Filipitɔnŋ kiri 3 - Jɔ Biibili ki

Telibi sɔbɛ ki Kirinŋ ɲaanfɛ

¹ Ńʼtindaŋ ni, á á ciirudi á fa Ŋuntiŋ ki wɔ tenbi ki bira. Míŋ a yɛli niŋ bi kiri sɛbɛ wɔri ta ki ra ábɛɛ tɛ, ŋí i ńʼpwulu-li yìrì sun kì, yìrì ra ábɛɛ gbɛrinpa.

² Á á yɛri paka tɔ bi kulinŋ matɔnŋ kiri kɛlina, nini wɔ̀ri i miŋ tu kwuu ri, kí i sɔɔpeefɛmaanna gbansanŋ ki ji-ri bi sinaŋ i.

³ Sabu, yibɛɛ wɔ̀ri i Kirinŋ gbɛ-a Ɲiniwɔlinŋ ki baraka ra, yibɛɛ kiri i kpeeri i, nwɔ̀ri sɔɔ-ɔ peefɛ sɛlɛsɛli ki ra. Yibɛɛ yi yɛri ragbɛ-a konanmini wɔ baara mamaan wu kì, nka Yesu Kirisa bi wɔ̀ ma-i yibɛɛ tɛ, yibɛɛ i yi ragbɛ-a niŋ wu.

⁴ A koŋ ji wuru so-a a ragbɛ-i a yɛri ki mabi wu, míŋ yɛri ki wuru-ra ńʼnagbɛ ŋuŋ kila ńʼyɛri wu ńʼmabi kiri ra. A koŋ pyɛ kiri ji ǹʼmiiri-ra tu ragbɛ ŋuŋ arìbɛɛ gbɛ, ǹʼyɔ míŋ gbɛ ŋì i fwuu kí bataa sun.

⁵ Sabu, míŋ ji ki sunŋ fulupɔnɔtɔnŋ ki, kí míŋ sɔɔpeefɛ, ŋí i ji Isirayɛli nupo ki bɛɛ ɛ. Míŋ po-i Bɛnyamɛŋ wɔ konanbi ki ru, ŋí i ji Iburu sɛlɛsɛli yɛrima ki i. Ŋì i bo niŋ bataa sun, Yawutu kiri wɔ sariya ki kɛlintɛ, míŋ wuru Farinsiyɛnŋ ki bɛɛ ɛ.

⁶ Míŋ cɛrukɔli wuru niŋ na, fɔ ŋí i egilisidaŋ kiri ɲaanfɛkwulu-li. Míŋ Yawutu kiri wɔ sariya ki pa wuru ɲaan wɔ̀ tɛ, koŋ wuru pɔlimaŋ ja-a míŋ na niŋ bi ru kì.

⁷ Míŋ wuru tɔnɔ kila-a niŋ bi kiri finŋ woo finŋ nu fɔlɔfɔlɔ, dɔnsaŋ, Yesu Kirisa bira, nini bataa ji-i bi tawɔ ri i, míŋ ɲaanna.

⁸ Sɛli ki ra, finŋ bataa i míŋ gbɛ ǹʼtawɔ ɔ, Kirisa bi ki bira. Míŋ ńʼkaan-a finŋ pyɛ kiri bataa tɛ, ŋí i yìrì ji miŋ tu shinŋ sun jɛ ri i, nwɔma ŋí i ńʼŊuntiŋ Yesu Kirisa tɔ,

⁹ niŋ fa míŋ fa ntiŋ i ji yimaŋ fan. Míŋ ńʼwɔ telibi ki ceeli-la ńʼwɔ sariya ki rasɔɔ ki baraka ra kili kì, nka míŋ i ǹʼkila-a, sabu míŋ bili-i Kirisa ra. Niŋ telibi ki i po-a Kirinŋ yɛrima ki ru, sabu míŋ bili-i ǹʼna.

¹⁰ Míŋ i finŋ wɔ̀ ceeli-la, niŋ i kaa : ŋí i Kirisa tɔ, sotinbi wɔ̀ ntiŋ ŋmɛni-i, ŋí i niŋ tɔ, ŋí i ńʼwɔ lu kila ntiŋ wɔ ɲaanfɛkwulu ki ra, ŋí i ji ntiŋ bishi i, hali beŋ ki ra,

¹¹ nwɔma a ǹʼji ɲaan woo ɲaan tɛ, míŋ yɛri ki i na ŋmɛni po san konkwuu kiri ru.

Banbabi ki fɔ ŋì i ta so ǹʼdaŋ ki ra

¹² Míŋ ǹʼtɛ ŋí i ǹʼbi, ńʼtu míŋ so ǹʼdaŋ ki ra, walima ńʼtu míŋ nafaamaan i kì dɛ! Nka míŋ i faa ńʼwɔ bili ki ra, nwɔma ŋí i ńʼbanba, ŋí i jali ki kila, sabu Kirisa míŋ kila ji-i awɔ kɔ.

¹³ Míŋ tindaŋ ni, míŋ ǹʼtɛ ŋí i ǹʼbi, ńʼtu míŋ nafaamaan i kì dɛ! Nka míŋ i bi tenŋ ma-a : míŋ i ńʼɲakili san-a ńʼwɔ bi mamaan fwuudemaan kiri sun, ŋí i cɛɛn-ni ńʼfaan ki bataa wu ńʼjɛŋ bi kiri cɛfan.

¹⁴ Míŋ i niŋ bili ki tan-a ńʼɲaniŋ i ji ńʼbili ŋuŋ ki ra, nwɔma ŋí i jali kila, Kirinŋ yibɛɛ dɔri-i ninwɔ̀ bira kirinpɔli ki ra Kirisa sababu ra.

¹⁵ Yibɛɛ wɔ̀ri Kirisa wɔ saa ki ɲaantɔka shɔ-i, yibɛɛ bataa kakan-i yi ɲakilila ki i ji niŋ i. A ɲakilila tɔri ji ábɛɛ bɛɛ ri gbɛ ka mani ka bi sun, Kirinŋ yɛrima ki a ǹʼfɔɔ ábɛɛ tɛ.

¹⁶ A ǹʼji ɲaan woo ɲaan tɛ, yibɛɛ so-i tumaŋ wɔ̀ ru, yi i yi banba, yi i tiri kɛɲɛ niŋ wu.

¹⁷ Míŋ tindaŋ ni, á bataa ji míŋ nakitiiri i. Ábɛɛ tirikanŋ wɔ̀ ja-i yibɛɛ gbɛ, koŋ wɔ̀ri i tiri kɛɲɛ-a niŋ wu, á nini shɛɛli, á i kí raki.

¹⁸ Míŋ ka bi-i ábɛɛ tɛ kaan mwɔɔnna kɔ, nka míŋ a ńʼpwulu ǹʼsun ɲaannaju wu dɔɔ, ńʼtu koŋ mwɔɔnna wɔ ɲaninkulutɔnbi ki maka ki ǹʼji-a, tu kí Kirisa kpinkpisuu ki ɲa ni i.

¹⁹ Niŋ koŋ kiri rakɔɔra a bɔni. Kí wula ki i kɔ́ɔ́ Kirinŋ ki i. Kí i arì ɲaankwunbi kiri ji-a arì yɛri ragbɛ bi ri i. Kí ɲakili ki bataa i ka juniɲa ka ru finŋ kiri bantenŋ sun.

²⁰ Nka, nwɔ̀ i yibɛɛ, yibɛɛ i kirinpɔlila Masabi ki daŋ ni i, yi i ji yi Mwutɔnŋ ki, Ŋuntiŋ Yesu Kirisa na ki sunsuu-ra, ntiŋ i po nmaŋ.

²¹ Ntiŋ a na yibɛɛ firi baraka bali ki ji firi i, ntiŋ wɔ nɔɔri ki bishi i nwɔ̀ sun. Ntiŋ a na niŋ ma, ŋì i kɛɲɛ ntiŋ wɔ sotinbi ki ɲaan ki wu, niŋ sotinbi wɔ̀ i ncusun-a ŋì i finŋ kiri bataa kulu awɔ faan ki fɛ.