wulujii ki baara ki ra, ŋì i bo Kilema fa yi dɛbɛshi pyɛ kiri bataa sun, nini wɔ̀ri tɔ kiri i ɲaninkulutɔnbi sɛbɛ ki ru.

⁴ Á á ciirudi waarinŋ bataa ru Ŋuntiŋ ki bira. Míŋ a ńʼpwulu ǹʼsun sɛbɛ, á á ciirudi.

⁵ Á ncusun konaŋ kiri bataa i áwɔ tɔnsunfili ki tɔ, sabu Ŋuntiŋ ki myɛ-ɛ.

⁶ Á fa á gbɛɛratɛɛ finŋ tɔri tenŋ bira kì, nka finŋ woo finŋ bi i ábɛɛ ra, á niŋ bataa ceeli Kirinŋ gbɛ. Á baraka bi ǹʼtɛ, finŋ woo finŋ bi i ábɛɛ ra, á i niŋ nafɛ ǹʼgbɛ.

⁷ A niŋ ma, Kirinŋ wɔ ɲaanfɛfili wɔ gbɛ-i konanmini wɔ tɔbi sun, ninki a na ncusun ábɛɛ ciiru ki fa á ɲakili ki bataa i tu Yesu Kirisa wɔ tenbi ki ra.

⁸ Niŋ bataa kɔɔtɛ, míŋ tindaŋ ni, finŋ woo finŋ i sɛli i, gbɛbi i finŋ woo finŋ nu, finŋ woo finŋ teli-i, finŋ woo finŋ fɔɔ-ɔ, finŋ woo finŋ di-i Kirinŋ tɛ, finŋ woo finŋ tɔ shɔɔrinŋ po-i, finŋ woo finŋ shɔ-i niŋ fa tɔ shɔɔrinŋ i kila-a finŋ woo finŋ nu, á á ɲakili tu niŋ finŋ kiri bataa ra.

⁹ Míŋ ábɛɛ kini-i bi wɔ̀ri ra, niŋ fa ábɛɛ mabi wɔ̀ri kila-i míŋ gbɛ, niŋ fa ábɛɛ bi wɔ̀ri rama-i míŋ tɔnŋ na, á i ńʼja nwɔ̀ri ma-a, á nini ma-ni. A ábɛɛ niŋ ma, Ɲaanfɛfilitiŋ Kirinŋ ki a ji ábɛɛ fan.

Pooli wɔ coolinŋ ki Filipitɔnŋ kiri tɛ arɔɔ kafinŋ ki bira

¹⁰ Míŋ i ńʼyoori-ra Ŋuntiŋ ki baraka ra kusɛbɛ, sabu ábɛɛ ǹʼji-i míŋ wu dɔɔ, tu ábɛɛ ra á ɲakili tu míŋ na sɛbɛ. Niŋ ɲakilila ki wuru ábɛɛ gbɛ nmaŋ sun, nka ábɛɛ maka ɲaan kila-ri ǹʼna sun kì.

¹¹ Míŋ ka bi-a ábɛɛ tɛ, ŋí i ńʼwɔ gbɛwɔbi wulu bi-ri á tɛ kì dɛ! Niŋ i kì, sabu mɔ́ɔ́n kila ki ji ɲaan woo ɲaan tɛ, niŋ i míŋ pyii-ra. Míŋ ńʼyɛri kini-i niŋ na.

¹² Míŋ gbɛwɔ i woo, walima míŋ gbɛ faamaan i woo, míŋ ńʼyɛri paka tɔ-i ǹʼfɔn nu. Ɲaan bataa tɛ, miŋ tu míŋ pyii-i woo, bɛɛ míŋ wu woo, míŋ i ǹʼbataa ɲaantɔ-a. Ŋi i ji fintiŋ i walima ŋi i ji gbɛwɔ ɔ woo, míŋ ńʼkini-i ǹʼbataa ra.

¹³ Míŋ i so-a bi bataa ra Kirisa bira, ninwɔ̀ i so ki wɔri-ra míŋ tɛ.

¹⁴ Niŋ fa a fɔn na, á ǹʼtɔ tu ábɛɛ bi shɔɔrinŋ ma, á i áwɔ lu shi mɔ́ɔ́n yɛlinŋ ki ru.

¹⁵ Míŋ tindaŋ Filipitɔnŋ ni, ábɛɛ yɛrima kiri ǹʼtɔ-i, tu kabi Wulujii ki sunjorama ki tɔnpa waari ki ru míŋ gbɛ, míŋ i po san Maseduwanɛ sɔɔta ki ru, tu bilinatɔnŋ kwuru tɔri tenŋ ye míŋ tɛ a gbɛfɛfinŋ wu, kí i mɔ́ɔ́n cinŋ ki nafan kila kì. Ábɛɛ bantenŋ ǹʼma-i.

¹⁶ Ŋì i míŋ tu Tesaloniki kili ki ru, ábɛɛ yentɛfinŋ ni wɔri ta-i míŋ tɛ, fɔ kaan fuuli.

¹⁷ Ŋì i miŋ tu míŋ ńʼkafinŋ ceeli-la ábɛɛ gbɛ kì dɛ! Nka míŋ i nwɔ̀ ceeli-la, niŋ i tu ábɔɔ bi shɔɔrinŋ mamaan ki sali ki mwɔ.

¹⁸ Finŋ woo finŋ bi wuru míŋ na, míŋ yìrì bataa kila-i, ŋí i ji fintiŋ i. Kabi Epaforoditusi na-i yìrì wɔri míŋ tɛ, míŋ ńʼgbɛ faa-a, fɔ ŋì i fwuu a daŋ ki sun. Yìrì ji-i miŋ tu saraka shɔɔrinŋ, nwɔ̀ kini di-i Kirinŋ tɛ.

¹⁹ Mɔ́ɔ́n Kirinŋ ki a na ábɛɛ makufinŋ kiri bataa wɔri á tɛ, ŋì i kɛɲɛ ǹʼwɔ fintinbi rafaamaan ki wu Yesu Kirisa baraka ra.

²⁰ Yi Tiŋ Kirinŋ tɔ ki gbɛ waarinŋ bataa ru. Amiina!

Pooli wɔ coolinŋ nakɔɔra ki Filipitɔnŋ kiri tɛ

²¹ Wɔlinŋ finŋ woo finŋ i nmaŋ Yesu Kirisa baraka ra, á ńʼwɔ coolinŋ ki wɔri ǹʼfɔn tenŋ tenŋ tɛ. Tindaŋ wɔ̀ri i míŋ fan kwumaŋ, nini bataa i ábɛɛ co-a.

²² Kirinŋ wɔ wɔlinŋ kiri bataa i ábɛɛ co-a, nka nwɔ̀ri i Masa Sensaari wɔ kaniŋ ki sun, nini i ábɛɛ co-a kusɛbɛ.

²³ Ŋuntiŋ Yesu Kirisa awɔ shɔɔrinŋ ki ma á tɛ.